မဝ်သကိုဝ်၊ ဖေဖဝ်ဝါရဳ ၁၇
ဍုၚ်ရုယှာဝွံ ညံၚ်ဂွံလုပ်ပေါဲဗ္တိုက် ကရောံဒပ်ပၞာန်ညးတံဂှ် ကော်ကေတ်လဝ် ကောန်ပၞာန်စလိၚ် နူကဵုအာဖရိက ကေုာံ ဍုၚ်အာယှတံ ဂၠိုၚ်ကဵုလ္ၚီဂှ် ထ္မံက်ထ္ၜးလဝ် ပ္ဍဲလိက်ဒုၚ်စဳရေၚ် သေန်တာတဝ်စၞေဟ်ကောန်ဂကူယူကရုၚ် NRC ရ။
ရုယှာ ဗ္တိုက်ဒၟံၚ်ပၞာန်ၜက်ၜေတ် ကုဍုၚ်ယူကရုၚ်ဂှ်ဝွံ ကောန်ပၞာန်ညးတံကော်လဝ်ဂှ် ပ္ကတ်ပ္ကေၚ်ဗ္တောန်ကဵုဒၟံၚ် လ္တူတိရုယှာ နွံဒၟံၚ်ရောၚ် သ္ဂးရ။
အလဵုအသဳရုယှာဂှ် ဟီုလဝ်သြန်ဂိတု ကုညးတံ အကြာ ၂၀၀၀ ကဵု ၄၀၀၀ ဒဝ်ဠာကီုလေဝ် သြန်ဂိတုကလိဂွံဍာံဍာံဂှ် ယအ်ဒၟံၚ်ဒဝ်ဠာကဵုလ္ၚီဂှ် ထ္မံက်ထ္ၜးလဝ် ပ္ဍဲလိက်ဒုၚ်စဳရေၚ် NRC ရ။
အေဂျေန်ဇြဳထံၚ်ပရိုၚ်ရုယှာတံ ကော်ကေတ်ဒၟံၚ်မၞိဟ် နူကဵုဍုၚ်သဳရဳယျာ၊ နဳပဝ်၊ အာဖဂါန်နေဿတာန်၊ ကောန်ဂိုဝ်၊ အဳဂျေတ် ကေုာံ ဍုၚ်အာယှဗဟဵုတံဂှ်တုဲ ရပ်စပ်အာညးတံ ပ္ဍဲကဵုပေါဲဗ္တိုက်ယူကရုၚ်ဏောၚ်ဂှ် ဂွံတီကေတ်ရ။
ဟိုတ်နူမက်ဂၠက်ရုယှာ ကဵုသြန်ဂိတုဂၠိုၚ်ၚ်ဏောၚ်ဂှ်တုဲ ကောန်ဍုၚ်သ္အာၚ်တံဝွံ သွက်ဂွံအာဗ္တိုက်ပ္ဍဲယူကရုၚ်ဂှ် ကဵုလဝ်စရၚ် ဂွံတီကေတ်တုဲ ပ္ဍဲဂိတုဖေဖဝ်ဝါရဳ ၁၁ ဂှ်လေဝ် ကော်လဝ် ကောန်ဍုၚ်နဳပဝ် ၁၅၀၀၀ ဂှ် ဌာန်ပရိုၚ် CNN ထ္မံက်ထ္ၜးလဝ်ရ။
ပ္ဍဲကဵုအေန်တာဗျူ သၟာန်သၟုက်လဝ် ကောန်ဍုၚ်နဳပဝ် မစဴကၠုၚ်နူကဵုပေါဲပၞာန်ယူကရုၚ် ခြာဟွံလအ်ဂှ် ကဵုလဝ်သတိ ကောန်ဍုၚ်ညးတံ ညံၚ်ဂွိုအ်ဗ္တိုက်ကဵု လ္ပာ်ဒပ်ပၞာန်ရုယှာ နွံလဝ်ရ။
သ္အာၚ်နူဂှ်ပၠန် ဒပ်ပၞာန်ရုယှာဝွံ အတိုၚ်သြန်ဂိတု မကဵုလဝ်ကတိဂှ် ဟွံကဵုတုဲ မၞိဟ်ဒးဆောံလေၚ်အဝဲအၚ်္ဂဇိုၚ်တဲတံကဵု မၞိဟ်ဆောံလေၚ်လမျီုတံ နွံဒၟံၚ်တၟာဂလိုၚ်ဏောၚ်ဂှ်လေဝ် ကောန်ပၞာန်စလိၚ်နဳပဝ်မွဲတၠ ဟီုရ။
ကောန်ပၞာန်စလိၚ်နဳပဝ်တံဂှ် ဍုၚ်ဗျိတိၚ် ကေုာံ ဍုၚ်အိန္ဒိယတံ ကော်ကေတ်မာန်ရောၚ် တုပ်လဝ်စိုတ်ကီုလေဝ် ဟိုတ်နူတုပ်လဝ်စိုတ် ကုရုယှာဟွံမွဲဂှ်ရ အလဵုအသဳနဳပဝ် ကဵုလဝ်သတိ ညံၚ်ဂွိုအ်ကော်ကေတ် ကောန်ဍုၚ်ညးတံ နဒဒှ်ကောန်ပၞာန်စလိၚ်တံ မဒှ်ရ။
Ref: The New Voice of Ukraine