သဵု(လ်) ၊ မာတ် ၂၉
ပ္ဍဲဍုၚ်ကိုဝ်ရဳယျာသၠုၚ်ကျာ ဍုၚ်သဵု(လ်) ပရေၚ်ပ္ညဳပ္ညပ် သ္ဂောံပပဵုပ္တိုန်သြန်ဂိတု ကဆံၚ်လက္ကရဴအိုတ် လီုအာတုဲဂှ် ညးဒဳကွဳစက်ပ္ဍိုက်မၞိဟ်အာတရဴဂမၠိုၚ် ပ္ဍဲဂိတုမာတ် ၂၈ ဟိုတ်နူဗ္ကပ်လဝ်ဗဗေၚ်ဂှ်ရ လၟိဟ်မၞိဟ် ဗ္ဒါဲ ၁၀ ပြကောဋိကိုဋ် ဒးဂဗဒၟံၚ်ကဵု အခက်အခုဲပရေၚ်အာကၠုၚ်တံရ။
အခိၚ်မၞိဟ်အာကၠုၚ်ဂၠိုၚ် ဒှ်ကၠုၚ်ပလာပ်ပထုဲမာန်ဂှ်ရ အလဵုအသဳဍုၚ်သဵု(လ်) ဓဇက်ဂြိပ်အာကဵု ကွဳပၟတ်သၟဝ်တိ အခိၚ်အပဵုဏောၚ်ဂှ် သ္ဂးလဝ်ရ။
ပ္ဍဲဍုၚ်ဇၞော် ၂၅ ဒေသဂှ် သွက်ဂွံပလံၚ်ဗစိုပ် ညးအာတရဴဂမၠိုၚ် ဇရေၚ်သၞေဟ်ကွဳပၟတ်သၟဝ်တိဂှ် သွက်ဂွံဓဇက်ဂြိပ်အာ လၟိဟ်ကွဳစက် ၄၈၀ ဖ္ဍိုက် သီုအာသီုစဴဂှ်လေဝ် အလဵုအသဳ စဳဇန်လဝ်ရောၚ် ဂွံတီကေတ်ရ။
ညးဒဳကွဳစက်ပ္ဍိုက်မၞိဟ်အာတရဴတံ ဗ္ကပ်ဗဗေၚ် တၟံကၠံပေၚ်ၚ်ဂှ်ဝွံ အပ္ဍဲပွိုၚ် ၁၂ သၞာံ ဒှ်အလန်ပထမကၠာအိုတ်တုဲ ညးတံ ဗ္ကပ်ဗဗေၚ် အလန်လက္ကရဴအိုတ်ဂှ်ဝွံ လအ်အာပွိုၚ် ၂၀ မိနေတ်ဂှ် ဂွံတီကေတ်ရ။
သမဂ္ဂသၟာကမၠောန်ဒဳကွဳစက်သဵု(လ်) သ္ပစၞး ညးဒဳယာန်တံဂှ် သွက်ဂွံပပဵုပ္တိုန်ကဵု သြန်ဂိတု မွဲနာဍဳ ၁၂ ဒဿမ ၇ တၟံကၠံ အာတ်မိက်လဝ်တုဲ တၠကမၠောန်ဂမၠိုၚ် ဟိုတ်နူဟွံဒုၚ်တဲတုဲ ပရေၚ်ပ္ညဳပ္ညပ် ဟွံပြေပြံၚ်ဒှ်အာလဝ်ရ။
အခိၚ်အရှိုန်တိုန် ပရေၚ်ပ္ညဳပ္ညပ်ဂှ် လီုအာတုဲ ပ္ဍဲဂိတုမာတ် ၂၈ အခိၚ်နူဂယးဂှ် ညးဒေသသဵု(လ်) ဂမၠိုၚ် ဒဒှ်ရညးဒဳကွဳစက်တံ ဗ္ကပ်ဗဗေၚ်ဂှ် ဟွံတီတုဲ ဂွံအာစိုပ်တရဴသၟိက်မိက်ဂွံအာဂှ် ဒှ်လဝ်အခက်အခုဲရ။
ပ္ဍဲဍုၚ်သဵု(လ်) ကွဳစက်ဂမၠိုၚ်ဝွံ ဓဇက်ဂြိပ်ဒၟံၚ် နဒဒှ်သၞောတ်ညးဂမၠိုၚ်ပိုၚ် မွဲဒကုတ်မွဲဒကဴတုဲ သွက်ဂွံရပ်စပ်ပရေၚ်ဒုၚ်ကာ ချိုတ်တ်ပၠိုတ်တ်မာန် အလဵုအသဳ ကောပ်ကာဲတုဲ ကမ္ပဏဳပုဂ္ဂလိကတံ ဖန်ဇန်ကောပ်ကာဲကဵုဒၟံၚ်ရ။
မြုဝန်ဍုၚ် အိုဝ်သဳဟောန်ဂှ် ကွဳစက်ပ္ဍိုက်မၞိဟ်အာတရဴ ပ္ဍဲဍုၚ်ဂှ်ဝွံ ဒှ်မံၚ်ညံၚ်ရဴဇိုၚ်တဲညးဒေသလ္တူဍုၚ်တံတုဲ ဘဝလၟေၚ်တ္ၚဲညးတံဝွံ ဒးဗ္ဒဗ္ဒါဲဒၟံၚ် ကွဳစက်ပ္ဍိုက်မၞိဟ်အာတရဴတံဏံရောၚ်ဂှ် ဟီုလဝ်ရ။
Ref: Reuters