သွက်ဂွံသောၚ်ကလးအာ အခက်ခုဲပရေၚ်စသုၚ်မံၚ်စံၚ် ဂကောံဇြဟတ်ပၠန်ဂတး ဒးလုပ်ဗ္ဒာဲဒလာဲဒၟံၚ် ပ္ဍဲဍုၚ်မာဲချံက်၊ ကၟိန်ဍုၚ်သေံ ဟိုတ်နူပရေၚ်ကံၚ်ဇြဳပၞာန်သီအဝဵု ပ္ဍဵုပ္ဍိုက်တအ်ဂှ် သွံကဵုဒၟံၚ်ပုၚ် မွဲဗဂါပ် ၁၅ ၝာတ်ရ။ စပ်ကဵုအကာဲအရာ စဒှ်ကၠောန်ကၠုၚ် အစဳဇန်ပုၚ်မွဲဗဂါပ် ၁၅ ၝာတ်ကီု၊ လၟုဟ်ဏံ သွံကဵုဒၟံၚ် မၞိဟ်ကဆံၚ်လဵု ဗွဲအဓိကရောကီု၊ အခက်ခုဲဒးဆေၚ်ဒၟံၚ်မုက်ကီုတအ်ဂှ်တုဲ ဆက်စၠောံသၟာန်လဝ်ကဵု ညးတာလျိုၚ် နူဂကောံ ပုၚ်မွဲဗဂါပ် ၁၅ ၝာတ် ဇြယာကျောၚ်(မျေန်ချာန်)ရ။
၁။ ကၠာအိုတ်ဏံ စပ်ကဵုအကာဲအရာ ဂွံဒးဒက်ပ္တန်လဝ် ဂကောံပုၚ်မွဲဗဂါပ် (၁၅)ၝာတ်တုဲ ဟီုလဴထ္ၜးကဵုညိ။
သွက်ပရေၚ်စသုၚ်မံၚ်စံၚ်သ္ဇိုၚ် သ္ဂံၚ်ဘဝတုပ်သၟဟ်တအ် ဂကောံလ္ၚဵုတအ် ကဵုဒၟံၚ်အရီုဗၚ်တအ်ဂှ်တှ်ေ ဂကောံပိုဲဂှ် ညံၚ်ပရေၚ်စသုၚ်ဂွံပြေပြံၚ် ချပ်လဝ် သွက်ညးယိုက်ဝန် CDM ဘဝတုပ်၊ သ္ဂံၚ်ဘဝတုပ်တအ် ဂွံပြေပြံၚ်တုဲ ဂကောံဏံဂှ် နကဵုသြန်တမ် သ္ဂံၚ်အဆက်ဆေန်တြေံတအ် မွဲမွဲတၠ သြန်ၝာတ် ၜိုတ်မွဲကိုတ် စဒှ်ကၠောန်လဝ်ဂကောံဏံရ။
၂။ မုဟိုတ်ဂကောံပုၚ်မွဲဗဂါပ် (၁၅) ၝာတ် ဂွံဒှ်ကၠောန်လဝ် သွက်ဂွံကၠောန်ကဵု အရၚ်ဂကောံဇြဟတ်ပၠန်ဂတးတအ်ရော။
ၜိုတ်အခိၚ်အတးလောန်တုဲဂှ်တှ်ေ ပိုဲစှ်ေတိဍာ်ချိုတ်တ်ပၠိုတ်တ်တုဲ ဃောပကောံပကေဝ်ဒၟံၚ် တၚ်ဂၞၚ်ဂှ် ၜိုတ်အတးလောန်ဂှ် သ္ဂံၚ်လ္ၚဵုတအ် ၊ နူကဵုဂကောံလ္ၚဵုလ္ၚဵုဂှ် အစဳဇန်ပရေၚ်ပါ်ပရအ်ဇွောံမတအ် လဇုဲလဇအာရ။ ဟိုတ်ဂှ်ရ သွက်သ္ဂံၚ်ဘဝတုပ်တအ် ဂွံသၠဲလးသက်သာညိဂှ် ပိုဲကၠောန်ကဵု မမိက်ကဵုမွဲမွဲစိုအ် ၜိုတ်မာန်ကဵုမာန် ကၠောန်စိုအ်ဟီုတုဲ ပုၚ်မွဲဗဂါပ် ၁၅ ၝာတ်ဟီုဏံ ဒှ်ကၠောန်လဝ်ရ။ နူပထမတေံဂှ်တှ်ေ စဵုကဵု ၁၀ သွက်ဂွံသွံပုၚ်မွဲဗဂါပ် စဵုကဵု ၁၀ ၝာတ် ပ္တိတ်လဝ်ဇြဟတ်ရ။ အရာဏံဂှ် ဂွံမွဲဂိတုၜါဂိတုတုဲ ဒေါံညိၚ်အာတှ်ေ ဟွံဒှ်ပုဟ်ဂးတုဲ သွက်ပိုဲဂွံသွံ ပုၚ်မွဲဗဂါပ် ၁၅ ၝာတ် မွဲသတ္တာမ္ဂး ၜါတ္ၚဲမာန်ဂှ်။ ပ္ဍဲကဵုဂှ် ပိုဲစွံအဓိက မိက်ဂွံသွံဂှ်တှ်ေ သ္ဂံၚ်ပိုဲ၊ သ္ဂံၚ်နူကဵုဗွိုၚ်ပရေၚ်ဍုၚ်ကွာန်တအ်၊ သွက်ညးယိုက်ဝန် CDM တအ် စွံအဓိကတုဲ ညံၚ်ဂွံသွံကဵုမာန်ဂှ် ပ္တိတ်လဝ်ဇြဟတ်ရ။
မမိက်ကဵုမွဲမွဲ ဟွံကၠဟ်စွံလဝ် လ္တူညးတအ်ပုဟ်။ ညံၚ်အကာဲအရာဟွံကၠဟ်ထောံလဝ်ညးတအ် ဂွံမံက်ဂတဝ်ဂးတုဲ နကဵုသြန်ဂအုံပိုဲ ၜိုတ်သ္ပမာန် ဇၟာပ်ပ်ညးအဲ ဟေန်ဆာဲပံၚ်ပကောံတုဲ မွဲသတ္တာဟမ္ဂး စဵုကဵုၜါတ္ၚဲ သွံကဵုဒၟံၚ်ရ။ အခိၚ်သွံဂှ် ဟွံကေတ်ၚုဟ်ပလံၚ်တုဲ ဗ္ကန်မွဲထိုၚ်ဓဝ်လေဝ် ပလံၚ်ကဵု စဵုစိုပ်သ္ၚိရ။ သ္ဂံၚ်နွံပၟိက်ဇေတ်တ်ဂှ်တှ်ေ ဗ္ကန်ကေတ် ပ္ဍဲကဵုမေတ်ဇြေန်ဂျာပိတ်ပိုဲမာန်ဒၟံၚ်ရ။ နဒဒှ်ရီုဗၚ်ကဵု ညးပါဲပၞာန်တအ်၊ သ္ဂံၚ်စိုပ်ဒၟံၚ်ဒဒိုက်ကာတၟေၚ်တအ်ဂှ် နူကဵုဂကောံပုၚ်မွဲဗဂါပ် ၁၅ ၝာတ်ဂှ် ကဵုဒါန်သၠးကဵုဒၟံၚ် နွံရ။ ပါဲနူကဵုသွံဂှ်လေဝ်ဏး။
၃။ နကဵုဂကောံပုၚ်မွဲဗဂါပ် ၁၅ ၝာတ်ဂှ် ပ္ဍဲကဵုသွာၚ်ပရေၚ်ဘဏ္ဍာ ဗီုပြၚ်လဵု ဗ္ဂေတ်ဒၟံၚ်ရော။
ပ္ဍဲကဵုသွာၚ်ပရေၚ်ဘဏ္ဍာပိုဲဂှ် အကြာ ၃၀၀ ပေါဲကဵု ၅၀၀ ပေါဲ အရိုဟ်ဟ်တ္ၚဲ ဗီုပြေပြံၚ်အခိၚ်သွံကဵုဒၟံၚ်ဂှ် ပိုဲဒးဆေၚ်ဒၟံၚ်မုက်ကဵု ပရေၚ်ဒးကျဆောံရ။ အတိုၚ်ၚုဟ်ဗွဝ်ဖျာမာဲချံက် အခိၚ်လၟုဟ်တှ်ေ အရိုဟ်ဟ်သတ္တာဟ ဒးကျဒၟံၚ်ရ။ အကာဲအရာဘဏ္ဍာဂှ် စဵုကဵုကဆံၚ်ဏံ မုဟိုတ်ဂွံဒုၚ်ဒဝ်မာန်ဒၟံၚ်ရောတှ်ေ သ္ဂံၚ်လ္ၚဵု သ္ဂံၚ်ပဵုသာန်ဒၟံၚ်လ္ၚဵုဂှ် ဗ္ကန်ကေတ် ၁၀ ဗူတုဲ စထောံမွဲဗူ ကလေၚ်ကဵုဒါန် ၉ ဗူ ပၠန်ဂှ် နွံရ။ ကဵုသြန်ဂအုံဂှ် မွဲမွဲတၠ ပိုဲဂှ် ဂကောံဒုၚ်ဒၟံၚ်ဒါန် ဒတူလာၚ် ဟွံသေၚ်ပုဟ်။ ညးတၠဒါန် ဒးစိုတ်ဂကောံပိုဲတအ်ဂှ် ဗီုကဵုၝာတ် မွဲလ္ၚီ၊ ၝာတ် ၅၀၀၊ နကဵုသြန်ဒါန်တအ်ဂှ် ပ္ဍဲကဵုပိုဲ ဂကောံစၟတ်စရၚ် နွံဒၟံၚ်။ ညးရပ်စရၚ်သက်က် နွံဒၟံၚ်။ သ္ကိုပ်ဘဏ္ဍာနွံ။ သြန်ဒါန်သ္ဂံၚ်ပဵုသာန် ညိညဂှ်ကဵု သြန်တမ်ပိုဲ သှ်ေဒၟံၚ်ညိညတအ် ဂေတ်အာဒၟံၚ်ရ။
၄။ ဗီုပြၚ်သွံကဵုဒၟံၚ် ဂကောံပုၚ်မွဲဗဂါပ် ၁၅ ၝာတ်ဂှ်လေဝ် ဟီုလဴထ္ၜးကဵုညိ။
ပိုဲဂှ် အရိုဟ်ဟ်တ္ၚဲ မွဲဂိတု နွံပွိုၚ် ၃၀ တ္ၚဲတှ်ေ သီုပွိုၚ် ၃၀ တ္ၚဲ မိက်ဂွံသွံကဵုဒၟံၚ်ရ။ ဆ္ဂး ပ္ဍဲပိုဲဂှ် ဟိုတ်နူဒှ်ဒၟံၚ် ဍုၚ်ကွာန်ညးတၞဟ်ဂှ်မွဲတၚ်၊ ပိုဲဂှ် ဗွိုၚ်ညးယိုက်ဝန်စေတနာရီုဗၚ်ကဵုဒၟံၚ်ဂှ် မၞိဟ်တီအောန်ဒၟံၚ်ဏီတုဲ ညးပံၚ်တောဲရေၚ်တၠုၚ်ကဵုပိုဲဂှ် ဟိုတ်နူအောန်ဒၟံၚ်ဏီဂှ်ရ မွဲသတ္တာဟ ၜါတ္ၚဲရ။ သွံဒၟံၚ်ဗီုဏံရ။
ဂွံသွံကဵုဗီုဏံဂှ်တှ်ေ သွက်ပိုဲဂွံသွံတ္ၚဲစန်ဂှ် နူကဵုတ္ၚဲအဒိုတ်တေံ ပရဟ်ဒုၚ်တုဲတှ်ေ ရေက်ဍေက်ပလေဝ်ပလေတ်လဝ်၊ ညံၚ်ဂွံသွံ တ္ၚဲယးဂတတေံမာန် ယဝ်ရပိုဲသွံ မွဲသတ္တာဟ ၜါတ္ၚဲတှ်ေ ညးယိုက်ဝန်စေတနာပိုဲ ဒးကၠောန်ကဵုဍာ်ဓတ်ကာယ ပွိုၚ်ပန်တ္ၚဲရ။ ပြဟ်ဟ်ဏံ အကာဲအရာပ်ရေၚ်ဘဏ္ဍာဂှ် သွံကဵုအရိုဟ်တ္ၚဲ ၜိုန်ပြေပြံၚ်ကီုလေဝ် မၞိဟ်ဂွံဘိုၚ်ကၠောန်ကဵုဂှ် ဟိုတ်နူဇြဟတ်အောန်ဒၟံၚ်ဂှ်ရ ညံၚ်ပိုဲဂွံသွံကဵု အရိုဟ်ဟ်တ္ၚဲဂှ် အခက်ခုဲပိုဲနွံဒၟံၚ်ဂှ်ရ မွဲသတ္တာၜါတ္ၚဲရ သွံကဵုမာန်ရ။
၅။ စွံအဓိကကဵု မၞိဟ်ကဆံၚ်ဂကူလဵုတုဲ သွံကဵုဒၟံၚ်ရော။
မိက်ဂွံစွံအဓိကကဵု ညးယိုက်ဝန် CDM တအ်ကီု၊ ညးချဳဒရာၚ်ကတိုၚ်ကၟဟ် ပရေၚ်ဍုၚ်ကွာန်တအ်ကီု၊ ကြဴနူပရေၚ်သီအဝဵုတုဲ ထောံဍုၚ်မိတိမတုဲ ပ္ဍဲကဵုကၟိန်ဍုၚ်မွဲလ္ပာ်တေံ သ္ဂံၚ်ဒးဆဵုဂဗ ဆေၚ်ဒၟံၚ်မုက်ကဵု ဒဒိုက်ပရေၚ်မၞိဟ် ဟွံဂီုကၠီု ဘဝတုပ်ကဵုပိုဲတအ်ဂှ် နကဵုအစဳစဇန်ပိုဲမွဲတန် ပိုဲသွံကဵုဒၟံၚ်ရ။
၆။ နကဵုဂကောံပုၚ်မွဲဗဂါပ် ၁၅ ၝာတ်ဂှ် ရီုဗၚ်ကဵုဒၟံၚ် သွက်ညးပါဲဘဲပၞာန်တအ်ဂှ်လေဝ် ဂွံတီကေတ်ရ။ ဗီုပြၚ်လဵု ရီုဗၚ် ရေၚ်တၠုၚ်ကဵုဒၟံၚ် နွံရော။ မုသွက်ဂွံဆက်ကၠောန်ရေၚ်တၠုၚ်အာ ဂတတေံနွံရော။
သွက်ညးပါဲဘဲပၞာန်တအ် ယဝ်မိက်ဂွံကဵုဒါန်ဏောၚ်တှ်ေ ပ္ဍဲကဵုတ္ၚဲစန်ကဵု တ္ၚဲဗြဴဗတိ ပိုဲဍုန်တပ်ဒၟံၚ်ဂှ် ပိုဲဂှ် ထပ်တုဲ နဒဒှ်ဇြဟတ်ဒါန်ဍာ်ဓတ်ကာယဂှ် ဍုန်တပ်ကဵုဒၟံၚ် နွံရ။ အခိၚ်ဇိုၚ်သဝ်တ္ၚဲလေဝ်။ မိက်ဂွံဟီုဂှ်တှ်ေ ပိုဲဂှ် တ္ၚဲစန်အခိၚ်နူဂယးဂှ် သွံဒၟံၚ်။ တ္ၚဲဗြဴဗတိ အခိၚ်နူဂယးဂှ် သွံဒၟံၚ်ရ။ ရီုဗၚ်ကဵုအရၚ်ဇိုၚ်သဝ်တ္ၚဲညိ၊ မိက်ဂွံအာကဵုဒါန် သွက်ညးပါဲဘဲပၞာန်တအ်ဟီုတုဲ ယဝ်ရ ဂကောံကၠုၚ်ဆက်စၠောံနွံတှ်ေ ပိုဲတအ်စိုက်ဂွဳဒက်တုဲ ပရေၚ်ရေၚ်တၠုၚ်ပလံၚ်ဗစိုပ်ကဵုဂှ်လေဝ် ကၠောန်ကဵုဒၟံၚ်ရ။ လ္တူနူဂှ် သွက်ဂွံထပ်ကၠောန်လေဝ် နွံရ။ ဗွိုက်လတက် ပဵုသာန်ဒၟံၚ်ဂှ် ပိုဲမိက်ဂွံကဵုဒါန် ညးပါဲဘဲပၞာန်ဂးတုဲ ဆက်စၠောံနၚ်တုဲ အစဳဇန်ကဵုဒါန်ဂှ်လေဝ် ကၠောန်လဝ်ရ။ တၚ်ရန်တၟံ ဂကောံဏံဂှ် သွက်သ္ဂံၚ်ဘဝတုပ် စိုပ်ဒၟံၚ်မာဲချံက်ဂှ် အစဳဇန်ညံၚ်ဂွံသၠဲလးသက်သာ ၜိုတ်ပိုဲသ္ပမာန် ရေၚ်တၠုၚ်ကဵု သီုဟွံစၟဳမွဲသာ် ဟွံနိဿဗ္ဒာဲဒလာဲမွဲသာ် နကဵုစေတနာဗုဗုအးအးရ။
၇။ အလန်လကြဴအိုတ်ဏံ မုမိက်ဂွံထပ်ဟီုဗပေၚ်နွံဏီရော။
ဂကောံဟီုဒၟံၚ် တာလျိုၚ်နွံတအ်၊ ဂကောံကရောံတအ်ဂှ် ဟိုတ်နူဒှ်ဒၟံၚ် ညံၚ်ဟွံကေတ်တာလျိုၚ်တုဲ ဒၟာနူပိုဲတီတာလျိုၚ်ဂှ်ရ စကၠောန်ရေၚ်တၠုၚ်လဝ် တာလျိုၚ်ဏံ ၜိုတ်မာန်ကဵုမာန်ရ။ နကဵုအစဳဇန်ခိုဟ်လ္တူနူဏံလေဝ် ကောန်ဂကောံပုၚ်မွဲဗဂါပ် ၁၅ ၝာတ်တအ် ဂစာန်ဒၟံၚ်ရ။ နကဵုညးဇၞော်မၞုံတာလျိုၚ်တအ်လေဝ် အရီုဗၚ်ဗ္စာရဏာပရေၚ်မၞိဟ် ဟွံစၟဳစလဝ် ဗီုကဵုပိုဲတအ်ဂှ် ဂကောံကဵုမာန် လ္တူနူကဵုပိုဲတအ်ဂှ် ကဵုအိုတ်ညိဂှ် စၞးဂကောံကီု၊ အလဵုဇကုပိုဲလေဝ် ဟိုတ်နူဒှ်ဒၟံၚ်ညးဂြိပ်ဒပါဲဓလေတ် မံၚ်ဒၟံၚ် ပ္ဍဲကဵုမာဲချံက်ဂှ်ရ စၞးညးဘဝတုပ်သၟဟ်တအ် နူကဵုပိုဲ မိက်ဂွံအာတ်မိက်ဏာ ဇရေၚ်ညးတာလျိုၚ်တအ် နူကဵုသြၚ်လောန်တိုၚ်(မ်)ဏံ မွဲကဆံၚ်ရ။