ပ္ဍဲမွဲကာလဒပ်ပၞာန်သီအဝဵုဏံ ညးဗြဴတအ်ဂှ် ဒးဒုၚ်ရပ်ဒက်ကဵုကံၚ်ဇြဳပၞာန် ဟွံဗဗွဲဓဝ်၊ ဒးဒုၚ်ပ္ကီုပရာပ်စပ်ကဵုလိၚ်၊ ဃောထ္ပက်ကရောၚ်ပၞာန် ဒးဒုၚ်ပြိုက်ဂစိုတ်လဝ် မပ္တံသာ်ဏံ ဒးဒုၚ်ဖံက်ပ္ကဝ်ဒၟံၚ် အခေါၚ်အရာမၞိဟ်ပရေံပရေံရ။ မွဲလ္ပာ်ပၠန်လေဝ် မၞိဟ်ဗြဴ ဗ္ဒာဲ ၃၅၀၀ တအ်ဂှ် ဒးဒုၚ်ရပ်စပ်ပ္ဍဵုပ္ဍိုက်ဒၟံၚ်ကဵု ကံၚ်ဇြဳပၞာန်တုဲ မၞိဟ်ဗြဴမ္ၚးထံၚ်စာတ်တအ်လေဝ် ဒးဂျိုၚ်တန်တဴဒၟံၚ် သီုကဵုပရေၚ်ဒှ်ဓဝိၚ် ဂွိၚ်စံၚ်တူရ။
ဟိုတ်ဂှ်ရ လက်ထက်ကံၚ်ဇြဳပၞာန်ဏံ စပ်ကဵုမၞိဟ်ဗြဴတအ် ဒးဒုၚ်ဆေၚ်ဒၟံၚ်မုက်ကဵု တၚ်အခက်ခုဲဝါတ်ဂါတ်ကီု၊ ပရေၚ်ဒးဒုၚ်ဖံက်ပ္ကဝ်ဒၟံၚ် အခေါၚ်အရာမၞိဟ်ကီု၊ ပရေၚ်ဒးဒုၚ်ပ္ဍဵုပ္ဍိုက်ပျဲပျာံ ပြိုက်ဂစိုတ်ဒၟံၚ်ကဵု ဒပ်ကံၚ်ဇြဳပၞာန် ကေုာံ အခန်ကဏ္ဍမၞိဟ်ဗြဴတအ်ပါလုပ်ဒၟံၚ် ပ္ဍဲပၠန်ဂတးက္ညၚ်တအ်တုဲ ဆက်စၠောံသၟာန်လဝ်ကဵု ဖက်ဆောညးအုပ်ကာနာနာ ဗော်လုဘောၚ်တေဝ်ဒဳမဝ်ကရေတ်တေတ် (DPNS) ဒဝ်နှေန်နှေန်မွှေရ။
၁။ ကၠာအိုတ်ဏံ ပ္ဍဲလက်ထက်ကံၚ်ဇြဳပၞာန်ဏံ စပ်ကဵုအကာဲအရာညးဗြဴတအ် ဒးဒုၚ်ပ္ဍဵုပ္ဍိုက်ဒၟံၚ်တုဲ ဟီုထ္ၜးကဵုညိ။ ပ္ဍဲကဵုဂှ် ညးဗြဴပါလုပ်ဒၟံၚ် ပ္ဍဲပၠန်ဂတးက္ညၚ်တအ်ဂှ် ဗီုပြၚ်လဵု ဒးဆေၚ်ဒၟံၚ်မုက်ကဵု အကာဲအရာတၚ်ခက်ခုဲရော။
ပ္ဍဲပၠန်ဂတးက္ညၚ် ဒၞာဲဒစဵုဒစးချဳဒရာၚ်ပၠန်ဂတးကဵု တၠအဝဵုပၞာန်ဂှ် ပရေၚ်ညးဗြဴတအ်ပါလုပ်ဂှ် ပ္ဍဲကဵုပၠန်ဂတးကၠာတေံ ဒၟာနူပါလုပ်ဒၟံၚ်ဟာဂှ် ဟွံတီပုဟ်။ လၟုဟ် က္ဍိုပ်သ္ကိုပ်ညးဗြဴ မံက်ဂတဝ်ပြာကတ်ဒၟံၚ်တအ်၊ က္ဍိုပ်သ္ကိုပ်ညးဗြဴ ပါလုပ်ကၠောန်ဒၟံၚ် ပ္ဍဲပရေၚ်ဍုၚ်ကွာန်တအ် မံက်တိတ်ကၠုၚ် ဗွဲမဂၠိုၚ်ရ။ အရာဏံဂှ် နူကဵုကံၚ်ဇြဳပၞာန် ညးဗြဴတအ်ပါလုပ်ဒၟံၚ်ဗီုဏံဂှ် နကဵုဍေံတအ် ဗီုပြၚ်အေၚ်ဒုၚ်မာန် ဟၟဲပုဟ်။ မၞိဟ်ဗြဴတအ်ပါလုပ်ဒၟံၚ် ပ္ဍဲပရေၚ်ပၠန်ဂတးဂှ် ဗီုပြၚ်ကံၚ်ဇြဳပၞာန်အေၚ်ဒုၚ်မာန်ဟၟဲပုဟ်။ မုဒှ်ရောတှ်ေ လစွံစိုတ်ဂကောံပၞာန်ဂှ် ဂိုၚ်ရပ်လဝ် ဝါဒမဟာကၟက်ရ။ ဝါဒဳပၞာန်ဟီုဂှ်လေဝ် ဒှ်လစှ်ေအရာဏံ မွဲသာ်ကီုရ။ ပရေၚ်ညးတြုံတအ် အုပ်ဓလီုလဝ်နွံတုဲ ညးဗြဴတအ်ဂှ် ပ္ဍဲကဵုကဆံၚ်ဒုတိယလေဝ် ဟွံသေၚ်တုဲ ဒးပ္ဍဵုပ္ဍိုက်လဝ်ဏောၚ်ဂှ် ကသပ်ဗီုဏံ နွံဒၟံၚ် ပ္ဍဲဍေံတအ်ဏောၚ် အဲဂှ်တှ်ေ ညာတ်ကေတ်လဝ် ဗီုဏံရ။ ပ္ဍဲကဵုဒၞာဲညးဗြဴတအ် ပါလုပ်ဒၟံၚ်ဗီုဏံ ဟွံဒုၚ်တဲတုဲ မုပဂွံဒစဵုဒစးကဵုဍေံတအ်ဂးတုဲ ပရေၚ်ပ္ဍဵုပ္ဍိုက်ဒၟံၚ် သ္ကာတ်တ်မြဟ်ဟ်ဂှ် ဂွံညာတ်ကေတ်ရ။
ပ္ဍဲပရေၚ်စၟဳစၟတ်ကဵုဒှ်၊ ပ္ဍဲဒၞာဲဒေသဍေံတအ်ထ္ပက်ပၞာန်ကဵုဒှ်၊ ပ္ဍဲဒၞာဲဗီုပြၚ်တအ်ဏံ လ္တူညးဗြဴတအ်ဂှ် ပရေၚ်ကၠောန်သ္ပဒၟံၚ် သွာၚ်စိုတ်ဓာတ် လတူညးဗြဴတအ်လောန်လောန်ကာဲကာဲ၊ က္လိလောန်ဒၟံၚ် သီုဂဗုတ်ဂြိုဟ်ပလီုကောန်သမ္ဘာဂှ်လေဝ် ပိုဲဂွံမိၚ်ကေတ်ဒၟံၚ်ရ။ ဒၟာနူအကာဲအရာ ရုပ်ဝတ္ထုညးဗြဴတအ် ဍိုန်လျ ဒးဟီုဟာဟွံတီရ ပ္ဍဲလ္တူဏံ သ္ပမာန်တုဲ က္လိလောန်ဒၟံၚ် အရာဏံပရေံပရေံဂှ်လေဝ် ပိုဲဂွံမိၚ်ကေတ်ဒၟံၚ်ရ။
၂။ လ္တူညးဗြဴတအ်ဂှ် မုဟိုတ်ကံၚ်ဇြဳပၞာန် ဂွံပ္တဝ်လဝ် ပတုပ်ကဵုညးတြုံတအ်တုဲ ဂွံပ္ဍဵုပ္ဍိုက်ဒၟံၚ် ညာတ်ကေတ်ရော။ လ္တူဏံ သဳကၠဳထ္ၜးကဵုညိ။
ညးဗြဴပါလုပ်ဒၟံၚ် ပ္ဍဲသွာၚ်က္ဍိုပ်သ္ကိုပ်တအ်လေဝ် ဂကောံပၞာန်ဂှ် ဟၟဲပ္ဍဲတဲဍေံတအ်ပုဟ်။ အကာဲအရာလုက်စုက်ဒး ဟွံဂွံပုဟ်ဟီုတှ်ေ ဖျေံသိက္ခာ နူကဵုအောန်လာၚ်ကီု၊ သုၚ်စောဲဗီုပြၚ်ပျုက်ဗ္ဒေက်ဂဝဵုဂဝိုက်နာနာသာ်တုဲ ဟီုဂးစောတ်စောဲဒၟံၚ်ကီု၊ ကၠောန်ဒၟံၚ် ပရေၚ်တြးဝါဒ ဗီုပြၚ်နနာနာဂှ် ပိုဲဂွံဆဵုကေတ်ရ။ ၜိုန်ရဟၟဲ ပ္ဍဲသွာၚ်က္ဍိုပ်သ္ကိုပ်ကီုလေဝ် ညးဗြဴပ္ဍဲကွာန် ပါလုပ်ဒၟံၚ် ပ္ဍဲပရေၚ်ဒစဵုဒစးကဵုဍေံတအ်လေဝ် ယဝ်ရထ္ပက်ကရောၚ်ပၞာန်တှ်ေ ဂြိုဟ်ပလီုပလာ်တုဲ ကိစ္စဂစိုတ်ထောံတအ်ဂှ်။ ဂစိုတ်ထောံလဝ် ၜိုန်ဟီုကီုလေဝ် စံၚ်ဂစိုတ်ထောံကဵုပၟတ် ဓဇန်ဓဇန်ကြာန်န်တအ်ဂှ် ပ္ဍဲကဵုပရိုၚ်ဂွံမိၚ်လဝ် ခြာဟွံလအ်ဏံမွဲဂှ် လုပ်တ္ၚီုက္ဍိုက်ဗတိုက် ဗဒိုပ် PDF မွဲဗဒိုပ်တုဲ သ္ဂံၚ်ဗြဴ ပ္ဍဲဗဒိုပ်ဂှ် ဂြိုဟ်ပလီုလဝ်တုဲတှ်ေ ညံၚ်ဂွံတီ ဒဒှ်ရဂြိုဟ်ပလီုလဝ်ဂှ် သၠောတ်ပ္တိတ်လဝ် သီုဗွိုက်လတက်တုဲ သ္ဂံၚ်ဂစိုတ်လဝ် သှ်ေဒၟံၚ်ဂှ် စံၚ်ထောံပၟတ်တုဲ ညးဗြဴမွဲဂှ်တှ်ေ ဟွံစံၚ်စွံ လဝ်အတိုၚ်ဂှ်ရ။ ဂကောံပၞာန်ဂှ်တှ်ေ ညးဗြဴမၞုံဒၟံၚ် ပ္ဍဲသွာၚ်က္ဍိုပ်သ္ကိုပ်ကဵုဒှ်။ ညးဗြဴနွံဒၟံၚ် ဒၞာဲလဵုဒှ်ဒှ်ရ။ မၞိဟ်ဗြဴတှ်ေတုဲ အကာဲအရာဍေံတအ်က္လိလောန်လဝ် ဓဇန်ဓဇန်ကြာန်န်ဂှ် ပိုဲဂွံညာတ်ကေတ်ဒၟံၚ်ရ။
၃။ NUG လေဝ် သွက်ပွပ္ကီုပရာပ်ဆေၚ်ကဵုလိၚ် ဒပ်ကံၚ်ဇြဳပၞာန် လ္တူညးဗြဴတအ်ဂှ် ပလံၚ်လဝ်လိက်တေၚ်ဗစိုပ် ဇရေၚ် ယန္တရာကုလသမဂ္ဂ ပရေၚ်စၟဳစၟတ်ဗၠးၜး ဆေၚ်ကဵုကၟိန်ဍုၚ်ဗၟာ (IIMM)ရဂှ် ဂွံမိၚ်ကေတ်လဝ်ရ။ နကဵုညးတအ်လေဝ် ၜိုတ်ဂလိုၚ်လဵု ကၠောန်ရေၚ်တၠုၚ်ကဵုမာန်ဏောၚ် ညာတ်ကေတ်ရော။
ပလံၚ်လဝ်လိက်ဂှ် ကမၠောန်ခိုဟ်မွဲရ။ ပရေၚ်ဂၠိုက်ဂၠာဲစၟဳစၟတ် ဗၠးၜးတအ်ဂှ်တှ်ေ ဆလအ်ကၠောန်မာန်၊ ကၠောန်ဟွံမာန်ပုဟ်ဟီုဂှ် ပိုဲ ဟီုဟွံမာန်။ ဆ္ဂး ထပ်တုဲမိက်ထပ်ဂွံဟီုဗပေၚ်ကဵုဂှ် ပ္ဍဲကာလဏံ အရာဒးအောန်စိုတ်မွဲဂှ် ညးဒးဒုၚ်က္လိလောန် ဆေၚ်ကဵုလိၚ်တအ်ဂှ် မၞိဟ်ဗြဴတအ်သၟးဟွံသေၚ်တုဲ ကောန်ၚာ်တအ်၊ LGBT တအ်၊ တုဲပၠန် လ္တူမၞိဟ်တြုံတအ် က္လိလောန်ဒၟံၚ်ဂှ်လေဝ် ဂွံတီကေတ်ရ။
အရာဏံ ဒှ်ကိစ္စထေက်ကဵုဒးဖေက်ဂၟံက်ဇအိုန်ဇရလောန်မွဲရဂှ်လေဝ် ပိုဲပတှ်ေလဝ်ရ။ သွက်ညးဒးဒုၚ်ကလိလောန်တအ်ဂှ် စၟတ်သမ္တီ နွံဒၟံၚ်ဟီုတှ်ေ ဒှ်ကိစ္စခိုဟ်ရ။ ဆ္ဂးလေဝ် တၚ်ကၠောန်ရေၚ်တၠုၚ် စိုပ်တရဴတအ် ညံၚ်ဂွံနွံဂှ် နကဵုပိုဲ ပတှ်ေကေတ်လဝ်ရ။ ပူဂဵုဂကောံ က္လိလောန်ဒၟံၚ်ဗီုဏံတအ်ဂှ် ဗီုပြၚ်လဵု ကဵုအာဒုဟ်ဒဏ်မာန်ရော။ ဗီုပြၚ်လဵု စဵုဒၞာကဵုမာန်ရော။ ဗီုပြၚ်ဏံလေဝ် ဒးဖျေံပိုၚ်ခြာလဝ်ထေက်ရ ညးက္လိလောန်လဝ် ဒုဟ်ဒဏ်၊ ဂကောံတအ်ဂှ်လေဝ် ဒုဟ်ဒဏ် ကြိုက်ကဵုဒုဟ်ဒဏ်ကလိလောန်လဝ်ဂှ် ဒးကဵုအာ ဗီုပြၚ်မာန်ဏောၚ်ဂှ် ပတှ်ေကေတ်လဝ်ရ။
ဗီုဂှ်ဟွံသေၚ်တှ်ေ ပ္ဍဲကဵုတွဳဗွိုၚ်ပိုဲ ဗွဲတၟေၚ်တှ်ေ ဒုဟ်ဒဏ်ဒပ်ပၞာန်က္လိလောန်လဝ်ဗီုဏံဂှ် ဂၠိုၚ်ကဵုလ္ၚီ ဂၠိုၚ်ကဵုလက် ကိစ္စဒှ်ဒၟံၚ်ရ။ ဆ္ဂးအခိၚ်လဵုလေဝ် စပ်ကဵုအရာတအ်ဏံတုဲ ရေၚ်တၠုၚ်ကဵုလဝ် ပရေၚ်ဗဗွဲဓဝ် ဟၟဲလဝ်ပုဟ်။ ဂွံလဝ်အခေါၚ်ဗၠးတိတ်ဒၟံၚ် နူကဵုဒုဟ်ဒဏ်ရ။ ဍေံတအ်ဂှ် က္လိလောန်ဒၟံၚ်ဒုဟ်ဒဏ်တအ်ဏံ ထပ်ကဵုထပ်ရ။ ကၠဵုကိတ်လေပ်ဒၟံၚ်ဂှ် ယဝ်ဟွံတက်တှ်ေ လကြဴဍေံကိတ်ပၠန်ရ။ ကြက်အရေဝ်ဏံ ၜိုန်ရရိုၚ်လေဝ် ရိုၚ်ဏောၚ်။ ဆ္ဂးအကာဲအရာဏံ ဒှ်ဒၟံၚ်ဍာံဍာံရ။ ဟိုတ်ဂှ်ရ ညံၚ်ဟွံဂွံထပ်ကလိလောန်ဒုဟ်ဒဏ် ဗီုပြၚ်ဏံပၠန်ဂှ် ပိုဲတအ်ဂှ် ညံၚ်ဟွံဂွံထပ်က္လိလောန်ပၠန်ဂှ် ဒးဘိုၚ်ပ္တိတ်ဇြဟတ် ဏောၚ်မိက်ဂွံဟီုဏာရ။
၄။ ကံၚ်ဇြဳပၞာန် ပ္တဝ်လဝ်ကဵု ညးဗြဴတအ်တုဲ ညံၚ်စိုတ်ဖေက်ဂွံဒှ်ကၠုၚ် လ္တူသွာၚ်ဍဵုဍိုက်ဒၟံၚ်ဂှ် ပရေၚ်ချဳဒရာၚ်ကတိုၚ်ကၟဟ်ညးဗြဴတအ် ဒးဆောံလေၚ်အာ ပေၚ်ၚ်ယျဟာ။ ပရေၚ်ချဳဒရာၚ်ညးဗြဴ သၟဝ်တဲဍေံတအ်ဂှ် အကာဲအရာဗီုပြၚ်လဵုနွံရော။
ပ္တဝ်လဝ်ကဵု ညးဗြဴတအ်တုဲ ညံၚ်ဂွံဖေက်လကိုတ် ကၠောန်သ္ပဍဵုဍိုက်ဒၟံၚ်ဟီုဂှ် ကသပ်လညာတ်ဍေံတအ် ဗၠေတ်ဒၟံၚ် မှာဒၟံၚ်ယျဂှ် မိက်ဂွံဟီု ဗီုဏံရ။ ဂွံညာတ်ကေတ်ဒၟံၚ် နတဲရလေဝ်။ ညးချဳဒရာၚ်ကတိုၚ်ကၟဟ် ညးဗြဴကဵုဒှ်၊ သၟာပရေၚ်ဍုၚ်ကွာန်ကဵုဒှ်၊ ကမၠောန်ဇကုဒးကၠောန်ဂှ်တှ်ေ ဆက်တုဲ ကၠောန်ကဵုဒၟံၚ်ဂှ် ဍာံဍာံရ။ ကိစ္စကလိလောန်ဂြိုဟ်ပလီုလ္တူဇကုဗီုဏံ၊ ကိစ္စဍဵုဍိုက်ကၠုၚ်ဂှ် ပိုဲသ္ပသတိတုဲတှ်ေ ဗီုပြၚ်လဵု ဂွံစဵုဒၞာအာညးသ္ကအ်ရော။ ညးဍုၚ်ကွာန် မၞုံဒၟံၚ်တွဵုဗွိုၚ်ဇကု ဂၠိုၚ်လ္တူဏံတအ်ဂှ် ခံက်တဲညးသ္ကအ်တုဲ ကဵုသတိညးသ္ကအ် စဵုဒၞာမၚ်မွဲဒၟံၚ်ညးသ္ကအ်ရ။
ကၠောန်ဒၟံၚ်ဗီုပြၚ်ဏံ ညးသ္ကအ်ရ။ တုဲမွဲတၚ်ပၠန်ဂှ် ဒးကျဆောံအာဟီုဂှ် ဟွံဂွံဆဵုလဝ်လးလးရ။ ကမၠောန်ဒးကၠောန်နွံဒၟံၚ်ဂှ် ဆက်ကၠောန်ဒၟံၚ် ညးသ္ကအ်အိုတ်ရ။ နူကဵုကံၚ်ဇြဳပၞာန် ပ္တဝ်လဝ်ကဵု ညးဗြဴတအ်တုဲ ညံၚ်စိုတ်ဖေက်ဂွံဒှ်ကၠုၚ် ၜိုန်ရပရေၚ်ဍဵုဍိုက် နွံကီုလေဝ် ညးဗြဴညးချဳဒရာၚ်ကတိုၚ်ကၟဟ်တအ်ဏံကဵုဒှ်၊ သၟာပရေၚ်ဍုၚ်ကွာန်တအ်ကဵုဒှ် ကမၠောန်ဒးကၠောန်နွံဒၟံၚ်ဂှ် ဆက်ကၠောန်ဒၟံၚ် ညးသ္ကအ်ရ။ အန္တရာယ်ဗီုပြၚ်ဏံ ညံၚ်ဟွံဂွံဒှ်ကၠုၚ် ပ္ဍဲတွဳဗွိုၚ်ဇကုဂှ် စွံသတိဇၞော်ဇၞော်တုဲ အရာဒးကၠောန်ဂှ်တှ်ေ အတိုၚ်ကၠောန်ဒၟံၚ်ဂှ်ရ ဆက်ကၠောန်ဒၟံၚ်ဏောၚ်ဂှ် မိက်ဂွံဟီုဏာရ။
၅။ စပ်ကဵုပရေၚ်ကၟိန်ဍုၚ်ဗၟာတုဲ ကၟိန်ဍုၚ်ပလိုတ်တအ် ပါလုပ်သီုကၟိန်ဍုၚ်ပံၚ်ကောံအမေရိကာန်တအ် ပရေၚ်ထံက်ပၚ်၊ ပရေၚ်ထ္ၜလဘာ် ပ္ဍဲပရေၚ်ချဳဒရာၚ်ညးဗြဴကၟိန်ဍုၚ်ဗၟာဂှ် အကာဲအရာဂွံဇြဟတ် နွံဒၟံၚ်ဏောၚ် ဟီုစမာန်ဟာ။
စပ်ကဵုပရေၚ်ခချဳဒရာၚ်ပိုဲတုဲ ပါလုပ်သီုအမေရိကာန်ရ။ နူကဵုကၟိန်ဍုၚ်တၞဟ်တအ် ကၟိန်ဍုၚ်လဵုဟွံဟီု ကိစ္စထံက်ဂလာန်တအ်ဂှ်တှ်ေ ဒှ်ကိစ္စခိုဟ်မွဲရ။ ဟွံပံၚ်ကဵုဂကောံပၞာန်တုဲ ညံၚ်အယုက်ဂကောံပၞာန်ဂွံဂၠိၚ် ဟွံသ္ပဒၟံၚ်ပုဟ်တှ်ေ ဒှ်ကိစ္စ ဒးဒုၚ်တၠုၚ်ရ။ လညာတ်အဲဂှ်တှ်ေ ကဵုဒၟံၚ်ဇြဟတ် ပရေၚ်ပၠန်ဂတးရ။ ပ္ဍဲသွာၚ်ပရေၚ်ထံက်ဂလာန်ဂှ်တှ်ေ ၜိုတ်သွာၚ်ညးတအ် သ္ပမာန်ရ ကၠောန်ဒၟံၚ်ဂှ်တှ်ေ ပၠန်ဂတးညံၚ်ဂွံအံၚ်ဇၞး ဒးကၠောန်ဂှ် အလဵုဇကုပိုဲ ဒးကၠောန်ကေတ်ရ။ ပရေၚ်ထံက်ပၚ်ဍုၚ်သ္အာၚ်ဂှ်တှ်ေ လစှ်ေမွဲ မွဲလစှ်ေရ ဟိုတ်နူဒှ်ဒၟံၚ်တုဲ သွက်အရာဏံ ပိုဲစၟဳပတှ်ေဒၟံၚ်လေဝ် ဟွံဂွံပုဟ်။ ဒးကၠောန်ကေတ် အလဵုပိုဲဏောၚ်ကမၠောန်ဂှ် ကၠောန်အလဵုဇကုချိုတ်တ်ပၠိုတ်တ်မှ ပၠန်ဂတးပိုဲ ဂွံဂွံပေါဲအံၚ်ဇၞးမာန်ဏောၚ် အဲဂှ်တှ်ေ ပတှ်ေကေတ်လဝ်ဗီုဏံရ။
၆။ ကြဴနူဒပ်ပၞာန်သီအဝဵုတုဲ အခေါၚ်ကမၠောန်ညးဗြဴတအ် ကၠောန်မာန် ၜိုတ်ဂလိုၚ်လဵု အောန်ယအ်စှ်ေအာရော။ လ္တူဏံ သ္ၚဳဂၠိပ်ထ္ၜးကဵုညိ။
ကြဴနူသီကေတ်အဝဵုတုဲဂှ် အကာဲအရာကၟိန်ဍုၚ်ပိုဲ စိုပ်အာအကာဲအရာကၟိန်ဍုၚ်ဟောံဗြီု ဇေတ်တ်ရ အဲညာတ်ကေတ်ရ။ ဒၞာဲလဵုဟွံဟီု ပရေၚ်စဳမာန်ဖန်ဇန် ဂွံတှ်ေတုဲ နကဵုယန္တာရာဟွံအံၚ်ဇၞးတအ် အာဒၟံၚ်ရ။ သွက်ညးလဵုမွဲလေဝ် တၚ်ဒုၚ်လျိုၚ်ဟၟဲပုဟ်လေဝ်ဏး။ ဇေတ်တ်တေံဂှ် ပ္ဍဲကဵုကမၠောန်အလဵုအသဳကဵုဒှ်၊ ပ္ဍဲကမၠောန်ပုဂ္ဂလိကကဵုဒှ်၊ ပ္ဍဲဌာနပုဂ္ဂလိက ဇကုဇကုကဵုဒှ်၊ ပ္ဍဲကဵုကမၠောန်ဇကုဇကုကဵုဒှ်၊ အရာရေၚ်တၠုၚ်ကၠောန်ဂှ်တှ်ေ ဗီုပြၚ်လဵုလေဝ် တၚ်ဒုၚ်လျိုၚ်ဟၟဲပုဟ် ပိုဲဂွံဆဵုကေတ်ဒၟံၚ်ရ။ ပရေၚ်ဒဒှ်နတဲတအ် ယဝ်ရံၚ်လေဝ် တီကေတ်မာန်ရ။ ပရေၚ်သြန်ဖောဝ် လၟုဟ်တှ်ေ လ္တူနူကဵုအခိၚ်သီအဝဵုတေံ တိုန်ကၠုၚ်ဒၟံၚ် ဂၠိုၚ်ကဵုချတုဲ ပ္ဍဲကၟိန်ဍုၚ်ဂှ် သွက်ဂွံဂွံကၠေၚ် ၜိုတ်လျိုၚ်ကပါ်ဂှ် စဵုကဵုအကာဲအရာဒးရေၚ်ဒၟံၚ် ပ္ဍဲကဵုတ္ၚဲကာတ်တ် ဂၠိုၚ်ကဵုမိုၚ်ဂှ် အကာဲအရာပရေၚ်ပိုန်ဒြပ်လေဝ် ဟုတ်ယုတ်စှ်ေအာရ။ ညးဗြဴနွံဒၟံၚ် ပ္ဍဲဗွိုၚ်ကမၠောန်တအ်ကဵုဒှ် ညးတြုံတအ်ကဵုဒှ် အန္တရာယ်လမျီုကဵု ပရေၚ်ဂီုကၠီုဟၟဲဂှ် ပိုဲဂွံဆဵုကေတ်ဒၟံၚ်ရ။
၇။ လကြဴအိုတ်ဏံ မုမိက်ဂွံထပ်ဟီုဗပေၚ် နွံဏီရော။ ဟီုဗပေၚ်ကဵုညိ။
ပ္ဍဲကဵုကၟိန်ဍုၚ်ပိုဲဂှ် လုကဴရိုဟ်ကၞက်ဂကောံပၞာန်ဏံ ဟွံပိုတ်ဏီ လုကဴပိုဲဒက်ပ္တန် ကၟိန်ဍုုၚ်ပံၚ်ကောံဖေတ်ဒရေဝ်ဒဳမဝ်ကရေဇြဳ ဟွံမာန်ဏီတှ်ေ ပရေၚ်ဒဒှ်ပရေံပရေံဗီုဏံ အကာဲအရာပရေၚ်ဂီုကၠီုဟၟဲ အခိၚ်တိက်ဗ္တံလေဝ် အခိၚ်လဵု ကၠုၚ်ခဍံက်တြၚ်ရော ဘဝဒးဖေက်ဂၟံက်ဒၟံၚ်ဂှ် ဆလအ်လေဝ် တုဲဒှ်အာ ဟွံသေၚ်ပုဟ်။ ဟိုတ်ဂှ်ရ က္ဍိုပ်သ္ကိုပ်ပၠန်ဂတးတအ် ဂကောံပရေၚ်ဍုၚ်ကွာန်တအ် က္ဍိုပ်သ္ကိုပ်ပရေၚ်ဍုၚ်ကွာန်တအ်ကဵုဒှ် ညးဍုၚ်ကွာန်တအ်ကဵုဒှ် သီုညးဖအိုတ်ဂှ် အခိၚ်လၟုဟ်ဏံ ညံၚ်ရိုဟ်ကၞက်ဂကောံပၞာန် ဂွံပိုတ်သ္ကုတ်အာ အခိၚ်ဗီုလၟုဟ်ဏံ ဘိုၚ်ကၠောန်ရေၚ်တၠုၚ် သီုညးဖအိုတ်ဟေၚ်မှ ဂွံတိတ်ဗၠးနူ ကဵုအကာဲအရာပရေံဏံမာန်ဏောၚ်ဂှ် အဲမိက်ဂွံဟီုဏာရ။