သ္ကိုပ်ဒပ်မဟာ ကေုာံသ္ကိုပ်ဗျူဟာ ဒပ်မဟာ (၄) ဒပ်မဟာ (၆) ဒပ်မဟာ (၇) ဒပ်ပၞာန်ဗၠးၜးကောန်ဂကူကရေၚ် KNLA မဒှ်ဂကောံရပ်လွဟ် သၟဝ်တဲဗော်သွးကောန်ဂကူကရေၚ် (KNU)တအ်ဂှ် ပ္ဍဲတုဲကၠုၚ်မွဲၜါတ္ၚဲဏံ ပြံၚ်သၠာဲခါန်ကၞက်ပ္တိုန်လဝ်ရ။ စပ်ကဵုအပြံၚ်သၠာဲ သ္ကိုပ်ဒပ်မဟာ KNLA (၃)တၠဏံဂှ် အပြံၚ်သၠာဲသွာၚ်ပၞာန် ဒှ်ကၠုၚ်မာန်ဟာ၊ အကာဲအရာပရေၚ်ပၞာန် အသိၚ်သၠုၚ်ဂၠိုၚ်တိုန်ကၠုၚ်မာန်ကီုဟာ၊ စပ်ကဵုကံၚ်ဇြဳပၞာန် ပ္တဝ်လဝ်ကဵုကောန်အရာပ် ဗတိုက်ဒၟံၚ်တအ်ဂှ်တုဲ ဆက်စၠောံသၟာန်လဝ်ကဵု ညးမၞုံအခေါၚ်ဟီုဂး KNU ပဒိုဝ်သဝ်တဝ်နဳရ။
၁။ စပ်ကဵုအပြံၚ်သၠာဲ သ္ကိုပ်ဒပ်မဟာ KNLA (၃) တၠတုဲဟီုလဴထ္ၜးကဵုညိ။
ကၠာဏံမိက်ဂွံဟီုဂှ် ကောံဓရီုသ္ကိုပ်ဒပ် KNLA လၟေၚ်တြဴဴဂိတုဟီုဂှ် ဟွံသေၚ်ပုဟ်။ ကောံဓရီုဂှ် ဍာံဍာံတေံ သ္ကိုပ်ဒပ် KNLA တအ် ဆဵုဂဗ ကောံဓရီုလဝ်ရ။ လ္တူပရိုၚ်အပြံၚ်သၠာဲ သ္ကိုပ်ဒပ်မဟာနွံဒၟံၚ် တိတ်ဒၟံၚ်လၟုဟ်ဂှ် ဗွဲတၟေၚ်တှ်ေ သွက်ဒပ်မဟာ (၄)ကဵု ဒပ်မဟာ (၆) ဒပ်မဟာ (၇)တအ် ခါန်ကၞက်လဝ် ကဆံၚ်သ္ကိုပ်ဒပ်မဟာဟီုဂှ် ဂွံညာတ်ကေတ်ဗီုဏံရ။ ယွံဍာံဒၟံၚ်ရ။ သ္ပဒ္တန်ဂွံဒၟံၚ်ရ။
၂။ ပ္ဍဲအပြံၚ်သၠာဲသ္ကိုပ်ဒပ်မဟာဂှ် ဗွဲတၟေၚ်တှ်ေ ပ္ဍဲသွာၚ်ချဳဒရာၚ်ပၞာန်ဏံ အပြံၚ်သၠာဲ ဗီုပြၚ်လဵု နွံကၠုၚ်မာန်ရော။ အသိၚ်ပရေၚ်ပၞာန် သာတုဲ သၠုၚ်ပ္တိုန်မာန်ဟာ။
ပရေၚ်ခါန်ကၞက်ပ္တိုန် သ္ကိုပ်ဒပ်မဟာဏံကဵု အကာဲအရာပၞာန် သွက်ဂွံသၠုၚ်ဂၠိုၚ်တိုန်ကၠုၚ်ဂှ် ဒှ်ကၠုၚ်တိုက်ရိုက်ဟွံသေၚ်ပုဟ် ထေၚ်ကေတ်ရ။ မုဒှ်ရောဟီုတှ်ေ အရာဏံဂှ် တုဲတဴကဵု မူဝါဒပိုဲရ။ မူဝါဒပိုဲဂှ် သောၚ်ကၠးဒၟံၚ်ရလေဝ်။ ကံၚ်ဇြဳပၞာန်ဏံ ဗွဲတၟေၚ်တှ်ေ ညံၚ်သၞောတ်တၠအဝဵုပၞာန် ဂွံပၠိုတ်အိုတ်အာဟီုတှ်ေ ဒးဗတိုက်ပ္တိတ်အာ နနဲကဲစုၚ်ဏောၚ်ဟီုဂှ် နွဒၟံၚ်တုဲတုဲရလေဝ်။ အရာဏံဂှ် ပရေၚ်ပၞာန်မွဲဓဝ်ဟွံသေၚ်ပုဟ်။ ပရေၚ်ဍုၚ်ကွာန်ကီု၊ ပရေၚ်ကၟာတ်လဒဵုကီု၊ ပရေၚ်ကလုတ်ကီု နကဵုနဲကဲစုၚ် ဇြဟတ် ညးဍုၚ်ကွာန်တအ်ကီု၊ အကာဲအရာ သွက်ဂွံလုပ်ပေါဲဗတိုက်ညးဍုၚ်ကွာန်ကီု ဒးပါလုပ်ဖအိုတ်ဏောၚ်လေဝ်။ နကဵုတၠုၚ်လအာညဳညဳ ပ္ဍဲကဏ္ဍနာနာ ပါလုပ် သီုပရေၚ်ပၞာန် ဒးသၠုၚ်ပတိုန်အသိၚ်သီုဖအိုတ်ဏောၚ်ဂှ် နွံဒၟံၚ်တုဲတုဲရ။ ဒၟာနူဂှ်ရ ခါန်ကၞက်ပ္တိုန် သ္ကိုပ်ဒပ်မဟာတၟိဗက် ကဵုအရာဏံ ဆက်စပ်ဒၟံၚ်တိုက်ရိုက်ဏောၚ်ဂှ် ဟီုဟွံမာန်ပုဟ်လေဝ်။ ကမၠောန်ဇကုဒးကၠောန်ဂှ် သွက်ဂွံဆက်ကၠောန်အာရ နွံဏောၚ်။
၃။ ပ္ဍဲဘာပန် ဟိုတ်နူကံၚ်ဇြဳပၞာန် ဂြာတ်ထောံဖျေံဗုမ် ကဵုက္ၜၚ်ကျာတုဲ အ္စာဘာ၊ ကွးဘာတအ် ဒးချိုတ် ဒးလဝ်ဘဲဝပ်ညးသ္ကအ်ရ။ စပ်ကဵုအကာဲအရာပ္တဝ်လဝ်ကဵု ကောန်အရာပ်တုဲ အကာဲအရာဒပ်ပၞာန် သာကၠောန်ကၠုၚ်ပရေၚ်ဗတိုက်ပန်ပှော်ဂှ်တုဲ မုမိက်ဂွံကလေၚ်ဟီုပလန် နွံရော။
ပ္ဍဲခရိုၚ်ဘာပန်ပိုဲကီု၊ လ္ပာ်ခရိုၚ်ညံၚ်လေဝ်ပေန်တေံကီု ပရေၚ်ဗတိုက်ကဵုလွဟ်ဇၞော် ဗတိုက်ဒၟံၚ်ကဵုက္ၜၚ်ကျာတအ်ဂှ် သာတုဲ ဗတိုက်ကၠုၚ်ရ။ ကြဴနူဒးဒုၚ်သီကေတ်ဗဒိုပ်တုဲ ပရေၚ်ဗတိုက်ပန်တအ် သာဂၠိုၚ်တိုန်ကၠုၚ်ရ။ တအ်ဏံဂှ် ဟွံဗတိုက်ပန်လေဝ် ဘာသာဍေံတအ် ဍေံတအ် က္တဵုကၠောန်ဒၟံၚ် နွံရ။ အခိၚ်ဗ္တံညာတ်လျးပၟတ်ဗက်ဂှ် ညပါဲပၞာန် နွံဏောၚ်၊ ကောန်ကွာန်တအ် နွံဏောၚ်ဂှ် ခ္ဍာၚ်ပန်ဏာ လွဟ်ဇၞော်ဟဂှ်ရ။ ပန်ဒၟံၚ် မွဲခနမွဲခနရ။ ဒၟာနူဂှ်ရ ကမၠောန်ပြဝဍေံတအ်ဂှ် ပေါဲဗတိုက်နွံ ကဵုဒှ်၊ ဟၟဲလေဝ် ကၠောန်ဒၟံၚ်ဗီုပြၚ်ဏံ အရိုဟ်ဟ်တ္ၚဲ ဒှ်ဒၟံၚ်ရ။
ဟိုတ်ဂှ်ရ ဍေံတအ်ဂှ် ဒှ်ညးက္လိလောန်ဒၟံၚ် ဒုဟ်ရာဇဝတ်ပၞာန် ပေၚ်ၚ်ရ။ စပ်ကဵုကိစ္စဏံတုဲ KNU ပိုဲလေဝ် ပ္တိတ်အာ တၚ်လလောၚ်တြးဏောၚ်။ ပရေၚ်ဗတိုက်ပန်ဒၟံၚ် ကောန်အရာပ်တအ်၊ ပရေၚ်ကောန်အရာပ်တအ် လီုလာ်ချိုတ်ဂျိုၚ်ဒၟံၚ်တအ်ဂှ် လလောၚ်ပ္တိတ်အာ တၚ်လလောၚ်တြးတုဲ ပိုဲလေဝ် မိက်ဂွံအာတ်မိက်ဂှ် ပရေၚ်ကေတ်အရေဝ် နတဲစှ်ေစှ်ေ နွံဒၟံၚ်ပၟိက်ဍာံဍာံရဟီုဂှ် ဘိုၚ်ကၟာတ်ဒၞာကဵု ကံၚ်ဇြဳပၞာန်တုဲတှ်ေ ညံၚ်ပရေၚ်ချဳဒရာၚ်ပၞာန် ပ္တဝ်ဒၟံၚ်ကဵုကောန်အရာပ်တအ် ဂွံဒေါံဒေၚ်အာမာန်ဂှ် တၚ်ဍေံတအ်ကၠောန်ရေၚ်တၠုၚ်ဒၟံၚ် ညံၚ်ဂွံကၟာတ်ဒၞာအာ နွံဒၟံၚ်ပၟိက်ဗွဲတၟေၚ်ရ။ ပရေၚ်ကေတ်အရေဝ်ကၟာတ်လဒဵု သာတုဲသ္ကာတ်မြဟ်တအ်ဂှ် နွံဒၟံၚ်ပၟိက်ကွေံကွေံရဏောၚ် အဲမိက်ဂွံဟီုရ။
၄။ ပရေၚ်ကောန်ဒပ်ကံၚ်ဇြဳပၞာန် လုပ်ကၠုၚ်ဖျေံဒၟံၚ်လွဟ် ပ္ဍဲဇရေၚ် KNU ဂှ် ဂွံညာတ်ကေတ်ဒၟံၚ်ရ။ စဵုကဵုဂိတုသေပ်တေမ်ဗာ သၞာံ ၂၀၂၃ သၞာံဏံ။ အကာဲအရာကောန်ဒပ်ကံၚ်ဇြဳပၞာန်တအ် လုပ်ကၠုၚ်ဖျေံဒၟံၚ်လွဟ်ဂှ်လေဝ် ၜိုတ်ဟီုဂွံ ဟီုထ္ၜးကဵုညိ။
ကောန်ပၞာန် လ္ပာစ်ကစတအ် လုပ်ကၠုၚ်ဒၟံၚ်ကီု ဖျေံဒၟံၚ်လွဟ်တအ်ကီု နာနာသာ်ရ။ လၟိဟ်မၞိဟ်ဂှ်တှ်ေ နွံဒၟံၚ် ဟွံပိုတ်သ္ကုတ်ရ။ ပိုဲဒးကၠိုဟ်လဝ်မွဲဂှ် ဖျေံလွဟ်လုပ်ကၠုၚ် နွံဒၟံၚ်ကီု လွဟ်လက်နက်ပါကဵုဒှ် ဟွံပါကဵု ဒစဵုဒစးကဵုအဝဵုတုဲ ကောန်ပၞာန်ဒှ်ဒၟံၚ်ဒတုဲဖိုလ် သွက်ပရေၚ်ပၠန်ဂတး နူကဵုနဲကဲဂၠံၚ်ဍာ်စုၚ်လေဝ် နွံဒၟံၚ်ဏောၚ်ဟီုဂှ် ပိုဲကၠိုဟ်လဝ်ရ။ ဗီုလဵုဒှ်ဒှ်ရ သွက်ဂွံဒတူလာၚ် လ္ပာ်ညးဍုၚ်ကွာန်ရ ပၟိက်ဇၞော်ဒၟံၚ်။ ယဝ်ရဒတူလာၚ်လ္ပာ်ညးဍုၚ်ကွာန်တှ်ေ ဒၞာဲလဵုမံၚ်မံၚ် ဒှ်ဒၟံၚ်အထံက်အရီု ပရေၚ်ပၠန်ဂတးဏောၚ်ဟီုဂှ် မိက်ဂွံကဵုဏာပရိုၚ်ရ။ ဟိုတ်ဂှ်ရ ပ္ဍဲအရာဗတိုက်သရိုဟ်သၞောတ်တၠအဝဵုပၞာန် နဲကဲစုၚ်ဂှ် ဗွဲမတၟေၚ်တှ်ေ ကောန်ဒပ်စကစတအ် ယဝ်ရကၠုၚ်ပံၚ်တောဲ သီုလွဟ်လက်နက်ဏောၚ်တှ်ေ ၜိုန်ရဒှ်အရာခိုဟ်အိုတ်ကီုလေဝ် အရာဏံ ဒှ်နဲကဲဂၠံၚ်ဍာန်ဏံ မွဲဂကူဓဝ်ဟွံသေၚ်ပုဟ်။ ဂၠံၚ်ဍာန်နဲကဲတၞဟ်သ္အာၚ်တအ်လေဝ် ကၠောန်သ္ပဂွံမာန်ဒၟံၚ် နွံဗွဲမဂၠိုၚ်ဏီ။ အကာဲအရာကၠောန်သ္ပမာန်ဂှ် ဆက်တုဲ ပိုဲကဵုအာဇြဟတ်ဏောၚ်။
၅။ အလန်လကြဴအိုတ်ဏံ စပ်ကဵုအကာဲအရာပရေၚ်ဍုၚ်ကွာန် ပရေၚ်ပၞာန်အခိၚ်လၟုဟ်တုဲ လ္တူညးဍုၚ်ကွာန်တအ် ယဝ်မိက်ဂွံဟီုကဵုသမ္တီ နွံတှ်ေ ဟီုထ္ၜးကဵုညိ။
ပရေၚ်ဍုၚ်ကွာန်၊ ပရေၚ်ပၞာန် ယဝ်ဒးဟီုတှ်ေ လ္ပာ်စကစဂှ် စိုပ်ဒၟံၚ်ကရေပ်ကွေံကွေံဏောၚ် ဂွံဆဵုကေတ်ရ။ ပရေၚ်ကၟာတ်လဒဵု ကၟိန်ဍုၚ်နာနာလေဝ် သီုဟွံထေၚ်လဝ်မွဲသာ် သာတုဲ ကၟာတ်ဒၞာကၠုၚ်ဒၟံၚ် တံရိုဟ်ပရေၚ်ဘဏ္ဍာဂှ် ဂွံညာတ်ကေတ်ရ။ ဟိုတ်ဂှ် ဇွိုန်လပှ်ပရေၚ်ပိုန်ဒြပ် လပိုက်လဝိၚ်ကၠုၚ်ဂှ် လ္တူညးဍုၚ်ကွာန်တအ်ကီု၊ လ္တူဍေံတအ်ကီု ညးနွံဒၟံၚ် ပ္ဍဲကၟိန်ဍုၚ်ဏံ ဒးဆဵုဂဗတွဵုရ ဆ္ဂးညံၚ်သၞောတ်တၠအဝဵုပၞာန် ဂွံဒေါံကၟိုၚ်စှ်ေ ပၟိက်ကိစ္စဇၞော်အိုတ်ဟီုဂှ်ရတှ်ေ ပိုဲတအ်ဒးဆေၚ်အာမုက်ကဵု အရာတံဏံ မွဲစွံဏောၚ်ဂှ်ရ။ အရာဏံဂှ် ညံၚ်သၞောတ်တၠအဝဵုပၞာန် ဂွံဒေါံကၟိုၚ်စှ်ေ ဒှ်ဒၟံၚ်အဓိကဂှ်ရ သွက်ပိုဲဂွံဆက်အာဂတတေံရ နွံ။ ဝါတ်ဂါတ်ခက်ခုဲ နွံလေဝ် ပိုဲဆုတ်ကလေၚ်ထောံဟွံဂွံပုဟ်ဟီုဂှ် မိက်ဂွံဗ္ကန်ဏာရ။ ပိုဲလေဝ် လုပ်အာပေါဲဗတိုက်မွဲစွံဏောၚ်ဂှ် မိက်ဂွံကဵုဏာ သမ္တီကၠးကၠးရ။