ကံၚ်ဇြဳပၞာန်ဂှ် နဒဒှ်ဒစဵုဒစးတးပါဲ ကၟိန်ဍုၚ်တဳမဝ်လေတ်သတေ ကၠောန်ဒၟံၚ်ပရေၚ်ဆက်ဆောံစုက်လုက်ကဵု အလဵုအသဳညဳသၟဟ်ကောန်ဂကူ NUG သ္ကာတ်တ်မြဟ်ဟ်ဂှ် ဌာနဝန်ဇၞော်ဍုၚ်သ္အာၚ် ကဵုလဝ်ပရိုၚ် ကုညးတာလျိုၚ်ရုၚ်ကလုတ်ယာယဳ ရုၚ်ကလုတ်တဳမဝ်ဗၟံက် မၞုံဍုၚ်လဂုၚ် သွက်ဂွံစ္ဍးတိတ်အာ ကၠာဟွံစိုပ် ဂိတုသေပ်တေမ်ဗာ စၟတ်တ္ၚဲ (၁)ရ။
အလဵုအသဳတဳမဝ်ဂှ်မ္ဂး ဟီုပျုတ်ဗ္ဒေက်လဝ် လ္တူကမၠောန်ပြဝကံၚ်ဇြဳပၞာန်လၟုဟ်ဏံဂှ်တုဲ မ္ၚးနူဂွံသ္ပရှ်ေသှ်ေဒ္ဂေတ်ဗက် အခေါၚ်အရာမၞိဟ်ဂှ် သွက်ဂွံသောၚ်ကလးအာ အကြေပ်ဂြတ်လၟုဟ်ဏံ ဗွဲမၜိုဟ်သြိုဟ်ဂှ် ဗတိုက်ဖ္အောဝ်လဝ် ဒပ်ပၞာန်ဗၟာတုဲ ဆက်ဒတူအာ မွဲကရောံကဵု ညးဍုၚ်ကွာန်ကောန်ကၟိန်ဍုၚ်ဗၟာရောၚ်ဂှ် လလောၚ်တြးလဝ် တၚ်လစွံစိုတ် ပ္ဍဲဂိတုအဝ်ဂါတ် စၟတ်တ္ၚဲ (၂၆)ရ။
မုဟိုတ်လ္ပာ်ကံၚ်ဇြဳပၞာန် ဂွံထ္ဍေၚ်ဘာတ်ပ္တိတ် ကလုတ်တဳမဝ် နူဍုၚ်ရော။ ပ္ဍဲဗလးပရေၚ်ကေၚ်ကာကလုတ် သွက်ကံၚ်ဇြဳပၞာန် ၜိုတ်ဂလိုၚ်လဵု ဒးဂိဒၟံၚ်ယျရော။ စပ်ကဵုအကာဲအရာဏံတုဲ ဆက်စၠောံသၟာန်လဝ်ကဵု ညးလ္ၚတ်သ္ၚဳဂၠိပ်ပရေၚ်ဍုၚ်ကွာန် ဥူတာန်သိုဝ်နိုၚ်ရ။
၁။ ကၠာအိုတ်ဏံ မုဟိုတ်ကံၚ်ဇြဳပၞာန် ဂွံထ္ဍေၚ်ဘာတ်ပ္တိတ် ကလုတ်တဳမဝ်ဂှ် ဗီုလဵုညာတ်ကေတ်ရော။ လ္တူဏံ သ္ၚဳဂၠိပ်ထ္ၜးကဵုညိ။
ကိစ္စစပ်ကဵုကံၚ်ဇြဳပၞာန် ကၟာတ်ထောံ ရုၚ်ကလုတ်တဳမဝ်ဗၟံက်ပေၚ်ၚ်ဂှ်တှ်ေ အတိုၚ်လၟေၚ်ကမၠောန်ကေၚ်ကာကလုတ်တမာန် ဒှ်ကိစ္စ ကၠောန်သ္ပဟွံထေက်ရ။ ကၟာတ်ထောံရုၚ်ကလုတ်ဟီုဂှ် ဗွဲမဂၠိုၚ်တှ်ေ ပ္ဍဲဍုၚ်ဒှ်ဒၟံၚ်ပၞာန်ရ ကေၚ်ကၠောန်ကၠုၚ် နွံ။ သာမညဏံ ယဝ်ဒးဟီုတှ်ေ ရုၚ်ကလုတ်သၟး ကၟာတ်ထောံလဝ် ဟၟဲပုဟ်။ တၚ်လစွံစိုတ် ရုၚ်ဆက်ဆောံ ဒးနွံဏောၚ်။ ဆ္ဂးကံၚ်ဇြဳပၞာန်ဂှ်တှ်ေ ကၟာတ်ထောံရုၚ်ကလုတ်တဳမဝ်ဟီုဂှ် အလဵုအသဳတဳမဝ် အလဵုအသဳလၟုဟ်ဏံကီု၊ ဟွံသ္ပစၟတ်သမ္တီကဵု အလဵုအသဳကံၚ်ဇြဳပၞာန် ပ္ဍဲဍုၚ်ဗၟာ၊ ဟွံသ္ပစၟတ်သမ္တီမွဲသာ် ကဵု NUG ဂှ် ပရေၚ်သ္ပစၟတ်သမ္တီ ဆက်ဆောံကၠုၚ် နွံရ။
၂။ အကာဲအရာကံၚ်ဇြဳပၞာန် ထ္ဍေၚ်ဘာတ်ပ္တိတ်ကလုတ်တဳမဝ်ဂှ် ပ္ဍဲဗလးကလုတ်တမာန် ၜိုတ်ဂလိုၚ်လဵု ဒးဂိဒၟံၚ်ရော။ လ္တူဏံ ဗီုလဵုညာတ်ရော။
အလဵုအသဳတဳမဝ် သ္ပလဝ်စၟတ်သမ္တီကဵု အလဵုအသဳ NUG ရ။ NUG ဂှ်လေဝ် ကိစ္စကဵုလဝ်အခေါၚ်ပံက်ရုၚ်ကလုတ် ပ္ဍဲတဳမဝ်ဏောၚ်ဂှ် နကံၚ်ဇြဳပၞာန် ဒုၚ်ဟွံဒဝ်ဟွံမာန်။ အကြာ ကံၚ်ဇြဳပၞာန်ကဵု အလဵုအသဳ NUG တဳမဝ်သ္ပလဝ်စၟတ်သမ္တီဂှ် အခိၚ်ဒှ်ဒၟံၚ်ပဋိပက္ခပၞာန်ဂံက်ဏံ အခိၚ်လၟုဟ်ဏံ အလဵုအသဳတဳမဝ်ဂှ် ဟွံဂွံဒှ်ကောန်ဂကောံအာဇြဳပၞာန် ပေၚ်ၚ်ဏီရ။ သွက်ဂွံဒှ်ကောန်ဂကောံဂှ် ဒှ်အခိၚ်ကဵုဒၟံၚ် ပရေၚ်ထံက်ဂလာန်ရ။ ပ္ဍဲအကာဲအရာဗီုလၟုဟ်ဏံဂှ် ဗပိုတ်ထောံပရေၚ်ဆက်စၠောံကလုတ်တမာန်ဂှ်တှ်ေ မုဒှ်ဒှ်ရ အလဵုအသဳသ္ပလဝ်စၟတ်သမ္တီကဵု NUG မွဲဂကောံဂှ် ဓမံက်ထ္ၜးဒၟံၚ် ဒဒှ်ရကံၚ်ဇြဳပၞာန် ဟွံသ္ပစၟတ်သမ္တီရ။ ဣဏံဂှ် ပ္ဍဲကဵုကမၠောန်ကလုတ်တမာန်တှ်ေ ဟိုတ်နူဒှ်ကိစ္စတၟေၚ်တၟဟ်လောန်ဂှ် ကၠောန်သ္ပဟွံထေက်ပုဟ်ဂှ် နူကဵုတွဳဗွိုၚ်ကလုတ်တမာန် သီုကဵုဂၠးကဝ်တအ် ဘိုၚ်ဒစဵုဒစးဒၟံၚ်ညးသ္ကအ်ရ။
၃။ အလန်လကြဴအိုတ်ဏံ ဟိုတ်နူလ္ပာ်ကံၚ်ဇြဳပၞာန် ဘာတ်ပ္တိတ်ကလုတ်တဳမဝ် နူကၟိန်ဍုၚ်တုဲ မုဆက်ဒှ်ကၠုၚ်မာန်ရော။
ဒၟာနူဒှ်ကၠုၚ်ဗီုဏံတုဲ အခေါၚ်တဳမဝ် ဂွံလုပ်အာဇြဳယာန်ဂှ် က္လေၚ်ဆုတ်တိတ်အာမာန်ဒၟံၚ်ဏောၚ်ဟီုဂှ် အကာဲအရာမွဲမွဲဏံ ဍာံဒၟံၚ်ရ။ ဆ္ဂး ယဝ်ရအလဵုအသဳကံၚ်ဇြဳပၞာန်ဗၟာ ကၠေံကၠက်အိုတ်အာတုဲ ယဝ်ကျအာပ္ဍဲပေါဲပၞာန်ဏောၚ်တှ်ေ အလဵုအသဳNUG ဂှ် က္လေၚ်သ္ပစၟတ်သမ္တီတဳမဝ်ပၠန်တုဲ သွက်ဂွံလုပ် ပ္ဍဲဂကောံအာဇြဳယာန်ဂှ် ထံက်အာဂလာန် ဗွဲမုချဍာံဍာံဏောၚ်။ ကၠာဟွံစိုပ်ကာလဂှ်ဏီမွဲဂှ် အခေါၚ်အရာကလုတ်တဳမဝ် ဒဵုကဵုအခိၚ်ကာလမွဲမွဲ၊ စဵုကဵုအခိၚ်ကာလဟွံသီရုပ်ကံၚ်ဇြဳပၞာန်ဂှ်တှ်ေ ဒးဆေၚ်မုက်ကဵု အကာဲအရာဒးပဆုဲလဝ် သွက်ဂွံလုပ်ဂကောံအာဇြဳယာန်မာန်ဒၟံၚ်ဏောၚ် မိက်ဂွံဟီုရ။