ၜၚ်ကံက်၊ မေ ၁၆
ကၠာဂွိုအ်ပ္တိုန်ရုၚ်စၟဳတ် အခိၚ်ရပ်ထိၚ်လဝ် နကဵုတၚ်စောဲစပ်ဗွဲမဂၠိုၚ်ဂၠေၚ် သီုကဵုတၚ်စောဲစပ် ဖ္ဍိုက်ဂရိုက်နန်ဨကရာဇ်ဂှ် ကြဴနူထ္ၜးဆန္ဒအေၚ်စၞတုဲ သၟတ်ဗြဴချဳဒရာၚ်ပရေၚ်ဍုၚ်ကွာန် မ္ဒးချိုတ်အာလဝ်ဂှ် သွက်ဂွံဂၠိုက်ဂၠါဲစၟဳတ်ဂှ် သ္ကိုပ်ဝန်ဇၞော်သေံ သရဳထာ တာဗဳဇြေန် ကဵုလဝ်အမိၚ် ပ္ဍဲဂိတုမေ ၁၅ တေံရ။
သွက် နာတ်တဳပေါန် ဗောန် သာနဳသာမ်ဃောန် အာယုက် ၂၈ သၞာံ ဇီုကပိုက်ဒးကောန်တၟံတုဲ မ္ဒးချိုတ်အာလဝ် ပ္ဍဲရုၚ်ဂဥုဲ ထံၚ်စာတ်ဂှ် ဂိတုမေ ၁၄ အခိၚ်ဗ္တံဂှ် ညးချဳဒရာၚ်ကတိုၚ်ကၟဟ်ဂမၠိုၚ် ကေုာံ အမာတ်ကၠတ်ထဝ် လ္ပာ်ဒစဵုဒစးဂမၠိုၚ် မပါလုပ် မၞိဟ်ဂၠိုၚ်ကဵုကၠံ ဍေန်ပၞာၚ် ရာဒနာကဵုလဝ်တုဲ ကလုတ်တမာန် ဍုၚ်ပလိုတ်တံကဵု ညးချဳဒရာၚ်ကတိုၚ်ကၟဟ် အခေါၚ်အရာမၞိဟ်တံ ဒဒှ်ရအောန်တဴစိုတ်ဂှ် ချူပ္တိုန်လဝ် လ္တူမဳဒဳယျာပရေၚ်မၞိဟ်တံရ။
“ ဒးဆောံလေၚ်လမျီုဂှ် ဒးအောန်စိုတ်ဗွဲမလောန်ရ။ ဒဒှ်ရအဲ အောန်တဴစိုတ် ညံၚ်ရဴတၠခန္ဓတံဂှ် မိက်ဂွံကဵုဂြောဝ်ဂတာညးတီရ” သာ်ဝွံ သ္ကိုပ်ဝန်ဇၞော် သရဳထာ ဟီုရ။
စပ်ကဵုသၟတ်ဗြဴဂှ် ဒးပြဟ်လလုဲအာလဝ်တုဲ ဂွံဂၠိုက်ဂၠါဲစၟဳတ် သောဲသောဲဗြောဲဗြောဲဂှ် စၞောန်ပ္ညုၚ်လဝ် ဌာနဝန်ဇၞော်သၞောဝ်ဓဝ်ရောၚ်ဂှ်လေဝ် သ္ကိုပ်ဝန်ဇၞော်ဂှ် ဟီုရ။
နာတ်တဳပေါန်ဝွံ ဂိတုဂျာန္နဝါရဳတေံ ဒးဒုၚ်ရပ်လဝ် နကဵုဂဗုတ် ဟွံသ္ပကေၚ်ကာကဵုရုၚ်ဂဗုတ်တုဲ ဒၟါနူဂဝဵုဂဝိုက် ဖ္ဍိုက်ဂရိုက် နန်ဨကရာဇ်တုဲ အရာမအာတ်ပ္တိုန်လဝ် သ္ဂောံဗၠးတိတ်နကဵုလျိုၚ်ဂှ်လေဝ် ဒးဒုၚ်ရုပ်သီလဝ်တုဲ ဆက်ရပ်ဒက်လဝ်ရောၚ် ဂကောံညးရေၚ်တၠုၚ်ဂဗုတ်သေံ စပ်ကဵုအခေါၚ်အရာမၞိဟ် ဟီုရ။
ညးဝွံ ၜိုတ်မွဲဂိတု ထ္ၜးဆန္ဒ အေၚ်စၞတုဲ ပရေၚ်ထတ်ယုက် ဍိုန်လျစှ်ေကၠုၚ်လဝ်ရောၚ် ဂွံတီကေတ်ရ။
ၜိုတ်ဂိတုဨပရဴမံက်တေံဂှ် ညးကလေၚ်စလဝ် စၞဍိုန်န်ကီုလေဝ် ကၠာညးဂွိုအ်ပြဟ်လလုဲ အကာဲအရာပရေၚ်ထတ်ယုက် ပရေံဒၟံၚ်ကီုလေဝ် သ္ဂောံသုၚ် ဗဳတာမေန် ကေုာံ ဓာတ်သတ္တုတံဂှ် ကယျာန်ပါဲလဝ်ရောၚ် ဌာနက္ဍိုက်ပ်ထံၚ်စာတ် ဟီုလဝ် ပ္ဍဲပေါဲသောၚ်ကလးလိက်ပရိုၚ်ရ။
သ္ဂောံတီကေတ်ဟိုတ်ပရူပရာ ညးမ္ဒးချိုတ်အာဂှ်တုဲ မၚ်ဒၟံၚ်သွဟ် စၟဳတ်လဝ်ဇွဂှ်ဖိုဟ်ရောၚ် ဌာနက္ဍိုက်ပ်ထံၚ်စာတ် ဟီုလဝ် ပ္ဍဲပေါဲသောၚ်ကလးလိက်ပရိုၚ် မကၠောန်ဗဒှ်လဝ် ပ္ဍဲဂိတုမေ ၁၅ တေံရ။
ကြဴနူပေါဲထ္ၜးဆန္ဒ သၞာံ ၂၀၂၀ ညးသၟတ်ဂမၠိုၚ် သ္ကိုပ်သ္ကတုဲ မအာတ်မိက်လဝ် သ္ဂောံပြုပြေၚ်ပြံၚ်လှာဲ နန်ဨကရာဇ်တုဲဂှ် အခိၚ်ဒးဒုၚ်ရပ်ထိၚ်လဝ်ဂှ် နာတဳပေါန်ဝွံ ဒှ်ညးချဳဒရာၚ်ကတိုၚ်ကၟဟ် မ္ဒးချိုတ်အာလဝ် ကၠာအိုတ်ရ။
သၞာံ ၂၀၂၀ လောန်ၜက်ကၠုၚ်တုဲ ပ္ဍဲကဵုမၞိဟ် ၂၇၂ တၠ ဒးဒုၚ်စောဲလဝ် နကဵုဂဗုတ်ဖ္ဍိုက်ဂရိုက်နန်ဨကရာဇ် ပ္ဍဲကဵုဍုၚ်သေံဂှ် ညးဝွံ ဒှ်ညးပါလုပ်ဒၟံၚ်မွဲရောၚ်ဂှ် ဂကောံညးရေၚ်တၠုၚ်ဂဗုတ်သေံ ဟီုရ။
Ref: Reuters