ဟဏဳ၊ မေ ၂၂
သၞာဲဒဴဂီုကၠီုကဆံၚ်လ္တူ ဍုၚ်ဗဳယေတ်နာမ် မၞုံယၟုတိုဝ်လာမ်ဂှ် ပ္ဍဲဂိတုမေ ၂၂ တေံ ခါန်ကၞက်ပ္တိုန်လဝ် နဒဒှ်သမ္မတရောၚ် ဂွံတီကေတ်ရ။
သ္ဇိုၚ်အခေါၚ်သၠးပွးတံ ဒးဒုၚ်ဍဵုဍိုက်တုဲ အခိၚ်ဂကောံအခေါၚ်အရာမၞိဟ်တံ ဟီုလဝ် ဌာနထံၚ်ပရိုၚ်ဗဳယေတ်နာမ် ဝးပ္ကဝ်ဒၟံၚ် သၞောဝ်ဍုၚ်သ္အာၚ်တံဂှ် သမ္မတ တိုဝ်လာမ်ဝွံ ဒှ်ညးကောပ်ကာဲလဝ် ဒပ်ဗၠာဲသၟိၚ် ကေုာံ ပရေၚ်ပြုပြေၚ်ပၞာန် စပ်ကဵုပရေၚ်ထံၚ်ပရိုၚ်တံဂှ်ရ။
အခိၚ်ရေၚ်တၠုၚ်ဒၟံၚ် အစဳဇန်သ္ဂောံဗ္တိုက်သရိုဟ် ပွမဒ္ဂေတ်လီုစလာပ် မက္တဵုဗဒှ်ကဵု ဗွိုၚ်ပရေၚ်ဍုၚ်ကွာန် ကေုာံ ဗွိုၚ်ပရေၚ်ပိုန်ဒြပ် ဗဳယေတ်နာမ် ကဆံၚ်သၠုၚ်တံ ချဳဇတဝ်အာတုဲ အပ္ဍဲဂကောံအလဵုအသဳ အပြံၚ်အလှာဲ ဒၞါဲကဆံၚ် မက္တဵုဗဒှ်လဝ်ဂှ် ကြဴနူသမ္မတတြေံ နုက်တိတ်နူ ကဆံၚ်သမ္မတတုဲ ကၠတ်ထဝ်ကောန်ဂကူဗဳယေတ်နာမ် သ္ပဒတန်လဝ် လာမ် နဒဒှ်သမ္မတရ။
ကဆံၚ်ဌာနန္တရ သမ္မတဗဳယေတ်နာမ်ဂှ်ဝွံ ဗွဲမဂၠိုၚ်တှ်ေ ၜိုတ်တိုန်စအသေအဟာန်ရကီုလေဝ် ဟိုတ်နူအကာဲအရာ လာမ် ၆၆ သၞာံ ဒှ်ကၠုၚ်က္ဍိုပ်သ္ကိုပ်ကၟိန်ဍုၚ်ဂှ်တုဲ ညးဝွံ အပ္ဍဲဍုၚ်ဂှ် သ္ဂောံဒှ်ကၠုၚ် ဂအုပ်ညးအုပ်ကာ အပ္ဍဲဗော်ကောန်မျူနေတ် မဒှ်ကဆံၚ်ပရေၚ်ဍုၚ်ကွာန် ပၟိက်ဇၞော်အိုတ်ဂှ် နွံဒၟံၚ်ဒၞါဲဇြဟတ်ခိုဟ်မွဲရောၚ် သုတေသဳ ၚုယေန်ခက်ဂျာၚ် နူ ISEAS-Yusof Ishak Institute ဟီုရ။
ဂအုပ်ညးအုပ်ကာ ဗော်ကောန်မျူနေတ် မၞုံယၟု ၚုယေန် ဖူထရောန်ဝွံ သၞာံ ၂၀၂၁ ဂှ် ဂွံဒုၚ်ရုဲစှ်လဝ် အလန်တတိယကီုလေဝ် ကလိဂွံလဝ် အာယုက် ၈၀ သၞာံယျဂှ်ရ ကြဴနူသၞာံ ၂၀၂၆ တုဲ နကဵုညး ဂွံထပ်ယိုက်ဂၠေၚ်လျိုၚ် မွဲအလန်ပၠန်ဂှ် ပ္တိတ်အာဇြဟတ် ဟွံသေၚ်ရ။
ဂအုပ်ညးအုပ်ကာဗော် ထရောန်ဂှ် ပရေၚ်ဒ္ဂေတ်လီုစလာပ်တံဂှ်ဝွံ ဒှ်အန္တရာယ်သ္ကာတ်မြဟ်အိုတ် ဗော်ကောန်မျူနေတ် ဒးဆေၚ်ဒၟံၚ်မုက်မွဲရောၚ် ညးညာတ်လဝ်တုဲ ပရေၚ်ဗ္တိုက်သရိုဟ် ပွမဒ္ဂေတ်လီုစလာပ် မသၠဲလးတံဂှ် သမ္မတတၟိ လာမ် က္ဍိုက်ဒၟံၚ်က္ဍိုပ်ရ။
သမ္မတလာမ်ဝွံ သၞာံ ၂၀၁၆ တေံ ကၠာဂွိုအ်ဒှ်ကၠုၚ်ဝန်ဇၞော်ဂှ် ဒှ်ညးကေၚ်ယိုက်ဂၠေၚ်လဝ်လျိုၚ် ပ္ဍဲဌာနဝန်ဇၞော်ပရေၚ်ဂီုကၠီုညးဍုၚ်ကွာန် ပွိုၚ်ပန်သၞာံရ။ ညးဝွံ ပ္ဍဲကဵုပရေၚ်ဂၠိုက်ဂၠါဲစၟဳတ် သၟာပရေၚ်ဍုၚ်ကွာန်ကဆံၚ်လ္တူတံဂှ် ဒှ်ညးပါလုပ်လဝ် လ္ပာ်လက္ကရဴရောၚ် ဂွံတီကေတ်ရ။
Ref: ABC