ဂျေရုသလေန်၊ မေ ၂၁
စပ်ကဵုတၚ်စောဲစပ် ကလိလောန်ဒုဟ်ရာဇဝတ် ပ္ဍဲပေါဲပၞာန်ဂါဇြာဂှ်တုဲ ရုၚ်သၞောဝ်ဓဝ်အမှုရာဇဝတ်ဍုၚ်သ္အာၚ် ICC ပ္တိတ်ဇြဟတ် သ္ဂောံရပ်စပ်ညး ကရောံက္ဍိုပ်သ္ကိုပ်ဟာမာသ်ဂှ် သ္ကိုပ်ဝန်ဇၞော်အေဿရေ ဗေန်ဂျမေန်နေတာန်ညာဟု ပ္တိုန်ဒုဟ်ဒစဵုဒစးလဝ် သီုဒေါသရ။
အေဿရေ စကာဒၟံၚ်သၞောတ်ဒဳမဝ်ကရေဇြဳဂှ် ပ္တောံၜတ်ထောံ ကုရဲဂစိုတ်မၞိဟ် ကဵုဂအုံဗွဝ်ဂှ်ဝွံ ဒှ်အရာသ္ဇက်ဒးဇအိုန်ဇရရောၚ် သ္ကိုပ်ဝန်ဇၞော် နေတာန်ညာဟု ဟီုရ။
သမ္မတအမေရိကာန် ဂျဵုဗိုၚ်ဒေန်ဂှ်လေဝ် လအာတုပ်သာ်ဏံကီု အကြာအေဿရေ ကေုာံ ဟာမာသ်ဂှ် အရာမတုပ်သၟဟ်ဟွံမွဲပုဟ်ဂှ် ဟီုတဴရ။
သ္ကိုပ်ဝန်ဇၞော် နေတာန်ညာဟု ကေုာံ ဝန်ဇၞော်ကာစဵုဒၞါ ဂဝ်ဠတံဝွံ သွက်အမှုရာဇဝတ် ကလိလောန်လဝ် လ္တူဂကူမၞိဟ်တံကဵု အမှုရာဇဝတ်ပၞာန် ပ္ဍဲဒေသဂါဇြာတံဂှ် လျိုၚ်နွံဒၟံၚ်ရောၚ် ဟိုတ်သ္ဂောံပတှ်ေကေတ်သာ်ဏံ နွံဂှ် ဂအုပ်ညးရေၚ်တၠုၚ်ဂဗုတ် ICC ကာရေန်ခါန် ဟီုရ။
က္ဍိုပ်သ္ကိုပ်ဟာမာသ် ယာယာယှေန်ဝါ ပ္ဍဲဂါဇြာဂှ်လေဝ် ICC ပ္တိတ်ဒၟံၚ်ဇြဟတ် သွက်ဂွံရပ်ဒက် နကဵုတၚ်စောဲစပ် အမှုရာဇဝတ်ပၞာန်ရ။
အေဿရေ ကေုာံ မဟာမိတ်အဓိက အမေရိကာန်တံဝွံ ဒှ်ကောန်ဂကောံ ICC မဒက်ပ္တန်လဝ် သၞာံ ၂၀၀၂ ဂှ် ဟွံသေၚ်ရ။
ဝန်ဇၞော်ကာဍုၚ်သ္အာၚ် အမေရိကာန် အာန်တိုဝ်နဳယိုဝ် ဘလေန်ကာန်ဂှ်လေဝ် ဒဒှ်ရတးပါဲကၠေံ ပြဝ ICC ဂှ် ဟီုလဝ်တုဲ ပြဝ ICC ဝွံ ဟွံသ္ကဵုဗဒှ်တဴ အထံက်အရီုပုဟ်ဂှ် ဗျိတိၚ်လေဝ် ဟီုလဝ်ရ။
ICC ပ္တိတ်ဇြဟတ် သ္ဂောံရပ်ဒက် သ္ကိုပ်ဝန်ဇၞော် နေတာန်ညာဟုကဵု က္ဍိုပ်သ္ကိုပ်ဟာမာသ်ဂှ်ဝွံ က္တဵုဗဒှ်ကဵုပရေၚ်ဇီုကပိုက် ကုပရေၚ်ပ္ညဳပ္ညပ်ဒေါအ်ပန်ပှော် အကြာအေဿရေ ကဵု ဟာမာသ်တံ လၟုဟ်ဂှ်ဏောၚ်ဂှ် ဝန်ဇၞော် ဘလေန်ကာန် ဟီုရ။
ပ္ဍဲဂါဇြာဂှ် အေဿရေ ဗ္တိုက်ဒၟံၚ်ကောန်အရာပ်တံ တိုက်ရိုက်တုဲ ညံၚ်ဂွံကၠောဝ် ရေၚ်တၠုၚ်လဝ်တံ မပါလုပ် သီုကဵုကလိလောန်ဒၟံၚ် အမှုရာဇဝတ်တံဂှ်တုဲ သွက်ဂွံရပ်ဒက် သ္ကိုပ်ဝန်ဇၞော် နေတာန်ညာဟု ကဵု ဝန်ဇၞော်ကာစဵုဒၞါတံဂှ် ဂအုပ်ညးရေၚ်တၠုၚ်ဂဗုတ် ICC အာတ်ပ္တိုန်လဝ်ရ။
နေတာန်ညာဟု မဒှ်သ္ကိုပ်ဝန်ဇၞော်အေဿရေ အာယုက်ဂၠိၚ်အိုတ်ဂှ် ပြဝ ICC ဝွံ ဒှ်ပြဝဗၠေတ်မှာ ဟွံဒးရးတံရောၚ် ဟီုရ။
ဂျာမနဳ ကေုာံ ပြၚ်သေတ်ဂှ် ၜိုန်ရထံက်ဂလာန် ဟီုဂးလဝ် ပြဝရုၚ်သၞောဝ်ဓဝ်ဂှ်ကီုလေဝ် ပွမစၟတ်ထောံ အေဿရေ ကေုာံ ဂကောံဟာမာသ် ကဆံၚ်တုပ်ပ်ဂှ်တှ်ေ တးပါဲလဝ်ရ။
Ref: BBC