ကိဗ်၊ ဖေဖဝ်ဝါရဳ ၁၅
နဒဒှ်အလန်ကိုပ်ကၠာအိုတ် ရုယှာ ဗ္တိုက်လဝ် ပ္ဍဲယူကရုၚ် နကဵုကမ်လှောဝ် Zircon မြက်နူရမျာၚ်ဂှ် ညးစိုန်သ္ကီုဂမၠိုၚ် ဟီုရ။
သက်သဳ ဒဒှ်ရဗ္တိုက်လဝ်သာ်ဏံဂှ် ခြာဟွံလအ်ကၠုၚ်တေံ ကလိဂွံလဝ် နူကဵုပရေၚ်ဗ္တိုက်ရုယှာမွဲဏောၚ် အိုဝ်လက်ဇြာန်ဒါ ရူဗေန် သ္ကိုပ်စၞောန်ပ္ညုၚ် အေန်သတဳကျုတ်သိပ္ပံ သုတေသန ယူကရုၚ် ဟီုရ။
ကမ်လှောဝ်ဂှ်ဂှ် ရုယှာ ပန်ဗလးလဝ် လ္တူက္ၜၚ်မွဲဖ္ဍိုက်တုဲ မွဲနာဍဳ စဵုကဵုအသိၚ် ၆၀၀၀ မိုၚ် မြက်ဇက်ဂှ် ဂွံတီကေတ်ရ။
ဒမြိပ်ဏံဝွံ မြက်နူကဵု အသိၚ်ရမျာၚ် ၈ ဆ ဏီရ။ ဟိုတ်နူပရေၚ်ဗ္တိုက်ရုယှာဂှ်တုဲ မၞိဟ် ၅ တၠ ချိုတ်တုဲ မၞိဟ် ၅၀ ပြၚ် ကလိဂွံလဝ်ဝပ်ဂှ် ထ္မံက်ထ္ၜးလဝ် ပ္ဍဲပရိုၚ်ယူကရုၚ်တံရ။
ကမ်လှောဝ် Zircon ဇကုတံဝွံ ဒှ်သၞောတ်လွဟ် ဂွံစဵုဒၞါတဝ်စၞေဟ် ဟွံလောဲမွဲရောၚ်ဂှ် သမ္မတရုယှာ ဗလာဒဳမာပူတေန် ဟီုဂးလဝ်ရ။
အတိုၚ် မဳဒဳယျာ အလဵုအသဳရုယှာပိုၚ် ထ္မံက်ထ္ၜးလဝ်ဂှ်မ္ဂး ပန်ပှော်လဝ်ကမ်လှောဝ်ဏံဂှ်ဝွံ ဒှ်အလန်ကိုပ်ကၠာအိုတ် ဟွံသေၚ်ပုဟ်ဂှ် ဂွံတီကေတ်ရ။
ရုယှာဝွံ ကမ်လှောဝ်ဏံဂှ် သၞာံ ၂၀၂၀ တေံ ပိဝါ၊ သၞာံ ၂၀၂၂ ဂိတုမေ ဂှ် မွဲဝါ၊ သၞာံ ၂၀၂၁ ဂိတုအံက်တဝ်ဗာ နူက္ၜၚ်ဗၠိုပ်ဍာ်ဂှ် မွဲဝါ ပန်ဗလးလဝ် ဗွဲမအံၚ်ဇၞးရ။
ဂကူကမ်လှောဝ်ဏံဂှ် ပ္ဍဲသၞာံ ၂၀၂၃ ဂိတုဂျာန္နဝါရဳတေံ ရုယှာ ဗ္ဂပ်စုတ်လဝ် လ္တူက္ၜၚ်ဖရဳဂိတ်ရ။
အခိၚ်တေံဂှ် လ္တူဂၠးတိဏံ ဍုၚ်ပိုၚ်ပြဳလဝ်လွဟ်လက်နက်သာ်ဏံ ဍုၚ်လဵုမှ ဟွံမွဲဏီပုဟ်ဂှ် ပူတေန် ဟီုဂးလဝ်ရ။
ဟိုတ်နူကမ်လှောဝ်ရုယှာတုဲ ပရေၚ်ဇီုကပိုက်ချိုတ်တံ နွံကီုလေဝ် ၜိုတ်ဍေံတံဟီုလဝ်လေဝ် ဟွံစောန်ပုဟ်ဂှ် တၠပညာယူကရုၚ်တံ ဟီုဂးလဝ်ရ။
Ref: Business Insider