ကရာချဳ၊ ဖေဖဝ်ဝါရဳ ၉
မ္ၚးရုၚ် အလံၚ်ညးစၞးပေါဲရုဲမာဲ မၞုံသ္ကုတ်ပလိုတ်ကၟိန်ဍုၚ်ပါကေဿတာန်ဂှ် ဟိုတ်နူဗုမ်ဗ္တိုဟ်ထ္ကးအာၜါမတုဲ မၞိဟ် ၂၈ တၠ ချိုတ်တုဲ ဂၠိုၚ်ကဵုဒါဇြိန် ဇီုကပိုက်ကလိဂွံလဝ်ဝပ်ဂှ် ဂွံတီကေတ်ရ။
က္တဵုဒှ်လဝ် ပ္ဍဲဂိတုဖေဖဝ်ဝါရဳ ၇ တုဲကၠုၚ်တေံတုဲ ကၠာဂွိုအ်စိုပ်တ္ၚဲပေါဲရုဲမာဲ မကၠောန်ဗဒှ် ပ္ဍဲဂိတုဖေဖဝ်ဝါရဳ ၈ ဂှ် ဖျေံလဝ်ဂီုကၠီု မသုန်ကိုဋ်ပြၚ်တုဲ သၞာဲဒဴဂမၠိုၚ် တြးလဝ်တၞးလိက်မာဲ ဇရေၚ်ရုၚ်မာဲ ၉ ဠက်ပြၚ် ဂွံတီကေတ်ရ။
ကၠာဂွိုအ်စိုပ်ပေါဲရုဲမာဲ အလုံဍုၚ်မွဲ မၞိဟ်ကဵုဒါဇြိန် ဒးဒုၚ်ဗ္တိုက်လဝ်တုဲ အလံၚ်ညးစၞးပေါဲရုဲမာဲၜါတၠလေဝ် ဒးဒုၚ်ပန်လဝ်ကီုရ။
တၚ်ရန်တၟံ ပရေၚ်ဗ္တိုဟ်ထ္ကးဂှ်ဝွံ ညံၚ်ဂွံပလီုပေါဲရုဲမာဲဂှ်ဏောၚ်ဂှ် ဝန်ဇၞော်လလောၚ်ပရိုၚ်ယာယဳ တွဵုရးဗာလူချဳသတာန် ဂျာန်အချာဇြိုၚ် ဟီုရ။
ဟိုတ်နူဗုမ်တဲဗ္တိုဟ်ထ္ကးအာလဝ် ဗ္ဒါဲရုၚ်အလံၚ်ညးစၞးပူဂဵု မၞုံပ္ဍဲဒေသပဳယှေန် ကိုပ်ကၠာအိုတ်ဂှ်တုဲ မၞိဟ် ၁၆ တၠ ချိုတ်အာလဝ်တုဲ ဒေသဏံဝွံ တန်တဴဒၟံၚ် နူကဵုပယျဵုအာဖဂါန်နေဿတာန်ဂှ် ၁၀၀ ကဳလောမဳတာ နူကဵုဍုၚ်ကူယက်တာဂှ် ၅၀ ကဳလော မဒှ်ရ။
ပရေၚ်ဗုမ်ဗ္တိုဟ်ထ္ကး ပ္ဍဲဍုၚ်ကဳလာဇြိုၚ်ဇူလာ အလန်ဒုတိယဂှ်ဝွံ က္တဵုဒှ်အာလဝ် ဗ္ဒါဲရုၚ်အလံၚ်ညးစၞး ဗော် (JUI-F) တုဲ ဟိုတ်နူဗုမ်တဲတုဲ မၞိဟ် ၁၂ တၠ ချိုတ်အာလဝ်ရ။ ပ္ဍဲကဵုပရေၚ်ဗ္တိုက်သီုၜါလ္ပာ်ဂှ် ညးဇီုကပိုက်ကလိဂွံဝပ် ၃၄ တၠ နွံဂှ် ဂွံတီကေတ်ရ။
တုဲကၠုၚ်ပ္ဍဲဂိတုဂျူလာၚ်တေံ ပ္ဍဲကဵုတွဵုရးခိုၚ်ဘာပက်တောန်ခွါ ဒိုဟ်ဗာယပ်ဂှ် အပ္ဍဲကဵုပရေၚ်ကောံကလောံ စပ်ကဵုပရေၚ်ဍုၚ်ကွာန်ဗော်ဏံဂှ် ဟိုတ်နူဗ္တိုဟ်ထ္ကးဗုမ် ဒုၚ်ချိုတ်တံဂှ်တုဲ မၞိဟ် ၄၄ တၠ ဒးချိုတ်အာလဝ်ဏီရ။
စပ်ကဵုပရေၚ်ဗ္တိုက်ဗ္တိုဟ်ထ္ကးဗုမ်ဂှ်တုဲ ဂအုပ်ညးအုပ်ကာကုလ အာန်တဝ်နဳယိုဝ် ဂူတာရက် ဒစဵုဒစး ဗျိပၠုတ်လဝ်ရ။
ပ္ဍဲပါကေဿတာန် ပရေၚ်ချဳဒရာၚ်စန်ဒက်မာဲတံဂှ် ဂိတုဖေဖဝ်ဝါရဳ ၆ အခိၚ်ဗ္တံဂှ် ပတုဲဒှ်ထောံလဝ်တုဲ နကဵုညးဍုၚ်ကွာန်ဂမၠိုၚ် ဂိတုဖေဖဝ်ဝါရဳ ၈ နူဂယး ၈ နာဍဳ စဵုကဵု ဇိုၚ်သဝ်တ္ၚဲ ၅ နာဍဳ ကဵုမာဲမာန်ရောၚ် ဂွံတီကေတ်ရ။
မၞိဟ်လုပ်ပြိုၚ် သွက်ဒၞါဲအမာတ်ကၠတ်ထဝ်ဂှ် ၁၈၀၀၀ နွံတုဲ သွက်ဂီုကၠီုဂှ် ဇၟာပ်ပ်ဒၞါဲ ဖျေံစၟတ်အာအစဳဇန်တုဲ ကၠောန်အာဏောၚ်ဂှ် ဇၞော်သ္ကိုပ်ဂကောံဒပ်ဗၠာဲသၟိၚ် ရာဖါတ် ဟီုရ။
ပါကေဿဝာာန်ဝွံ ပ္ဍဲကဵုလၟိဟ်မၞိဟ်ဂၠိုၚ်အိုတ် မရနုက်ကဵုပဉ္စမ လ္တူဂၠးတိဏံ ၂၄၀ ပြကောဋိကိုဋ်ဂှ် ၁၂၈ ပြကောဋိကိုဋ်ဂှ်ဝွံ အခေါၚ်ကဵုမာဲနွံဂှ် ဂွံတီကေတ်ရ။
Ref: AFP