ဗာတဳကာန်၊ မာတ် ၂၃
က္ဍိုပ်သ္ကိုပ်သၚ်ခရေတ် ဖရာန်သေတ်ဂှ် ပေါဲပၞာန်မက္တဵုဒှ်ဒၟံၚ် ပ္ဍဲယူကရုၚ် ကေုာံ ပ္ဍဲသ္ကုတ်လဒေါဝ်ဗၟံက် ဂါဇြာတေံ ညံၚ်ဂွံတုဲဒှ်အာ နူကဵုပရေၚ်သဳကၠဳပ္ညဳပ္ညပ်မွဲကဆံၚ် သ္ဂောံဂွံပရေၚ်ၜိုဟ်လလမ်ဂှ် သီုညးဖအိုတ် ဒးဘိုၚ်ရေၚ်တၠုၚ်ဏောၚ်ဂှ် ဖ္တိုက်ဖ္အောဝ်လဝ်ရ။
ပေါဲပၞာန်ဟီုဂှ် လ္ပာ်လဟုတ်ရနွံဂှ် ပိုယ်တံ လ္ပဝိုတ်ညိ။ ပေါဲပၞာန်ဂှ် ပိုယ်တံ ဆက်ဗ္တိုက်အာဟွံဂွံပုဟ်။ ညံၚ်ပေါဲပၞာန် ဂွံတုဲဒှ်အာ သွက်ဂွံလုပ်အကြာပ္ညဳပ္ညပ်ဂှ် သီုညးဖအိုတ် ပ္တိတ်ဇြဟတ်အိုတ်ညိဂှ် က္ဍိုပ်သ္ကိုပ်သၚ်ခရေတ် သ္ဂးလဝ်ရ။
က္ဍိုပ်သ္ကိုပ်သၚ်ခရေတ် ကောန်ဍုၚ်အာဂျေန်တဳနာ အာယုက်မၞုံ ၈၇ ဏံဂှ် ဒးဂဗဒၟံၚ်ကဵု ပြသၞာစပ်ကဵုအာကၠုၚ်ချဳဒရိုၚ်တံတုဲ ခြာဟွံလအ်ဏံရ က္တဵုဒှ်လဝ် ယဲကသအ်၊ ဒးချာံတံရ။
ဟိုတ်နူညး ပရေၚ်ထတ်ယုက်ဟွံခိုဟ်တုဲ လိက်ချူလဝ်သ္ဂောံဟီုဂှ် ကဵုအထံက်သၟဝ်တဲညး ဟီုလဝ်တုဲ ညးဝွံ ဂွံဆဵုဂဗ ကုညးဍုၚ်ကွာန်ဂမၠိုၚ် အရာမတာဒၞါတံ ဂၠိုၚ်ကၠုၚ်ဂှ် ဂွံတီကေတ်ရ။
ညးဝွံ သွက်ပရေၚ်ၜိုဟ်လလမ်ဂှ် လေပ်ဖ္တိုက်ဖ္အောဝ်ဟီုတဴ မွဲဏှမွဲဏှကီုလေဝ် ဂလာန်ညးဟီုလဝ်တံဂှ် လဆောဝ်လဆောဝ် ဒးဒုၚ်ပါ်ပါဲပ္တိုန်ဒုဟ်လေပ်ရ။
ပ္ဍဲကဵုဟီုပ္တိတ်လဝ် စပ်ကဵုပေါဲပၞာန်ယူကရုၚ် တုဲကၠုၚ်ဟွံလအ်ဂှ်လေဝ် နကဵုယူကရုၚ် ဂွံပစူအလာံဗု သတ္တိဒးနွံထေက် ဟီုလဝ်ဂှ်ရ ဒးဒုၚ်ပါ်ပါဲလဝ် ကုညးဂမၠိုၚ်ရ။
ကြဴနူဂှ်တုဲ သၚ်သၟဝ်တဲညးမွဲဇကုဂှ် ညးမိက်ဂွံသ္ဂးဂှ်ဝွံ ရုယှာ ဗ္တိုက်ဒၟံၚ်တံဂှ် ဒေါအ်ကၠာတုဲ ထေက်ကဵုဒးကၠောန်သာ်ဏံဏောၚ်ဂးတုဲ ဟီုဗပေၚ်စုတ်လဝ်ရ။
Ref: Reuters