မဝ်သကိုဝ်၊ ဖေဖဝ်ဝါရဳ ၁၀
သမ္မတရုယှာ ဗလာဒဳမာပူတေန်ဂှ် သွက်ဖဵုဂုန်ဂှ် ဗ္တိုက်အာဒဵုစိုပ်တရဴဏောၚ်ကီုလေဝ် ပေါဲပၞာန် ဗ္တိုက်ဒၟံၚ်ပ္ဍဲယူကရုၚ်ဂှ် ညံၚ်ဂွံဗျာပ်တြးအာ ဒဵုကဵုဍုၚ်ပဝ်လာန် ကေုာံ ဍုၚ်လာတ်ဗဳယာတံဂှ် ရန်လဝ်ဟွံမွဲပုဟ်ဂှ် ဟီုလဝ် ပ္ဍဲအေန်တာဗျူမွဲရ။
ညးဟီုလဝ် ပ္ဍဲကဵုအေန်တာဗျူ ကုအ္စာပရိုၚ်အမေရိကာန် မဗလးပ္တိတ်လဝ် ပ္ဍဲဂိတုဖေဖဝ်ဝါရဳ ၈ တုဲကၠုၚ်တေံရ။
ကၠာဂွိုအ်လုပ်ၜက်ၜေတ် ယူကရုၚ်တေံရ ပ္ဍဲကဵုအေန်တာဗျူ ကုအ္စာပရိုၚ်အမေရိကာန် ကၠာအိုတ်ဂှ် ပူတေန်ဂှ် က္ဍိုပ်သ္ကိုပ်ရးပလိုတ်ဂမၠိုၚ်ဝွံ သွက်ဂွံဗ္တိုက်သၠေက် ရုယှာ နကဵုမဟာဗျူဟာစှ်ေစှ်ေဂှ် ဒှ်ဟွံမာန်ပုဟ်ဟီုဂှ် ချပ်ဒးကၠုၚ်တုဲ လက္ကရဴ မုဂွံကၠောန်မုရောဟီုဂှ် မိက်ဂွံတီဒၟံၚ်အိုတ်ယျ သ္ဂးလဝ်ရ။
အ္စာပရိုၚ်အမေရိကာန် ဝဝ်သရိတ်ဂျာနေဝ် အဳဗာန် ဂက်ယှ်ကိုဝ်ဝေဒ် မၚ်ဒၟံၚ် သွက်ဂွံပ္တိုန်ရုၚ် နကဵုတၚ်စောဲစပ် ကၠတ်ထံၚ်ပရိုၚ် ဒးဒုၚ်ရပ်ထိၚ်လဝ် ပ္ဍဲရုယှာ ဗ္ဒါဲပွိုၚ်မွဲသၞာံ ဂွံကေတ်တၚ်တုပ်စိုတ်ပရေၚ်ဗၠးၜးမွဲ ဒှ်ကၠုၚ်မာန်ဏောၚ် နကဵုဇကု ပတှ်ေစှ်ေစိုတ်ဂှ် ညး ဟီုလဝ်ဏီရ။
ပ္ဍဲကဵုအေန်တာဗျူ ကုညးပ္တိုန်ထ္ၜးအစဳဇန် တက်ကာ ကာဇြေန် လလအ်ပွိုၚ်ၜါနာဍဳ ပ္ဍဲဂိတုဖေဖဝ်ဝါရဳ ၆ ပ္ဍဲဍုၚ်မဝ်သကိုဝ်ဂှ် ပူတေန် ဟီုလဝ် သာ်ဏံရ။
စပ်ကဵုတၚ်သၟာန် သွက်ဂွံဗလးဏာကောန်ပၞာန်ရုယှာတံ ဍုၚ်ပဝ်လာန် မဒှ်ကောန်ဂကောံနေတဝ် အနာဂတ်တေံ ချပ်လဝ်ကီုဟာဂှ် နကဵုပဝ်လာန် ယဝ်ဗ္တိုက်ကၠုၚ် ရုယှာမှဟေၚ် ကလေၚ်ဗ္တိုက်အာဏောၚ်ဂှ် ပူတေန် သှ်ကဵုလဝ်ရ။
ယူကရုၚ်ဝွံ အပ္ဍဲပေါဲသဳကၠဳပ္ညဳပ္ညပ် ကၠောန်ဗဒှ်လဝ် ပ္ဍဲဍုၚ်အေဿတာန်ပူ သၞာံ ၂၀၂၂ ဂိတုဨပရဴဂှ် ညံၚ်ပရေၚ်ဗ္တိုက်တံ ဂွံဒေါအ်ဒေၚ်အာ ကြပ်တုပ်လဝ်စိုတ် က္တဵုဒှ်လဝ်ကီုလေဝ် ကြဴနူဒပ်ရုယှာတံ ဆုတ်ကလေၚ်အာ နူကဵုဗ္ဒါဲဍုၚ်ကိဗ်တုဲဂှ် လစွံစိုတ်ကလေၚ်ပြံၚ်လှာဲအာဂှ် ပူတေန် ဟီုဂးလဝ်ရ။
ကြဴနူပရေၚ်ဗ္တိုက်ၜက်ၜေတ်ရုယှာ စလဝ် ပ္ဍဲသၞာံ ၂၀၂၂ ဂိတုဖေဖဝ်ဝါရဳတုဲဂှ် အမေရိကာန် မရီုဗၚ်လဝ် ယူကရုၚ် ဒဝ်ဠာ ၁၁၀ ဗဳလျာန်ဂှ် ဂွံသဳကၠဳအာ အတိုၚ်ပူတေန်ဖျေံစၟတ်လဝ်ဂှ် စိုတ်ဟွံလုပ်စပုဟ်ဂှ် ဟီုလဝ်ရ။
Ref: Reuters