ၝောံခန်လဟိၚ်စိုတ် ဍုၚ်မဝ်သကိုဝ် ဒးဒုၚ်ဗ္တိုက်တုဲ မၞိဟ် ၆၀ တၠဟွံအောန် ချိုတ်အာ

မဝ်သကိုဝ်၊ မာတ် ၂၄

ဒၟါနူသၟာသေနာတ်တံ လုပ်စိုပ်ဗ္တိုက် ၝောံခန်လဟိၚ်စိုတ် မၞုံပ္ဍဲအရာပ်ဇိုၚ်ဍုၚ်မဝ်သကိုဝ် ဍုၚ်ရုယှာဂှ်တုဲ မၞိဟ်ဟွံအောန်နူကဵု ၆၀ တၠ ချိုတ်တုဲ ၁၄၅ တၠ ဇီုကပိုက်ကလိဂွံလဝ်ဝပ်ဂှ် သၟိၚ်တၠအဝဵုရုယှာတံ ဟီုရ။

ၝောံခန်ဍုၚ် ခရိုဝ်ကာသ် စပံက်လဝ် ပ္ဍဲသၞာံ ၂၀၁၉ တေံဂှ်ဝွံ ဒှ်ၝောံခန်လဟိၚ်စိုတ် ဒၞါဲကၠောန်ဗဒှ်အသေအဟာန်ဒယှ် ပါလုပ်သီုကဵုပေါဲပြိုၚ်ကျေဝ်အမေရိကာန် ပ္ဍဲသၞာံ ၂၀၁၃ တေံရ။

ပရေၚ်ဗ္တိုက်ဏံဝွံ ညးတံကၠောန်သ္ပလဝ်ရောၚ် ဂကောံအိုၚ်အက်သ်တံ ဟီုလဝ်ဂှ်ဝွံ ပတှ်ေဖျေံစိုတ်ဂွံဂှ် ထံၚ်ပရိုၚ်အမေရိကာန် ဟီုလဝ်ကီုလေဝ် ရုယှာဂှ်တှ်ေ စပ်ကဵုပရေၚ်ဗ္တိုက်ဏံတုဲ ဟွံကဵုတၚ်စၟတ်မွဲသာ် ဂၠိုက်ဂၠါဲစၟဳတ်ဒၟံၚ်ဂှ် ဂွံတီကေတ်ရ။

စပ်ကဵုပရေၚ်ဗ္တိုက်သာ်ဏံ က္တဵုဒှ်မာန်ဂှ်တုဲ ထံၚ်ပရိုၚ်အမေရိကာန်တံ ဒစးဒုၚ်ကဵုလဝ်သတိ ကုရုယှာရောၚ် သ္ၚိဗု ဟီုရ။

ကၠာတေံလေဝ် ဂကောံအိုၚ်အက်သ်တံ ကေၚ်ဗ္တိုက်လဝ် ရုယှာတုဲ ပ္ဍဲသၞာံ ၂၀၁၅ တေံ က္ၜၚ်ကျာရုယှာမွဲဖ္ဍိုက် ဒးဒုၚ်ဗ္တိုက် လ္တူတ္ကအ်သိုၚ်နာၚ် အဳဂျေတ်ဂှ်တုဲ ကောန်ဍုၚ်ရုယှာ ၂၂၄ တၠ ဒးချိုတ်အာလဝ်ရ။

သ္အာၚ်နူဂှ်ပၠန် သၞာံ ၂၀၁၇ ဂှ်လေဝ် ကွဳစက်သၟဝ်တိ ဍုၚ်သုက်ပဳတာသဗက် ဒးဒုၚ်ဗ္တိုက်တုဲ မၞိဟ် ၁၅ တၠ ချိုတ်အာဂှ်လေဝ် ဒှ်တၠတဲအိုၚ်အက်သ်တံရောၚ်ဂှ် သ္ဂးရ။

ပရေၚ်ဗ္တိုက်ၝောံခန် လဟိၚ်စိုတ် ဍုၚ်မဝ်သကိုဝ်ဂှ်ဝွံ ဒှ်တၠတဲအိုၚ်အက်သ်တံရောၚ် ဌာန်ပရိုၚ်မစုက်လုက်ကဵု ဂကောံဏံမွဲ ထ္မံက်ထ္ၜးလဝ် ပ္ဍဲထလဳဂရာမ် ပ္ဍဲဂိတုမာတ် ၂၂ တေံရ။

ပ္ဍဲကဵုစမြိုၚ်ဇၞော် ၝောံခန်လဟိၚ်စိုတ်ဂဳတလေဝ်နွံ သေန်တာရာန်ဖျာလေဝ်နွံဂှ် ပရေၚ်ဗ္တိုက်က္တဵုဒှ်တုဲ ပၟတ်တူလဝ်ရောၚ် ဂွံတီကေတ်ရ။

သၟာသေနာတ်တံဂှ် ပန်လဝ် နကဵုအဝ်တဝ်ရိုၚ်ဖေဝ်တံတုဲ ဗ္တိုက်လဝ် သီုကဵုဗုမ်တဲ ဗုမ်ပၟတ်တူတံဂှ်တုဲ ပၟတ်တူက္တဵုဒှ်လဝ်ရ။

ပ္ဍဲကဵုညးကလိဂွံဝပ် ၁၄၅ တၠဂှ် မၞိဟ်ဒးဂွိၚ်ကဵုအန္တရာယ်လမျီု ၆၀ ပြၚ် ပါလုပ်ဒၟံၚ်တုဲ မၞိဟ်ပြဟ်လလုဲတံ သာဂၠိုၚ်ကၠုၚ်မာန်ဂှ်လေဝ် သၟိၚ်တၠအဝဵုတံ ကဵုလဝ်သမ္တီရ။

ယူကရုၚ်ဂှ်တှ်ေ ပ္ဍဲကဵုပရေၚ်ဗ္တိုက်ဂှ် ညးတံ ပါလုပ်လဝ်ဟွံမွဲပုဟ်ဂှ် ကယျာန်ပါဲလဝ်ရ။

Ref: BBC