ဘရာတ်သေဲ၊ ဖေဖဝ်ဝါရဳ ၁၃
ဂလာန်ဒဝ်နေဝ်ထြာပ်ဟီုလဝ် ဍုၚ်မဟာမိတ်နေတိုဝ် မရပ်စပ်သြန်ရုမ်မ်ဂပ်ပ် သွက်ပရေၚ်စဵုဒၞါဟွံမာန်တံဂှ် အမေရိကာန် စဵုဒၞါကဵုအာဟွံသေၚ်ဂှ်ဝွံ ကဵုပရေၚ်ဂီုကၠီုဇကုတံသီုဖအိုတ် ဇြဟတ်ဍိုန်စှ်ေအာဂှ် ဇၞော်သ္ကိုပ်မဟာမိတ် ပရေၚ်ပၞာန်ရးပလိုတ် ဟီုရ။
ပွမဟီုဂးသာ်ဏံဂှ်ဝွံ သ္ကဵုအန္တရာယ်ဇၞော်ဇၞော် ဒတုံစှ်ေလ္တူအမေရိကာန် ကေုာံ ဂကောံဒပ်ဥရဝ်ပတံမာန်ဂှ် သတိုဝ်တာန်ဗက် သ္ဂးလဝ်ရ။
နကဵုဍုၚ်မဟာမိတ်ဂမၠိုၚ် ၚုဟ်မးဗၞိက်ပ္တိတ်အပ္ဍဲဍုၚ်ညးတံ ၂ တၟံကၠံဂှ် ဒးသုၚ်စောဲ သွက်ပရေၚ်စဵုဒၞါဏောၚ် စၟတ်လဝ်တုဲ သွက်ဂွံဗ္တိုက် ဍုၚ်ဟွံဒ္ဂေတ်ဗက်တံဂှ် နကဵုညး ဖ္တိုက်ဖ္အောဝ်အာ ရုယှာဏောၚ်ဂှ် သမ္မတထြာပ် ဟီုဂးလဝ် ပ္ဍဲကဵုပေါဲမၞိဟ်ကောံကလောံမွဲရ။
အခိၚ်ဆဵုဂဗကဵု က္ဍိုပ်သ္ကိုပ်ဍုၚ်ဇြဟတ်ဇၞော်မွဲဍုၚ်ဂှ် ထြာပ်ဟီုလဝ်သာ်ဏံတုဲ ဟီုလဝ်အခိၚ်လဵု ဟီုလဝ်ကဵုက္ဍိုပ်သ္ကိုပ်လဵုရောဟီုဂှ် ဟွံဂွံတီကေတ် ချိုတ်တ်ပၠိုတ်တ်ဏီရ။
ဆ္ဂး ဂလာန်ထြာပ်ဟီုလဝ်ဂှ်ဝွံ ဒှ်ဂလာန်အန္တရာယ်ဂၠိုၚ်မွဲတုဲ သွက်ဂွံဗဒှ်ပေါဲပၞာန်ကဵု သွက်ပရေၚ်ဗ္တိုက်ပကီုပရာပ်တံဂှ် တုပ်တဴညံၚ်ရဴကဵုဂၠံၚ် ကုရုယှာဂှ် သမ္မတဂျဵုဗိုၚ်ဒေန် ခၠေဝ်ပလန်လဝ်ရ။
ပ္ဍဲကဵုဍုၚ်ဂကောံနေတဝ် ၃၀ ဍုၚ်ဂှ် ၁၉ ဍုၚ်ဂှ် ဟွံရပ်စပ်လဝ် ၚုဟ်မးဗၞိက်ပ္တိတ်အပ္ဍဲဍုၚ်ညးတံ စဵုကဵု ၂ တၟံကၠံ သွက်ပရေၚ်စဵုဒၞါဂှ် ထ္မံက်ထ္ၜးလဝ် ပ္ဍဲကဵုစရၚ် သၞာံ ၂၀၂၃ ဂကောံနေတဝ်ဂှ်ရ။
ပ္ဍဲကဵုဍုၚ်ဂွံရပ်စပ်သြန် ဟွံပေၚ်သာ်ဏံတံဂှ် ပြၚ်သေတ်၊ ဂျာမနဳ ကေုာံ ဍုၚ်နဝ်ဝေတံပါလုပ်တုဲ နကဵုဍုၚ်မလုပ်ဂကောံဂမၠိုၚ် ပ္ဍဲကဵုညးတံ ဍုၚ်လဵုဟွံဟီု ယဝ်ရဒးဒုၚ်ဗ္တိုက်မ္ဂး ဒးစဵုဒၞါကဵုဏောၚ်ဂှ် သ္ပလဝ်ကတိအိုတ်ရ။
မေဿတာ သတိုဝ်တာန်ဗက်ဂှ် ဂကောံပိုယ်တံဝွံ သွက်ဂွံစဵုဒၞါကဵု ဍုၚ်မလုပ်ဂကောံတံဂှ် ကောံကလောံဒှ်ဒၟံၚ်ဒတုဲယျတုဲ ကၠောန်သ္ပအာ ပရေၚ်ခၠေဝ်ပလန်ဇြဟတ်ခိုဟ်တံဏောၚ်ဂှ် ဟီုဂးလဝ်ရ။
Ref; BBC