မဝ်သကိုဝ်၊ မာတ် ၁၃
လ္တူနူကဵုလွဟ်ဇၞော် အမေရိကာန် ကေုာံ ဥရဝ်ပတံ မပ္တိတ်ဒၟံၚ်သွက်ဂွံရီုဗၚ်ယူကရုၚ်ဂှ် ရုယှာ ဂလိုၚ်ပ္တိုန်ပိဆတုဲ ကၠောန်ပ္တိတ်ဒၟံၚ်ဂှ် ဌာန်ပရိုၚ် CNN ထ္မံက်ထ္ၜးလဝ်ရ။
ရုယှာဝွံ မွဲဂိတု ပ္တိတ်ဒၟံၚ် မကမ်လွဟ်ဇၞော် ၂ ကိုဋ်ဘာ် ဟွံသေၚ်မ္ဂး မွဲသၞာံ ၜိုတ် ၃ ပြကောဋိကိုဋ် ကၠောန်ပ္တိတ်ဒၟံၚ်ရောၚ် ဌာန်ပရိုၚ်ထံၚ်ပရိုၚ်နေတိုဝ် သ္ဂးရ။
အမေရိကာန် ကေုာံ ဥရဝ်ပဂှ် သွက်ဂွံပလံၚ်ဗစိုပ်ကဵုယူကရုၚ် မွဲသၞာံ ပ္တိတ်ဒၟံၚ်မကမ်လွဟ်ဇၞော် ၁ ဒဿမ ၂ ပြကောဋိကိုဋ်ဂှ် သၞာဲဒဴထံၚ်ပရိုၚ်ဥရဝ်ပမွဲတၠ ဟီုကဵု CNN ရ။
ကၠုၚ်စိုပ် သၞာံ ၂၀၂၅ အိုတ်ဏံ ဒပ်ပၞာန်အမေရိကာန် မွဲဂိတု သွက်ဂွံပ္တိတ် မကမ်လွဟ်ဇၞော် ၁ ကိုဋ် ရန်တၟံလဝ်ကီုလေဝ် လၟိဟ်ဏံဝွံ အောန်ဒၟံၚ်နူကဵု လၟိဟ်ရုယှာတံ ပ္တိတ်ဒၟံၚ်ဏောၚ်ဏီဂှ် ဂွံတီကေတ်ရ။
ဆ္ဂး အခိၚ်လၟုဟ် နူကဵုကၠတ်ထဝ် သွက်ဂွံထပ်ကဵုယူကရုၚ်ဂှ် ဟိုတ်နူဟွံဂွံကဵုအခေါၚ် ကုအရီုဗၚ်ဒဝ်ဠာ ၆၀ ဗဳလျာန်ဂှ်ဏီတုဲ ပရေၚ်ကၠောန်ပ္တိတ်လွဟ်လက်နက်ဇၞော် အမေရိကာန်တံဝွံ ယအ်စှ်ေအာ တၟာဂလိုၚ်ယျဂှ် ဂွံတီကေတ်ရ။
သၞာဲဒဴကဆံၚ်လ္တူ နေတိုဝ်မွဲတၠဂှ် အခိၚ်လၟုဟ် ညးတံ ဒးပြိုၚ်ကၠောန်ပ္တိတ်ဒၟံၚ် သွက်ပေါဲပၞာန်တံအိုတ်ဂှ် ဟီုလဝ်ရ။
အခိၚ်လၟုဟ် ဒပ်ယူကရုၚ်တံဝွံ မွဲတ္ၚဲ ဒးပန်ပှော်ဒၟံၚ်မကမ်လွဟ်ဇၞော် ၂၀၀၀ တုဲ ဒပ်ရုယှာတံဂှ် ပန်ပှော်ဒၟံၚ်လွဟ်ဇၞော် ၜိုတ် ၁၀၀၀၀ ရ။
သွက်ဂွံရီုဗၚ်ယူကရုၚ် ဂွံကဵုလွဟ်လက်နက်တံဂှ် ပ္ဍဲအမေရိကာန် သြန်အိုတ်ဒၟံၚ်တုဲ ရဳပါပလေတ်ကာန် ပ္ဍဲကၠတ်ထဝ်တံဂှ် သွက်ဂွံထပ်ကဵုအရီုဗၚ်ဂှ် ကယျာန်ပါဲဒၟံၚ်ရောၚ် ဂွံတီကေတ်ရ။
သမ္မတဇြဳလာန်သကဳဂှ် နကဵုဇကုတံ ယဝ်ရလွဟ်လက်နက်မကမ် ပလံၚ်ဗစိုပ်နၚ် နူကဵုဍုၚ်ပလိုတ်တံ ဟွံမွဲမ္ဂး ဂွံတဝ်စၞေဟ်ရုယှာ ဍာ်ဇမၠိၚ်မာန် ဟွံလောဲသွာပုဟ်ဂှ် ကရောတ်တသဝ်ဒၟံၚ်ရ။
အမေရိကာန် ကေုာံ မဟာမိတ်တံဝွံ ကဵုလဝ်ယူကရုၚ် ကွဳစၚ်ခြပ်ပသဲ M-1 Abrams တံ၊ လွဟ်လက်နက်ကဆံၚ်သၠုၚ်တံတုဲ ခြာဟွံလအ် သွက်ဂွံပလံၚ်ဗစိုပ်ကဵုအာ သီုက္ၜၚ်ကျာဗ္တိုက် F-16 တံ နွံဂှ် ဂွံတီကေတ်ရ။
ညးလ္ၚတ်ဂမၠိုၚ်ဂှ် ပေါဲပၞာန်ကျဇၞးဂှ်ဝွံ တန်တဴဒၟံၚ်ကဵု ဗၞတ်ၜိုတ်လဵု ပန်ပှော်မကမ်လွဟ်ဇၞော်မာန်ဂှ်ဏောၚ်ဂှ် ဟီုလဝ်ရ။
Ref: CNN