ဝါယှေန်တာန်၊ မေ ၁၅
သ္ၚိဗု ကဵုလဝ်သမ္တီ ကုကၠတ်ထဝ် ဒဒှ်ရမိက်ဂွံပလံၚ်ပ္တိုန်လွဟ်လက်နက် ကုအေဿရေ ၚုဟ်မးမၞုံ မွဲဗဳလျာန်ဒဝ်ဠာဂှ်ရောၚ်ဂှ် သၞာဲဒဴအမေရိကာန်ဂမၠိုၚ် ဟီုလဝ်ရ။
ပ္ဍဲအစဳဇန်ဏံ သွက်ကွဳစက်ခြပ်ပသဲ၊ မကမ်၊ မဝ်တာ ကေုာံ သွက်ယာန်အရပ်စပ်ပၞာန်တံဂှ် မကမ်ဂမၠိုၚ် ပါလုပ်အာဏောၚ်ဂှ် သ္ဂးရ။
ဆ္ဂး သွက်အစဳဇန်အလဵုအသဳအမေရိကာန် မပလံၚ်ပ္တိုန်အာ ဇရေၚ်အေဿရေတံဂှ် ဒးကေတ်အခေါၚ် နူကၠတ်ထဝ်ကၠာဏောၚ် မဒှ်ရ။
ယဝ်ရအေဿရေ ထ္ပက်ကၠုၚ်ပၞာန် ကုဍုၚ်ရာဝှာ မၞုံဒေသဂါဇြာ ဇၞော်ကဵုဇြဟတ်မ္ဂး ပွမပလံၚ်ပ္တိုန်လွဟ်လက်နက် ဇရေၚ်အေဿရေဂှ် ဒေါအ်ဇူအာဏောၚ် သမ္မတဂျဵုဗိုၚ်ဒေန် ဟီုလဝ် ပ္ဍဲသတ္တာဟတုဲကၠုၚ်တေံရ။
ကွဳစၚ်ခြပ်ပသဲ အေဿရေဂမၠိုၚ်ဝွံ ပ္ဍဲဂိတုမေ ၁၄ တေံ လုပ်စိုပ်ကၠုၚ်လဝ် စဵုကဵုအပ္ဍဲဒေသဒၞါဲမၞိဟ်ဒၟံၚ် ဍုၚ်ရာဝှာ ဗွဲဒိုဟ်အဂၞဲဂှ်ရောၚ် သၞာဲဒဴပါလက်သတိုၚ်ဂမၠိုၚ် ဟီုရ။
စပ်ကဵုဂလာန် အမေရိကာန် ဟီုဂးလဝ် ဒေါအ်ဒေၚ်အာ ပရေၚ်ပလံၚ်ပ္တိုန်လွဟ်လက်နက်ဏောၚ်ဂှ်တုဲ သၟာန်သၟုက်တဴဂှ် ဟိုတ်နူလွဟ်လက်နက် ညးတံပလံၚ်ပ္တိုန်လဝ်တုဲ ပ္ဍဲဂါဇြာ ကောန်အရာပ်ဂမၠိုၚ် ဒးချိုတ်ဒၟံၚ်ရောၚ်ဂှ် ဗိုၚ်ဒေန် ဟီုလဝ်ရ။
ဣဏံဝွံ ကြဴနူအမေရိကာန် ဒေါအ်ဒေၚ်ထောံ ပရေၚ်ပလံၚ်ပ္တိုန်လွဟ်လက်နက် ကုအေဿရေ ပ္ဍဲသတ္တာဟတုဲကၠုၚ်တေံတုဲဂှ် ပ္တိုန်ထ္ၜးလဝ် ပ္ဍဲကၠတ်ထဝ် အလန်ပထမကၠာအိုတ်ရ။
ပ္ဍဲအစဳဇန်ဏံ မကမ်ကွဳစက်ခြပ်ပသဲ ၚုဟ်မး ၇၀၀ ပြကောဋိကိုဋ်ဒဝ်ဠာ၊ မကမ်ကွဳစက်ပၞာန် ၚုဟ်မးမၞုံ ၅၀၀ ပြကောဋိကိုဋ်ဒဝ်ဠာ ကေုာံ မကမ်မဝ်တာ ကွက် ၆၀ ပြကောဋိကိုဋ် ပါလုပ်အာဏောၚ် သ္ဂးရ။
ပ္ဍဲသတ္တာဟတုဲကၠုၚ်တေံ ဌာနဝန်ဇၞော်ကာဍုၚ်သ္အာၚ်ဂှ် ဒဒှ်ရအေဿရေ သုၚ်စောဲဒၟံၚ် လွဟ်လက်နက် အမေရိကာန်ပ္တိတ်လဝ်တံ ပ္ဍဲအရာဖံက်ပ္ကဝ်သၞောဝ် ဍုၚ်နာနာတံ ဒှ်မာန်ဏောၚ်ဂှ် ဟီုလဝ်ရ။
သ္ကိုပ်ဝန်ဇၞော်အေဿရေ နေတာန်ညာဟုဂှ် ကလေၚ်ခၠေဝ်ပလန် ကုဂလာန်သမ္မတဗိုၚ်ဒေန်တုဲ ဟီုလဝ် ယဝ်ရသ္ဂောံဗ္တိုက် မုလွဟ်လက်နက်မှ ဟွံမွဲရမ္ဂး ဗ္တိုက်အာကဵု သၞေံတဲဏောၚ် မဒှ်ရ။
ဒပ်အေဿရေတံဝွံ ဟိုတ်နူ ဝးပ္ကဝ်ဒၟံၚ် အခေါၚ်အရာမၞိဟ် ပ္ဍဲဂါဇြာ နွံဒၟံၚ်ဂှ်ရ အမေရိကာန် ပလံၚ်ပ္တိုန်ဒၟံၚ်လွဟ်ဇၞော် ကုအေဿရေတံ ညံၚ်ဂွံဒေါအ်ဒေၚ်ကဵုဂှ် တၚ်အာတ်မိက်သာ်ဏံလေဝ် မံက်တိတ်ဒၟံၚ်ရ။
Ref: BBC