မနဳလာ၊ မေ ၁၈
အခိၚ်ပရေၚ်ကယျာန်ဓဝါန် စပ်ကဵုတွဵုဒၞက်ဗလးဍာ် ကုကြုက် သ္ကာတ်မြဟ်ကၠုၚ်ဂှ် သမ္မတဖဳလေတ်ဖေန် မာကောသ်ဂျူနဳယာဂှ် ပ္ဍဲဂိတုမေ ၁၈ တေံ ဟီုလဝ် ဒဒှ်ရစဵုဒၞါအာ တွဵုဒၞက်ဍုၚ်ညး နကဵုအစောံဇြဟတ်ပေၚ်ၚ်ဏောၚ် မဒှ်ရ။
နကဵုဍုၚ် ဒ္ဂေတ်ဗက်သၞောဝ်ဂၠးတိမွဲ ကလေၚ်ခၠေဝ်ပလန်အာ ကုညးဟွံသ္ပဂရု ကုတွဵုဒၞက်ဖဳလေတ်ဖေန်ပိုၚ်ပြဳလဝ်တံဂှ်တုဲ ညးမလုပ်စိုပ်ၜက်ၜေတ်ကၠုၚ်တံ အတိုၚ်သၞောဝ်၊ အတိုၚ်တၚ်ဒုၚ်လျိုၚ်ဂမၠိုၚ်ရောၚ် သမ္မတဖဳလေတ်ဖေန်ဟီုရ။
ပ္ဍဲကဵုဂလာန်ဟီုလဝ် ပေါဲစှ်ေဘာအလံၚ်ဗိုလ်ဂှ် သမ္မတမာကောသ် ၜိုန်ရပ်စပ်လဝ်ဝေါဟာ ညးၜက်ၜေတ်တွဵုဒၞက်ကီုလေဝ် ဟီုပ္တိတ်လဝ်ယၟုကြုက်ဂှ် ဟွံမွဲရ။
ဗ္ဒါဲသြၚ်သၟဝ်ဍာ် နူၜဳကြုက်သၠုၚ်ကျာဂှ် ဖဳလေတ်ဖေန် စွံလဝ်က္ၜၚ်လီုလီုမွဲဖ္ဍိုက်တုဲ လ္တူက္ၜၚ်လီုဏံဂှ် စွံလဝ် ကောန်ပၞာန်ဂမၠိုၚ်ရ။
ဖဳလေတ်ဖေန် ဖ္ဍိုက်ပ္တိုန်နၚ် ကပေါတ်ကညောတ် ကေုာံ က္ၜၚ် မဆက်စပ်ကဵုပရေၚ်ထံက်ပၚ်ပလံၚ်ဗစိုပ် သွက်ကောန်ပၞာန်တံဏံဂှ်မ္ဂး ဒပ်မၚ်ပြၚ်ၜဳကြုက်တံ သုၚ်စောဲပိုက်သိုဟ်ပၠိုတ်ပၟတ်တုဲ တာဒၞါဒၟံၚ်တုဲ လုပ်ဇီုကဵုက္ၜၚ်တုဲ ဂၠါဲဒၟံၚ်သၞတံလေဝ် ကၠောန်ဒၟံၚ်ရ။
ၜဳကြုက်သၠုၚ်ကျာ မွဲသၞာံ ၚုဟ်မးပရေၚ်ပလံၚ်ပ္တိုန်ဗၞိက်ကဵုက္ၜၚ် ၜိုတ် ၃ ထရဳလဳယာန် ဒဝ်ဠာနွံဂှ် ကြုက်ဟီုလဝ် ဒှ်ဒြပ်ညးတံရောၚ် မဒှ်ရ။
ပ္ဍဲတွဵုဒၞက်ဏံ မ္ၚးနူကဵုဖဳလေတ်ဖေန်ဂှ် ဍုၚ်ဘရူနာၚ်၊ မလေဝ်ယှာ၊ ထိုၚ်ဝါန် ကေုာံ ဗဳယေတ်နာမ်တံဂှ်လေဝ် ညးတံပိုၚ်ပြဳလဝ်ရောၚ် တွဵုဒၞက်ဟီုဂှ်လဝ်လေဝ် နွံဒၟံၚ်ရ။
သၞာံ ၂၀၁၆ တေံ နူရုၚ်သၞောဝ်ဓဝ် သောၚ်ကလးပရေၚ်ကယျာန်ဓဝါန်ဍုၚ်နာနာဂှ် ပွမဟီုဂး ကြုက် ပိုၚ်ပြဳလဝ် ၜဳကြုက်သၠုၚ်ကျာဂှ်ဝွံ ဟွံကိတ်ညဳကဵု သၞောဝ်ပုဟ်ဂှ် သ္ဂုတ်သွာတ်လဝ်ကီုလေဝ် လ္ပာ်ဍုၚ်ကြုက် ဟွံသ္ပဂရုလဝ်ရ။
Ref: Reuters