သွဟ်ပေါဲရုဲမာဲ သၞာံ ၂၀၂၀ ဂှ် နကဵုတၚ်ထ္ၜးဟိုတ် စရၚ်မာဲဗၠေတ်မှာ ကေတ်ဇြဟတ်လွဟ်လက်နက် ဟိုတ်နူပရေၚ်သီကေတ်လဝ်အဝဵု ဟွံဗဗွဲဓဝ်တုဲ ပၞာန်ပၠန်ဂတးဒစဵုဒစးညးဍုၚ်ကွာန် က္တဵုဒှ်ကၠုၚ်လဝ်ဂှ် လၟုဟ်မ္ဂး စိုပ်ကၠုၚ် ပ္ဍဲကာလပွိုၚ် ၜါသၞာံပြၚ်ၚ်ရ။ အကာဲအရာပၠန်ဂတးက္ညၚ် ပြံၚ်သၠာဲကၠုၚ် ပ္ဍဲပွိုၚ်ၜါသၞာံဏံကီု၊ ပရေၚ်ဓမံက်ရုပ်ရဴဴ ဥပဒေ Burma Act ကီု၊ သွက်ဂွံစဵုဒၞာသၞကျာကံၚ်ဇြဳပၞာန် အရာလဵုဒးကၠောန်ရေၚ်တၠုၚ်ထေက်ရောကီု။ သွက်ဂွံဖ္အောန်ယှအ်ဖျေံ ပရေၚ်ဇီုဓဗတ် အကြာဂကောံဇြဟတ်ပၠန်ဂတးဂှ် မုပလေဝ်ပလေတ်လဝ်ရောကီု။ စပ်ကဵုအကာဲအရာဂမၠိုၚ်ဏံတုဲ ဆက်စၠောံသၟာန်လဝ်ကဵု ညးမၞုံအခေါၚ်ဟီုဂး ရုၚ်သမ္မတအလဵုအသဳညဳသၟဟ်ကောန်ဂကူ (NUG) ဥူကျဝ်ဇြဝ်ရ။
သြၚ်လောန်တိုၚ်(မ်) – ကၠာအိုတ်ဏံ ပရေၚ်အလဵုအသဳအမေရိကာန် ပျးဌာန်လဝ် သၞောဝ်ဥပဒေ သွက်ဂွံရီုဗၚ်ဂကောံဇြဟတ်ပၠန်ဂတးတအ် Burma Act ဂှ် စိုပ်ဒၟံၚ်အကာဲအရာလဵုရရော။
ဥူကျဝ်ဇြဝ် – သ္ပလဝ်ဒ္တန် Burma Act ။ ပ္ဍဲဂိတုဒဳဇြေမ်ဗာသၞာံတုဲကၠုၚ်တေံ သ္ပလဝ်ဒ္တန်တုဲ ကၠတ်ထဝ်သ္ပလဝ်ဒ္တန်ရ။ သမ္မတထ္ပက်စၟတ်တဲ တုဲဒှ်လဝ်ရ။ ကဏ္ဍလဵု ရီုဗၚ်ကဵုဏောၚ်ဟီုဂှ် ပျးဌာန်လဝ်တုဲယျ။ ဓမံက်ထ္ၜးလဝ် NUG, NUCC တအ်၊ ဂကောံရပ်လွဟ်ကောန်ဍုၚ်အရၚ်တအ်ရ။ နကဵုအလဵုအသဳအမေရိကာန်ဂှ် ပ္ဍဲကဵုကဏ္ဍလဵု ရီုဗၚ်ကဵုၜိုတ်လဵုရောဟီုဂှ် ညးတအ်ပ္ညဳပ္ညပ်ဒၟံၚ်ဂှ် ဂွံတီကေတ်ရ။ ဗ္ၜတ်ကၠတ်ထဝ်လ္တူ ပ္တိုန်လဝ်ဂလာန်ဂှ်မွဲ၊ ဗ္ၜတ်ကၠတ်ထဝ်သၟဝ် ကဵုလဝ်ကသပ်ဂှ်မွဲ၊ ပ္ညဳပ္ညပ် ပ္ဍဲအကြာကၠတ်ထဝ်ၜါတန်တုဲတှ်ေ သွက်ကၟိန်ဍုၚ်ဗၟာပိုဲဂှ် နူကဵု Burma Act ဂှ် ၜိုတ်ဂလိုၚ်လဵု ရီုဗၚ်ကဵုရောဟီုဂှ် ပ္ညဳပ္ညပ်ဒၟံၚ်ရ။ အခိၚ်သ္ပဒ္တန်တုဲတှ်ေ နူကဵုဂကောံကဵုရီုဗၚ်တအ် နူကဵုဂကောံကဵုရီုဗၚ် ပျးဌာန်လဝ်ပ္ဍဲသၞောဝ်ဥပဒေတအ်ဂှ် သွက်ဂွံကဵုအာရီုဗၚ် ဇရေၚ်ဂကောံဒးကဵုရီုဗၚ်တအ်ဂှ် ဆက်ကၠောန်ရေၚ်တၠုၚ်အာဏောၚ် ဂွံတီကေတ်ရ။ ဂကောံနွံဒၟံၚ် ပ္ဍဲကၟိန်ဍုၚ်အမေရိကာန်တအ်လေဝ် ပြဟ်ဟ်ပြေဟ်ဟ် ၜိုတ်ဂလိုၚ်လဵုရီုဗၚ်ကဵုရော။ ဗီုပြၚ်လဵုရီုဗၚ်ကဵုရောဟီုဂှ် သွက်ဂွံဖျေံသ္ဂုတ်သွာတ် ဗတိုဝ်ဖ္အောဝ်ဒၟံၚ်ဂှ် ဂွံဆဵုကေတ်ရ။
သြၚ်လောန်တိုၚ်(မ်) – သ္ကုတ်လကြဴဴဏံ ဟိုတ်နူကံၚ်ဇြဳပၞာန် ဗ္တိုက်ကဵုပၞာန်ကျာတုဲ ပရေၚ်ကောန်အရာပ်ညးဍုၚ်ကွာန်တအ် ဇီုကပိုက်ဒးဒၟံၚ်မွဲတ္ၚဲကဵုမွဲတ္ၚဲ ဂၠိုၚ်တိုန်ကၠုၚ်ဒၟံၚ်ရ။ သွက်ဂွံစဵုဒၞာပၞာန်ကျာကံၚ်ဇြဳပၞာန် မုဒးကၠောန်ရေၚ်တၠုၚ်ဒၟံၚ်နွံရော။
ဥူကျဝ်ဇြဝ် – အလဵုအသဳညဳသၟဟ်ကောန်ဂကူဂှ် သွက်ဂွံပန်ဖျေံက္ၜၚ်ကျာ ဂွံလဝ်လွဟ်လက်နက်လ္ၚဵုဂှ် နွံရ။ နကဵုပိုဲ သွက်ဂွံပရးပ္တိတ်ဏာ ဟၟဲပုဟ်။ နွံဒၟံၚ်ကဵု ဗ္ၜတ်ပိုၚ်ခြာရဂှ် ဟီုလဝ်ရ။ ပ္ဍဲကဵုဒၞာဲလ္ၚဵုဂှ်တှ်ေ ပ္ဍဲတွဵုရးကရေၚ်ဍာဲဟီုတှ်ေ က္ၜၚ်ကျာဂျေတ်မွဲဖ္ဍိုက် ဒးဒုၚ်ပန်ဖျေံလဝ်ဂှ် ဂွံညာတ်ကေတ်ဏောၚ်။ က္ၜၚ်ကျာပၞာန် ကၠုၚ်ထောံဖျေံဇွောံမ ပ္ဍဲတိဍာ်ကောန်ဍုၚ်အရၚ်တအ်ဂှ်တှ်ေ ဒးဒုၚ်ပန်ဖျေံဒၟံၚ်တုဲ လီုလာ်အာလဝ်ဂှ် ဂွံညာတ်ကေတ်ဏာၚ်။ မဂွံပန်ဖျေံ နူကဵုပေဂၠိုၚ်ကဵုလ္ၚီဂှ် တှ်ေ ဟၟဲဏီပုဟ် ဂွံညာတ်ကေတ်ရ။ ဟိုတ်ဂှ် နွံဒၟံၚ်ကဵု အပိုၚ်အခြာဗၞတ်ဗ္ၜတ်ဏောၚ်ဟီုဂှ်ရ။ အလုံံမွဲကၟိန်ဍုၚ် စဵုဒၞာကဵု ဟွံမာန်ပုဟ်ဂှ်လေဝ် ဂွံဆဵုဒၟံၚ်ရ။ ဟီုထ္ၜးဒၟံၚ်ကဵုကၟိန်ဍုၚ်နာနာဂှ် သွက်ဂွံစဵုဒၞာ ကောန်အရာပ်ညးဍုၚ်ကွာန်တအ်ဂှ် သွက်ဂွံကဵုအရီုဗၚ် နဲကဲကွတ်ပညာ အာတ်မိက်လဝ်ရ။ ဒပ်ပၞာန်ဗတိုက်ဒၟံၚ် ဗွဲမဂၠိုၚ်ဂှ်တှ်ေ ပ္တဝ်လဝ်ကဵုကောန်အရာပ်တအ်ရ။ ဒှ်ကၠုၚ်လဝ် ခြာဟွံလအ်ဏီဏံဂှ်လေဝ် ကောန်အရာပ်ဂှ် ညံၚ်ဂွံဒှ်သၟာဒဒိုက်ၜါထပ် ကၠောန်ဏာလဝ်ရ။ သွက်ဂွံစဵုဒၞာ အရာတအ်ဏံဂှ်တှ်ေ ကဵုအလဵုအသဳညဳသၟဟ်ကောန်ဂကူဂှ် သွက်ဂွံကဵု နဲကဲကွတ်ပညာ အောန်အိုတ်သွက်ဂွံဒက်ပ္တန်သၞောတ်ကဵုသတိမာန်ဂှ် မိက်ဂွံအာတ်မိက်ဏာရ။
သြၚ်လောန်တိုၚ်(မ်)- သွက်ဇၟောဝ်လွဟ်ဇွောဝ်လုပ် ဒၟံၚ်ပ္ဍဲကံၚ်ဇြဳပၞာန် ဂွံဒေါံညိၚ်အာ မုကၠောန်ရေၚ်တၠုၚ်ဒၟံၚ်ရော။ စပ်ကဵုအကာဲအရာ ပ္တိတ်ဒၟံၚ်ဇြဟတ် အခိၚ်ပြဟ်ဟ်လၟုဟ်တုဲ ဟီုလဴထ္ၜးကဵုညိ။
ဥူကျဝ်ဇြဝ် – ညံၚ်ဇၟောဝ်လွဟ်ဟွံဂွံဇွောဝ်လုပ်ဂှ် ကဏ္ဍလုပ်ဒၟံၚ်ပေါဲဗတိုက် ပရေၚ်ပိုန်ဒြပ်ကၟိန်ဍုၚ်နာနာနွံဒၟံၚ်ဂှ် ညံၚ်ကံၚ်ဇြဳပၞာန် ရာန်ကေတ်လွဟ်လက်နက် ဟွံမာန်ဂှ် ကၠောန်ရေၚ်တၠုၚ် ကၟာတ်ဒၞာဒၟံၚ် ဂၠံၚ်ဍာန်လွဟ်ဇွောဝ်လုပ်တအ်ဂှ်ရ။ ပ္ဍဲဍုၚ်ကီု၊ မ္ၚးဍုၚ်ကီု ညံၚ်ဟွံဂွံရာန်သုၚ်စောဲ ကပေါတ်ဗၞိက်ကၠောန်ပ္တိတ် နူကံၚ်ဇြဳပၞာန်ကဵု ဂကောံမိတ်ပွံၚ်ဍေံတအ်ဂှ် ဗကပ်ဒၟံၚ်ဗဗေၚ်ညးသ္ကအ်ဖအိုတ်ရ။
ပစူလဝ်လွဟ်တုဲ စကာကဵုဗက်သွံတြးဒၟံၚ်ဗဳယာတအ်။ ပ္ဍဲလဂုၚ် ဂွံမိၚ်လဝ်ရ။ ညးဍုၚ်ကွာန်တအ်ဂှ် ညံၚ်ဟွံဂွံရာန်သုၚ်စောဲ ကပေါတ်ဗၞိက်ကၠောန်ပ္တိတ် ဆက်စပ်ကဵုကံၚ်ဇြဳပၞာန်ဂှ် ထေက်ကဵုဒးစွံသတိ။ ဍေံတအ်ဟွံဂွံသြန်ပုဟ်။ ညံၚ်ဇၟောဝ်သြန် ကၟိန်ဍုၚ်နာနာ လုပ်ဟွံဂွံမွဲဂှ် ကၠောန်ဒၟံၚ်ရ။ ဗက်ကၟာတ်ဒၟံၚ် တိုက်သြန်ကၟိန်ဍုၚ်နာနာဍေံတအ်ရ။ နူကဵုအမေရိကာန် ကၟာတ်ဒၞာဒၟံၚ်ပရေၚ်ပိုန်ဒြပ်တအ်ရ။ ပ္ဍဲကဵုကံၚ်ဇြဳပၞာန် ဒှ်ဒၟံၚ်အခက်ခုဲပရေၚ်ပိုန်ဒြပ်တုဲ ညံၚ်ဂွံရာန်ကေတ်လွဟ်လက်နက်ဟွံမာန်။ ဆ္ဂး အကာဲအရာကၠောန်ပ္တိတ်ဒၟံၚ် ပ္ဍဲဍုၚ် နွံဗွဲမဂၠိုၚ်ရ။ ညံၚ်ရာန်ကေတ်ကၠေၚ်က္ၜၚ်ကျာဟွံဂွံဂှ် ကၟိန်ဍုၚ်မိတ်ပိုဲတအ် ကၠောန်သ္ပဒၟံၚ်ပရေၚ်ကေတ်အရေဝ်ရ။ ဒးစဵုဒၞာကၟာလဒဵုအာ နကဵုသၞောဝ်ဗ္ၜတ်အတိုၚ်အလုံမွဲဂၠးကဝ်ဏောၚ်။ အခိၚ်လၟုဟ်ဂှ် ပရေၚ်ပၞာန်ဍေံတအ်ကီု၊ ပရေၚ်ဍုၚ်ကွာန်ကီု ဒှ်ဒၟံၚ်အကြေပ်အဂြတ်ယျဂှ် ထံက်ထ္ၜးတုဲမိက်ဂွံဟီုလဴထ္ၜးကဵုရ။
သြၚ်လောန်တိုၚ်(မ်) – အကြာဂကောံဇြဟတ်ပၠန်ဂတး ပ္ဍဲဗလးမုက်တိတအ် ပရေၚ်ဇီုဓဗတ် နွံကၠုၚ်ဒၟံၚ် ဂွံညာတ်ကေတ်ရ။ မုဟိုတ် ဂွံဒှ်ဒၟံၚ်ဗီုဏံ ညာတ်ကေတ်ရော။ နကဵု NUG သွက်ဂွံထိၚ်ဒဝ်အာ မုကၠောန်ရေၚ်တၠုၚ်ဒၟံၚ်ရော။
ဥူကျဝ်ဇြဝ် – ပၠန်ဂတးက္ညၚ် စဒှ်ကၠုၚ်ဂှ် ညးဍုၚ်ကွာန်တအ်ရ စလဝ်။ စထ္ၜးလဝ်ဆန္ဒၜိုဟ်ဟ်သြိုဟ်ဟ်ရ။ ဗျာံလဝ်လွဟ် ပ္ဍဲကဵုဒေါဝ်က္ဍိုပ်တပ်ပ်တုဲ ပြိုက်ဂစိုတ်လဝ်သၟတ်တအ်တုဲ လ္ပာ်ဍေံတအ် စလဝ်ပရေၚ်ပ္ကီုပရာပ်ကၠာရ။ ညးဍုၚ်ကွာန်တအ်ဂှ် ရပ်ကေတ်လွဟ် ၜိုတ်ဒှ်ကဵုဒှ်တုဲ ပၠန်ဂတးကၠုၚ်ညးသ္ကအ်ရ။ PDF ဟီုဂှ် စဒှ်ကၠုၚ်ရ။ နူကဵုဌာနဝန်ဇၞော်ပရေၚ်စဵုဒၞာ MOD ဂှ် ညံၚ် PDF တအ်ဏံ သၞောတ်ဂွံစှ်ေကၠုၚ် ညံၚ်စရာဲဍာ်ဒကေဝ်ဂွံပေၚ်ကၠုၚ် အကာဲအရာဒးဒက်ပ္တန်ဒၟံၚ်ရ။ သီုပရေၚ်လုပ်ပေါဲဗတိုက်ကီု၊ မွဲဒမြိပ်ဂှ် ကဵုဒၟံၚ်တန်ဗ္တောန် မွဲဒမြိပ်ရ။ ညံၚ်ဂွံဒ္ဂေတ်ဗက်စေဝ်ပၞောန် သၞောတ်စှ်ေစှ်ေဂှ် ဗ္တောန်ကဵုဒၟံၚ်ရ။ တၚ်ရန်တၟံ ညးတအ်သီုညးဖအိုတ်ဂှ် ညံၚ်ဂကောံပၞာန် ဂွံစှ်ေ သွက်ဂွံလုပ်အာပေါဲဗတိုက်ရ။ အတိုၚ်သဘာဝမၞိဟ် လညာတ်ဟွံတုပ်သၟဟ်နွံတှ်ေ ပရေၚ်ဇီုဓဗတ်ကၠုၚ်ဂှ် နွံဏောၚ်။ အတိုၚ်သဘာဝမၞိဟ် ဂကောံအဲဂးတုဲ မာနတအ် နွံဏောၚ်။ ညံၚ်ဟွံဂွံဒှ်ဗီုဏံ ပိုဲပ္တိတ်ဒၟံၚ်ဇြဟတ် သွက်ဂွံဒက်ပ္တန် COC စိုပ်ဒၟံၚ်ဗၞတ်ဗ္ၜတ်မွဲမွဲယျ။ ပရေၚ်ဇီုဓဗတ်ဂှ် ပ္ညဳပ္ညတ်ဒၟံၚ်ရ။ ဆ္ဂးပရေၚ်က္လိလောန်ဒၟံၚ် ဒုဟ်ရာဇဝတ်တအ်ဂှ်တှ်ေ ညံၚ်ဂွံကဵုဒုဟ် ကေတ်အရေဝ်မာန် ဒပ်ဗၠာဲသၟိၚ်ပိုဲကဵု ရုၚ်သၞောဝ်ဓဝ်တအ် ပ္တိတ်ဇြဟတ်ရေၚ်တၠုၚ်ဒၟံၚ်ရ။ ပ္ဍဲကဵုဌာနဝန်ဇၞော်ပရေၚ်စဵုဒၞာလေဝ် ကဝ်မတဳတေၚ်ဗစိုပ် နွံရ။ ဌာနဝန်ဇၞော်ပရေၚ်စဵုဂှ်လေဝ် အတိုၚ်စေဝ်ပၞောန်ပၞာန် ကေတ်အရေဝ် ကဵုဒၟံၚ်ဒုဟ်ဒဏ်နွံရ။
သြၚ်လောန်တိုၚ်(မ်) – အလန်လကြဴအိုတ်ဏံ ပ္ဍဲအကြာဂကောံဇြဟတ်ပၠန်ဂတးတအ် တၚ်နွံပၟိက်လွဟ်လက်နက်မကမ် နွံဂၠိုၚ်ကၠုၚ်ဒၟံၚ်ဂွံမိၚ်ကေတ်ရ။ ဟိုတ်နူမကမ်ဟွံရုမ်ဂပ်တုဲ စပေါဲဗတိုက်ဟွံမာန်ဟီုဂှ် ဟီုဂးကၠုၚ်ဒၟံၚ် နွံကၠုၚ်ရ။ နကဵု NUG ပ္ဍဲလ္တူဏံ မုမိက်ဂွံဟီုသ္ဂးနွံရော။
ဥူကျဝ်ဇြဝ် – အခက်ခုဲဇၞော်အိုတ်ဂှ် သွက်ဂွံထံက်ပၚ်ကဵု လွဟ်လက်နက်မကမ် ဍိုက်က်ပေၚ်ၚ်ဂှ်ရ ကၠာတေံတှ်ေ အခိၚ်ပၠန်ဂတးရပ်လွဟ် စဒှ်ကၠုၚ်ဂှ် ပရေၚ်ထံက်ပၚ်မာန် စဵုကဵုဟၟဲရ။ ပရေၚ်ညးဍုၚ်ကွာန်တအ် ထံက်ပၚ်မာန်ကၠုၚ် ပၠန်ဂတးက္ညၚ်ဂှ် ညးဍုၚ်ကွာန်တအ် ရီုဗၚ်ကဵုပရေၚ်ဘဏ္ဍာရ။ ပါလုပ်ပူဗိုၚ်ရေၚ်တၠုၚ်လဝ်ရ။ ပ္ဍဲကဵုကာမ်ဗုၚ်ပၠန်ဂတးက္ညၚ် အလဵုအသဳညဳသၟဟ်ကောန်ဂကူ ကၠောန်လဝ်တအ်ဂှ် ဟိုတ်နူပါလုပ်ပံၚ်တောဲရေၚ်တၠုၚ်လဝ်ဂှ်ရ နူကဵုအလဵုအသဳပိုဲ ဌာနဝန်ဇၞော်ပရေၚ်ဘဏ္ဍာ လလောၚ်တြးလဝ်နွံရ။ ပ္ဍဲမွဲကာလပွိုၚ် ၂ သၞာံပြၚ်ၚ်ဂှ် ဂွံလဝ်သြန်ဒဝ်ဠာအပံၚ်လၟိဟ် ၂၅၀ ပြကောဋိကိုတ် ပြၚ်ဟီုဂှ် ဟီုလဝ်နွံရ။ ရာန်ကေတ်လဝ် လွဟ်လက်နက်မကမ်တအ်။ တြးကဵုလဝ် အတိုၚ်ရးပၞာန်တအ်နွံရ။ ကဵုဒၟံၚ်အရီုဗၚ်ဗ္စာရဏာပရေၚ်မၞိဟ် တအ်နွံ။ ဗွဝ်ဖျာလွဟ်လက်နက် ၜိုတ်လဵုၚုဟ်က္ဍၚ်ဒၟံၚ်ရောဂှ် ညးဍုၚ်ကွာန်တအ်တီဒၟံၚ်ရ။ လွဟ်မံၚ်ကလေၚ်ဂှ် ဒးကဵုဒၟံၚ်ဒဝ်ဠာကဵုလ္ၚီနွံရ။ ဗ္ဂပ်ကဵုဒၟံၚ်လွဟ်ကဵု PDF တအ်ရ။ ကဵုဒၟံၚ်မကမ်တအ်နွံရ။
ယွံဍာံဒၟံၚ်။ မိၚ်မံၚ်ရ။ ပ္ဍဲအခိက်ကြပ်သီဗဒိုပ်ဂှ် ဟိုတ်နူမကမ်အိုတ်တုဲ ဒးက္လေၚ်ဆုတ်တိတ်လဝ်လေဝ် နွံဗွဲမဂၠိုၚ်ရ။ ညံၚ်ဟွံဂွံဒှ်ဗီုဂှ် ထံက်ပလံၚ်ကဵုဒၟံၚ် သၞောတ်ဗျူဟာစှ်ေစှ်ေ နွံရ။ နူကဵုကၟိန်ဍုၚ်နာနာ သွက်ဂွံဂွံအရီုဗၚ်ဂှ် ပ္တိတ်ဒၟံၚ်ဇြဟတ်ရ။ ပၠန်ဂတးဂှ် ပၠန်ဂတးဒးအံၚ်ဇၞး ပ္ဍဲဍုၚ်ဏောၚ်။ အရီုဗၚ်ညးဍုၚ်ကွာန်တအ်ဂှ် နွံဒၟံၚ်ပၟိက်ဗွဲမဂၠိုၚ်ဏောၚ်ဟီုဂှ် မိက်ဂွံဟီုရ။ ဌာနဝန်ဇၞော်ပရေၚ်စဵုဒၞာပိုဲဂှ် ပံၚ်တောဲကဵုမဟာမိတ်တအ်တုဲ ပ္တိတ်ဒၟံၚ်ဇြဟတ် သွက်ဂွံဂွံ လွဟ်လက်နက်မကမ်ရ။ ဆ္ဂးညံၚ်ဂွံဍိုက်ပေၚ်ရုံံဂပ်သီုဖအိုတ် ထံက်ပၚ်ဟွံမာန်ဏီ။ အခက်ခုဲ နွံဒၟံၚ်ဏီရ။ ညးဍုၚ်ကွာန်တအ်ဂှ ်သွက်ဂွံအံၚ်ဇၞး ပ္ဍဲပရေၚ်ပၠန်ဂတးဂှ် လ္တူနူဏံညံၚ်ဂွံရေၚ်တၠုၚ်ကဵုဂှ် မိက်ဂွံဗတိုက်ဖ္အောဝ်ဏာရ။
ဠဝ်ဗဳဒပ်ပၞာန်တအ်သီုဖအိုတ်ဂှ် ပ္တိတ်ဒၟံၚ်ပရိုၚ်ဟွံဍာံတုဲတှ်ေ ပ္ဍဲလ္တူဇြောယှေဝ်မဳဒဳယာ ညံၚ်ဆီဂွံပါ်ဒကး ကၠောန်ဒၟံၚ် ညံၚ်စိုတ်ဓာတ်ဂွံစှ်ေ သ္ပဒၟံၚ်ရ။ ပ္ဍဲလ္ပာ်သ္ကုတ်ဒိုဟ်သၠုၚ်ကျာ ကၟိန်ဍုၚ်ဗၟာ ဟိုတ်နူတိဍာ်ဒပ်ပၞာန်ထိၚ်ဒဝ် စဵုကဵုဟၟဲဒှ်ဒၟံၚ်တုဲ ပ္ဍဲကဵုဘာဗ္တောန်လိက်တအ်လေဝ် ဘာဗ္တောန်လိက်ဒပ်ပၞာန် ဒဵုကဵုဟၟဲ ဒှ်ဒၟံၚ်ယျ။ ပရေၚ်အုပ်ဓုပ်ဍေံတအ် ဒှ်ဒၟံၚ် စဵုကဵုဟၟဲယျ။ ညံၚ်ပၠန်ဂတးဂွံတုဲဒှ် ဂွံအံၚ်ဇၞးဂှ် ဘိုၚ်ကရိုၚ်ပ္တိတ်ကဵုဇြဟတ်ညးသ္ကအ်ညိဂှ် မိက်ဂွံဟီုဗ္ကန်ဏာရ။