ၜၚ်ကံက်၊ ဖေဖဝ်ဝါရဳ ၈
ဂအုပ်ညးရေၚ်တၠုၚ်ဂဗုတ်အလဵုအသဳ ချပ်ဒၟံၚ် သွက်ဂွံပံက်ဂဗုတ်ကေတ်အရေဝ် ကုသ္ကိုပ်ဝန်ဇၞော်တြေံ တက်ဇြေန်ယှေန်နာဝါထရာ နကဵုတၚ်စောဲစပ် ဖ္ဍိုက်ဂရိုက် ဂြောဝ်ဂတာဨကရာဇ်ဂှ်ဏောၚ်ဂှ် ပ္ဍဲဂိတုဖေဖဝ်ဝါရဳ ၆ တေံ သၞာဲဒဴမွဲတၠ ဟီုဂးဏာလဝ်ရ။
တေၚ်စပ်လဝ်တက်ဇြေန် စပ်ကဵုအေန်တာဗျူ မကၠောန်သ္ပလဝ် ပ္ဍဲဍုၚ်ကိုဝ်ရဳယျာသၠုၚ်ကျာ သၞာံ ၂၀၁၅ တေံဂှ်တုဲ ကြဴနူဒပ်ပၞာန် ပလှ်ဖျေံ အလဵုအသဳဒေံဗြဴညး သ္ကိုပ်သ္ကဂှ်တုဲဂှ် အလဵုအသဳပၞာန် ပံက်လဝ်ဂဗုတ်ရ။
ပ္ဍဲသၞောဝ်သ္ဇိုၚ်ဒက်ပ္တန်သေံဂှ် လ္ဂောံကဵုသိက္ခာတုဲ ဒးစွံအာဨကရာဇ် ဒၞါဲဒးရှ်ေသှ်ေပူဇဴဏောၚ် စၟတ်လဝ်တုဲ ပွမဖ္ဍိုက်ဂရိုက် ဂြောဝ်ဂတာဨကရာဇ်ဂှ်ဝွံ ဒှ်ဒုဟ်ဒဏ်ဇၞော်ဇၞော်တုဲ အပ္ဍဲဍုၚ်ဂှ်လေဝ် ဒှ်ပရေၚ်ယှုက်ထုဲမွဲရ။
သၞောဝ်ဏံဝွံ လ္တူဂၠးတိဏံ ဒှ်သၞောဝ်တေၚ်ဂြတ်အိုတ် သ္ဂးမာန်တုဲ ဖံက်ပ္ကဝ်ဒးမွဲဝါမ္ဂး ဒဏ်ထံၚ် စဵုကဵု ၁၅ သၞာံ ဒးဖျေံမာန်ဏောၚ် ဂွံတီကေတ်ရ။
တက်ဇြေန် ဒှ်လဝ်သ္ကိုပ်ဝန်ဇၞော် နူသၞာံ ၂၀၀၁ စဵုကဵု ၂၀၀၆ သြဇာဇၞော်ဂှ်ဝွံ ရပ်စပ်အဝဵု ဟွံဗဗွဲကဵုဒၞါဲတုဲ ဒဏ်ထံၚ် ၈ သၞာံ ဒးဒုၚ်ဖျေံလဝ်ဂှ် ပါဲဒလေတ်တုဲ အာမံၚ်လဝ် ပ္ဍဲဍုၚ်သ္အာၚ် ပွိုၚ် ၁၅ သၞာံတုဲ သၞာံတုဲကၠုၚ်တေံ ပ္ဍဲဂိတုအဝ်ဂါတ်ဂှ် ကလေၚ်စိုပ်ကၠုၚ် ဍုၚ်မိတိမပၠန်ရ။
အခိၚ်လၟုဟ် တက်ဇြေန်ဝွံ ဟိုတ်နူပြသၞာပရေၚ်ထတ်ယုက်တုဲ ဒးဒုၚ်ထိၚ်လဝ် ပ္ဍဲရုၚ်ဂဥုဲတုဲ ဟွံကေၚ်မံၚ် ပ္ဍဲထံၚ်ဏီတုဲ ဒဏ်ထံၚ်ဖျေံစၟတ်လဝ် လ္တူညးဂှ်လေဝ် ဨကရာဇ်ဂှ် ယှအ်ဖျေံကဵုလဝ် စဵုကဵု ၁ သၞာံတုဲ ဂိတုဏံကြပ်အိုတ်မ္ဂး အခေါၚ်အာတ်ဒုၚ်ဂုန်ဒုၚ်လျိုၚ်တံ နွံဒၟံၚ်ဂှ် ဂွံတီကေတ်ရ။
ဟိုတ်နူအာမံၚ်လဝ် ဍုၚ်သ္အာၚ်တုဲ အရာမတေၚ်စပ် စပ်ကဵုသၞောဝ်ဨကရာဇ်ဂှ် ဟွံဂွံကေတ်လဝ်အရေဝ်တုဲ လအ်အာ ပွိုၚ် ၇ သၞာံယျဂှ် ညးမၞုံအခေါၚ်ဟီုဂး ရုၚ်ဂအုပ်ညးရေၚ်တၠုၚ်ဂဗုတ်အလဵုအသဳ ပရာယုတ် ပက်ယှ်ဃောန် ဟီုကဵု အ္စာပရိုၚ်ဂမၠိုၚ်ရ။
သ္ဂုတ်သွာတ်အာ ကေတ်အရေဝ်အခိၚ်လဵုဏောၚ်ဟီုဂှ် ဟီုပ္တိတ်လဝ်ချိုတ်တ်ပၠိုတ်တ် ဟွံမွဲတုဲ တက်ဇြေန်ဂှ်တှ်ေ ပြဝဗၠေတ်တ်လဵုမွဲမှ ဟွံကၠောန်လဝ်ပုဟ်ဂှ် တးပါဲလဝ်တုဲ လိက်မွဲတၞး အာတ်မိက်လဝ် သွက်ဂွံရေၚ်တၠုၚ်ကဵုညး ညံၚ်ဂွံဗဗွဲဓဝ်ဂှ်လေဝ် ပလံၚ်ဗစိုပ်လဝ် ဇရေၚ်သၟိၚ်တၠအဝဵုတံဂှ် ဂွံတီကေတ်ရ။
နကဵုတက်ဇြေန် ကလေၚ်ဗလးကၠုၚ်မ္ဂး ဂကောံဒပ်ဗၠာဲသၟိၚ်တံ ရပ်အာညးဏောၚ်တုဲ အခိၚ်ဂအုပ်ညးရေၚ်တၠုၚ်ဂဗုတ်အလဵုအသဳ ချပ်ဒၟံၚ်သ္ဂောံပ္တိုန်တၚ်စောဲစပ် လ္တူညးဂှ် ဗၠးဒၟံၚ်ယာယဳမာန်ရောၚ် ပရာယုတ် ဟီုရ။
သ္ကိုပ်ဝန်ဇၞော်တြေံ တက်ဇြေန်ဂှ် ကြဴနူမဟာမိတ်ညး ဂွံဇၞးပေါဲရုဲမာဲတုဲဂှ် ကလေၚ်စိုပ်ကၠုၚ် ဍုၚ်မိတိတုဲ အကြာသၞညးကဵု ညးဂှ် ကေတ်လဝ်တၚ်တုပ်စိုတ် စပ်ကဵုပရေၚ်ဍုၚ်ကွာန်သ္ၚိတ်တ်မွဲဏောၚ် ဟီုဂးဒၟံၚ်နွံကီုလေဝ် မဟာမိတ်တံဂှ်တှ်ေ တးပါဲလဝ်ရ။
Ref: Reuters