မဝ်သကိုဝ်၊ မာတ် ၁၅
နကဵုရုယှာ သွက်ပေါဲပၞာန်နျူကလဳယျာဂှ် လ္ဂောံကဵုနဲပညာ ဒှ်ဒၟံၚ်ဒတုဲယျဂှ် သမ္မတပူတေန် ကဵုလဝ်သတိ ကုဂကောံဍုၚ်ပလိုတ်တံတုဲ ယဝ်ရဗလးဏာဒပ်အမေရိကာန်တံ ယူကရုၚ်မ္ဂး ဒဒှ်ရဒုၚ်ဂိုၚ်ကေတ် ကၠောန်ဒၟံၚ် ညံၚ်ပေါဲပၞာန်အသိၚ်ဂွံသၠုၚ်တိုန်ကၠုၚ် တီတီဏောၚ်ဂှ် ဟီုလဝ်ရ။
သမ္မတပူတေန် ဂွံဆက်ကေတ်အဝဵု ၆ သၞာံပၠန် ချိုတ်ပၠိုတ်ဒၟံၚ်ဂှ် ကၠာပေါဲရုဲမာဲမကၠောန်ဗဒှ်အာ ပ္ဍဲဂိတုမာတ် ၁၅ စဵုကဵု ၁၇ ဏံ ဂွိုအ်စိုပ်ဂှ် ဟီုပ္တိတ်ကၠုၚ်သာ်ဏံရ။
ပေါဲပၞာန်နျူကလဳယျာ ဂွံဒှ်ကၠုၚ်မာန် အနာဂတ်တေံဂှ်ဝွံ ဒှ်ကၠုၚ်မြက်က်ဇက်က်ဟွံသေၚ်တုဲ ပ္ဍဲယူကရုၚ် ဒးသုၚ်စောဲလွဟ်နျူဏောၚ် ဟွံထေၚ်ကေတ်ပုဟ်ဂှ် သမ္မတ ပူတေန် ဟီုရ။
နကဵုရုယှာ သွက်ပေါဲပၞာန်နျူကလဳယျာဂှ် ဒှ်ဒၟံၚ်ဒတုဲယျဟာ စပ်ကဵုသၟာန်ဏံတုဲ ပူတေန်ဂှ် ရံၚ်အာလ္ပာ်နဲကွတ်ပညာပရေၚ်ပၞာန်တံမ္ဂး ဒှ်ဒၟံၚ်ဒတုဲယျဂှ် ဟီုလဝ်ကဵု ဌာန်ပရိုၚ်အပ္ဍဲဒေသ ကေုာံ RIA ရ။
သ္အာၚ်နူဂှ်ပၠန် ယဝ်ရဖျေံလဝ်ကောန်ပၞာန်အမေရိကာန်တံ ပ္ဍဲကဵုတွဵုဒၞက် ယူကရုၚ် ကေုာံ ရုယှာတံဂှ်မ္ဂးလေဝ် ပြဝဏံဂှ် ရုယှာတံ စွံအာစိုတ် နဒဒှ်လုပ်စိုပ်ပထုဲပလာပ်အကြာဏောၚ်ဂှ် နကဵုအမေရိကာန် ကၠိုဟ်ဂှ်လေဝ် ညးဟီုလဝ်ဏီရ။
သ္ၚိဗုဂှ်တှ်ေ နကဵုပူတေန် သုၚ်စောဲလွဟ်လက်နက်နျူကလဳယျာမာန်ဏောၚ် ၜိုန်ရဟီုကျာဒၟံၚ် ဂၠိုၚ်ၚ်ကဵုဝါကီုလေဝ် ပ္ဍဲရုယှာ လက္ချန်ဂွံရပ်စပ်လွဟ်လက်နက်နျူကလဳယျာမာန် ဟွံဂွံဆဵုကေတ်ပုဟ်ဂှ် သ္ဂးလဝ်ရ။
ရုယှာဂှ် ဒေသယူကရုၚ် ၄ ညးတံသီဂွံလဝ်တံဂှ်ဝွံ ဒှ်တိဍာ်အပိုၚ်ညးတံဏောၚ် ကဵုလဝ်သတိတုဲ အခိၚ်လၟုဟ် ဒှ်ဒၟံၚ်တိဍာ်ရုယှာ တၟံကၠံပေၚ်ၚ်ယျဂှ်လေဝ် သ္ဂးရ။
သွက်ပရေၚ်ဆက်ဆောံ အမေရိကာန်−ရုယှာဂှ် လ္ပာ်သွာၚ်ထိၚ်ဒဝ်တုဲ ဂွံကၠောန်ၜိုတ်အာ ဗွဲမစှ်ေကဵုဗျူဟာတံဂှ် ပ္ဍဲအမေရိကာန် ညးစိုန်သ္ကီု ရုမ်မ်ဂပ်ပ်နွံဒၟံၚ်ဂှ်လေဝ် ပူတေန် ကဵုလဝ်သမ္တီရ။
အခိၚ်လၟုဟ် အလဵုအသဳအမေရိကာန်ဂှ် အစဳဇန်ဂွံဗလးကောန်ဒပ် ပ္ဍဲယူကရုၚ် ဟွံမွဲပုဟ် ဟီုလဝ်ကီုလေဝ် ဂွံပလံၚ်ဗစိုပ်လွဟ်လက်နက် သွက်ဒပ်ယူကရုၚ်တံမာန်ဂှ် ပၟိက်ဇၞော်တဴရောၚ် သ္ဂးရ။
သၞာဲဒဴရုၚ်သမ္မတယူကရုၚ်မွဲတၠဂှ် ဂလာန်ပူတေန် ဟီုဂးဒၟံၚ် သွက်ဂွံရပ်စပ်လွဟ်လက်နက်နျူကလဳယျာဂှ်ဝွံ ဒှ်တြးဝါဒ ရန်တၟံ သ္ဂောံဘပဠ ဍုၚ်ပလိုတ်တံဏောၚ်ဂှ် ဟီုလဝ်ရ။
Ref: Reuters