တိုဝ်ကျိုဝ်၊ မေ ၂၄
ပ္ဍဲဍုၚ်ဗၟာ ဍုၚ်ဇိုၚ်ဝုတ်ဒိုဟ် အကြာကံၚ်ဇြဳပၞာန်ကဵု ဂကောံဇြဟတ်ပၠန်ဂတးတံ ဗ္တိုက်ဒၟံၚ်ညးသ္ကအ်ဂှ် ညံၚ်ပဋိပက္ခဂွံအိုတ်အးအာ နကဵုအလဵုအသဳသေံ ဒဒှ်ရဂ္စါန်ဒၟံၚ် ဟွံဒေါအ်ဟွံဇူရောၚ် သ္ကိုပ်ဝန်ဇၞော်သေံ သရဳထာ တာဗဳဇြေန် ဟီုလဝ်ရ။
နကဵုအလဵုအသဳသေံ ပ္တိတ်ဒၟံၚ်ဇြဟတ် သ္ဂောံသောၚ်ကလးပြသၞာဍုၚ်ဗၟာ မွဲဟာန်ကေုာံဍုၚ်လာအိုဝ် ဥက္ကဌအာဇြဳယာန်လၟုဟ်၊ သီုကဵုဍုၚ်အာဇြဳယာန်တၞဟ်သ္အာၚ်ဂှ်ရောၚ် တာဗဳဇြေန် ဟီုလဝ် ပ္ဍဲဝှဝ်ရာမ် အနာဂတ်အာယှ ဌာန်ပရိုၚ် Nikkei မကၠောန်ဗဒှ်လဝ် ပ္ဍဲဍုၚ်တိုဝ်ကျိုဝ် ဂိတုမေ ၂၄ ဂှ်ရ။
သွက်ဂွံကဵုအရီုဗၚ် ပရေၚ်ဗ္စာရဏာမၞိဟ် ကုကောန်ဍုၚ်ဗၟာ နူပယျဵုၜါဍုၚ် ပေါဲဗ္တိုက်သ္ကာတ်မြဟ်ဒၟံၚ်ဂှ် ဍုၚ်သေံ သၠုၚ်ပ္တိုန်အသိၚ် ရေၚ်တၠုၚ်ဒၟံၚ်ရောၚ် သ္ကိုပ်ဝန်ဇၞော် တာဗဳဇြေန် ဟီုရ။
နကဵုဍုၚ်ဗၟာ ဂွံကလေၚ်စိုပ် လ္တူဂၠံၚ်တရဴဒဳမဝ်ကရေဇြဳပၠန်ဂှ် ပိုယ်တံမိက်ဂွံညာတ်တုဲ သွက်ပရေၚ်ၜိုဟ်လလမ်၊ ပရေၚ်ညိၚ်ဝတ် ကေုာံ ပရေၚ်ညဳသၟဟ် ဍုၚ်ဗၟာဂှ် ဍုၚ်သေံ ဂ္စါန်ဒၟံၚ်ဟွံဒေါအ်ဟွံဇူရောၚ် သ္ကိုပ်ဝန်ဇၞော်ဂှ် ဟီုတဴရ။
ဟိုတ်နူပေါဲဗ္တိုက် က္တဵုဒှ်ဒၟံၚ် ပ္ဍဲဍုၚ်ဗၟာတုဲ ညးမဂြိပ်တိတ်ကၠုၚ် ဗွဲမဂၠိုၚ်ဂၠေၚ်ဂှ် ဍုၚ်သေံဝွံ ဒှ်ဍုၚ်ဒုၚ်လဝ်တဲမွဲရ။
ကံၚ်ဇြဳပၞာန် သၟဝ်ပၠတရဴ က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ်ဂှ်ဝွံ ဒးဆေၚ်ဒၟံၚ်မုက်ကဵု ပရေၚ်ပၠန်ဂတးဒစဵုဒစး ဂကောံရပ်လွဟ်နာနာတုဲ အခိၚ်လၟုဟ် ဒးဆေၚ်ဒၟံၚ်မုက်ကဵု ပရေၚ်ကျဗြံ တၟာဂလိုၚ်ရ။
ပလှ်ဖျေံအလဵုအသဳကောန်အရာပ်တုဲ အခိၚ်သီအဝဵုပိသၞာံပြၚ်ကၠုၚ်ဂှ် ကၠောန်ဗဒှ်ကဵုပေါဲရုဲမာဲဏောၚ် က္ဍိုပ်သ္ကိုပ်ပၞာန် ကံၚ်ဇြဳပၞာန် ဟီုဂးဒၟံၚ် ဂၠိုၚ်ၚ်ကဵုဝါကီုလေဝ် ဂလာန်ဟီုဂးဒၟံၚ် ကၠောန်ဗဒှ်ပေါဲရုဲမာဲ ပ္ဍဲအကာဲအရာဟွံညိၚ်ဝတ်တံဂှ်ဝွံ ဒှ်အရာသ္ဇက်ဒးဒှ်သံသယခိုဟ်ဏောၚ်ဂှ် မဳဒဳယာဍုၚ်သေံ ချူထ္မံက်ထ္ၜးလဝ်ရ။
Ref: Bangkok Post