ဝါယှေန်တာန်၊ မေ ၂၅
ဒၟါနူကြုက် ပ္ကတ်ပ္ကေၚ်ပရေၚ်ပၞာန် မွဲဒမြိပ်တ္ကအ်ထိုၚ်ဝါန်ဂှ်တုဲ ပရေၚ်ကြံၚ်မ္ၚိုဟ်တံ သၠုၚ်တိုန်ကၠုၚ်တုဲ ဝန်ဇၞော်ကာစဵုဒၞါအမေရိကာန် အေဝ်လွိုၚ် အဝ်သတေန်ဝွံ ဆဵုဂဗအာ ကုဇၞော်သ္ကိုပ် စပ်ကဵုလ္ပာ်ပၞာန်ကြုက်ဏောၚ်ဂှ် ပေန်တဂေါန် လလောၚ်တြးလဝ် ပ္ဍဲဂိတုမေ ၂၄ တေံရ။
အခိၚ်တိုန်စိုပ် ကောံဓရီု ယှာန်ဂရဳလာ ပ္ဍဲသေန်ကပေါဝ် ဒၞါဲကၠောန်ဗဒှ်ပေါဲဆဵုဂဗ ဝန်ဇၞော်ကာစဵုဒၞါအလုံဂၠးတိ လၟေၚ်သၞာံ နူဂိတုမေ ၃၁ စဵုကဵုဂိတုဂျောန် ၂ ဂှ် ဝန်ဇၞော် အဝ်သတေန် ဆဵုဂဗအာကဵု သ္ကိုပ်ဗိုလ်ဒပ်ဍာ်ကြုက် ဒံၚ်ဂျာန်ဏောၚ် ပေန်တဂေါန် ဟီုရ။
ကြုက်ဝွံ နဒဒှ်စမ်ၜတ်အစောံစရာဲညးတံ သွက်သ္ဂောံသီကေတ် တ္ကအ်ထိုၚ်ဝါန် မဟီုလဝ် အပိုၚ်ညးတံဂှ်တုဲ ပ္ဍဲတ္ၚဲအကြာတုဲကၠုၚ်တေံ ဂေတ်ဂေၚ်ပူဗိုၚ်လဝ် ကဵုက္ၜၚ်ပၞာန် က္ၜၚ်ကျာဗ္တိုက်တံဂှ်တုဲ ကၠောန်လဝ် ပွပ္ကတ်ပ္ကေၚ်ပရေၚ်ပၞာန်တံရ။
စဵုဒၞါအာ သၞောတ်ဒဳမဝ်ကရေဇြဳထိုၚ်ဝါန် မအုပ်ဓုပ်ဒၟံၚ်အပိုၚ်ဂှ် ဂတအိုတ်ဏောၚ် သမ္မတတၟိ လိုၚ်ချေန်တဳ မဟီုကြီုဒၟံၚ်ဂှ် ကြဴနူယဵုဒုၚ်သစာတုဲ ကြုက် ကၠောန်ပ္ကတ်ပ္ကေၚ်ကၠုၚ်ပရေၚ်ပၞာန်တံရ။
ဝန်ဇၞော် အဝ်သတေန်ကဵု သ္ကိုပ်ဗိုလ်ဒပ်ဍာ်ကြုက်တံ ပ္ဍဲဂိတုဨပရဴတေံ ကေၚ်သဳကၠဳလဝ် နကဵုဖုၚ်တုဲ အပ္ဍဲဗ္ဒါဲ ၁၈ ဂိတုဂှ် အကြာဇၞော်သ္ကိုပ်ကာစဵုဒၞါ ဍုၚ်ဇြဟတ်ဇၞော်ၜါဍုၚ်ဂှ် ပရေၚ်သဳကၠဳပထမကၠာအိုတ် က္တဵုဒှ်ကၠုၚ်ရ။
ဂိတုတုဲကၠုၚ်တေံ ဝန်ဇၞော်ကာဍုၚ်သ္အာၚ် အာန်တိုဝ်နဳ ဗလေန်ကာန် အာစိုပ်လဝ် ဍုၚ်ဗေကျေန်ကဵု ဍုၚ်ယှာန်ဟိုၚ်တုဲ ပရေၚ်ဆက်စၠောံ အကြာအလဵုအသဳဗိုၚ်ဒေန်ကဵု ဗေကျေန်တံ သာဂၠိုၚ်ကၠုၚ်ဂှ် ဂွံဆဵုကေတ်ရ။
ဝန်ဇၞော် အဝ်သတေန်ဝွံ သတ္တာဟဂတကၠုၚ်စိုပ်ဏံ သ္ဂောံတိုန်စိုပ် ကောံဓရီုဝန်ဇၞော်ကာစဵုဒၞါအာဇြဳယာန်ဂှ် အာစိုပ်ကာမ္ဗောဒဳယျာဏောၚ်တုဲ လၟေၚ်တရဴညးဝွံ တုဲဒှ်အာ ပ္ဍဲပြၚ်သေတ်ဏောၚ် မဒှ်ရ။
Ref: AFP