မဝ်သကိုဝ်၊ မာတ် ၂၂
ပ္ဍဲဒေသခရိုၚ်မဳယျာ ဟိုတ်နူလ္ပာ်ယူကရုၚ်တံ ဗ္တိုက်ဒၟံၚ် ဂကောံက္ၜၚ်ဒပ်ဍာ် သမ္မတရုယှာ ဗလာဒဳမာပူတေန် မစွံၚုဟ်မးဂှ် ကွေံကွေံကြာန်န်ဂှ်တုဲ ဂွံကလေၚ်ခၠေဝ်ပလန်ဗ္တိုက်အာဂှ် ခါန်ကၞက်လဝ် ဇၞော်သ္ကိုပ်ဒပ်ဍာ်မွဲတၠရ။
အလက်ဇြာန်ဒါ မွိုက်သဳ သ္ကိုပ်ဗိုလ်ဒပ်ဍာ် ကေတ်လဝ်တာလျိုၚ် နဒဒှ်သ္ကိုပ်ဒပ် ဂကောံယာန်ဍာ်ခရိုၚ်မဳယာ ပွိုၚ်မွဲသၞာံ လောန်ကၠုၚ်သၞာံ ၂၀၁၈ တေံဂှ် ခါန်ကၞက်လဝ် နဒဒှ်သ္ကိုပ်က္ဍိုက်ပ်ဒပ်ဍာ် ပ္ဍဲကဵုအသေအဟာန်မွဲ မကၠောန်ဗဒှ်လဝ် ပ္ဍဲဍုၚ်သုက်ပဳတာသဗက် ဌာန်ဇာတိ ပူတေန်က္တဵုဒှ်မၞိဟ်ဂှ်ရ။
ဒပ်ပူတေန်တံဝွံ ၜိုန်ရဂွံမံၚ်ပေါဲအံၚ်ဇၞး ပ္ဍဲတိဍာ်ယူကရုၚ်ကီုလေဝ် ဟိုတ်နူယူကရုၚ် ဗ္တိုက်ဒၟံၚ် နကဵုလွဟ်ပန်ဇမ္ၚောဲ ကုဂကောံဒပ်ဍာ်ရုယှာ ပ္ဍဲၜဳဗ္စံက်တေံဂှ်တုဲ ဒးဆောံလေၚ်အာလဝ် က္ၜၚ်ပန်ဂအုံမွဲဂအုံဂှ် ဂွံတီကေတ်ရ။
က္ၜၚ်တၞဟ်သ္အာၚ် ဖျေံလဝ် ပ္ဍဲဒေသခရိုၚ်မဳယျာ ဂၠိုၚ်ကဵုစှော်သၞာံတံဂှ်လေဝ် ဒးကလေၚ်ဆုဲပြံၚ်ဒၟံၚ် အပ္ဍဲတွဵုဒၞက်ဍာ် လ္ပာ်ကုန်တံယျဂှ် ဂွံတီကေတ်ရ။
ပ္ဍဲကၞောတ်သၞာံတုဲကၠုၚ်တေံ ဟိုတ်နူပရေၚ်ဗ္တိုက်ယူကရုၚ်တုဲ ဌာန်ဂအုပ်ဒပ်ဍာ်ၜဳဗ္စံက်ရုယှာ လီုလာ်အာတုဲ ဒပ်ယူကရုၚ်တံဝွံ ဗ္တိုက်လဝ် နကဵုကမ်လှောဝ်ပန်ဇမ္ၚောဲ Storm Shadow ဗျိတိၚ်ထံက်ပၚ်ကဵုလဝ်ဂှ်ရ။
ပ္ဍဲကဵုပရေၚ်ဗ္တိုက်လက္ကရဴအိုတ် ပ္ဍဲဂိတုဏံဂှ်လေဝ် ယူကရုၚ်ဝွံ ဟိုတ်နူဗ္တိုက်လဝ် နကဵုဒရုၚ်သီုကဵုကပေါတ်ဖံက်ထ္ကးတံဂှ်တုဲ က္ၜၚ်ဂေတ်ကၚ်ရုယှာမွဲဖ္ဍိုက် လီုလာ်အာလဝ်ရ။
သ္ကိုပ်က္ဍိုက်ပ်ဒပ်ဍာ် စဵုဒၞါနူကဵုပရေၚ်ဗ္တိုက်ယူကရုၚ်ဟွံမာန်ဂှ် ပ္ဍဲဂိတုဏံမံက်တေံ ပ္တိတ်ထောံလဝ်တုဲ ပူတေန်ဝွံ ထ္ပက်အဇာခါန်ကၞက်လဝ် မွိုက်သဳတုဲ ညးဝွံ ပ္ဍဲကဵုဒပ်ဍာ်ရုယှာဂှ် ၜိုန်ရဒှ်မၞိဟ်ကဆံၚ်တိုန်ပြဟ်မွဲကီုလေဝ် ဒးဆေၚ်အာမုက် ကုတၚ်ကော်ဆဴ မခက်ခုဲတံဏောၚ် မဒှ်ရ။
ညးလ္ၚတ်သ္ၚဳဂၠိပ်ပရေၚ်ပၞာန်တံဂှ် မွိုက်သဳဝွံ ဟိုတ်နူဒှ်သ္ကိုပ်ဒပ်က္ၜၚ်ဗၠိုပ်ဍာ်ရုယှာမွဲတၠဂှ်ရ ထေၚ်သောဲဟွံဂွံပုဟ်ဂှ်လေဝ် ကဵုလဝ်သတိရ။
Ref: The Independent