ၜၚ်ကံက်၊ ဖေဖဝ်ဝါရဳ ၇
ကရောံက္ဍိုပ်သ္ကိုပ်ဗော် Move Forward ဒယှ်ကၠုၚ်လဝ် သွက်ဂွံဒှ်သ္ကိုပ်ဝန်ဇၞော်ဍုၚ်သေံဂှ် သၟာပရေၚ်ဍုၚ်ကွာန် ၇ တၠဂှ် ပ္ဍဲဂိတုဖေဖဝ်ဝါရဳ ၅ တေံ ဟိုတ်နူပကောံမၞိဟ်ဟွံလုပ်သၞောဝ် ပ္ဍဲသၞာံ ၂၀၁၉ တေံဂှ်တုဲ နူကဵုရုၚ်သၞောဝ်ဓဝ် ဖျေံစၟတ်လဝ်ဒဏ်ကဵုဒေါအ်ဇူရ။
ပြဝဗော် Move Forward ပ္တိတ်လဝ်ဇြဟတ် သွက်ဂွံပလေဝ်သၞောဝ်ဨကရာဇ်ဂှ်ဝွံ သ္ကဵုဇီုကပိုက်တဴ ပရေၚ်ဂီုကၠီုကၟိန်ဍုၚ် ကေုာံ နန်ဨကရာဇ်ဂှ်ရောၚ် ကြဴနူရုၚ်သၞောဝ်ဓဝ် စပ်ကဵုသၞောဝ်သ္ဇိုၚ်ဒက်ပ္တန် သ္ဂုတ်သွာတ်တုဲဂှ် သာတုဲဒးဆေၚ်ကၠုၚ်မုက် ကုပြသၞာစပ်ကဵုသၞောဝ်ဥပဒေတံရ။
ရုၚ်သၞောဝ်ဓဝ်ပါတောန်ဝါန် ဖျေံသ္ဇိုၚ်ၜၚ်ကံက်ဂှ် ဖျေံစၟတ်လဝ်ဒဏ်ထံၚ် ကုက္ဍိုပ်သ္ကိုပ်ဗော် Future Forward မဒှ်ဗော် Move Forward တြေံဂှ်တုဲ ဖျေံလဝ်အမိၚ် ဒဏ်လှုဲ ၁၁၂၀၀ ၝာတ်ရ။
တၚ်စောဲစပ်တံဏံဝွံ ဆက်စပ်ဒၟံၚ်ကဵု ပေါဲထ္ၜးဆန္ဒ လ္တူဍုၚ်ၜၚ်ကံက် သၞာံ ၂၀၁၉ တေံ မၞိဟ်ထံက်ဂလာန်ဂၠိုၚ်ကဵုလ္ၚီပါလုပ်လဝ်ဂှ် ဂွံတီကေတ်တုဲ သၞာဲဒဴပရေၚ်ပိုန်ဒြပ် ထာနာဓံၚ်ကဵု အမာတ်ကၠတ်ထဝ် ပဳယာဗု ဒးဒုၚ်ဖျေံစၟတ်လဝ်ဒုဟ်ဒဏ်တံပါလုပ်ဂှ် သီု ၈ တၠဝွံ ဖန်လဝ်သွက်ဂွံလုပ်အာတ်ဒုၚ်ဂုန်ဂှ် ညးရေၚ်တၠုၚ်ဂဗုတ်ညးတံ ဟီုရ။
နကဵုဖဳထာ ယဝ်ရလုပ်အာတ်ဒုၚ်ဂုန် ဟွံအံၚ်ဇၞးမ္ဂး နူရုၚ်သၞောဝ်ဓဝ် ဒုဟ်ဒဏ်ဖျေံစၟတ်လဝ်လ္တူညးဂှ် ဟိုတ်နူသ္ပဒတန်မာန်ဂှ်ရ နူကဵုနဒဒှ်အမာတ်ကၠတ်ထဝ်ဂှ် ဒးဒုၚ်ပ္တိတ်မာန်ရောၚ် ညးလ္ၚတ်ဂမၠိုၚ် သ္ဂးဒၟံၚ်အိုတ်ရ။
လ္ဂောံကဵုသၞောဝ်ဥပဒေသေံမ္ဂး ညးမကလိလောန်လဝ် အမှုရာဇဝတ်မွဲတၠဝွံ အခေါၚ်ဂွံယိုက်ဂၠေၚ်တာလျိုၚ် နဒဒှ်အမာတ်ကၠတ်ထဝ် ဟွံမွဲ စၞောန်ပျးလဝ်ဂှ်ရ ဗော် Move Forward ဝွံ ဒးဒုၚ်ပလီုမာန်တုဲ က္ဍိုပ်သ္ကိုပ်ဂမၠိုၚ်လေဝ် ဒးဒုၚ်ကၟာတ်လဒဵု နူကဵုပရေၚ်ဍုၚ်ကွာန်မာန်ဂှ် ဂွံတီကေတ်ရ။
ကြဴနူတၚ်သ္ဂုတ်သွာတ် ရုၚ်သၞောဝ်ဓဝ် စပ်ကဵုသၞောဝ်သ္ဇိုၚ်ဒက်ပ္တန် မံက်တိတ်ကၠုၚ်တုဲဂှ် သၞာဲဒဴဂမၠိုၚ်ကဵု ဗော်ဒစဵုဒစးညးတံဝွံ ယဝ်ရစအာတ်မိက်ကၠုၚ် အတိုၚ်သၞောဝ်မ္ဂး ဗော် Move Forward ဂွံဆက်ဒတူလိုၚ် အန္တရာယ်နွံကၠုၚ်မာန်ရ။
ဗော် Move Forward ဂွံလဝ်ဇၞးပ္ဍဲပေါဲရုဲမာဲ မစန်ဒက်လဝ် သွက်ဂွံဖအောန်ဖျေံ သြဇာဒပ်ပၞာန်ဓလီုလဝ် ပ္ဍဲပရေၚ်ဍုၚ်ကွာန်ဂှ်ကီု၊ သွက်ဂွံတးပါဲ ပူဂဵုမွဲတၠဓဝ် အုပ်ဓလီုကေတ်လဝ်ဖအိုတ် ပ္ဍဲကဵုပရေၚ်ပိုန်ဒြပ်တံ ကေုာံ သီုကဵုသွက်ဂွံဖအောန်ဖျေံ အဝဵုအခေါၚ်ကၠောန်နန်ထဝ်ဨကရာဇ်ဂှ်ဝွံ အပ္ဍဲကၠတ်ထဝ်ဂှ် ဒှ်ဗော်ဇြဟတ်ဂၠိုၚ်အိုတ်မွဲရ။
Ref: Reuters