အေဿလာမ်မာဗာတ်၊ ဖေဖဝ်ဝါရဳ ၁၁
သ္ကိုပ်ဝန်ဇၞော်တြေံ ပါကေဿတာန် နာဝတ်ဇြာယှာရေဖ် ကေုာံ အဳမရာန်ခါန်တံ သီုၜါတၠ ဂွံဇၞးပေါဲရုဲမာဲ လလောၚ်တြးလဝ် ပ္ဍဲဂိတုဖေဖဝ်ဝါရဳ ၉ တေံဂှ်ရ ပဋိပက္ခပရေၚ်ဍုၚ်ကွာန်တံ ထပ်က္တဵုဒှ်ကၠုၚ်မာန်ရောၚ် ညးလ္ၚတ်ဂမၠိုၚ် ဟီုရ။
ပ္ဍဲပေါဲရုဲမာဲ မကၠောန်ဗဒှ်လဝ် ပ္ဍဲဂိတုဖေဖဝ်ဝါရဳ ၈ တုဲကၠုၚ်တေံဂှ် ဗော် ယှာရေဖ်ဝွံ ကလိဂွံလဝ်ဇၞး နကဵုမာဲဂၠိုၚ်အိုတ်ကီုလေဝ် ဗော်အဳမရာန်ခါန်ဝွံ ၜိုန်ရဒးဒုၚ်တာဒၞါလဝ် အခေါၚ်လုပ်စိုပ်ပြိုၚ်ပေါဲရုဲမာဲကီုလေဝ် လုပ်စိုပ်ပြိုၚ်လဝ် နဒဒှ်ညးစၞးပူဂဵုတုဲ သရောပ်ကၠေံဖအိုတ်မ္ဂး ကလိဂွံလဝ်ဇၞး ဒၞါဲအမာတ်ဂၠိုၚ်အိုတ်ဂှ် ညးထံက်ဂလာန်ညးတံ သ္ဂးရ။
အဳမရာန်ခါန် ညးဝေၚ်ခြေၚ်ကိတ်ဒယှ်တြေံဂှ်ဝွံ ဒးဒုၚ်ဖျေံထံၚ်တုဲ ပေါဲရုဲမာဲဝွံ ဟိုတ်နူပရေၚ်ဗ္တိုက် ရဲမၞုံပၟိက်ပၞာန်တံကဵု ဟိုတ်နူသွဟ်ဂွံတိတ် လအ်လတံဂှ်တုဲ ပရေၚ်ပလာပ်ပထုဲတံ နွံလဝ်ရ။
ယှာရေဖ်ဂှ် ဗော်ညးမွဲဗော်ဓဝ် ဟွံဂွံဇၞးလဝ် ဒၞါဲအမာတ်ကၠတ်ထဝ် ပိုတ်တ်သ္ကုတ်တ်ဂှ်ရ သွက်ဂွံဒက်ပ္တန်အလဵုအသဳပံၚ်ကောံဂှ် သဳကၠဳအာကဵု ဗော်တၞဟ်ခြာတံဏောၚ်ဂှ် ဟီုလဝ်ရ။
ပ္ဍဲကဵုဒၞါဲအမာတ် ၂၆၅ ဂှ် ကြဴနူလလောၚ်တြးသွဟ် ပန်ဂအုံပိဂအုံပြၚ်တုဲဂှ် တၚ်လလောၚ်တြး ယှာရေဖ်ဏံ မံက်တိတ်ကၠုၚ်ရ။
ဟိုတ်နူပရေၚ်ဗ္တိုက်ညးမၞုံပၟိက်ပၞာန်တံဂှ်တုဲ ပေါဲရုဲမာဲ မၞိဟ် ၂၈ တၠ မဒးချိုတ်အာတုဲ ဂွံ ၂၄ နာဍဳဂှ် ယှာရေဖ် လလောၚ်တြးလဝ်သာ်ဏံရ။
ဒၟါနူမၞိဟ်ဂွံဇၞး ပိုတ်တ်သ္ကုတ်တ်ဟွံမွဲဂှ်ရ လစွံစိုတ်စပ်ကဵုပရေၚ်ဍုၚ်ကွာန် ပါ်ထ္ကးဂၠိုၚ်တုဲ အခိၚ်အန္တရာယ်ညးမၞုံပၟိက်ပၞာန်တံ ဂၠိုၚ်ကၠုၚ်ဒၟံၚ်ဂှ် အကြေပ်အဂြတ်ပရေၚ်ပိုန်ဒြပ် ဂွံကလေၚ်ယာက္ဍိုပ်မာန် အကာဲအရာပါကေဿတာန် ဒးရုန်ဂ္စါန်ဒၟံၚ်ဂှ် သာပရေံကၠုၚ်မာန်ရောၚ် ညးလ္ၚတ်ဂမၠိုၚ် သ္ဂးရ။
အလံၚ်ညးစၞးပူဂဵု ညးထံက်ဂလာန်အဳမရာန်ခါန်ဗွဲမဂၠိုၚ်ပါလုပ်ဂှ်ဝွံ သွက်ဒၞါဲအမာတ် ၂၄၅ အခိၚ်ရိုဟ်လၟိဟ်မာဲတုဲဂှ် ကလိဂွံလဝ် ၉၈ ဒၞါဲဂှ် ဂွံတီကေတ်ရ။
ဗော်ယှာရေဖ် (PML-N) ကလိဂွံလဝ်ဇၞး ၆၉ ဒၞါဲတုဲ ဗော်ညးဍုၚ်ကွာန်ပါကေဿတာန် ကောန်ဗၠာဲသ္ကိုပ်ဝန်ဇၞော်တြေံ ဗဳနာဇြာဘူ မဒးဒုၚ်ကၠတ်ဂစိုတ်လဝ် မၞုံယၟုဗဳလာဝါဘူတိုဝ်ဇြာဒါရဳ သ္ကိုပ်သ္ကဂှ် ဂွံလဝ်ဇၞး ၅၁ ဒၞါဲရ။
ဒၞါဲအမာတ်သှ်ေတံဂှ် ဗော်ဍောတ်တ်တံကဵု ညးစၞးပူဂဵုတံ ကလိဂွံလဝ်ဇၞးရောၚ် ဂွံတီကေတ်ရ။
Ref: Reuters