သွက်ဂွံက္လိဂွံအခေါၚ်တုပ်သၟဟ် မၞုံကဵုအခေါၚ်ကံကုသဵုဇကု ဇကုဖန်ဖက်ကေတ်မာန် သီုအခေါၚ်ပျးဌာန်ဇကုဇကုဂှ် နူကဵုဂကောံသၟတ်မွဲဂကောံ စပ္တံကၠုၚ်လဝ်ပၠန်ဂတးရပ်လွဟ်ခေတ်တၟိ လအ်ကၠုၚ်ပွိုၚ် ၇၀ သၞာံပြၚ်ရ။
တ္ၚဲပၠန်ဂတးမန် မရနုက်ကဵု ၇၆ ဝါကၠုၚ်စိုပ်သၞာံဏံဂှ် နကဵုဂတဵုမုက် “ဇြဟတ်ပၠန်ဂတးဇၞော် အခေါၚ်အရာဂကူမံက်”ဂှ် ကၠောန်ဗဒှ်လဝ် ပ္ဍဲကုန်အာဇာနဲ မၞုံဂြိုပ်ဝၚ်စိၚ် ပွိုၚ်ဍုၚ်မုဟ်ဍုၚ် တွဵုရးဍုၚ်မန်ရ။
ဟိုတ်ဂှ်ရ တၚ်ရန်တၟံပၠန်ဂတးမန် ပၠန်ဂတးကၠုၚ်လဝ် ပွိုၚ် ၇၀ သၞာံဂှ် ၜိုတ်ဂလိုၚ်လဵု ဍိုက်ပေၚ်ကၠုၚ်ရော။ ပ္ဍဲလက်ထက်ကံၚ်ဇြဳပၞာန် စပ်ကဵုအကာဲအရာအခေါၚ်ဖန်ဖက် ကံကုသဵုဇကုဂှ်တုဲ ဆက်စၠောံသၟာန်လဝ်ကဵု နာဲနဂါ ညးမၞုံအခေါၚ်ဟီုဂး ဒပ်ပၠန်ဂတးဍုၚ်မန် (MSRF)ရ။
၁။ ပ္ဍဲတရဴပၠန်ဂတးမန်မရနုက်ကဵု ၇၆ ဝါဏံ အခေါၚ်ဖန်ဖက်ကံကုသဵုဇကုဇကု မဒှ်တိုၚ်ပ္ကဴအဓိကကောန်ဂကူမန်တအ်ဂှ် ၜိုတ်ဂလိုၚ်လဵု ဍိုုက်ပ ေၚ်ကၠုၚ်ယျရော၊ လ္တူဏံသ္ၚဳဂၠိပ်ကဵုညိ။
ဒၞာဲဏံမိက်ဂွံဟီုဂှ်တှ်ေ တရဴမရနုက်ကဵု ၇၆ ဝါဟီုဂှ် နွံဆၜိုတ်မဂၞန်ဓဝ်ရ။ ကၠောန်ကၠုၚ်လဝ်ပၠန်ဂတးဍာံဍာံရဟာဟီုဂှ် ဒးက္လေၚ်သ္ၚဳဂၠိပ်ထေက်ရ။ တုဲပၠန် အခိၚ်ကာလ ပွိုၚ် ၇၆ သၞာံဟီုဂှ် ကလေၚ်တၟော်လဝ် အခိၚ်စပ္တံလဝ်ပၠန်ဂတးရပ်လွဟ်ခေတ်တၟိရ။ အဲမိက်ဂွံဟီုဂှ်တှ်ေ လောန်ကၠုၚ် ၇၆ သၞာံတေံ စကၠောန်လဝ် ပၠန်ဂတးရပ်လွဟ်ရ။ ဆ္ဂးပ္ဍဲလဒေါဝ်တရဴဂှ် ဒပ်ပၠတရဴဍုၚ်မန် ဖျေံထောံလွဟ်ရ။ နာဲယှိုဲကျေန် က္လေၚ်ဒက်ပ္တန်ဗော်ဍုၚ်မန်တၟိတုဲ ဆက်ကၠောန်ကၠုၚ်ပၠန်ဂတးရပ်လွဟ်ရ။ ဆ္ဂးအတိုၚ်တီဒၟံၚ်သီုညးဖအိုတ်ဂှ်ရ သောၚ်ထ္ၜးလဝ် ပ္ဍဲကဵုလိက်သဝဏ် ဥက္ကဋ္ဌဗော်ဍုၚ်မန်တၟိ နာဲဟံသာနွံဒၟံၚ်ရ။
ၜိုတ်သၞာံ ၁၉၇၀ ဂှ်မှ အကာဲအရာ ပိုဲဂွံစတံက္လေၚ်ကၠောန်ပၠန်ဂတးရပ်လွဟ်မာန်ပၠန် နွံရ။ ပ္ဍဲ ၁၉၉၅ ဂှ် အခိၚ်ဗော်ဍုၚ်မန်တၟိပိုဲ ကၠောန်ကၠုၚ်ပရေၚ်ဒေါံပန်ပှော်ဂှ်တှ်ေ သ္ကုတ်လကြဴ နူ ၁၉၉၅ ဂှ် စၟတ်သမ္တီ နဒဒှ်ပၠန်ဂတးရပ်လွဟ် ဟွံဂွံရ၊ ဣဏံဂှ်လေဝ် ပိုဲထေက်ကဵုဒးက္လေၚ်ချပ် နွံရ။ ပ္ဍဲလ္တူအခေါၚ်ဖန်ဖက်ကံကုသဵုဇကု ၜိုတ်ဂလိုၚ်လဵုဍိုက်ပေၚ်ယျရောဟီုဂှ်တှ်ေ အဲညာတ်ကေတ်ဂှ် ပါဲနူအခေါၚ်အရာလိက်ပတ်ယေန်သၞာၚ်ညိညတုဲတှ်ေ ဣဏံလေဝ် ပါဲနူၜံၚ်ဇကုဇကုဗ္ကေက် ဂကူဇကု ဇကုက္တဵုကၠောန် မ္ၚးနူ ကိစ္စလိက်ပတ်ယေန်သၞာၚ်တုဲ အခေါၚ်အရာသှ်ေနူဂှ် ဟၟဲဏီပုဟ်။
၂။ ပ္ဍဲလက်ထက်ကံၚ်ဇြဳပၞာန် နကဵုကောန်ဂကူမန်တအ် သ္ဂောံက္လိဂွံ အခေါၚ်အခေါၚ်တုပ်သၟဟ် နွံကဵုအခေါၚ်အရာ ကံကုသဵုဇကု ဇကုဖန်ဖက်ကေတ်မာန် သီုကဵုအခေါၚ်ပျးဌာန်ဇကုမာန်ဟာ ဗီုလဵုညာတ်ကေတ်ရော။
သၟဝ်ပရေၚ်အုပ်ဓုပ်ကံၚ်ဇြဳပၞာန် ဆၜိုတ်အခေါၚ်အရာသာမညဓဝ်လေဝ် ကဵုဟွံမာန်ဂှ် သ္ဂောံဂွံအခေါၚ်ဖန်ဖက် ကံကုသဵုဇကု ဇကုဖန်ဖက်ကေတ်မာန် အခေါၚ်ပျးဌာန်ဇကုဇကုဂှ်ဟီုဂှ် ပိုဲတအ် နဲလဵုလေဝ် ဒှ်ဟွံမာန်ပုဟ် အဲညာတ်ကေတ်ရ။ အဲသဳကၠဳဏာလဝ်လၟုဟ်ဏံဂှ် ဟီုလဝ် နကဵုလညာတ် အလုံညးဍုၚ်ကွာန်မန်မွဲရ။ ဆ္ဂးဂှ် ပ္ဍဲကဵုဒေသထိၚ်ဒဝ်ဗော်ဍုၚ်မန်တၟိ ကၞောတ်ၜဳရေဝ်ကဵု လှာဒကှ်တအ်ဂှ်တှ်ေ ဒက်ပ္တန်လဝ်ကဵု သၞောဝ်သ္ဇိုၚ်ဒက်ပ္တန် ပရေၚ်အုပ်ဓုပ် ပရေၚ်စဳရေၚ်သၞောဝ်ဓဝ် ဗော်ဍုၚ်မန်တၟိ ၜိုတ်ညးတအ်သ္ပမာန်တအ်ဂှ် နွံရ။ ဆ္ဂးဣဏံဂှ် ဟွံတၞီလုပ် သီုအလုံညညးဍုၚ်ကွာန်မန်မွဲပုဟ်။ ဗီုဏံအဲမိက်ဂွံဟီုရ။
၃။ နကဵုဒပ်ပၠန်ဂတးဍုၚ်မန် (MSRF) လုပ်ဒၟံၚ်ပေါဲဗတိုက်ရပ်လွဟ် သွက်ဂွံသ္ဂောံက္လိဂွံအခေါၚ်အရာ ကံကုသဵုဇကု ဇကုဖန်ဖက်ကေတ်မာန် မဒှ်တၚ်ရန်တၟံကောန်ဂကူဇကုဂှ် ပ္ဍဲပရေၚ်ဒက်ပ္တန်ကၟိန်ဍုၚ်ပံၚ်ကောံ ဖေတ်ဒရေဝ်ဒဳမဝ်ကရေဒဇြဳဂှ် မုသွက်ဂွံဆက်ကၠောန်အာ နွံရော။
ဒပ်စဵုဒၞာဍုၚ်မန် (MSRF) ဂှ် ဒှ်ဒပ်ပၞာန် ဍတ်ပါ်တိတ်ကၠုၚ် နူညဍုၚ်ကွာန်မန် အကြားညဍုၚ်ကွာန်မန် မွဲဒပ်ရ။ သွက်ပရေၚ်ဒက်ပ္တန် ကၟိန်ဍုၚ်ပံၚ်ကောံ ဍုၚ်မန်ဒဳမဝ်ကရေဇြဳအနာဂတ် နွံကဵုအခေါၚ်ကံကုသဵုဇကု ဇကုဖန်ဖက်ကေတ်မာန် မဒှ်တၚ်ရန်တၟံ၊ တိုၚ်ပ္ကဴညးဍုၚ်ကွာန်မန်ပိုဲဂှ် ပံၚ်တောဲကဵု ဂကောံဇြဟတ်ပၠန်ဂတး ဒစဵုဒစးပၠန်ဂတးဒၟံၚ်ကဵုကံၚ်ဇြဳပၞာန်တအ်တုဲ ပိုဲလုပ်အာပေါဗတိုက်ဏောၚ် အဲမိက်ဂွံဟီုရ။
၄။ အလန်လကြဴအိုတ်ဏံ ပ္ဍဲလ္တူတ္ၚဲပၠန်ဂတးမန်ဂှ် မုမိက်ဂွံထပ်ဟီုဗပေၚ်နွံဏီရော။
တၚ်ဒုၚ်ဂိုၚ်ကေတ်လဝ် ပြဿနာပရေၚ်ဍုၚ်ကွာန် ဒးသောၚ်ကလးအာ လ္တူခုၚ်ပရေၚ်ဍုၚ်ကွာန်ဏောၚ်ဂှ် ပိုဲပတှ်ေလဝ်ပေၚ်ၚ်ရ။ ဆ္ဂးသွက်ဂွံသဳကၠဳပရေၚ်ဍုၚ်ကွာန်ကဵုကံၚ်ဇြဳပၞာန် ကတိပါၚ်ဟွံဗိုန်၊ သစ္စဟၟဲ ပတှ်ေဒၟံၚ်ဇြဟတ်လွဟ် သွက်ဂွံသဳကၠဳဓဝ်ၜိုဟ်လလံဂှ် ဟိုတ်နူညာတ်ကေတ်လဝ် နဲလဵုလေဝ် ဂွံဒှ်မာန်ဟၟဲဂှ်ရ ဆက်တုဲ လုပ်အာပေါဲဗတိုက်ဏောၚ်။