ဒူဗိုၚ်၊ မာတ် ၁၆
ဂကောံသပုန်ဟူတဳ ဖျေံသ္ဇိုၚ်ဍုၚ်ယဳမေန်ဝွံ ကလိဂွံလဝ်ကမ်လှောဝ် မြက်နူရမျာၚ်ယျဂှ် ထ္မံက်ထ္ၜးလဝ် ပ္ဍဲပရိုၚ်မဳဒဳယျာရုယှာရ။
နကဵုဂကောံဟူတဳ ဒစဵုဒစး ကုအေဿရေ မပ္တိတ်ဒၟံၚ်ဇြဟတ် သွက်ဂွံဖအိုတ်ကၠေံဂကောံဟာမာသ် ပ္ဍဲဂါဇြာဂှ် ကလိဂွံလဝ်ကမ်လှောဝ် မြက်နူရမျာၚ်ဂှ်ဝွံ ယဝ်ဒှ်ကၠုၚ်ဍာံမ္ဂး ပ္ဍဲၜဳဗ္ကေတ် အန္တရာယ်ညးတံ ဂၠိုၚ်ကၠုၚ်ဏောၚ် မဒှ်ရ။
ပရိုၚ်ဏံဂှ် နူကဵုဌာန်ပရိုၚ်ရုယှာ RIA Novosti နိဿဲကေတ် သၞာဲဒဴဟွံမိက်ထ္မံက်ယၟုမွဲတၠတုဲ ချူလဝ်တုဲ သက်သဳတံဂှ်လေဝ် ထ္မံက်ထ္ၜးလဝ်ဟွံမွဲရ။
အခိၚ်ဗ္တိုက်ၜက်ၜေတ်ဒၟံၚ်ယူကရုၚ် အခိၚ်ရုယှာ ဒစဵုဒစးဍုၚ်ပလိုတ်တံတုဲ ဂၠါဲဒၟံၚ်သၞဂှ် ပရိုၚ်ဏံ မံက်တိတ်ကၠုၚ်ရ။
ဂကောံဟူတဳဝွံ က္ၜၚ်တတ်ကၠောံဒၟံၚ် ၜဳဗ္ကေတ်တံဂှ် ဗ္တိုက်ဒၟံၚ်ကဵု ကမ်လှောဝ် ဒရုၚ်တံတုဲ က္ၜၚ်ဖ္ဍိုက်က္ၜၚ်ကျာအမေရိကာန် ဖျေံလဝ်ပ္ဍဲၜဳဗ္ကေတ် ညံၚ်ဂွံဒှ်အာအံသဝ် ဗ္တိုက်အာဏောၚ်ဂှ်လေဝ် ဟီုကြီုစလဝ်ရ။
က္ဍိုပ်သ္ကိုပ်ကဆံၚ်လ္တူ ဂကောံဟူတဳ အဗဒူလာ မာလေတ်အေဝ်ဟိုဝ်တဳဂှ် က္ၜၚ်ပ္တဝ်အာက္ဍိုပ် လ္ပာ်မုဟ်ဒဵုသၠုၚ်ကျာအာဖရိကတံဂှ် ဗ္တိုက်အာဏောၚ်ဂှ်လေဝ် ပ္ဍဲဂိတုမာတ် ၁၃ တေံ ဟီုလဝ်ရ။
ဒဵုကဵုအခိၚ်လၟုဟ် ဂကောံဟူတဳဝွံ စွံပွန်ဗ္တိုက်ဒၟံၚ် က္ၜၚ်နူၜဳဗ္ကေတ် ပ္တဝ်အာ လ္ပာ်မြံၚ်ဍာ်သူအက်တံဂှ် ဂွံတီကေတ်ရ။
အကြာဏံ အဳရာန် ကေုာံ အမေရိကာန်တံ ကၠောန်သ္ပလဝ်ပရေၚ်သဳကၠဳ တိုက်ရိုဟ်ဟွံသေၚ် ပ္ဍဲအိုဝ်မာန်ဂှ်လေဝ် ဂွံတီကေတ်ရ။
ဣဏံဝွံ အခိၚ်တဳဟဳရာန် ပ္တိတ်ဒၟံၚ်ဇြဟတ် သွက်ဂွံထ္မံက်ရုပ်ရဴ တၚ်ရန်တၟံနျူကလဳယျာ ကေုာံ အခိၚ်ကဵုဂကောံရပ်လွဟ်ညးစၞးညးတံ ဗ္တိုက်ဒၟံၚ်ဂှ် ပရေၚ်သဳကၠဳဏံ မံက်တိတ်ကၠုၚ်လဝ်ရ။
အဳရာန် ထံက်ပၚ်ဒၟံၚ် ဂကောံဟူတဳ အဓိကဂှ် ထံက်ပၚ်ကဵုဒၟံၚ် သီုကမ်လှောဝ် သီုလွဟ်လက်နက် သြန်လှုဲတံရ။
ပိုၚ်ပြဳလဝ်ကမ်လှောဝ် မြက်နူရမျာၚ်ဂှ်ဝွံ သီုရုယှာ၊ အမေရိကာန်တံတှ်ေ နွံဒၟံၚ်ညိညရတုဲ ရုယှာ ပလံၚ်ဗစိုပ်လဝ် ကုဂကောံဟူတဳတံဏောၚ်ဂှ်လေဝ် ထေၚ်ခယျဒၟံၚ်တံ နွံဒၟံၚ်ရ။
Ref: AP