ပ္ဍဲဍုၚ်လဂုၚ် သ္ကုတ်ကာလလကြဴဏံ ပရေၚ်ချဳဒရာၚ် ဂကောံဇြဟတ်ပၠန်ဂတးတအ် စှ်ေကၠုၚ်ဒၟံၚ်တီတီတုဲ လ္ပာ်ကံၚ်ဇြဳပၞာန်လေဝ် သွက်ဂွံထိၚ်ဒဝ်မာန် ဂစာန်ပ္တိကၠုၚ်ဒၟံၚ်ဇြဟတ် သ္ကာတ်တ်မြဟ်ဟ်ရ။ ဟိုတ်ဂှ်ရ စပ်ကဵုအခက်ခုဲ ဂကောံဇြဟတ်ပၠန်ဂတးတအ် ဒးဆေၚ်ဒၟံၚ်မုက်ကီု၊ သွက်ပၠန်ဂတးဍုၚ်ဇၞော် ဂွံအံၚ်ဇၞး ပါလုပ်သီုပရေၚ်ဂီုကၠီုကံၚ်ဇြဳပၞာန် ၜိုတ်ဂလိုၚ်လဵု ပၟိက်ဇၞော်ဒၟံၚ်ရော။ စပ်ကဵုအကာဲအရာဂမၠိုၚ်ဏံတုဲ ဆက်စၠောံသၟာန်လဝ် ညးတာလျိုၚ် Yangon UG Association မဒှ်ဂကောံဒမၠုက်ဍုၚ်ဇၞော်လဂုၚ် ဇြယျာကျောၚ်(ဆရာကျောၚ်း)ရ။
သြၚ်လောန်တိုၚ်မ် – ကၠာအိုတ်ဏံ စပ်ကဵုအကာဲအရာ ဂကောံဇြဟတ်ပၠန်ဂတးဍုၚ်ဇၞော်လဂုၚ်တအ် ဒးဆေၚ်ဒၟံၚ်မုက်တုဲ ဟီုလဴဴထ္ၜးကဵုညိ။
ဇြယျာကျောၚ် – ပရေၚ်ပါ်ခတိုဟ် ပ္ဍဲကဵုလဂုၚ် အောန်ယအ်စှ်ေအာဂှ် ဒှ်ပကတိရုပ် အတိုၚ်ဒှ်ဒၟံၚ်ရ။ ကံၚ်ဇြဳပၞာန်ဂှ် ဆၜိုတ်လဂုၚ်၊ အၚ်ဝ၊ နေပျဳဒဝ်ရ သှ်ေဒၟံၚ်သွက်ဂွံထ္ၜးပယိုဂ်။ လဂုၚ်ဂှ် နူလ္ပာ်ဍေံတအ် သာတုဲပတေၚ်ဂြတ်လဝ်ရ။ သာတုဲစွံကၠုၚ်အာရီုကဵု လဂုၚ်ရ။ တုဲမွဲလ္ပာ်ပၠန်ဂှ် အခိၚ်လအ်ကၠုၚ်ဗက်။ UG ဗွဲမဂၠိုၚ် တော်ရံၚ်ပရေၚ်ဖံက်ခတိုဟ် ဗီုအခိၚ်ကၠာတေံတှ်ေ သာတုဲကၠောန်ကၠုၚ်ကမၠောန် စိုပ်တရဴမာန်ကၠုၚ်ဂှ် ဂွံညာတ်ကေတ်ရ။ မိက်ဂွံဟီုဂှ်တှ်ေ လၟိဟ်ဍေံဂှ် အောန်တှ်ေ အောန်အာဏောၚ်။ ဆ္ဂး ပရေၚ်ဇီုကပိုက်လ္ပာ်ကံၚ်ဇြဳပၞာန်ဂှ် ဟွံအောန်စှ်ေပုဟ် ညာတ်ကေတ်ဗီုဏံရ။
သြၚ်လောန်တိုၚ်မ် – သွက်ဂွံထိၚ်ဒဝ်ဍုၚ်လဂုၚ် လ္ပာ်ကံၚ်ဇြဳပၞာန် မုပလေဝ်ပလေတ်လဝ် ဂွံညာတ်ကၠုၚ်ရော။ အကာဲအရာ ဗီုပြၚ်လဵု နွံဒၟံၚ်ရော။
ဇြယျာကျောၚ် – သောဲသောဲဗြောဲဗြောဲတှ်ေ ဗီုကဵုစၟဳစၟတ်စရၚ်ကၟုဲထပ်ကဵုထပ်၊ ပ္ဍဲကဵုပွိုၚ်ဍုၚ် အရာပ်၊ မဆေၚ်စပ်တအ်ဂှ် ဗီုကဵုဓလုက်လဝ် မၞိဟ်ဍေံတအ် ကဵုလဝ်တန်ဗ္တောန်တအ်ကီု၊ ကောန်ဒပ်ပလိုတ်ပၟတ်ဍေံတအ်၊ ဗီုကဵုပရးစွံလဝ် ဇြဟတ်အရန်ဍေံတအ်ရ။ ပရေံအိုတ် မၞိဟ်အာကၠုၚ်ဒၟံၚ် လ္တူဂၠံၚ်တအ်လေဝ် ဇၟာပ်ပ်မၞိဟ် ညးဍုၚ်ကွာန်ဟွံသေၚ်ရပုဟ်။ ပတောံလဝ်အယောၚ်အလာကဵု မၞိဟ်ဍေံတအ်တုဲ ကရေပ်လဝ်အကြာဂှ်ရ။ လဂုၚ်ဂှ် ထံက်ရံၚ်ဒၟံၚ်ကဵု ဒကဴမတ်တုဲ မၚ်ရံၚ်ဒၟံၚ်ရ။ ဂွံတိုန်သၟူ သ္ဂံၚ်ဒပ်ဒမၠုက်ဍုၚ်ဇၞော်ဗက်ဂှ် ဗက်ဂၠာဲ ဂေတ်ကၠောံရ။ ကိစ္စလ္ၚဵုဂှ် လဂွံကဵုပရေၚ်ဂီုကၠီု ဟီုလဴဴထ္ၜးဟွံဂွံရ။ အဓိကဂှ် သၞတအ် ဗတိုက်ဒၟံၚ်ကဵု ဇာပလေတ်ရ။ ထိၚ်ဒဝ်လဝ်ရ။ ဗီုပြၚ်ဏံ ညာတ်ကေတ်ရ။
သြၚ်လောန်တိုၚ်မ် – ကာလပၠန်ဂတးလအ်တိုန်ကၠုၚ်ဗက်ဂှ် ပရေၚ်ချဳဒရာၚ်ပ္ဍဲလဂုၚ်ဗီုပြၚ်လဵုအခက်ခုဲတၚ်ကော်ချဴ သာဂၠိုၚ်တိုန်ကၠုၚ်ရော။
ဇြယျာကျောၚ် – နကဵု UG တအ် အဓိကဂှ်ပရေၚ်ဂီုကၠီုရ။ ညံၚ်ဂွံမံၚ်ဒှ်မွဲဖျုန်ကဵုညးတၞဟ်ဂှ် ဒးဖန်ဗဒှ်ဒၟံၚ်တၟာကလှ်ေရ။ ဒးစွံအာရီု။ အဓိကဂှ်ပရေၚ်ဂီုကၠီုရ။ တၚ်ဒုတိယ တၚ်ကော်ချဴဂှ်တှ်ေ ပရေၚ်ပ္ဍိုက်ကေတ်လွဟ်လက်နက်မကမ်ရ။ တုဲမွဲပၠန်ဂှ် အခိၚ်လအ်တိုန်ကၠုၚ်ဗက်ဂှ် ပ္ဍဲပရေၚ်ထံက်ပၚ်လေဝ် ဍောၚ်ၜိုတ်ကၠုၚ်ညးသ္ကအ်အိုတ်ရ။ ဣဏံလေဝ် ဒှ်တၚ်ကော်ချဴဴမွဲရ။
သြၚ်လောန်တိုၚ်မ် – ပ္ဍဲကာလကၠုၚ်စိုပ်ဂတဏံတှ်ေ စွံအဓိကကဵုဌာန်ပ္တဝ်ပၞာန်ဗီုပြၚ်လဵုတုဲ သွက်ဂွံဗတိုက်အာနွံရော။ စပ်ကဵုပရေၚ်ပၞာန်တုဲ မိက်ဂွံကဵုသမ္တီကဵု ညးဍုၚ်ကွာန်တအ်နွံတှ်ေ ဟီုလဴထ္ၜးကဵုညိ။
ဇြယာကျောၚ် – စပ်ကဵုပရေၚ်ပၞာန်တုဲ နကဵုလဂုၚ် အလုံဖအိုတ်ဂှ် ပိုဲဟွံမိက်ဟီုရ။ ဟွံမိက်ဟီုဂှ်တှ်ေ ပိုဲဂှ်နူတံတေံဂှ် ဒှ်ဒပ်ဒမၠုက်ဍုၚ်ဇၞော်ရ။ အတိုၚ်သဘာဝဒပ်ဒမၠုက်ဍုၚ်ဇၞော်ဂှ်ရ ပိုဲဂှ် ပါဲဓလေတ် အရာကြံၚ်ၚ်တုဲ လိုန်အရာဍိုန်န်ဏောၚ်။ တုဲမွဲတၚ်ပၠန်ဂှ် အခိၚ်ဝိုန်သတိရ။ အခိၚ်လဵုဝိုတ်သတိရောဟီုဂှ် ဂွံအခေါၚ်အရာတှ်ေ ဗီုဂွံဂှ် ပိုဲဗတိုက်အာဏောၚ်။ ဆၜိုတ်ဏံဓဝ်ရ။
သြၚ်လောန်တိုၚ်မ် – နဒဒှ်အလန်လကြဴအိုတ်ဏံ သွက်ပၠန်ဂတးဍုၚ်ဇၞော် ဂွံအံၚ်ဇၞး ၜိုတ်ဂလိုၚ်လဵုပၟိက်ဇၞော်ဒၟံၚ်ရော။ မုမိက်ဂွံဟီုကဵုညးဍုၚ်ကွာန် သီုညးမဆေၚ်စပ်တအ် မုကီုရော။
ဇြယျာကျောၚ် – သွက်ပရေၚ်ပၠန်ဂတးဂွံအံၚ်ဇၞးဟီုတှ်ေ ဂြိုပ်ကီု၊ ဍုၚ်ကီု မွဲဒမြိပ်ဓဝ်ရ။ ပိုဲဂှ်တှ်ေ ပ္ဍဲကဵုပိုဲ အတိုၚ်ဗီုပြၚ်ဖျေံလဝ် မူဝါဒဂှ်ရ။ အဓိကဂှ် ပိုဲကဵုဇြဟတ်ဍိုက်ဓရိုဟ် ကံၚ်ဇြဳပၞာန်ဏောၚ်။ နူကဵုဍုၚ်ဇၞော် ကဵုအာဇြဟတ်ဍိုက်ဓရိုဟ်ဏောၚ်။ ပ္ဍဲမုက်လိက်ကၟိန်ဍုၚ်နာနာဂှ် ညံၚ်ဍေံတအ် ထ္ၜးဟွံဂွံ သဝ်ဒၟံၚ်ဟီုဂှ် ညံၚ်ဂွံတီ ပိုဲချဳဒရာၚ်ကဵု ပ္ဍဲဍုၚ်ဇၞော်ဏောၚ်။ နကဵုဒပ်ဒမၠုက်ဍုၚ်ဇၞော်တအ်ဂှ်တှ်ေ နဒဒှ်မွဲဒပ် မွဲဇြဟတ်ရ ဒးဒှ်ဏောၚ်။ ဒပ်ဒမၠုက်ဍုၚ်ဇၞော်တအ်ဂှ် သီကေတ်ဗဒိုပ်လေဝ် ဟွံဂွံတုဲ သီကေတ်ဍုၚ်လေဝ် ဟွံဂွံပုဟ်။ မိက်ဂွံဟီုဂှ်တှ်ေ တၚ်ရန်တၟံ ညိဓဝ် ဟွံကဵုအခေါၚ်အုပ်ဓုပ်ကီု၊ တုဲမွဲတၚ်ပၠန်ဂှ် ပ္ဍဲမုက်လိက်ကၟိန်ဍုၚ်နာနာဂှ် သွက်ဍေံတအ်ထိၚ်ဒဝ်လဝ် ဍုၚ်ဇၞော်ဟီုဂှ် ဍာံဍာံဟွံသေၚ်ပုဟ် ဒှ်ကိစ္စဗီုဏံရ။ ဗီုပြၚ်တအ်ဏံ ညံၚ်ဂွံဒှ်အာ မံက်က်ဂတဝ်ဂတဝ်ဂှ် ချဳဒရာၚ်ဏောၚ် ဆၜိုတ်ဏံဓဝ်ရ။