ၜၚ်ကံက်၊ မေ ၂၃
စပ်ကဵုသ္ကိုပ်ဝန်ဇၞော် သရဳထာ တာဗဳဇြေန် သ္ဂုတ်သွာတ်လဝ် ပရေၚ်ခါန်ကၞက်ပ္တိုန် ပဳချေတ် ချူအာန်ဗာန် ပ္ဍဲဂကောံဝန်ဇၞော်ဂမၠိုၚ်ဂှ်တုဲ ပွမအာတ်ပ္တိုန်လဝ် သ္ဂောံပ္တိတ်ကၠေံသ္ကိုပ်ဝန်ဇၞော်ဂှ် ဒုၚ်တဲချပ် ထေက်ဟွံထေက်ဂှ် ဂိတုမေ ၂၃ ဏံ ရုၚ်သၞောဝ်ဓဝ်သၞောဝ်သ္ဇိုၚ် သ္ဂုတ်သွာတ်အာဏောၚ် မဒှ်ရ။
မေဿတာ ပဳချေတ် ကေုာံ သ္ကိုပ်ဝန်ဇၞော်တံဝွံ ဝးပ္ကဝ်ဒ္ဂေတ်ဝတ် စပ်ကဵုဝန်ဇၞော်ဂမၠိုၚ်ဂးတုဲ ဂကောံ အမာတ်ကၠတ်ထဝ် ၄၀ တၠ အာတ်ပ္တိုန်လဝ် ပ္ဍဲရုၚ်သၞောဝ်ဓဝ်သၞောဝ်သ္ဇိုၚ် သွက်ဂွံနုက်ပ္တိတ်ကၠေံ သ္ကိုပ်ဝန်ဇၞော်ရ။
မေဿတာပဳချေတ်ဝွံ ဂိတုမေ ၂၁ ဂှ် နုက်တိတ်နူ နဒဒှ်ဝန်ဇၞော် ရုၚ်သ္ကိုပ်ဝန်ဇၞော်ဂှ်တုဲ ညးနုက်တိတ်ဂှ်ဝွံ စပ်ကဵုပရေၚ်လုပ်သၞောဝ် ဒၞါဲကဆံၚ်ဌာနန္တရ မေဿတာ သရဳထာတုဲ လ္ဂောံကဵုသၞောဝ်ဥပဒေ ညံၚ်ပရေၚ်ကျဗြံ ဟွံဂွံမွဲတုဲ နုက်တိတ်လဝ်ရောၚ် ညးဂမၠိုၚ် ညာတ်လဝ်သာ်ဏံရ။
အမာတ်ကၠတ်ထဝ်ဂမၠိုၚ် အာတ်ပ္တိုန်လဝ်ဂှ် ယဝ်ရရုၚ်သၞောဝ်ဓဝ် ဒုၚ်တဲ သ္ပဒတန်မ္ဂး သရဳထာ ဒးဒေါအ်ဇူနူ ကဆံၚ်သ္ကိုပ်ဝန်ဇၞော်ဂှ်မာန်ရောၚ် ညးလ္ၚတ်သၞောဝ်ဥပဒေဂမၠိုၚ် ဟီုရ။
နူဥက္ကဌကၠတ်ထဝ်မွဲကဆံၚ် ဒဒှ်ရညးတံၜါတၠ ဝးပ္ကဝ်လဝ် ဒ္ဂေတ်ဝတ်စပ်ကဵုဝန်ဇၞော်ဂမၠိုၚ် နွံ၊ ဟွံမွဲတုဲ သွက်ဂွံသ္ပဒတန်ကဵုဂှ်ကီု ယဝ်ရဝးပ္ကဝ်ကၠေံမ္ဂး သွက်ဂွံပ္တိတ်နူကဵု ကဆံၚ်ဌာနန္တရဂှ် အမာတ်ကၠတ်ထဝ် ၄၀ တၠ အာတ်ပ္တိုန်လဝ်ရ။
ရုၚ်သၞောဝ်ဓဝ်ဂှ်လေဝ် ဒးသ္ဂုတ်သွာတ်အာ အတိုၚ်သၞောဝ်မဆေၚ်စပ်တံဂှ်ဏောၚ်တုဲ ရံၚ်မုက်ညးဍုၚ်ကွာန်တံတုဲ ဒုၚ်အာတဲ အရာမပ္တိုန်ထ္ၜးလဝ်တံဂှ်ဟာ ဟွံသေၚ်မ္ဂး ဟွံကိတ်ညဳကဵု သၞောဝ်ဂးတုဲ တးပါဲကၠေံဏောၚ်ဟာဟီုဂှ် ဒးသ္ဂုတ်သွာတ်ဏောၚ် မဒှ်ရ။
ပ္ဍဲအရာကၠောန်သ္ပအပြံၚ်အလှာဲ ဒၞါဲကဆံၚ်ဂကောံဝန်ဇၞော် လက္ကရဴအိုတ်ဂှ် အရာဟွံကိတ်ညဳကဵု ဒ္ဂေတ်ဝတ်ဂမၠိုၚ် နွံဒၟံၚ်ရောၚ် အမာတ်ကၠတ်ထဝ်သေံ လ္ပာ်ဒစဵုဒစးတံ စောဲစပ်လဝ်ရ။
ဝန်ဇၞော်ကာဍုၚ်သ္အာၚ် ဖက်ဆောကေတ်လဝ်တာလျိုၚ် နဒဒှ်လစှ်ေသ္ကိုပ်ဝန်ဇၞော်ဂှ်လေဝ် ကြဴနူဒးဒုၚ်လေၚ်လဝ် ဒၞါဲကဆံၚ်ဖက်ဆောဂှ်တုဲ နုက်တိတ်အာလဝ် သီုကဵုနဒဒှ်ဝန်ဇၞော်ကာဍုၚ်သ္အာၚ်ရ။
မေဿတာပဳချေတ်ဝွံ အပ္ဍဲပရေၚ်စောဲဂဗုတ် စပ်ကဵုပရေၚ်ပိုၚ်ပြဳတိဍာ် သ္ဇက်ဒးကယျာန်ဓဝါန် သၞာံ ၂၀၀၈ ဂှ် ဒှ်ညးကေၚ်ဗက်လဝ်ဂဗုတ် သွက်သ္ကိုပ်ဝန်ဇၞော်တြေံ တက်ဇြေန်တုဲ စပ်ကဵုပ္တိတ်ဇြဟတ် သ္ဂောံထ္ပက်လာပ်ဗဇဴဂှ်တုဲ ဒှ်ညးဒးဒုၚ်ဖျေံလဝ်ထံၚ် နကဵုဂဗုတ်ဟွံသ္ပကေၚ်ကာ ကုရုၚ်သၞောဝ်ဓဝ်ရ။
မေဿတာပဳချေတ် ကေုာံ ညးကၠောန်ကလောန်မွဲစွံ ကရောံညးၜါတၠဝွံ ပ္ဍဲသၞာံ ၂၀၀၈ ဂိတုဂျောန် ၂၅ ဂှ် ဒးဒုၚ်ဖျေံလဝ်ထံၚ်တြဴဂိတု နကဵုဂဗုတ်ပ္တိတ်ဇြဟတ် သ္ဂောံထ္ပက်လာပ်ဗဇဴရ။
Ref: Bangkokpost