ၜၚ်ကံက်၊ မေ ၁၇
ပ္ဍဲဍုၚ်သေံ နကဵုပူဂဵု မိက်ဂွံအာတ်ပ္တိုန်ဝဳဇြာကွးဘာတံဂှ် ဒးအာတ်ပ္တိုန် နူကဵုမ္ၚးဍုၚ်သၟးရဏောၚ် နကဵုဟိုတ်သာ်ဏံတုဲ ဟွံပ္တိတ်ကဵုဝဳဇြာကွးဘာပုဟ် ပရိုၚ်တိတ်ဒၟံၚ်ကီုလေဝ် သွက်ကောန်ဍုၚ်ဗၟာတံဂှ် စပ်ကဵုပ္တိတ်ကဵုဝဳဇြာ ပရေၚ်ပညာတုဲ ကၟာတ်လဒဵုသၞောတ်ဗ္ၜတ်လဝ် ဟွံမွဲပုဟ်ဂှ် ဝန်ဇၞော်ကာဍုၚ်သ္အာၚ်သေံ ဟီုလဝ် ပ္ဍဲဂိတုမေ ၁၆ တေံရ။
လၟေၚ်ကမၠောန် အာတ်ပ္တိုန်ဝဳဇြာ စပ်ကဵုပရေၚ်ပညာ ပ္ဍဲဍုၚ်သေံဂှ် အပြံၚ်အလှာဲနွံဒၟံၚ် ဟီုဂးဒၟံၚ်ဂှ်ဝွံ ပ္ဍဲဍုၚ်ဗၟာ ကြဴနူဂယိုၚ်ပ္တိုန် သၞောဝ်ယိုက်ဂၠေၚ်လျိုၚ်ပၞာန်တုဲမှ မံက်တိတ်ကၠုၚ်လဝ်ရ။
ညးမလုပ်ဒၟံၚ်ပ္ဍဲအာယုက်အပိုၚ်အခြာ သၞောဝ်ယိုက်ဂၠေၚ်လျိုၚ်ပၞာန် ဗွဲမဂၠိုၚ်ဂၠေၚ်ဝွံ နူလ္တူဍုၚ် ဂြိပ်တိတ်ကၠုၚ် လ္ပာ်တိဍာ် ဒပ်ပၠန်ဂတးတံ ထိၚ်ဒက်လဝ်တံ ဟွံသေၚ်မ္ဂး ပါဲဒလေတ်အာ မ္ၚးဍုၚ်တံ နွံဒၟံၚ်ရ။
သွက်ကောန်ဍုၚ်ဗၟာ ဖန်ဇန်ဒၟံၚ် သ္ဂောံတိုန်စိုပ်ဘာအရေဝ်ဘာသာသေံတံဂှ် ဍုၚ်သေံ ဟွံပ္တိတ်ကဵုဝဳဇြာပရေၚ်ပညာရပုဟ် ပ္ဍဲသတ္တာဟတုဲကၠုၚ်တေံ ပရိုၚ်တိတ်ကၠုၚ်ရ။
ဟိုတ်နူပရိုၚ်ဏံတုဲ ဂလာန်ဟီုဂးဒၟံၚ် အလဵုအသဳသေံ ရေၚ်တၠုၚ်လဝ် ညံၚ်ကောန်ဍုၚ်ဗၟာ ဟွံဂွံလုပ်စိုပ်ကၠုၚ်ပ္ဍဲဍုၚ်ညးတံ နကဵုဂအုံဗွဝ် ဟွံဂွံဂှ်လေဝ် နွံလဝ်ရ။
သၞာဲဒဴရုၚ်ကလုတ်သေံ နွံလ္တူဍုၚ်လ္ဂုၚ်တံဂှ် သွက်ကောန်ဍုၚ်ဗၟာ ကၠုၚ်စိုပ်ကတ်ဗ္တောန်ပညာ ပ္ဍဲဍုၚ်သေံတံဂှ် သၞောတ်ပ္တိတ်ကဵုဒၟံၚ်ဝဳဇြာ အပြံၚ်အလှာဲ ဟွံမွဲပုဟ်ဂှ် ဟီုရ။
တၞးလိက်မၞုံပၟိက်ဂမၠိုၚ် ဍိုက်ပေၚ်မ္ဂး အာတ်ပ္တိုန်ဝဳဇြာအိုဿီုမာန်ရောၚ် ရုၚ်ကလုတ်သေံ ဟီုရ။
ဆ္ဂး ကောန်ဍုၚ်ဗၟာ ပၠောပ်လဝ်စရၚ် သ္ဂောံတိုန်စိုပ်ဘာ၊ တက္ကသိုလ် ပ္ဍဲဍုၚ်ဇၚ်မာဲ သ္ကုတ်သၟဝ်ကျာဍုၚ်သေံတေံ မအာတ်ပ္တိုန်လဝ်ဝဳဇြာတံဂှ် နူဌာနကောပ်ကာဲပရေၚ်မၞိဟ်လုပ်သေံတံ တးပါဲထောံဒၟံၚ်ရောၚ် ကွးဘာနွံဒၟံၚ်ဍုၚ်သေံတံ၊ ညးရေၚ်တၠုၚ်ကဵုပရေၚ်ဝဳဇြာတံ ကေုာံ ဘာဗ္တောန်လိက်ဂမၠိုၚ် ဟီုတဴရ။
ကောန်ဍုၚ်ဗၟာတံဂှ် ကၠုၚ်စိုပ်ဍုၚ်သေံ နကဵုဝဳဇြာအာတရဴတုဲ သွက်ဂွံအာတ်ပ္တိုန်ဝဳဇြာကွးဘာ အာယုက်မွဲသၞာံနွံဂှ် ကေတ်ဒၟံၚ်အခေါၚ်ခိုဟ် ရပ်စပ်ဒၟံၚ် ဘာတန်ဗ္တောန် အရေဝ်ဘာသာသေံ၊ အရေဝ်ဘာသာအေၚ်္ဂလိက်တံ ကေုာံ ဘာအရေဝ်ဘာသာတၞဟ်ဟ်တံဂှ် လအ်ကၠုၚ်ဒၟံၚ်ယျ။
တက္ကသိုလ်ဍုၚ်သေံလ္ၚဵုတံဂှ်တှ်ေ ဒုၚ်သ္ဇိုၚ်ကဵုပရိုဝ်ဂရာမ်ဘာတုဲ သ္ဂောံအာတ်ပ္တိုန်ဝဳဇြာပန်သၞာံဂှ် ထံက်ကဵုဒၟံၚ်ဂလာန်ရောၚ် ဂွံတီကေတ်ရ။
ပ္ဍဲဍုၚ်သေံဂှ် ကွးဘာဍုၚ်သ္အာၚ် ၃၄၀၀၀ ပြၚ်နွံတုဲ ၂၁၀၀၀ ဝွံ ဒှ်ကွးဘာကြုက်ရ။
ဒုတိယ ဂၠိုၚ်အိုတ်ဂှ်တှ်ေ ဒှ်ကောန်ဍုၚ်ဗၟာတုဲ ၃၇၀၀ ပြၚ် နွံရောၚ် ဂွံတီကေတ် အတိုၚ်စရၚ်အၚ် ဌာနဝန်ဇၞော်ပရေၚ်ပညာသေံရ။
Ref: RFA