ပ္ဍဲတိဍာ်ဗော်သွးကောန်ဂကူကရေၚ် KNU ဂှ် ဒပ်ကံၚ်ဇြဳပၞာန် ပ္တဝ်လဝ်ကဵုကောန်အရာပ်ညးဍုၚ်ကွာန်တုဲ ပန်ဖျေံဒၟံၚ်လွဟ်ဇၞော်၊ ဂြာတ်ထောံဖျေံဗုမ်ကဵုက္ၜၚ်ကျာ၊ ပန်ဖျေံဒၟံၚ်ကဵုဒရုမ် ဗတိုက်ဒၟံၚ် ပ္ဍဲကွာန် ကေုာံဗွိုၚ်ကမၠောန်ကၠအ်ဗ္ၚတအ်တုဲ ဆက်က္လိလောန်ကၠုၚ်ဒၟံၚ် ပရေၚ်ဖံက်ပ္ကဝ်အခေါၚ်အရာမၞိဟ် အဆက်ဆက်ရ။ စပ်ကဵုပရေၚ်ဒပ်ကံၚ်ဇြဳပၞာန်ဖံက်ပ္ကဝ်ဒၟံၚ် အခေါၚ်အရာမၞိဟ်ကီု၊ အကာဲအရာပၞာန်ၜါလ္ပာ်ကီု၊ အခက်ခုဲ တၚ်ဝါတ်ဂါတ် ညးပါဲဘဲပၞာန်တအ် ဒးဆေၚ်ဒၟံၚ်မုက်ကီုတုဲ ဆက်စၠောံသၟာန်လဝ်ကဵု ညးမၞုံအခေါၚ်ဟီုဂး ဇာနှိက်ထံက်အရီုဓဝ်ၜိုဟ်လလံကရေၚ် (KPSN)သဝ်လေဝ်ပဝ်ရ။
၁။ ကၠာအိုတ်ဏံ ပ္ဍဲတိဍာ်ကေအေန်ယူဂှ် အကာဲအရာကံၚ်ဇြဳပၞာန် ပန်ပှော်ဒၟံၚ် သီုကဵုပရေၚ်ဖံက်ပ္ကဝ်ဒၟံၚ်အခေါၚ်အရာမၞိဟ်ဂှ် အကာဲအရာဗီုလဵု နွံရော။
ပရေၚ်ဖံက်ပ္ကဝ်အခေါၚ်အရာမၞိဟ်ကံၚ်ဇြဳပၞာန်ဂှ်တှ်ေ ဒှ်ဒၟံၚ် ကြပ်အရိုဟ်ဟ်တ္ၚဲရ။ ပန်ဖျေံလွဟ်ဒၟံၚ်ဇၞော် ဒၞာဲကောန်အရာပ်ညးဍုၚ်ကွာန်တအ် နွံ၊ ပ္ဍဲကွာန် ဂွံတှ်ေတုဲကီု၊ ပန်ဒၟံၚ်ကဵုက္ၜၚ်ကျာတအ်ဂှ်တှ်ေ ဍေံတအ်ကၠောန်ဒၟံၚ် အတိုၚ်တြေံဂှ်ရ။ ယဝ်စိုပ်ကၠုၚ် ကွာန်တှ်ေ အရာကဵုဒဒိုက်ကဵုးညဍုၚ်ကွာန်တအ်ရ။ ရပ်ဒက်ဟွံလုပ်သၞောဝ် ပျဲပျာံဍဵုဍိုက်ဒၟံၚ် စောတ်စောဲဒၟံၚ်တအ်ဂှ် ကၠောန်ဒၟံၚ်ရ။ အရာနွံဒၟံၚ် ပ္ဍဲညးဍုၚ်ကွာန်တအ်ဂှ် ကေတ်ဏာ။ ပၠံၚ်ကေတ်ဟွံဂွံတှ်ေ ပလီုပလာ်ဒၟံၚ်ဂှ် ပိုဲဂွံဆဵုညာတ်ကေတ်ဒၟံၚ်ရ။
၂။ လၟုဟ်ဏံရော အကာဲအရာပရေၚ်ပၞာန်ဂှ် ဂွံညာတ်ကေတ်ဒၟံၚ် ဗီုလဵုရော။ ပရေၚ်လ္ပာ်ဒပ်ကံၚ်ဇြဳပၞာန် ထ္ပက်ပၞာန် ချဳဒရာၚ်ပၞာန် ဗီုပြၚ်လဵုနွံရော။
ပရေၚ်ပၞာန်ဂှ်တှ်ေ ပ္ဍဲတိဍာ် KNU ဂှ်ပေါဲဗတိုက်ဒှ်ဒၟံၚ်ရ။ ကံၚ်ဇြဳပၞာန်ဂှ် ပ္ဍဲဗလးမုက်တိတှ်ေ ဆက်ကျဒၟံၚ်ဖိုဟ်ရ။ ဗဒိုပ်ဖျေံသ္ဇိုၚ်ဍေံတအ် ဒးဒုၚ်ဆောံလေၚ် ဂၠိုၚ်ကၠုၚ်ဒၟံၚ်ဂှ်ရ ဍေံတအ်ပန်ဖျေံလွဟ်ဇၞော်၊ သုၚ်စောဲဇြဟတ်တုဲ ဂြာတ်ထောံဖျေံဗုမ်၊ ကၠောန်သ္ပဒၟံၚ်ဗီုဏံဂှ် ပိုဲဂွံညာတ်ကေတ်ဒၟံၚ်ရ။ လွဟ်ဇၞော်ကဵုက္ၜၚ်ကျာတအ်ဂှ်တှ်ေ ဒၟာနူဍေံတအ်ပ္တဝ်လဝ်ကဵု ညးဍုၚ်ကွာန်တုဲ ဗတိုက်ဒၟံၚ်ဂှ်လေဝ် ညးဍုၚ်ကွာန်တအ် စိုပ်ဒၟံၚ်ဒဒိုက်ဇၞော်ဇၞော်ရ။
၃။ သ္ကုတ်လကြဴဏံ ပ္ဍဲဒပ်မဟာ(၃)ခရိုၚ်ညံၚ်လေဝ်ပေန် KNU ဂှ် ပရေၚ်ကောန်အရာပ် ဇီုကပိုက်ဒးချိုတ်ဂျိုၚ်ဂၠိုၚ်ကၠုၚ်ဒၟံၚ်ဂှ် ဂွံညာကေတ်ရ။ ပ္ဍဲဗလးမုက်တိ အကာဲအရာဗီုလဵုဒှ်ဒၟံၚ်ရော။
ပ္ဍဲခရိုၚ်ညံၚ်လေဝ်ပေန်ဂှ်တှ်ေ အခိၚ်လၟုဟ်ဏံ ဗဒိုပ်ဖျေံသ္ဇိုၚ်ကံၚ်ဇြဳပၞာန် ဒးစှ်ေအာယျ။ ဟိုတ်နူ KNU ကဵုဂကောံပံၚ်တောဲတအ် ဗတိုက်လဝ်တုဲ ဗဒိုပ်ဖျေံသ္ဇိုၚ်ဍေံတအ် စှ်ေအာလဝ်ဂှ်ရ ဍေံတအ်က္လေၚ်ပၠန်ဒၟံၚ်တဲ ကဵုလွဟ်ဇၞော် ဇၞော်ကဵုဇြဟတ်ဂှ် ဂွံဆဵုကေတ်ဒၟံၚ်ရ။ က္ၜၚ်ကျာလေဝ် ပ္တဝ်လဝ်ဒၞာဲကောန်အရာပ်ညးဍုၚ်ကွာန်တအ် နွံဒၟံၚ်ဂှ်တုဲ ဗတိုက်ဒၟံၚ်ဂှ် ဂွံညာတ်ကေတ်ရ။ ကဵုလွဟ်ဇၞော်ဂှ် ဟိုတ်နူဂြာတ်ထောံဖျေံဒၟံၚ် အရိုဟ်ဟ်တ္ၚဲ နွဴဒၟံၚ်တုဲ ညးဍုၚ်ကွာန်တအ် ဇီုကပိုက်ဒးချိုတ်ဒၟံၚ် ဂွံဆဵုကေတ်ဗွဲမဂၠိုၚ်ရ။ လ္တူပရေၚ်ဗတိုက်ပန်ကဵုက္ၜၚ်ကျာ ဟိုတ်နူကၟိန်ဍုၚ်နာနာ က္လေၚ်ပလန်လဝ်တဲဟၟဲတုဲ ဗီုဍေံတအ်ဒးစိုတ် ကၠောန်ဒၟံၚ် လ္တူကောန်ကွာန်တအ် ဂွံရ။
တုဲမွဲပၠန်ဂှ် လုပ်ကွာန်၊ လုပ်ဍိုက်ဗတိုက်၊ ဗီုဒမၠဗတိုက်လေဝ်။ ရပ်ကေတ်ညးဍုၚ်ကွာန် ဟၟဲကဵုသၞောဝ်သၞောတ်။ ဘပဠဒၟံၚ်။ ယဝ်စိုပ် ပ္ဍဲကွာန်တှ်ေ ကေတ်ဏာဒၟံၚ် ဒြပ်ညးဍု်ကွာန်တအ်ဂှ် ဒှ်အရာဍေံတအ် ကၠောန်သ္ပဒၟံၚ်လၟိုန်ရ။ အခိၚ်ညးဍုၚ်ကွာန်တအ် ရာန်ကေတ်ဇွောံမစၞ နွံပၟိက်တအ်ဂှ်တှ်ေ ယဝ်လုပ်ဒးအာ ဒၞာဲဍေံတအ်နွံဒၟံၚ်တှ်ေ စၟဳစၟတ်ဗီုပြၚ်ဇဳ ကဵုဒၟံၚ်ဒဒိုက်ရ။ ပၠံၚ်ၜးသီကေတ်ဒၟံၚ် ဟၟဲကဵုသၞောဝ်သၞောတ် ဗီုပြၚ်နာနာ ညံၚ်ညးဍုၚ်ကွာန်တအ်ဂွံဒှ်ဒဒိုက်ဂှ် ကၠောန်ဒၟံၚ်ဂှ် ဂွံညာတ်ကေတ်ရ။ ညးဍုၚ်ကွာန် ဒးလဝ်လွဟ်ဇၞော်တအ် ညံၚ်ဟွံဂွံစိုပ်ရုၚ်ဂဥုဲ ညးပါဲဘဲပၞာန် ဒးလဝ်ဘဲဝပ်တအ် ညံၚ်လွဳလွတ်ဟွံဂွံ ညံၚ်ရာန်ကေတ်ဂဥုဲဟွံဂွံဂွံဂှ် ဍေံတအ်ကၟာတ်ဒၞာ ကၠောန်သ္ပဒၟံၚ်ကဵုနဲကဲစုၚ်ဂှ် ပိုဲဂွံဆဵုကေတ်ဒၟံၚ်ရ။
၄။ ပ္ဍဲခရိုၚ်ညံၚ်လေဝ်ပေန် KNU မွဲခရိုၚ်ဓဝ် ညးပါဲပၞာန် စဵုကဵု (၂)ကိုတ်ပြၚ် နွံကၠုၚ်ယျ ဂွံတီကေတ်ရ။ အကာဲအရာညးပါဲဘဲပၞာန်အခိၚ်လၟုဟ် ဟီုထ္ၜးကဵုညိ။
ပ္ဍဲတိဍာ်ဒပ်မဟာ (၃)ဂှ် ညးပါဲဘဲပၞာန် ၜါကိုတ်ပြၚ် နွံကၠုၚ်ဒၟံၚ်ယျ။ ညးပါဲဘဲပၞာန်တအ်လေဝ် ဟိုတ်နူဒးဗ္ဒဗ္ဒာဲဒၟံၚ် ပ္ဍဲဂြိုပ်ဒဵု ဒၞာဲဂီုကၠီုတအ်တုဲ သွက်ဂွံမံၚ် ဂီုဂီုကၠီုကၠီုမာန် ဟွံဂွံမံၚ်ကဵု ကၟဳဗ္ဒၚ်ခိုဟ်ဟ်ပုဟ်။ ဒၟာနူဒးမံၚ်ဒၟံၚ် ၜိုတ်ဒှ်ကဵုဒှ်ဂှ်ရ၊ ညးပါဲဘဲပၞာန်တအ်လေဝ် ဂၠိုၚ်တိုန်ကၠုၚ်ဒၟံၚ် အရိုဟ်ဟ်တ္ၚဲတုဲ သွက်ဂွံစသုၚ် ဒဒိုက် ဂၠိုၚ်ကၠုၚ်ဒၟံၚ်ရ။ ဂဥုဲဇဗဟွံရုမ်ဂပ်ကီု၊ အာစာဂဥုဲဟွံရုမ်ဂပ် ဒးဆဵုဂဗဒၟံၚ်တုဲ ညးဇီုကပိုက်ဒးလဝ်ဘဲဝပ်တအ်လေဝ် ဂွံဆဵုညာတ်ကေတ်ဒၟံၚ် ဗွဲမဂၠိုၚ်ရ။ ကောန်ၚာ်တအ်၊ မၞိဟ်အယုက်ဇၞော်တအ်လေဝ် ဒးမံၚ်ဒၟံၚ် သီုဟွံဂီုကၠီုဗီုဏံတုဲ၊ ဟိုတ်နူစၞစသုၚ်ဟွံရုမ်ဂပ်တုဲ အကြာကြာဏံ စိုပ်ဒၟံၚ်ဒိုက် ဗွဲမလောန်ရ။ ပ္ဍဲကဵုညးဍုၚ်ကွာန်တအ်ဂှ်၊ ဂြိပ်ဒဴဒၟံၚ် သာတုဲဂၠိုၚ်ကၠုၚ်ရ ဒးထံက်ပၚ်ဒၟံၚ်ဍာ်ဇမၠိၚ်ဂှ်ရ အခိၚ်လၟုဟ်ဏံ ပိုဲဒးဆဵုဂဗကၠုၚ်ဒၟံၚ်ကဵု တၚ်ခက်ခုဲဗွဲမဂၠိုၚ်ရ။
ပရေၚ်စသုၚ်ဂှ် ဟွံလောဲသွာ။ ၚုဟ်ဗွဝ်ဖျာဂှ် က္ဍၚ်တိုန်ကၠုၚ် လောန်နူသၞောတ်ကီု၊ ဟိုတ်နူတၠဒါန်ဒ္တန်တအ်လေဝ်ဟၟဲတုဲ ညးပါဲပၞာန်တအ် လၟုဟ်ဂှ် ၜါကိုတ်ပြၚ်အာယျ ပ္ဍဲကဵုဒပ်မဟာ (၃) မွဲဓဝ်ဏောၚ်လေဝ်။ ညးပါဲဘဲပၞာန်တအ် စိုပ်ဒၟံၚ်ဒဒိုက်ညးသ္ကအ် ကွေံကွေံယျ။ ကမၠောန်တဵုလွဳညးတအ် ဒးကၠဟ်ထောံလဝ်ပေၚ်ၚ်ဂှ်ရ အကာဲအရာလၟုဟ်ဏံ ညးပါဲဘဲပၞာန်လ္ၚဵုတအ်ဂှ်တှ်ေ လအ်ကၠုၚ်ကဵုသၞာံယျ။ နူအခိၚ်ညးတအ်ဂြိပ်ဒဴကၠၚ် ဒဵုကဵုလၟုဟ် က္လေၚ်စဴကွာန်ဟွံမာန် နွံဒၟံၚ်ရ။
၅။ လကြဴအိုတ်ဏံ မုမိက်ဂွံထပ်ဟီုဗပေၚ် နွံရော ဟီုဗပေၚ်ကဵုညိ။
နကဵုတွဳဗွိုၚ်ကၟိန်ဍုၚ်နာနာတအ်ဂှ် မိက်ဂွံကဵုသ္ပဂရုပရေၚ်ညးပါဲဘဲပၞာန်တအ်ရ။ မိက်ဂွံကဵုကၠောန်ရေၚ်တၠုၚ်ရီုဗၚ်အထံက်အရီုပရေၚ်ရီုဗၚ် ဗ္စာရဏာပရေၚ်မၞိဟ် ချိုတ်တ်ပၠိုတ်တ်ရ။ အကာဲအရာပၞာန် ပ္ဍဲဍုၚ်ဗၟာဂှ် ဟိုတ်နူသာဇၞော်တိုန်ကၠုၚ်ဒၟံၚ်ဂှ်ရ လၟိဟ်ညးပါဲဘဲပၞာန်တအ်လေဝ် ဂၠိုၚ်တိုန်ကၠုၚ်ဒၟံၚ် အရိုဟ်ရိုဟ်တ္ၚဲရ။ ညးပါဲဘဲပၞာန်တအ်ဂှ် ဂွံက္လေၚ်စဴ ဌာန်ဒေသညးတအ်မံၚ်ဒၟံၚ်ဂှ် ဟွံလောဲဏီဂှ်ရ အရီုဗၚ်တအ်ဂှ် နကဵုအစဳဇန်ရီုဗၚ်ဍာ်ဇမၠိၚ်လေဝ် မိက်ဂွံကဵုကၠောန်ရေၚ်တၠုၚ်ကဵုရ။ အခိၚ်ရီုဗၚ်ကဵုလေဝ် နူကဵုပရေၚ်ကဵုရီုဗၚ် တတ်ကၠောံပယျဵုဒၞက်မွဲကဆံၚ် ဟိုတ်နူအာဒၟံၚ်တုဲ မိက်ဂွံကဵုဂလိုၚ်ပတိုန် ပရေၚ်တတ်ကၠောံပယျဵုဒၞက်ကဵုအရီုဗၚ်တအ်ရ။
ညးနွံဒၟံၚ်ပ္ဍဲဍုၚ်တအ်ဂှ် ပရေၚ်ရီုဗၚ်ညးပါဲဘဲပၞာန်ဂှ် အောန်ဒၟံၚ်ကွေံကွေံမွဲတဲ။ သွက်ညးပ္ဍဲဍုၚ်တအ် ဂွံစိုပ်အာ ဇရေၚ်ညးပါဲဘဲပၞာန်တအ်မာန် နူစကစ ဟိုတ်နူဘပဠတာဒၞာဒၟံၚ် ဗီုပြၚ်နာနာဂှ်လေဝ် ဒှ်ဒၟံၚ်နွံရ။ နကဵုဂကောံကုလသမဂ္ဂလေဝ် ပ္ဍဲအရာထ္ၜးညးဍုၚ်ကွာန် ပါဲဘဲပၞာန်တအ်လေဝ် ဒၟာနူအောန်နူလၟိဟ် မၞိဟ်နွံဒၟံၚ် ပ္ဍဲဗလးမုကတိဇေတ်တ်ဗွဲမဂၠိုၚ်ဂှ်ရ။ နကဵုညးတအ် အခိၚ်ပကောံပကေဝ်စရၚ်ဂှ်လေဝ် မိက်ဂွံကဵုကၠောန်ၜိုတ် ချိုတ်တ်ပၠိုတ်တ်ရ။
လၟိဟ်နွံဒၟံၚ်ပ္ဍဲဗလးမုက်တိဇေတ်တ်ကဵု လၟိဟ်မၞိဟ်ညးတအ်ပ္တိုန်ထ္ၜးလဝ်ဂှ် ဟိုတ်နူတၞဟ်ခြာဒၟံၚ်တုဲ ပရေၚ်ရီုဗၚ်ထံက်ပၚ်ကဵု လ္တူညးပါဲဘဲပၞာန်ကၟိန်ဍုၚ်နာနာတအ်ဂှ်လေဝ် ဟိုတ်နူသ္ပကဵုပရေၚ်ထံက်ပၚ်မာန်ဂှ်ရ နကဵုညးတအ် မိက်ဂွံကဵုစၟဳစၟတ် ကၠောန်ၜိုတ်ကဵု ချိုတ်တ်ပၠိုတ်တ်ဂှ် ပၟိက်နွံဒၟံၚ်ရဂှ် နကဵုပိုဲမိက်ဂွံဟီုဏာရ။