ဒုတိယဂအုပ်ဗိုလ်ဇၞော် သိုဝ်ထောဋ်၊ ဂအုပ်ဗိုလ်ယာန်နောၚ်သိုဝ်၊ ဝန်ဇၞော်ကူသာန်သွံရာန် ဥူအောၚ်ညောအ် ပါလုပ် သီုဒုတိယ ဂအုပ်သ္ကိုပ်ဗိုလ်ဇၞော် မိုဝ်မျေတ်ထောန် မၞိဟ်က္ဍိုပ်သ္ကိုပ်ပၞာန် ဂွံပတှ်ေဖျေံစိုတ်တအ်ဂှ် ရပ်စပ်စၟဳစၟတ်ဒၟံၚ် နဂဗုတ်ဗက်စအဂတိ၊ ဂဗုတ်တၚ်ပၞုက်ဓလုက်ကၟိန်ဍုၚ် မံက်ပြးတိတ် နကဵုထံၚ်သမၠဲသ္ၚိဒၟံၚ်ရ။
ပ္ဍဲလ္တူပရေၚ်ကေတ်အာအရေဝ် ပရေၚ်က္ဍိုပ်သ္ကိုပ်ပၞာန် သ္ကုတ်လ္တူတအ် ဗက်စအဂတိဂှ် ဗီုပြၚ်လဵု ကေတ်အာအရေဝ်ရောဟီုဂှ် ညးဍုၚ်ကွာန်တအ်စိုတ်လုပ်စဂၠိုၚ်ဒၟံၚ်တုဲ ပရေၚ်ပါ်ဒကး ပ္ဍဲဒပ်ပၞာန် ဒှ်ကၠုၚ်မာန်ဟာ တၚ်သၟာန်ဏံလေဝ် နွံဒၟံၚ်ရ။
ဟိုတ်ဂှ်ရ စပ်ကဵုအကာဲအရာ ပရေၚ်စၟဳစၟတ်ဂဗုတ် ဂအုပ်ဗိုလ်ပၞာန်တအ်ကီု၊ ကိစ္စအရာက္တဵုဒှ်ကၠုၚ် ပ္ဍဲဒပ်ပၞာန်မာန်ကီု။ နကဵုအလဵုအသဳညဳသၟဟ်ကောန်ဂကူ (NUG) မုထေက်ကဵုဒးကၠောန်ရေၚ်တၠုၚ်ရောကီု။ စပ်ကဵုအကာဲအရာဂမၠိုၚ်ဏံတုဲ ဆက်စၠောံသၟာန်လဝ် ကၠတ်ထဝ်သၞောဝ်ဓဝ်ဝှ်ကြံၚ် နာဲဗ္စာဇၞော် ဥူကျဳမျေအ်ရ။
၁။ ကၠာအိုတ်ဏံ လ္တူစၟဳစၟတ်ဒၟံၚ် ကောန်ဂကောံဍေံတအ် ပါလုပ်သီုဒုသ္ကိုပ်ဗိုလ်ဇၞော် မိုဝ်မျေအ်ထောန် က္ဍိုပ်သ္ကိုပ်ပၞာန်ဂွံပတှ်ေစှ်ေစိုတ်ဂှ် ဗီုလဵုညာတ်ကေတ်ရော။ နကဵုက္ဍိုပ်သ္ကိုပ်ပၞာန် မုမွဲ ကၠောန်သ္ပကၠုၚ်မာန်ရော။
ဗိုလ်နေဝေန်လေဝ် ကေၚ်ကၠောန်လဝ် ဗီုဏံရ။ တာန်ယှိုဲလေဝ်လေဝ် ကၠောန်လဝ်ရ။ ဗွဲမဂၠိုၚ်တှ်ေ ကေတ်လဝ်အရေဝ်ကဵု ဂဗုတ်အဂတိရ။ ဇေတ်တ်တေံဂှ် ပါဲပ္တိတ်ထောံ နူပရေၚ်ဍုၚ်ကွာန်ရ။ လၟုဟ်လေဝ် မေန်အံၚ်လှာၚ်ဂှ် ပၟိက်ဒှ်တုဲ ပါဲပ္တိတ်လဝ် ကဵုအဂတိရ။ ဆ္ဂးမေန်အံၚ်လှာၚ် ပါဲပ္တိတ်ဂှ် ဟွံတုပ်ကဵု မၞိဟ်ကၠာကၠာတေံပုဟ်။ မၞိဟ်ကၠာတေံဂှ် ဒးပါဲပ္တိတ်လဝ် အတိုၚ်ပရေၚ်ဍုၚ်ကွာန်ရ။ အခိၚ်လၟုဟ် က္ဍိုပ်သ္ကိုပ်ပၞာန်မေန်အံၚ်လှာၚ်ဂှ် စိုပ်ဒၟံၚ်အကာဲအရာ လကြဴအိုတ်ယျ။ ပၟတ်ကဝ်ဂဵု၊ ကောန်လေဝ်လိုန်ဍိုက်၊ စိုပ်ဒၟံၚ်ဘဝ တိုန်လိုန်ဍိုက်ဒၟံၚ် ဒပ်ဇကုပၠန်ယျ။ ယဝ်ပသောၚ်ထောံဗီုပြၚ်ဏံ ဟွံမာန်တှ်ေ အခိၚ်တုဲကၠုၚ်တေံဂှ် စွံလဝ်ကၠာ။ လၟုဟ်ဂှ် နဲလဵုမှ ၚုဟ်ဗွဝ်ဖျာဂှ် ထိၚ်ဟွံဂွံ၊၊ ဒဝ်ဠာတအ်လေဝ် ကလိုက်ကၟဵု၊ ပရေၚ်ပိုန်ဒြပ်လေဝ် စှ်ေ၊ ပေါဲဗတိုက်မုက်ပၞာန်လေဝ် ကျ၊ အကြာဏံ မၞိဟ်ဍေံတအ်လေဝ် ဖံက်ပၠန်တှ်ေ ဒပ်ဇကု ဇကုကလေၚ်လိုန်တုဲ စိုပ်ဒၟံၚ်ကိုန် ပၟတ်ကဝ်ဂဵု ကောန်ဇကုလေဝ်ဒးလိုန်ဍိုက်ရ။ ၜိုတ်ဏံဓဝ်ရ သရောပ်ထောံတှ်ေ။
၂။ ပရိုၚ်သ္ကိုပ်ဗိုလ်ပၞာန်တအ် ဗက်စဒၟံၚ်အဂတိ တိတ်ကၠုၚ်ဒၟံၚ် သၠဲသၠဲလးလးယျတှ်ေ ပ္ဍဲဒပ်ပၞာန် မုဆက်ဒှ်ကၠုၚ်မာန်ရော။
ဒပ်ပၞာန်ဂှ် ခရိုဟ်ယျလေဝ်။ ဖဒိုဝ်သဝ်တဝ်နဳ ဟီုလဝ်ရလေဝ်။ သီကေတ်ဒၟံၚ် ဗဒိုပ်ဒပ်ပၞာန်ဖျေံသ္ဇိုၚ်။ ဂွံလဝ်လွဟ် အကွက်ကွဳစက်မွဲဖ္ဍိုက်ရ။ ဗဒိုပ်မၞိဟ် (၃၀)ဖျေံလဝ်ဗဒိုပ်ဂှ် လအ်ပွိုၚ် ၂၅ မိနေတ်ဓဝ်ရလေဝ် ဂြိပ်တိတ်အာထောံ။ ဟီုတှ်ေ ချပ်ရံၚ်ညိ။ သွာၚ်စုၚ်ရလေဝ်။ ဍေံတအ်ကျဒၟံၚ် ဖအိုတ်ယျ။ လိုၚ်ဇြာလေဝ် ကြပ်လုပ်ဟွံမာန်ပုဟ်။ ကရေၚ်ဍာဲလေဝ် အတိုၚ်ဂှ်ရ။ ချေၚ်လေဝ်ဗီုဂှ်ရ။ စိုပ်ကၠုၚ်ဗ္ဒာဲကရောၚ်ဒဵုဗဂေါယျ။ စိုပ်ကၠုၚ်ဒၟံၚ်ဗ္ဒာဲနေပျဳဒဝ်ယျဏး။
၃။ အခိၚ်ဇွိုန်လပှ်အဂတိကလိုက်ကၟဵုဒၟံၚ် ပ္ဍဲဒပ်ပၞာန်ဏံ နကဵုအလဵုအသဳညဳသၟဟ်ကောန်ဂကူ (NUG) အရာလဵု ထေက်ကဵုဒးကၠောန်ရော။
ဂကောံပၠန်ဂတးတအ်ဂှ်တှ်ေ ဒၟာနူဒှ်ပရေၚ်ချဳဒရာၚ်ပၞာန်ဂှ်ရ ထေက်ကဵုဒးကေတ်အခေါၚ်ခိုဟ် ထေက်ရ။ စၞးဒးသၠုၚ်ပ္တိုန်အသိၚ်ပၞာန်ဂှ် အာဒၟံၚ် ပ္ဍဲညးဗတိုက်ဒၟံၚ်ပၞာန်တအ် အာကဵုပါဝါတုဲ ယဝ်ဟွံလုပ်ပ္ဍဲပိုဲတှ်ေ ပိုဲဟွံထံက်ပၚ်ပုဟ်ဂးတုဲ လၟုဟ်ဏံ အာကၠောန်ဒၟံၚ်ရ။ လၟုဟ်ဂှ် အခိၚ်ဒးကၠောန် ဗီုဏံဟွံသေၚ်ပုဟ်။ ဇကုတအ်လေဝ် ဗတိုက်၊ ပိုဲလေဝ်ဗတိုက်၊ အခိၚ်ဒးဘိုၚ်ဗတိုက် ဗီုဏံဏောၚ်လေဝ်။ ဇကုဂှ် အခိၚ်ဒးကလေၚ်လိုန် ဒပ်ဇကုဟွံသေၚ်ပုဟ်။
၄။ ပ္ဍဲကဵုအကာဲအရာဏံ ညးပါလုပ် ပ္ဍဲပၠန်ဂတးက္ညၚ်တအ်ဂှ် နကဵုအ္စာမုမိက်ဂွံကဵုကသပ်နွံရော။
ပၞာန်ဂှ် ဒးဗတိုက်ဒဵုကဵုမာန်ဏောၚ်။ လၟုဟ်ဂှ် ဒးစှ်ေပၞာန်ထ္ပက်ဏောၚ်။ ကောန်ဍုၚ်အရၚ်တအ်ကီု၊ ပံၚ်ကောံသီုဖအိုတ်ကီု၊ NUG ကီု ဒးထ္ပက်ကရောၚ်ပၞာန်ဏောၚ်။ ပ္ဍဲအရာထ္ပက်ပၞာန်ဂှ် လစွံစိုတ် ဒးသၠဲလးဏောၚ်။ မၞိဟ်အဲရ အဲဂြဲပၠုပ်ဏောၚ်။ အသိၚ်ပၞာန်လၟုဟ်ဂှ် ဇအိုန်ဒၟံၚ်ရ။ အသိၚ်ပၞာန်ဂှ် KNU တအ်သၟးရ ဗတိုက်ဒၟံၚ်။ ပရေၚ်ချဳဒရာၚ်ပၞာန် NUG ဂှ်ဟွံတိုန်ပုဟ် ဒှ်ဒၟံၚ်ရ။
၅။ အလန်လကြဴအိုတ်ဏံ မုမိက်ဂွံထပ်ဟီုဗပေၚ် နွံမံၚ်ဏီရော။ မုမိက်ဂွံဟီုဗ္ကန်စ ကဵုညးဍုၚ်ကွာန်တအ် ဂလာန်ပရိုၚ် မုနွံရော။
ညးဍုၚ်ကွာန်တအ်ဂှ်တှ်ေ မၚ်ကလၚ်ဒၟံၚ်ပရိုၚ် မံၚ်ၚုဟ်ဟ်က္တဵုက္တဵုညိ။ NUG ဂှ်က္ဍိုက်က္ဍိုပ်တုဲ ဒးဆဝ်ပ္ၚုဟ်ကဵုဒၟံၚ်ဏောၚ်လေဝ်။ NUG ဂှ် ဒးကၠောန်ကဵု လၟေၚ်ဂၠံၚ်တရဴဴဗတိုက်ဇကုဏောၚ်။ ဖျေံဒၟံၚ်ညးသ္ကအ် သွက်ဂွံဒးပ္တိတ်ဒၟံၚ်တၚ်လလောၚ်တြးညးသ္ကအ်ဂှ် ဟွံခိုဟ်ပုဟ် အခိၚ်ဏံဂှ်။