ဒး၊ ဗၠေတ်
မ္ၚဵုရအဴ။ ဒုၚ်တၠုၚ်ဏာ နူကဵုအစဳဇန်ဒးဗၠေတ် သြၚ်လောန်တိုၚ်(မ်) ပိုယ်တံရအဴ။ ကြဴနူဒပ်ပၞာန်သီအဝဵုတုဲ စပ်ကဵုပရေၚ်ချဳဒရာၚ် ပၠန်ဂတးညးဍုၚ်ကွာန်တံတုဲ ပရိုၚ်ဗၠေတ်၊ ပရိုၚ်ဒး မပြးထၞာန်ဒၟံၚ် လ္တူဇာဇၞိက်ပရေၚ်မၞိဟ်တံဂှ် နူကဵုအစဳဇန်ဒးဗၠေတ် သြၚ်လောန်တိုၚ်(မ်) ပိုယ်တံဏံ စၟဳစၟတ်ကဵုအာဏောၚ် မဒှ်ရ။
တ္ၚဲဏံ ပရူပရာမပါလုပ် ပ္ဍဲကဵုဗီုဓာတ် ရဲထံက်ဂလာန်ဒပ်ပၞာန်တံ မတြးဒၟံၚ် “လၟေၚ်ဒဒှ်သၞေဟ်ကၚ်စၟဳတ် ဒဒန်သၚ်လောန်(ဘာအၚ်) ဗ္တိုဟ်ထ္ကးဂှ်ဝွံ ဒှ်ပွဗ္တိုက်ဗ္တိုဟ်ထ္ကးဗုမ် ကုရဲကၠုၚ်စိုပ်လ္ၚောဝ်ကျာ် သ္ဘၚ်ကျာ်က္ဍိုပ်သ္ကိုပ်ပၞာန် ပ္ဍဲနေဗျဳဒဝ်တေံရောၚ်” သာ်ဝွံ ချူတြးလဝ်ဂှ် စၟဳတ်ဂွံဆဵုကေတ်ရ။
ပရူပရာဏံဂှ် ပ္ဍဲဂိတုဂျူလာၚ် (၃၀) ကဵု (၃၁) တေံ ချူတြးလဝ်ဝါဒ ပ္ဍဲကဵုအောန်လာၚ် နူကဵုထလဳဂရာမ်ချာန်နေဝ် DGF21 NEWS, Ba Nyunt, Han Nyein Oo ကေုာံ We Love Myanmar, မျဵုချေတ်တံ မဒှ်ရ။
စပ်ကဵုပရူပရာ မပါလုပ် ပ္ဍဲပသ်ထ် ကေုာံ ဗီုဓာတ် အကံက်ပ္တောံရဲထံက်ဂလာန်ဒပ်ပၞာန်တံ မတြးဒၟံၚ်ဂှ်တုဲ နူကဵုသြၚ်လောန်တိုၚ်(မ်) စၟဳတ်စမ်ရံၚ်ဂှ် ဒဒှ်ရဒှ်ဒၟံၚ်ပရိုၚ်ဗၠေတ် တြးဝါဒမွဲဂှ် စၟဳတ်ဂွံဆဵုကေတ်ရ။
လၟေၚ်ဒဒှ်ဍာံဂှ် သၞေဟ်ကၚ်စၟဳတ်ဒဒန်သြၚ်လောန်ဂှ်ဝွံ ဒှ်သၞေဟ်ကၚ်ဂကောံဒပ်ကံၚ်ဇြဳပၞာန်တံ ဖျေံလဝ်ဗ္ဒိုပ်မွဲတုဲ ကုညးဍုၚ်ကွာန်အာကၠုၚ်ဒၟံၚ်တရဴလၟေၚ်တ္ၚဲတံဂှ် ရပ်ဒက်ဟွံမွဲကဵုဟိုတ်ဂှ်ကီု၊ အာတ်မိက်လှုဲကီု၊ ဘပဠကွဳစက်အာတရဴတံတုဲ ကၠောန်သ္ပညံၚ်တရဴဂွံလဇဂှ်ကီု၊ သီဂိုၚ်တၞးကာဒ်ကောန်ဍုၚ်တံတုဲ အာတ်လှုဲကီု၊ ကုညးဍုၚ်ကွာန်အာတရဴတံဂှ် စောတ်စောဲ PDF တံဂးတုဲ ရပ်ဒက်ဂှ်ကီု မပ္တံကဵုဟိုတ်နာနာသာ်ဏံတုဲ ဒှ်သၞေဟ်ကၚ်စၟဳတ် ယၟုမြဟ်ဒၟံၚ် နကဵုယၟုပရေံပရေံမွဲရ။
ပ္ဍဲကဵုသၞေဟ်ကၚ်စၟဳတ်ဂှ် ဟိုတ်နူဖျေံလဝ်ဒပ် နကဵုတမ်ဒပ်သၟဝ်တဲကံၚ်ဇြဳပၞာန်တံ၊ ဂကောံဒပ်ဗၠာဲသၟိၚ်တံ ကေုာံ သၞာဲဒဴလဝက Non CDM တံဂှ်ရ ဂကောံဒပ်ပၠန်ဂတးတံ မ္ဒးဗ္တိုက်လဝ်ရောၚ်ဂှ် စၟဳစၟတ်ဂွံဆဵုကေတ် အတိုၚ်တၚ်လလောၚ်တြး ဌာနပရိုၚ်ဗၠးၜး ကေုာံ ဂကောံပြုပြေၚ်ပၞာန်လ္တူဍုၚ် GUERILLA FORCE ဘာအၚ်ရ။
အတိုၚ်ပရိုၚ်တမ်ရိုဟ် မစုက်လုက်ကဵု ကံၚ်ဇြဳပၞာန်တံဟီုဂှ်မ္ဂး ပ္ဍဲကဵုလၟေၚ်ဒဒှ်ဏံဂှ် ကောန်ဒပ်ကံၚ်ဇြဳပၞာန် ဟွံအောန်နူကဵု ၇ တၠ ဇီုကပိုက်ကလိဂွံလဝ်ဝပ်တုဲ ကောန်အရာပ် ၁ တၠချိုတ်တုဲ ၃ တၠ ဒးလဝ်ဘဲရောၚ် ဌာန်ပရိုၚ် BBC ထ္မံက်ထ္ၜးလဝ်ဂှ် ဂွံဆဵုကေတ်ရ။
ပွမဗ္တိုက် ဒဒန်သၚ်လောန်(ဘာအၚ်) ဂှ်ဝွံ ဒဒှ်ရဗ္တိုက်လဝ် ကုညးလျုၚ်ဇြုၚ်သ္ဍိုက်သာသနာတံဏောၚ်တုဲ ပရူပရာ နူကဵုချာန်နေဝ်ရဲထံက်ဂလာန်ဒပ်ပၞာန်တံ မတြးဒၟံၚ် နကဵုတၚ်ရန်တၟံဆဝ်မ္ၚုဟ်ပရေၚ်ဘာသာတံဂှ်ဝွံ အကြာဂကောံမၞိဟ် ဟွံဒုၚ်ဒွံလုက်တံ ညံၚ်ဂွံဒှ်ပဋိပက္ခဂှ် တြးလဝ်ဝါဒဆဝ်မ္ၚုဟ်လဝ်ရောၚ်ဂှ် စၟဳတ်ဂွံဆဵုကေတ်ရ။
တၚ်လလောၚ်တြး ဂကောံပြုပြေၚ်ပရေၚ်ပၞာန်လ္တူဍုၚ် GUERILLA FORCE ဘာအၚ် ထ္မံက်ထ္ၜးလဝ်ဂှ်
ဌာန်ပရိုၚ် BBC ထ္မံက်ထ္ၜးလဝ်ဂှ်
ဌာန်ပရိုၚ် Myanmar Now ထ္မံက်ထ္ၜးလဝ်ဂှ်
ဟိုတ်နူတၚ်နၚ်တံဏံတုဲ ပရူပရာ မပါလုပ် ပ္ဍဲဗီုဓာတ် ရဲထံက်ဂလာန်ဒပ်ပၞာန်တံ မတြးဒၟံၚ် “လၟေၚ်ဒဒှ်သၞေဟ်ကၚ်စၟဳတ် ဒဒန်သၚ်လောန်(ဘာအၚ်) ဗ္တိုဟ်ထ္ကးဂှ်ဝွံ ဒှ်ပွဗ္တိုက်ဗ္တိုဟ်ထ္ကးဗုမ် ကုရဲကၠုၚ်စိုပ်လ္ၚောဝ်ကျာ် ပ္ဍဲကဵုသ္ဘၚ်ကျာ်က္ဍိုပ်သ္ကိုပ်ပၞာန် ပ္ဍဲနေဗျဳဒဝ်တေံရောၚ်” မတြးဒၟံၚ်ဂှ်ဝွံ ဒဒှ်ရဒှ်ဆပရိုၚ်ဗၠေတ် တြးဝါဒမွဲဂှ် နူကဵုသြၚ်လောန်တိုၚ်(မ်) စၟဳစၟတ်ကဵုလဝ် သွက်ပုရိသာတ်သြၚ်လောန်တိုၚ်(မ်) ပိုယ်တံရ။
သြၚ်လောန်တိုၚ်(မ်)