ၜၚ်ကံက်၊ ဨပရဴ ၁၁
စပ်ကဵုတၚ်စောဲစပ် တေၚ်လဝ် ဒဒှ်ရဖ္ဍိုက်ဂရိုက်နန်ဨကရာဇ်ဂှ်တုဲ ပရေၚ်ကလၚ်ပၟိၚ် သွက်ဂွံစောဲဂဗုတ် ကုသ္ကိုပ်ဝန်ဇၞော်တြေံ တက်ဇြေန် မၞုံကဵုသြဇာဂှ်ဟာ၊ ဟွံစောဲဂဗုတ်ဟာ ဂှ် သ္ကိုပ်ညးရေၚ်တၠုၚ်ဂဗုတ်အလဵုအသဳသေံ ပဆုဲပြံၚ်အာဏောၚ် ညးရေၚ်တၠုၚ်ဂဗုတ်ညး ဟီုလဝ် ပ္ဍဲဂိတုဨပရဴ ၁၀ တေံရ။
သ္ကိုပ်ညးရေၚ်တၠုၚ်ဂဗုတ်အလဵုအသဳဂှ် ဂၠိုက်ဂၠါဲစၟဳတ်ဒၟံၚ် ဂဗုတ်ဏံဖိုဟ်ရောၚ် ညးရေၚ်တၠုၚ်ဂဗုတ် တက်ဇြေန် မၞုံယၟု ဝေန်ယက် ချာမန်ထရဳ ဟီုလဝ်ကဵု ရိုက်တာရ။
ဟိုတ်နူပရေၚ်ဂၠိုက်ဂၠါဲစၟဳတ် ဟွံတုဲဒှ်ဏီဂှ်ရ အစဳဇန်စၟဳတ် သ္ဂောံကလၚ်ပၚ်ပၟိၚ်အာပၠန်တံဂှ် ပဆုဲပြံၚ်လဝ် ဂိတုမေ ၂၉ တေံရောၚ် ညးမၞုံအခေါၚ်ဟီုဂး သ္ကိုပ်ရေၚ်တၠုၚ်ဂဗုတ်အလဵုအသဳသေံ ပရာယုတ် ဖက်ခါန် ကဵုလဝ်သမ္တီ ပ္ဍဲပေါဲသောၚ်ကလးလိက်ပရိုၚ်တုဲ သွဟ်ဂၠိုက်ဂၠါဲစၟဳတ်တံ ဟွံဍိုက်ပေၚ်ဏီပုဟ်ဂှ် သ္ဂးလဝ်ရ။
တက်ဇြေန် ပါဲဒလေတ်မံၚ်လဝ် ပ္ဍဲဍုၚ်သ္အာၚ် ပွိုၚ် ၁၅ သၞာံတုဲ သၞာံ ၂၀၂၃ ကလေၚ်စဴကၠုၚ်ဍုၚ်သေံ ဒးဒုၚ်ရပ်ထိၚ်လဝ်တုဲ ကလေၚ်ဗလးကၠုၚ် ပ္ဍဲဂိတုဖေဖဝ်ဝါရဳဂှ်ဝွံ ဒဒှ်ရသစ္စနွံ လ္တူနန်ဨကရာဇ်ဂှ် သ္ပလဝ်ကတိ ဂၠိုၚ်ၚ်ကဵုဝါရ။
ဒပ်ပၞာန် မၞုံပၟိက်ကုနန်ဨကရာဇ်ဂှ် စောဲလဝ်ဂဗုတ် ကုတက်ဇြေန်တုဲ ယဝ်ရကလိလောန်လဝ် ပြာကတ်မ္ဂး ဒးဒုၚ်ဖျေံစၟတ်ဒဏ်ထံၚ် စဵုကဵု ၁၅ သၞာံမာန်ဏောၚ် ဂွံတီကေတ်ရ။
ဒပ်ပၞာန် စောဲစပ်လဝ် ဂလာန်တက်ဇြေန် ဟီုဂးလဝ် လောန်ကၠုၚ် သၞာံ ၂၀၁၅ ပ္ဍဲကဵုအေန်တာဗျူ ကၠောန်သ္ပလဝ် ကုမဳဒဳယျာဍုၚ်သ္အာၚ်မွဲဂှ်ရ။
တက်ဇြေန်ဝွံ သွက်ဂွံပါဲဒလေတ် ဒဏ်ထံၚ် ဒးဒုၚ်ဖျေံလဝ် နကဵုပရေၚ်ရပ်စပ်အဝဵုဟွံဒးကဵုဒၞါဲဂှ်တုဲ ပါဲဒလေတ်လဝ် ပ္ဍဲဍုၚ်သ္အာၚ် ပွိုၚ် ၁၅ သၞာံတုဲ အခိၚ်မဟာမိတ်ညး ဂွံဇၞးကေတ် ပ္ဍဲပေါဲရုဲမာဲတုဲဂှ် စဴကၠုၚ်ဍုၚ်ရ။
ဒဏ်ထံၚ် ဖျေံလဝ် လ္တူညးဂှ် ဨကရာဇ် ဖအောန်ဖျေံကဵုလဝ် စဵုကဵုမွဲသၞာံကီုလေဝ် တက်ဇြေန်ဝွံ ဒးဒုၚ်ထိၚ်လဝ် ပ္ဍဲရုၚ်ဂဥုဲ မဒှ်ရ။
Ref: Reuters