မဝ်သကိုဝ်၊ မာတ် ၂၈
ၝောံခန်လဟိၚ်ဂဳတ ဍုၚ်မဝ်သကိုဝ် ကၟိန်ဍုၚ်ရုယှာ ဒးဒုၚ်ဗ္တိုက်ဂှ် ယူကရုၚ် ကေုာံ ဂကောံဍုၚ်ပလိုတ်တံ ပါလုပ်ဒၟံၚ် နူလက္ကရဴရောၚ် ဌာနပရေၚ်ဂီုကၠီုရုယှာ စောဲစပ်လဝ်ရ။
ညးသံသယနွံ သွက်ပရေၚ်ဗ္တိုက်တံဂှ်ဝွံ ဒှ်အေဿလာမ္မေတ် စိုပ်တၞုၚ်တၞးတံဏောၚ်ဂှ် သမ္မတရုယှာ ဂးလဝ်ကီုလေဝ် လက္ကရဴဏံ ဆက်စပ်ဒၟံၚ်ကဵု ယူကရုၚ်ဏောၚ်ဂှ် စောဲစပ်လဝ်ရ။
အလက်ဇြာန်ဒါ ဗဝ်နဳကဗ် သ္ကိုပ်စၞောန်ပ္ညုၚ် ဌာနပရေၚ်ဂီုကၠီု ရုယှာဖေဝ်ဒရာဂှ် လက္ကရဴပရေၚ်ဗ္တိုက်ဏံ အမေရိကာန်၊ ဗျိတိၚ် ကေုာံ ယူကရုၚ်တံ ပါလုပ်ဒၟံၚ်ရောၚ် သ္ဂးလဝ်ရ။
ပရေၚ်ဗ္တိုက်ဏံဝွံ ညးတံကလိလောန်လဝ်ရောၚ် ဂကောံမဆက်စပ်ကဵု IS မွဲဂကောံ သ္ဂးလဝ်တုဲ အမေရိကာန်ဂှ်လေဝ် သ္ပလဝ်ဒတန် တၚ်ဒုၚ်ဝန်ဂကောံဏံရ။
ပ္ဍဲရုယှာ ပရေၚ်ဗ္တိုက်ပကီုပရာပ်တံ ဒှ်မာန်ဏောၚ် ထံၚ်ပရိုၚ်အမေရိကာန်တံ ဒစးဒုၚ်ကဵုလဝ်သတိဂှ် ဂွံတီကေတ်ရ။
သမ္မတပြၚ်သေတ် မက်ခရောန်ဂှ်လေဝ် ဂကောံ IS ကလိလောန်လဝ်ရောၚ် ထ္မံက်ထ္ၜးဒၟံၚ် ပ္ဍဲကဵုပရိုၚ်ထံၚ်ပရိုၚ်တံဂှ် ဟီုလဝ်ရ။
ပရေၚ်ဗ္တိုက်ဏံဂှ် အေဿလာမ္မေတ်စိုပ်တၞုၚ်တၞးတံ ကၠောန်သ္ပလဝ်ဏောၚ်တုဲ ထံၚ်ပရိုၚ်ဍုၚ်ပလိုတ်တံ ပါလုပ်ရီုဗၚ်ကဵုလဝ်ရောၚ် ဗဝ်နဳကဗ် သ္ဂးလဝ်ရ။
သၟာသေနာတ် ၄ တၠဝွံ အခိၚ်ဂ္စါန်ဂြိပ်တိတ် လ္ပာ်ယူကရုၚ်ဂှ် ရပ်ဂွံလဝ်တုဲ ပ္ဍဲပရေၚ်ဗ္တိုက်ဏံ ယူကရုၚ်ပါလုပ်ဒၟံၚ်ရောၚ် ညး ဟီုလဝ်ရ။
သမ္မတဗဳလာရုသ် လူကာယှာန်ကိုဝ်ဂှ် သၟာတ်သေနာတ်ဂမၠိုၚ်ဝွံ ပ္ဍဲပယျဵုညးတံ ဟိုတ်နူတေၚ်ဂြတ်လဝ် ပရေၚ်ဂီုကၠီုတုဲ ဂ္စါန်ဂြိပ်တိတ် လ္ပာ်ယူကရုၚ်မဒှ်ဂှ် ပ္ဍဲဂိတုမာတ် ၂၆ တေံ ကဵုလဝ်သမ္တီရ။
အပ္ဍဲပရေၚ်ဗ္တိုက်ၝောံခန်ခရိုဝ်ကာတ် ဍုၚ်မဝ်သကိုဝ်ဂှ် မၞိဟ် ဗ္ဒါဲ ၁၄၀ တၠ ချိုတ်တုဲ ၉၀ ပြၚ် ဒးတိုန်ဒၟံၚ်ရုၚ်ဂဥုဲတုဲ ပ္ဍဲကဵုဏံ ၂၂ တၠ ဒးဂွိၚ်ဒၟံၚ်ကဵု အန္တရာယ်လမျီုဂှ် သၞာဲဒဴပရေၚ်ထတ်ယုက်တံ ဟီုလဝ်ရ။
Ref: Euronews