ၜၚ်ကံက်၊ မာတ် ၁၄
ဗော် Move Forward ပ္တိတ်ဇြဟတ် သ္ဂောံပြံၚ်လှာဲ သၞောဝ်တာဒၞါလဝ် ပွမဖ္ဍိုက်ဂရိုက်လ္တူနန်ဨကရာဇ်ဂှ် က္တဵုဗဒှ်ကဵု သၞောတ်အုပ်ဓုပ်ကၟိန်ဍုၚ် ညံၚ်ဇြဟတ်ဂွံဍိုန်လျဏောၚ် ဟိုတ်နူပရေၚ်ဒှ်ဓဝိၚ်ဏံတုဲ ကမ္မယှေန်ပေါဲရုဲမာဲသေံ အာတ်ပ္တိုန်အာ ရုၚ်သၞောဝ်ဓဝ် သွက်ဂွံပလီုဗော်ဂှ်ဏောၚ်ဂှ် ပ္ဍဲဂိတုမာတ် ၁၂ တေံ ဟီုလဝ်ရ။
ဗော် Move Forward ဂွံလဝ်ဇၞး ပ္ဍဲပေါဲရုဲမာဲသၞာံတုဲကၠုၚ်တေံဂှ် ဖန်ဇန်ဒၟံၚ် သွက်ဂွံပြံၚ်လှာဲ သၞောဝ်စပ်ကဵုဖ္ဍိုက်ဂရိုက်နန်ဨကရာဇ်ဂှ်ဝွံ ဝးပ္ကဝ်ဒၟံၚ် သၞောဝ်သ္ဇိုၚ်ဒက်ပ္တန်ဏောၚ်ဂှ် ရုၚ်သၞောဝ်ဓဝ် သၞောဝ်သ္ဇိုၚ်ဒက်ပ္တန် ဟီုလဝ် အပ္ဍဲဂိတုဂျာန္နဝါရဳတေံတုဲ တၚ်သ္ဂုတ်သွာတ် ကမ္မယှေန်ပေါဲရုဲမာဲ မံက်တိတ်ကၠုၚ်လဝ်ရ။
ဂလာန်ပ္တိုန်ဗော်ဏံ သ္ဂောံပြံၚ်လှာဲပလေဝ် ၝောံပိုဒ်ရာဇဝတ် ၁၁၂ ဂှ်ဝွံ ဒှ်ပွပ္တိတ်ဇြဟတ် သွက်ဂွံပလီု သၞောတ်ဨကရာဇ် စပ်ကဵုသၞောဝ်သ္ဇိုၚ် ကၟိန်ဍုၚ်သေံဏောၚ်ဂှ် ရုၚ်သၞောဝ်ဓဝ် သ္ဂုတ်သွာတ်လဝ်ရ။
သၞောတ်ဒဳမဝ်ကရေဇြဳ စွံလဝ်ဨကရာဇ် ဒၞါဲက္ဍိုပ်သ္ကိုပ်ကၟိန်ဍုၚ်ဂှ် ဗော် Move Forward ကၠောန်ဒၟံၚ်ညံၚ်ဇြဟတ်ဂွံဍိုန်လျ သက်သဳနွံဂှ် ထ္မံက်ထ္ၜးလဝ် ပ္ဍဲတၚ်လလောၚ်တြး ကမ္မယှေန်ပေါဲရုဲမာဲရ။
ကြဴနူကလေၚ်သ္ၚဳဂၠိပ် တၚ်သ္ဂုတ်သွာတ် ရုၚ်သၞောဝ်ဓဝ် သၞောဝ်သ္ဇိုၚ်ဒက်ပ္တန်ဂှ်တုဲ နကဵုကမ္မယှေန်ပေါဲရုဲမာဲ သွက်ဂွံပလီု ဗော် Move Forward အာတ်မိက်အာ ဇရေၚ်ရုၚ်သၞောဝ်ဓဝ် သၞောဝ်သ္ဇိုၚ်ဒက်ပ္တန်ဏောၚ်ဂှ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။
အစဳဇန်ပရေၚ်တောတက် ဗော် Move Forward ဝွံ က္တဵုဗဒှ်တဴရမျာၚ် ညးသၟတ်ဂၠိုၚ်ကဵုပြကောဋိကိုဋ် ကေုာံ တၠမာဲလ္တူဍုၚ်တံဂှ်တုဲ သၞာံတုဲကၠုၚ်တေံ ဂွံလဝ်ဇၞး ဗော်ထံက်ဂလာန်ဒပ်ပၞာန်တံ ဗွဲမအံသဝ်ရ။
ဆ္ဂး ဒၟါနူဗော်ဂှ် ပ္တိတ်ဇြဟတ်သ္ဂောံပြံၚ်လှာဲ သၞောဝ်စပ်ကဵုဖ္ဍိုက်ဂရိုက်နန်ဨကရာဇ်ဂှ်တုဲ ဒပ်ပၞာန်နွံပၟိက်ကဵုနန်ဨကရာဇ် ကေုာံ မဟာမိတ် အမာတ်ကၠတ်ထဝ် ဂိုၚ်လဝ်ဝါဒတြေံတြဟ်တံ ဒှ်တဴဒေါသတုဲ ဗော် Move Forward ဂွံဒက်ပ္တန်အလဵုအသဳဂှ် ညးတံ တာဒၞါလဝ်အိုတ်ရ။
လ္ဂောံကဵုသၞောဝ်စပ်ကဵုဖ္ဍိုက်ဂရိုက်နန်ဨကရာဇ်ဂှ်မ္ဂး ပွမဟီုဖျေံကဝု ကုဨကရာဇ်၊ ဂၞကျာ်၊ ညးမဒုၚ်စအာဲကၟာဲ ကေုာံ ညးအုပ်ဓုပ်တံ ဟွံသေၚ်မ္ဂး ပြဝညံၚ်ရဴဖ္ဍိုက်ဂရိုက်တံဂှ် ဖျေံစၟတ်ဒဏ်ထံၚ် စဵုကဵု ၁၅ သၞာံမာန်ရ။
Ref: Reuters