ဝါယှေန်တာန်၊ ဖေဖဝ်ဝါရဳ ၁၆
ရုယှာ ကၠောန်ဒၟံၚ် သွက်ဂွံစုတ်လွဟ်လက်နက်နျူကလဳယျာ ပ္ဍဲအကးနွံတုဲ သုၚ်စောဲကၠုၚ် သွက်ဂွံစွံပွန် ကုဂြိုဟ်ပ္တောံတံမာန်ဂှ် ထ္မံက်ထ္ၜးလဝ် ပ္ဍဲလိက်ဒုၚ်စဳရေၚ် ထံၚ်ပရိုၚ်အမေရိကာန်ရ။
မိုက်တာနာ ဥက္ကဌ ရဳပါပလေတ်ကာန် ကမ္မတဳထံၚ်ပရိုၚ်ကၠတ်ထဝ်သၟဝ်ဂှ် ပ္ဍဲဂိတုဖေဖဝ်ဝါရဳ ၁၄ ဂှ် ပ္တိတ်လဝ် တၚ်လလောၚ်တြးမွဲတုဲ ကြဴနူကဵုသတိ စပ်ကဵုအန္တရာယ်ဂီုကၠီုကၟိန်ဍုၚ်တုဲဂှ် ပရိုၚ်ထံၚ်ပရိုၚ်တံ မံက်တိတ်ကၠုၚ်ရ။
စပ်ကဵုအန္တရာယ်ဂီုကၠီုကၟိန်ဍုၚ် မဆက်စပ်ဒၟံၚ်ကဵု ဇြဟတ်ဓာတ်နျူကလဳယျာ ရုယှာဂှ်တုဲ ဥက္ကဌ ကမ္မတဳထံၚ်ပရိုၚ် သ္ၚိဗုအမေရိကာန် ကဵုလဝ်သတိရ။
စပ်ကဵုပြဝ သ္ဂောံခၠေဝ်ပလန် အန္တရာယ်တံဏံဂှ်တုဲ နကဵုအလဵုအသဳ သ္ဂောံသဳကၠဳကၠးကၠးမးမးဂှ် နကဵုဇကုတံ မိက်ဂွံဖ္တိုက်ဖ္အောဝ်ရောၚ် ညးဟီုလဝ်ဏီရ။
လွဟ်လက်နက်နျူကလဳယျာရုယှာတံ စွံထောံ ပ္ဍဲအကးမ္ဂး ပွိုၚ်မွဲနာဍဳ ဂြိုဟ်ပ္တောံအမေရိကာန် မဗလးပ္တိတ်ကဵုတၚ်နၚ် ဂၠိုၚ်ကဵုဗဳလျာန်ဂှ် ဒှ်အန္တရာယ်ဇၞော်ဇၞော်ရောၚ် ဂွံတီကေတ်ရ။
လိက်ပရိုၚ် New York Times ဂှ်လေဝ် အပ္ဍဲပွိုၚ်မွဲနာဍဳ ရုယှာ သွက်ဂွံစွံလွဟ်နျူကလဳယျာပလီုဂြိုဟ်ပ္တောံ ဖျေံသ္ဇိုၚ်မှဲအကးဂှ် စဳဇန်ဒၟံၚ်ရောၚ် ကေၚ်ထ္မံက်ထ္ၜးလဝ်ရ။
သၞာံလောန်ကၠုၚ်ခြာဟွံလအ်တံဂှ်လေဝ် ကြုက် ကေုာံ ရုယှာတံဝွံ ဂွံဂၠါဲဆဵုလဝ် နဲကဲတၟိ ညံၚ်ဂြိုဟ်ပ္တောံတံ ဟွံကၠောန်ကလောန်၊ ညံၚ်ဂွံကြတ်ဒၞါကေတ် တၚ်နၚ်ဂမၠိုၚ်၊ သ္ဂောံပန်ဖျေံကီု၊ သွက်ဂွံထိၚ်ဒက် ဂြိုဟ်ပ္တောံ နကဵုတဲရုပ်စက်တံဂှ် ညးလ္ၚတ်ဂမၠိုၚ် သ္ဂးရ။
အမေရိကာန်ဂှ်တှ်ေ ပ္ဍဲမှဲအကး ဟိုတ်နူအန္တရာယ်တံဂၠိုၚ်ကၠုၚ်ဂှ်ရ ပ္ဍဲသၞာံ ၂၀၁၉ တေံ ဒက်ပ္တန်လဝ် ဂကောံဒပ်မှဲအကးဂှ် ဂွံတီကေတ်တုဲ ဂကောံဒပ်ဏံဝွံ သွက်ဂွံဂၠိုက်ဂၠါဲထ္မံက်ပ္တိတ်တာဒၞါ အန္တရာယ်ဂမၠိုၚ်ရောၚ်ဂှ် ဂွံတီကေတ်ရ။
Ref: Livemint