ပ္ဍဲကဵုကၟိန်ဍုၚ်ဗၟာဂှ် အကြေပ်အဂြတ်အခေါၚ်အရာမၞိဟ်ကဵု ပရေၚ်ထံက်ရံၚ်ဗ္စာရဏာပရေၚ်မၞိဟ် သာတုဲကြေပ်ဂြတ်ကၠုၚ်ဒၟံၚ်တုဲ ပလံၚ်ဗစိုပ်လဝ် လိက်ပံက်ထိုၚ် ဇရေၚ်ဂကောံကၟိန်ဍုၚ် လုပ်ဂကောံ ကောံဓရီုကုလသမဂ္ဂ အပံၚ်လၟိဟ်ဂကောံကၟိန်ဍုၚ်နာနာ ၄၄၀ ဂကောံ ပါလုပ်သီုကၟိန်ဍုၚ်ဗၟာရ။ အတိုၚ်လိက်ပံက်ထိုၚ်ဂှ်မ္ဂး ဂကောံပၞာန်ဂှ် ကၟာတ်လဒဵုစဵုဒၞာ၊ သီကေတ်ကီု သီုကဵုပလီုပလာ်ဒၟံၚ် အရီုဗၚ်ဗ္စာရဏာပရေၚ်မၞိဟ် သွက်ညးဒးထောံသ္ၚိဌာန်တုဲ ဒးဂြိပ်ဒဴဴဴပါဲဓလေတ်ဒၟံၚ် နဒဒှ်ညံၚ်လွဟ်နက်လက်ရဂှ် ဓမံက်ထ္ၜးလဝ်ရ။
သွက်ကဵုအရီုဗၚ်ဗ္စာရဏာပရေၚ်မၞိဟ် သွက်ကောန်အရာပ်ညးဍုၚ်ကွာန်တအ်မာန်ဂှ် စပ်ကဵုအခက်ခုဲ ဒးဆဵုဂဗဒၟံၚ်ကီု၊ လၟေၚ်ကမၠောန် ဒးပ္ညဳပ္ညပ်ဒၟံၚ်တအ်ကီု၊ သွက်ဂွံကဵုရီုဗၚ်မာန် ၜိုတ်ဂလိုၚ်လဵု အုပ်ဓလီုမာန်ရောကီု၊ စပ်ကဵုအကာဲအရာဂမၠိုၚ်ဏံတုဲ ဆက်စၠောံသၟာန်လဝ်ကဵု ညးမၞုံအခေါၚ်ဟီုဂး ဂကောံက္ဍိုက်က္ဍိုပ်လၟေၚ်ကမၠောန် ပရေၚ်ၜိုဟ်လလံ (PPSSD) သ္ကိုပ်ဗိုလ်ဇၞော် သဝ်ဂျဝ်ညောအ်ရ။
သြၚ်လောန်တိုၚ်မ် – ကၠာအိုတ်ဏံ အရီုဗၚ်ဗ္စာရဏာပရေၚ်မၞိဟ်ဂှ် အကြာကံၚ်ဇြဳပၞာန်ကဵု ဂကောံညးအရာပ်တအ် ပရေၚ်ပံၚ်တောဲရေၚ်တၠုၚ် နွံဒၟံၚ်ဂှ် ဂွံတီကေတ်ရ။ ဗီုပြၚ်လဵု ကၠောန်ရေၚ်တၠေုၚ်ဒၟံၚ်ရော။
သ္ကိုပ်ဗိုလ်ဇၞော် သဝ်ဂျဝ်ညောအ် – ကိစ္စသွက်ဂွံကဵုအရီုဗၚ်ဗ္စာရဏာပရေၚ်မၞိဟ်တအ်ဂှ်တှ်ေ ဣဏံဂှ် ဒှ်ကိစ္စ ဒှ်ကၠုၚ်ဒၟံၚ် လၟုဟ်မှ ဟွံသေၚ်ပုဟ်။ ပိုဲကၠောန်ဒၟံၚ်လေဝ် ဒှ်ကၠုၚ်မွဲသၞာံ၊ ၜါသၞာံ နွံဒၟံၚ်ယျ။ အဓိကဂှ်တှ်ေ PPST ဂှ် ပ္ဍဲကဵုကာလဓမံက်ရုပ်ရဴ NCA ဟွံမာန်ဏီဂှ် တၚ်ကြက်ရှ်သာ ပါလုပ်ပ္ဍဲ NCA ပိတၚ်ရလေဝ်။ တၚ်မ္ဂး သွက်ဂွံစဵုဒၞာကောန်အရာပ်တအ်လေဝ် ပါလုပ်ဒၟံၚ်ရ။ ဗွိုၚ်ဏံဂှ် သၠဲလးဒၟံၚ်တုဲတှ်ေ ဗွိုၚ်သဳကၠဳပရေၚ်ဍုၚ်ကွာန် ပ္ဍဲကာလဍန်ဂြတ်ဒၟံၚ်ဂှ်တှ်ေ တၚ်ကြက်ရှ်သာ NCA အဲဟီုလဝ် နူကၠာဏံပိတၚ်ဂှ်တှ်ေ တၚ်သွက်ဂွံစဵုဒၞာကဵု ကောန်အရာပ်ဂှ် ၜိုတ်ချိၚ်လဝ် ပိုဲကၠောန်ဟွံမာန် တၚ်ဍိုန်လျတအ်လေဝ် နွံဒၟံၚ်ဗွဲမဂၠိုၚ်ရ။
ဆက်စပ်ကဵု ကိစ္စစဵုဒၞာကဵုကောန်အရာပ်ညးဍုၚ်ကွာန်တအ်တုဲ ပိုဲဂှ် ကိစ္စစပ်ကဵုပရေၚ်ကဵုအရီုဗၚ်ဗ္စာရဏာပရေၚ်မၞိဟ်တအ်ဂှ်တှ်ေ ၜိုတ်ဍဟောဝ်စိုပ် ဂကောံပိုဲ မွဲမွဲဂကောံ ကၠောန်ၜိုတ်ရေၚ်တၠုၚ်လဝ်လေဝ် နွံဗွဲမဂၠိုၚ်ရ။ ကိစ္စပရေၚ်ကဵုအရီုဗၚ် ဗ္စာရဏာပရေၚ်မၞိဟ် ဂှ်တှ်ေ ဂကောံမွဲမွဲဂကောံ အတိုၚ်အကာဲအရာတၚ်နွံပၟိက် ပ္ဍဲသ္ဇိုၚ်တိဍာ်ရလေဝ်။ ဗီုပြၚ်ကၠောန်ၜိုတ် တၞဟ်ခြာဂှ်တှ်ေနွံ ဂှ်နွံဏောၚ်။ ပရေၚ်ဖံၚ်ဒေယှေန်နဳပေါန် ထံက်ပၚ်ကဵုလဝ် ဇွောံမ သွက်ဂွံပါ်ပရအ်ဂှ်တှ်ေ ပ္ဍဲကဵုတိဍာ်ဂကောံဇကုအုပ်ဓုပ်လဝ်ဂှ် ညံၚ်ဂွံပလံၚ်ပဗစိုပ် ဇရေၚ်ညးဍုၚ်ကွာန်မဆေၚ်စပ်တအ်မာန်ဂှ် နကဵုဗ္ၜတ်အပိုၚ်အခြာဂကောံ အတိုၚ်သွာၚ်လၟေၚ်ကမၠောန် ကမၠောန် ဒးဓမံက်ဒၟံၚ်ရုပ်ရဴဴဂှ်တှ်ေ စဳဇန်ဒၟံၚ် ချိုတ်တ်ပၠိုတ်တ် နွံရ။
သြၚ်လောန်တိုၚ်မ် – သွက်ဂွံကဵု အရီုဗၚ်ဗ္စာရဏာပရေၚ်မၞိဟ် ကဵုကောန်အရာပ်ညးဍုၚ်ကွာန်တအ်မာန်ဂှ် ပ္ညဳပ္ညပ်ကဵုကံၚ်ဇြဳပၞာန်တုဲမှ အကာဲအရာဒးဓမံက်ဒၟံၚ်ရုပ်ရဴဟာ။
သ္ကိုပ်ဗိုလ်ဇၞော် သဝ်ဂျဝ်ညောအ် – ကဵုနၚ်လဝ်ပိုဲတိုက်ရိုက် ၜိုန်ဟီုကီုလေဝ် ကဵုလ္ပာ်အလဵုအသဳဏံလေဝ် ကမၠောန်ဒးဆက်စၠောံ ကၠောန်ရေၚ်တၠုၚ်ဒၟံၚ် နွံ။ ဗီုနူကၠာဏံ ပ္ဍဲကဵုဒၞာဲဗီုကဵုပယျဵုတအ်ဂှ်တှ်ေ ရေၚ်တၠုၚ်မာန် ဟၟဲဏီပုဟ်လေဝ်။ ချပ်ဂၞန်သဳကၠဳကဵု အလဵုအသဳကၟိန်ဍုၚ်တုဲမှ ကမၠောန် သွာၚ်ဒးကၠောန်ရေၚ်တၠုၚ်မာန်ဂှ်ဏောၚ်ဟီုတှ်ေ ကဵုအလဵုအသဳတွဵုရးလေဝ် လၟေၚ်ကမၠောန်ပိုဲ ဒးပံၚ်တောဲရေၚ်တၠုၚ်ဒၟံၚ်ဂှ် နွံရ။ ပရေၚ်ရီုဗၚ်ထ္ၜလဘာ်လေဝ် အတိုၚ်လၟေၚ်ကမၠောန် ဗီုပြၚ်ဒးကၠောန်ဂှ်တှ်ေ ပ္ညဳပ္ညပ်ကဵု အလဵုအသဳမဆေၚ်စပ်တအ်တုဲ နကဵုညးတၠဒါန်တအ်လေဝ် ညံၚ်ဂွံဒှ်ပရေၚ်ဓမံက်ရုပ်ရဴဴ ဗွဲမကၠးဖ္ဍးမာန် ပံၚ်တောဲရေၚ်တၠုၚ်ဒၟံၚ် နွံရ။
သြၚ်လောန်တိုၚ်မ် – နကဵုဂကောံဒေါံပန်ပှော်တအ်ဂှ် ပရေၚ်ဇြေန်တာ ပ္ညဳပ္ညပ်ဆေၚ်ကဵု ကဵုအရီုဗၚ်ဗ္စာရဏာပရေၚ်မၞိဟ်အာဇြဳယာန် (AHA) ကဵုဖံၚ်ဒေယှေန်နဳပေါန်တအ် ထံက်ပၚ်ကဵုဂှ် သွက်ဂွံကလေၚ်ကဵုရီုဗၚ်မာန် ကၠောန်ရေၚ်တၠုၚ်ဒၟံၚ်ရဟီုတှ်ေ ၜိုတ်ဂလိုၚ်လဵု အုပ်ဓလီုလဝ်မာန်ရော။
သ္ကိုပ်ဗိုလ်ဇၞော် သဝ်ဂျဝ်ညောအ် – ဂကောံတအ်ဂှ်ဟွံတုပ်ပုဟ်။ ပိုဲတအ်ဂှ်တှ်ေ AHA ကမၠောန်အရီုဗၚ်ဗ္စာရဏာပရေၚ်မၞိဟ် နူကဵုဇြေန်တာ AHA ရီုဗၚ်ကဵုလဝ်တအ်ဂှ် ပ္ဍဲလ္တူပရေၚ်ဂကောံ မဆေၚ်စပ်မွဲမွဲဂကောံတအ် ဒှ်ဒၟံၚ်ဒတုဲဂှ်တုဲ ပရေၚ်ပံၚ်တောဲရေၚ်ဒၟံၚ် နွံရ။ ဖံၚ်ဒေယှေန်နဳပေါန်ဂှ်တှ်ေ ကမၠောန်ပါ်ပရအ်ဇွောံမဂှ် နူကဵုသၟဝ်တဲ PPST ဓမံက်ဒၟံၚ်ရုပ်ရဴဴပရေၚ်ကောပ်ကာဲကမၠောန်တုဲ အခိၚ်ကၠောန် ပရေၚ်ပါ်ပရအ်သ္ၚုတအ်ဂှ်တှ်ေ ပ္ညဳပ္ညပ် နကဵုအလဵုအသဳမဆေၚ်စပ်တအ်တုဲ ဒုၚ်တဲရေၚ်တၠုၚ် သွက်ဂွံပလံၚ်ဗစိုပ် ဇရေၚ်ညးဍုၚ်ကွာန် နွံဒၟံၚ်ပၟိက်ဇေတ်တ်တအ်ရ။ ဒုၚ်တဲညးပါဲဘဲပၞာန် ပါလုပ်သီုညးဍုၚ်ကွာန်ပါဲဘဲပၞာန်တအ်ဂှ်တုဲ သွက်ညးဍုၚ်ကွာန် ကွာန်ဒုၚ်တဲရေၚ်တၠုၚ်ကဵုဒၟံၚ် နဒဒှ်မၞိဟ်တၠသ္ၚိတအ်ဂှ်လေဝ် ပရေၚ်ပါ်ပရအ်အရီုဗၚ်တအ် ညံၚ်ဂွံကဵုမာန် လၟေၚ်ကမၠောန်ဒးကၠောန်ရေၚ်တၠုၚ်ဒၟံၚ်လေဝ် နွံရ။
သြၚ်လောန်တိုၚ်မ် – ဟိုတ်နူပရေၚ်သီအဝဵုတုဲ လၟိဟ်မၞိဟ်ကောန်ကၟိန်ဍုၚ်ဗ္ဒာဲ ၂ ပြကောဋိကိုတ်ပြၚ် ထောံသ္ၚိဌာန်တုဲ ဒးဂြိပ်ဒဴဴပါဲဓလေတ်ဒၟံၚ် ဂွံတီကေတ်ရ။ သွက်ဂွံက္လိဂွံအရီုဗၚ် သွက်ညးတအ်ဂှ် အရာလဵု တာဒၞာဒၟံၚ်ရော။ မၞိဟ်ဗီုပြၚ်လဵု ရီုဗၚ်ကဵုဒၟံၚ် ဗွဲအဓိကရော။
သ္ကိုပ်ဗိုလ်ဇၞော် သဝ်ဂျဝ်ညောအ် – ညံၚ်ညးဍုၚ်ကွာန် နွံဒၟံၚ်ပၟိက်ဍာံဍာံတအ် သ္ဂောံက္လိဂွံအရီုဗၚ် ဂွံပါလုပ်သီုဖအိုတ်မာန်ဂှ် ပိုဲပ္တိတ်ဒၟံၚ်ဇြဟတ် ရေၚ်တၠုၚ်ဒၟံၚ် နွံရ။ အကာဲအရာခေတ်ကာလလၟုဟ်လေဝ် ပ္ဍဲကဵုဍုၚ်ပိုဲဂှ် ဒှ်ဒၟံၚ်ကာလ ဒှ်ဒၟံၚ်ပေါဲပၞာန် ပေါဲဗတိုက် ဂှ်ရ ဇရေၚ်ညးပါဲဘဲပၞာန်တအ်ဂှ်တှ်ေ ဂွံဍစိုပ်သီုဖအိုတ်မာန် ဟၟဲဏီရ။ အဓိကဂှ်တှ်ေ ညံၚ်ညးဍုၚ်ကွာန်ပါဲဘဲပၞာန် နွံပ္ဍဲတိဍာ် ဆက်စပ်ကဵုဇကုတအ် ဂွံထ္ၜလဘာ်မာန်ဂှ် ဗ္ၜတ်အပိုၚ်အခြာ ကၠောန်ကဵုဂွံဂှ်တှ်ေ နွံဒၟံၚ်ရ။ နကဵုဗ္ၜတ်အလုံမွဲကၟိန်ဍုၚ်ဂှ် ညံၚ်ဂွံဒှ်ဗီုပြၚ်ဏံ ဒှ်ကာလ ဃောဂစာန်ပ္တိတ်ဒၟံၚ်ဇြဟတ်ဖိုဟ်ဏီရ။
သြၚ်လောန်တိုၚ်မ် – ပေါဲ NCA ပေၚ်သၞာံတုဲဂှ် က္ဍိုပ်သ္ကိုပ်ပၞာန်ကဵု ဂကောံဒေါံပန်ပှော်တအ် ဆဵုဂဗသဳကၠဳလဝ် ဂွံတီကေတ်ရ။ မုသဳကၠဳ တုပ်လဝ်စိုတ်နွံရော။
သ္ကိုပ်ဗိုလ်ဇၞော် သဝ်ဂျဝ်ညောအ် – အခိၚ်ထ္ပက်လဝ်စၟတ်တဲ NCA ကဵုဒှ်။ အခိၚ်ချူဓဇက်ပကောံပကေဝ်တၚ်ဂၞၚ် NCA ကဵုဒှ်၊ က္ဍိုပ်သ္ကိုပ်ပါလုပ်ရေၚ်တၠုၚ်လဝ် အလဵုဇကု နူမူလတေံ ညံၚ်ဂွံတိုန်စိုပ် ကောံကောံမာန် ပ္တိတ်လဝ်ဇြဟတ်ရ။ နူကဵုက္ဍိုပ်သ္ကိုပ်တိုန်စိုပ်ကၠုၚ်တအ်ဂှ် အခိၚ်အခန်ကၞာတုဲ ပိုဲကလေၚ်ကောံညညးသ္ကအ်တုဲ အတိုၚ်ပရေၚ်ဆဵုဂဗညညးတအ်၊ အတိုၚ်ပရေၚ်တတ်ကၠောံဂှ် အတိုၚ်ပရေၚ်ဆဵုဂဗကမၠောန်သဳကၠဳပ္ညဳပ္ညပ် NCA ၜါလ္ပာ်ဂှ်၊ ပ္ဍဲကဵုကာလချူဓဇက် NCA ကတိကဝတ်ၜါလ္ပာ် စွံပ္တန်လဝ်တအ်ဂှ်ကဵု ဗ္ၜတ်အပိုၚ်အခြာပိုဲပတှ်ေကေတ်လဝ်မွဲဂှ် အတိုၚ်အပရေၚ်တတ်ကၠောံဆဵုဂဗ၊ ပိုဲပ္တိုန်ထ္ၜး ပါ်ပရအ်လဝ်ရ။
တုဲတှ်ေ ပိုဲထ္ပက်စၟတ်တဲ NCA တုဲဂှ်တှ်ေ ကာလဓမံက်ရုပ်ရဴ NCA နတဲ မွဲဒမြိပ်ဂှ် တုဲတဴဴကဵု တၚ်ကော်ချဴတုဲ ပ္ဍဲလ္တူအခက်ခုဲတအ်လေဝ် နူကဵုက္ဍိုပ်သ္ကိုပ်တိုန်စိုပ်ကၠုၚ် အလဵုညးတအ် ဒးတတ်ကၠောံကၠုၚ်လဝ် ပရေၚ်ဆဵုဂဗညးတအ်ဂှ် ပ္တိုန်ထ္ၜး သဳကၠဳလဝ်ညးသ္ကအ် ဂတးဂတန်တရ။ ဣဏံဂှ် ကောံဓရီုမွဲ ဟွံသေၚ်ဂှ်ရ ပ္ဍဲကဵုလၟေၚ်ကမၠောန်ပိုဲတအ်ဂှ် မုဆက်ကၠောန်အာရောဟီုဂှ် ဗီုပြၚ်တၚ်သ္ဂုတ်သွာတ် ပိုဲကၠောန်လဝ်မာန်ဟၟဲရ။ နူကဵုဂှ် တၚ်ဂၞၚ်ထေက်ကဵုဒးချပ်ဇြိုဟ်ဟ်နက်က်တအ် ပ္ဍဲလ္တူပရိုၚ်မံက်တိတ်ကၠုၚ်တုဲ တၚ်ဂၞၚ် (၁၀) ဂကူပြၚ်အခေါၚ်ပကောံပကေဝ် နွံလဝ်ရဂှ် ပိုဲမိက်ဂွံဟီုရ။
သြၚ်လောန်တိုၚ်မ် – တၚ်တုပ်စိုတ်က္လိဂွံလဝ် ဃောဆဵုဂဗကဵု က္ဍိုပ်သ္ကိုပ်ပၞာန် ၁၀ တၚ်ဂှ် ဟီုလဴထ္ၜးကဵုဂွံဟာ။ တၚ်တအ်ဏံ ဗီုပြၚ်လဵု သွက်ဂွံဓမံက်အာရုပ်ရဴနွံရော။
သ္ကိုပ်ဗိုလ်ဇၞော် သဝ်ဂျဝ်ညောအ် – ပြဟ်ဟ်ဏံနူကၠာဂှ် နူကဵုပရေၚ်သဳကၠဳရုၚ်ကမၠောန် ဒှ်ကၠုၚ်အဆက်တောဲကြဴအခန်ကၞာ ဟီုလဝ်သွက်ဂွံကၠောန်ဗဒှ် ညံၚ်ကြက်ရှ်သာပရေၚ်ဍုၚ်ကွာန် ဂွံနွံဂှ် ဗလးဒးကၠောန်ရေၚ်တၠုၚ်ဒၟံၚ်ဂှ်တှ်ေ ဣဏံဂှ် ပထမ ကၠာအိုတ်လေဝ် ဒှ်ရ။ အတိုၚ်တၚ်သ္ဇိုၚ်လေဝ် ပိုဲဂှ် ကေတ်အခိၚ်တုဲ ဟိုတ်နူအပိုၚ်အခြာသၞောတ် ဗ္ၜတ်ဒးကၠောန်ရေၚ်တၠုၚ်ဒၟံၚ်ဂှ်ရ အတိုၚ်တၚ်တုပ်စိုတ်ၜါလ္ပာ် သ္ကုတ်ဒးကၠောန်ရေၚ်တၠုၚ်လဝ် ပေါဲသဳကၠဳကမၠောန်ရုၚ်ဟေၚ် ရနွံ။ ဗီုဟီုနူကၠာဂှ်ရ ပရေၚ်ၜိုဟ်လလံ အနာဂတ်ဍာံဍာံဂှ် သွက်ပေါဲသဳကၠဳပပရေၚ်ဍုၚ်ကွာန် ပိုဲဆက်ပ္တိတ်ဒၟံၚ်ဇြဟတ် ကၠောန်ရေၚ်တၠုၚ်အာတုဲ အခိၚ်တၚ်ဂၞၚ်သီုၜါလ္ပာ် ကၠိုဟ်ခၠၚ်ကေတ်မာန် မံက်ဂတဝ်တိတ်ကၠုၚ်တှ်ေ ယဝ်ရဒးဟီုကၠးကၠးတှ်ေ ပြဟ်ဟ်ဏံ ပိုဲဂှ်သွက်ဂွံကၠောန်အာ ထိၚ်ၚ်ဒဝ်ဝ်ဂှ် တုပ်လဝ်စိုတ်ရ။ အခိၚ်နွံပၟိက်ကၠုၚ်ဇေတ်တ် စိုပ်မွဲတ္ၚဲ ယဝ်ရအခေါၚ်ခိုဟ်တှ်ေ သွက်ဂွံဓမံက်ဟီုပ္တိတ်အာ အရာတအ်ဏံ ဒှ်ဒၟံၚ်ဒတုဲဏောၚ်ထေၚ်ကေတ်ရ။