ဖဏံဖေန်၊ မေ ၁၄
ရန်တၟံကဵု ပရေၚ်ပံၚ်တောဲ အကြာၜါဍုၚ် ဇြဟတ်ဂွံခိုဟ်ကၠုၚ်ကီု၊ သွက်ဂွံလှာဲဂတး ပရေၚ်ဆဵုဂဗပရေၚ်ပၞာန်တုဲ ပွမပ္ကတ်ပ္ကေၚ်ပရေၚ်ပၞာန်လၟေၚ်သၞာံ “သၟိၚ်နာ်ထဝ်” ကြုက်ကဵု ကာမ္ဗောဒဳယျာဂှ် ပ္ဍဲသတ္တာဟဏံ စကၠောန်အာဏောၚ် သၞာဲဒဴကာမ္ဗောဒဳယျာမွဲတၠ ဟီုလဝ် ပ္ဍဲဂိတုမေ ၁၃ တေံရ။
ကောန်ဒပ်ကာမ္ဗောဒဳယျာ ၁၃၁၅ တၠကဵု ကောန်ဒပ်ကြုက် ၇၆၀ တၠတံဝွံ ကၠောန်အာပရေၚ်ပ္ကတ်ပ္ကေၚ်ပရေၚ်ပၞာန် ပွိုၚ် ၁၅ တ္ၚဲ သီုကဵုက္ၜၚ်ပၞာန်ကြုက် ၃ ဖ္ဍိုက်၊ က္ၜၚ်ပၞာန်ကာမ္ဗောဒဳယျာ ၁၁ ဖ္ဍိုက်တံဏောၚ်ဂှ် ညးမၞုံအခေါၚ်ဟီုဂး ဒပ်ပၞာန်ကာမ္ဗောဒဳယျာ သ္ကိုပ်ဗိုလ်ဇၞော် တောန်သဵုလဳမိုဝ် ဟီုလဝ်ကဵု အ္စာပရိုၚ်ဂမၠိုၚ်ရ။
ပရေၚ်ပ္ကတ်ပ္ကေၚ်ပရေၚ်ပၞာန် စအာ ပ္ဍဲဂိတုမေ ၁၆ တေံဂှ် ရန်လဝ် သွက်ဂွံပ္ကတ်ပ္ကေၚ် သ္ဂောံဗ္တိုက်သရိုဟ် ပွပကီုပရာပ်တံဂှ်ကီု၊ သွက်ဂွံကဵုအရီုဗၚ် သွက်ပရေၚ်ဗ္စာရဏာမၞိဟ် အကြာၜါဍုၚ်ကဵု အပ္ဍဲဒေသတံမာန်ရောၚ် ညးဟီုရ။
ကာမ္ဗောဒဳယျာ ကြဴနူဒေါအ်ထောံ ပွပ္ကတ်ပ္ကေၚ်ပရေၚ်ပၞာန် လအာတုပ်သာ်ဏံ ကုအမေရိကာန်တုဲ ခြာဟွံလအ်ဂှ်ရ စလဝ် ပွပ္ကတ်ပ္ကေၚ်ပရေၚ်ပၞာန်လၟေၚ်သၞာံ “သၟိၚ်နာ်ထဝ်” ကုကြုက် ပ္ဍဲသၞာံ ၂၀၁၆ ဂိတုဒဳဇြေမ်ဗာတေံရ။
ပရေၚ်ဍုက်ကေဝ်ဒဒှ်ေဒယှ် အကြာကာမ္ဗောဒဳယျာကဵု ညးတံဝွံ ဇြဟတ်ခိုဟ် ဗိုန်ခိုၚ်ဗွဲမလောန်ရောၚ် ကြုက် ဟီုတဴရ။
ပ္ဍဲအာယှဒိုဟ်အဂၞဲဏံ ကာမ္ဗောဒဳယျာဝွံ ဒှ်မဟာမိတ်ကြုက် ဍုက်ကေဝ်အိုတ်တုဲ ပရေၚ်ပိုန်ဒြပ်ကာမ္ဗောဒဳယျာဂှ် ကြုက် ဓလီုလဝ်သြဇာ တၟာဂလိုၚ်တုဲ ကြုက်ဝွံ သွက်ညးတံဂှ် ဒှ်မဟာမိတ်ပၟိက်ဇၞော်အိုတ်ရ။
ပ္ဍဲကာမ္ဗောဒဳယျာ ကိုန်စဳမာန် ကြုက်ပ္တိတ်လဝ်ကဵုတမ် နွံဒၟံၚ်တၟာဂလိုၚ်တုဲ ကိုန်စဳမာန်စမြိုၚ်သ္ဇိုၚ် ညံၚ်ရဴသၞေဟ်က္ၜၚ်ကျာ ကေုာံ ဂၠံၚ်တံ နွံတုဲ ကိုန်စဳမာန်ပူဂဵု ညံၚ်ရဴဟဝ်တေဝ်တံဂှ်လေဝ် ထ္မံက်ဒၟံၚ်ရုပ်ရဴဖိုဟ်ရ။
ခတှ်ကာမ္ဗောဒဳယျာ သ္ဒးကဵုဍုၚ်သ္အာၚ် ပ္ဍဲကဵု ၁၀ ဗဳလျာန်ဂှ် ၄၀ တၟံကၠံဂှ်ဝွံ ဒှ်သြန်ဒးလေဲကဵုကြုက် မဒှ်ရ။
သွက်ဂွံဖအောန်ဖျေံ လၟိဟ်က္ၜၚ်ဒးတတ်ကၠောံဒၟံၚ် သၞေဟ်ဗဳယေတ်နာမ်ဂှ်တုဲ နကဵုအရီုဗၚ်ကြုက် သွက်ဂွံဒက်ပ္တန်မြံၚ်ဍာ်ဂှ် ကာမ္ဗောဒဳယျာ စဳဇန်ဒၟံၚ်ဂှ်ရ ပရေၚ်ဒှ်ဓဝိၚ် သီုပရေၚ်ပိုန်ဒြပ် သီုပရေၚ်ပၞာန်တံ က္တဵုဒှ်ဒၟံၚ်ရ။
ဒက်ပ္တန်မြံၚ်ဍာ်ဏံတုဲမ္ဂး ကြုက်ဝွံ ပလံၚ်ဗစိုပ် ဒပ်ပၞာန်ညးတံ စဵုကဵုကရပ်ပြၚ်ၜဳ သၠုၚ်ကျာဗဳယေတ်နာမ်မာန်ရောၚ်။
Ref: AP