သၞောတ်စဳရေၚ်သၞောဝ်ဓဝ်ကၟိန်ဍုၚ်ဗၟာဂှ် ဒပ်ပၞာန် ထိၚ်ဒဝ်လဝ်ပေၚ်ပေၚ်တုဲ လ္တူကောန်ထံၚ်ပရေၚ်ဍုၚ်ကွာန် ပရေၚ်စဳရေၚ်သၞောဝ်ဓဝ် ကဵု ပရေၚ်ဖျေံဒုဟ်ဒဏ် ဟွံဗဗွဲဓဝ် က္တဵုဒှ်ဒၟံၚ်အဆက်က်ရဂှ် ဂကောံမၚ်မွဲရံၚ်စံၚ်ကောန်ထံၚ်ပရေၚ်ဍုၚ်ကွာန် AAPP လလောၚ်တြးလဝ် လိၚ်ဒုၚ်စဳရေၚ် ပ္ဍဲဂိတုအဝ်ဂေတ် စၟတ်တ္ၚဲ (၇)ရ။ ပ္ဍဲလိက်ဒုၚ်စဳရေၚ် “ဍုၚ်ဟၟဲသၟိၚ်တၠ” AAPP လလောၚ်တြးလဝ်ဂှ်မ္ဂး ပ္ဍဲကဵုထံၚ်စာတ် ရုၚ်သၞောဝ်ဓဝ်တၟေၚ် လ္ပာ်ညးအရာပ်ဂှ်မ္ဂး ညးဒးဒုၚ်ရပ်ဒက်ထိၚ်ဒဝ်လဝ်တအ်ဂှ် သွက်ဂဗုတ်ညးတအ် ၜိုန်ရကဵုလဝ်အခေါၚ် သွက်ဂွံစဵုဒၞာသွက်ဂဗုတ်ညးတအ်ကီုလေဝ် ဟိုတ်နူဒပ်ပၞာန် ထိၚ်ဒဝ်လဝ်ပေၚ်ၚ်ဂှ်ရ ပရေၚ်စဳရေၚ်သၞောဝ်ဓဝ် ဟၟဲကဵုဗဗွဲဓဝ်ရဂှ် ဟီုသ္ဂးလဝ်ရ။
ဟိုတ်ဂှ်ရ လက်ထက်ကံၚ်ဇြဳပၞာန် အကာဲအရာက္တဵုဒှ်ဒၟံၚ် ပ္ဍဲကဏ္ဍစဳရေၚ်သၞောဝ်ဓဝ်ကီု၊ သၞောတ်စဳရေၚ်သၞောဝ်ဓဝ် ၜိုတ်ဂလိုၚ်လဵု လီုလာ်ဒၟံၚ်ရော။ စပ်ကဵုအကာဲအရာဏံတုဲ ဆက်စၠောံသၟာန်လဝ်ကဵု နာဲဗ္စကၠတ်ထဝ်သၞောဝ်ဓဝ်ဝှ်ကြံၚ် ဥူကျဳမျေတ်ရ။
၁။ ကၠာအိုတ်ဏံ လက်ထက်ကံၚ်ဇြဳပၞာန် မဏ္ဍိုၚ်စဳရေၚ်သၞောဝ် ဟၟဲဗဗွဲဓဝ်ပုဟ်ဂှ် AAPP လလောၚ်တြးလဝ် ဂွံဆဵုကေတ်ရ။ လက်ထက်ကံၚ်ဇြဳပၞာန် ကဏ္ဍစဳရေၚ်သၞောဝ်ဓဝ်ဂှ် အကာဲအရာလဵု က္တဵုဒှ်ဒၟံၚ်ရော။
ကြဴနူဒပ်ပၞာန်သီအဝဵုတုဲ ပရေၚ်စဳရေၚ်သၞောဝ်ဟီုဂှ် ဂွံပလီုထောံမာန်ပေၚ်ၚ် ဟၟဲပုဟ်။ ဟွံဒးကဵုစိုတ်ဍေံတအ်တှ်ေ ဗီုဟွံဒးကဵုစိုတ် ကဵုဒုဟ်ဒဏ် ဟွံထေက်တန်တုဲ သီုဟွံဂွံအခေါၚ်ခၠေဝ်သှ်ပေၚ်ၚ်မွဲသာ် ဖျေံဒၟံၚ်ဒုဟ်ဒဏ်သၠုၚ်အိုတ်ရ။ တၚ်လလောၚ်တြး AAPP ဂှ် ဒှ်ဒၟံၚ် ဍာံဍာံရ။ စပ်ကဵုအရာဏံ အ္စာတအ် ဒစဵုဒစးရ။
၂။ ပ္ဍဲရုၚ်သၞောတ်ဓဝ် သ္ကုတ်လကြဴဏံ ညးတၠဒုဟ်ဒဏ်တအ် ဒးဆောံလေၚ်ကၠုၚ်ဒၟံၚ် အခေါၚ်ခၠေဝ်သှ်ရဏး။ မုဟိုတ် ဂွံဒးဆောံလေၚ်ကၠုၚ် အခေါၚ်ခၠေဝ်သှ် ဗီုဏံရော။ သၞောဝ်စဳရေၚ်သၞောဝ်ဓဝ် ၜိုတ်ဂလိုၚ်လဵု လီုလာ်ဒၟံၚ်ယျ ဟီုစမာန်ရော။
တၚ်စောတ်စောဲ ညးစောဲဂဗုတ်(ကံၚ်ဇြဳပၞာန်) ဂှ်ရ နာဲဗ္စာသၞောဝ်ဓဝ် လ္ပာ်ပၞာန်တအ်၊ နာဲဗ္စာဗိုလ်ပၞာန်၊ နာဲဗ္စာညးအရာပ်တအ် သ္ပဇြိုဟ်နက်တုဲ က္လၚ်ရ။ တၚ်ခၠေဝ်သှ် နူလ္ပာ်ညးဒးဒုၚ်စောတ်စောဲဂှ် ဟွံသ္ပဇြိုဟ်နက် လ္တူသက်သဳ တၚ်ခၠေဝ်သှ်တအ်ပုဟ်။ ပ္ဍဲဂဗုတ်ဒဝ်အံၚ်သာန်သုကျဳ ဥူဝေန်မျေတ်ဏောၚ် ဂွံက္လၚ်ဒၟံၚ်တၚ်ခၠေဝ်သှ်ဏီရ။ တုဲတှ်ေတုဲအာရ အတိုၚ်ဍေံတအ်မိက်ဂွံကၠောန်ဂှ်ကၠောန်၊ သာပရေံဂှ်တှ်ေ ပ္ဍဲရုၚ်သၟဝ်၊ ရုၚ်လ္ဒောဝ်တအ်ဂှ်တှ်ေ တၚ်ခၠေဝ်သှ်တၠဒုဟ်ဂှ် စဵုကဵုဟွံက္လၚ်ရ။ တၚ်တိတ်ဟီုဍေံတအ်နွံပၟိက်၊ တၚ်ညးစောဲဂဗုတ်တအ်တိတ်ဟီုတအ်၊ တၚ်ဗၠာဲသၟိၚ်တိတ်ဟီုတအ် သက်သဳဗၠာဲသၟိၚ်တအ်ပ္တိန်ထ္ၜး။ စၟဳစၟတ်တအ်ဏံတုဲတှ်ေ သၟာန်တိုန် ဒုဟ်နွံဟာ ဒုဟ်ဟၟဲဟာဟဂှ်ရ။ ယဝ်ရဒုဟ်နွံတှ်ေ ချပ်ဖ္အောန်ယှအ်ဖျေံကဵုဒုဟ်ဒဏ်ဇကုတအ်ရ။ ယဝ်ရဒုဟ်ဟၟဲပုဟ်တှ်ေ ဖျေံဒုဟ်ဒဏ်ဇကုတအ်သၠုၚ်အိုတ်ဏောၚ်။ ဗီုဏံလေဝ် ဘပဠကၠုၚ်ဏီရ။ ဗီုဏံလေဝ်နွံရ။ ဟီုတှ်ေ မၞိဟ်တအ်လေဝ် ဒုဟ်နွံဒၟံၚ်ဟီုတုဲ သက်သာညိဟာလေဝ် ဖျေံဏာဒုဟ်ဒဏ်သၠုၚ်အိုတ်ဂှ်ရ။ ဖ္အောန်ယှအ်ဖျေံကဵုၜိုတ်မွဲသၞာံရလေဝ်။ ကၠောန်ပရေၚ်ကဵုကေတ်တုညးသ္ကအ်။ လ္ပာ်ဇကု ၜိုန်ရပ္တိုန်ထ္ၜးသက်သဳလေဝ် ဒးဒုၚ်ဖျေံဒုဟ်ဒဏ်သၠုၚ်အိုတ်ရ။
၃။ အလန်လကြဴအိုတ်ဏံ စပ်ကဵုသၞောတ်စဳရေၚ်သၞောတ်ဓဝ် ကၟိန်ဍုၚ်ဗၟာတုဲ နကဵုအ္စာ မုမိက်ဂွံထပ်ဟီုဗပေၚ် နွံဏီရော။ ဟီုထ္ၜးကဵုညိ။
လ္ပာ်ပိုဲဂှ် အရာထေက်ကဵုကၠောန် အရာထေက်ကဵုသ္ပဂှ် NUG တအ်၊ NUCC တအ်၊ PDF,EAO တအ် ကမၠောန်ဒးကၠောန်ဂှ်တှ်ေ လုကဴဟွံကုတ်ဗပိုတ် သၞောဝ်တၠအဝဵုပၞာန် ရိုဟ်ကၞက်ဟွံပိုတ်သ္ကုတ်အာဏီတှ်ေ ပရေၚ်စဳရေၚ်သၞောဝ်ဓဝ်ဏံ ဆလအ်လေဝ် ဂွံခိုဟ်ကၠုၚ်မာန် ဟွံသေၚ်ရဂှ် အ္စာတအ် မိက်ဂွံဟီုဏာဗီုဏံရ။