ကုလသမဂ္ဂ၊ မေ ၂၇
ပေါဲဗ္တိုက်အသိၚ်သ္ကာတ်ကၠုၚ်ဒၟံၚ် ဗွဲဒိုဟ်ပလိုတ်ဍုၚ်ဗၟာ ပ္ဍဲတွဵုရးရခေၚ်ဂှ် မၚ်ရံၚ်ဒၟံၚ်တုဲ ပရေၚ်ညးဂကူအောန်ဒးဒုၚ်ဍဵုဍိုက် ကဵုလ္ၚီ ဒးဒုၚ်ထဍေၚ်ပ္တိတ်ဂှ် ဂၠိုက်ဂၠါဲစၟဳတ်ဒၟံၚ်ရောၚ် ညးဂၠိုက်ဂၠါဲစၟဳတ် အမှုရာဇဝတ်ပၞာန် ကုလသမဂ္ဂ ဟီုရ။
ပ္ဍဲကဵုတၚ်လလောၚ်တြး ကုလသမဂ္ဂ ဂကောံဂၠိုက်ဂၠါဲစၟဳတ်စပ်ကဵုဍုၚ်ဗၟာ ဗွဲပလး IIMM ဂိတုမေ ၂၃ ဂှ် အကာဲအရာပကတိ က္တဵုဒှ်ဒၟံၚ် ပ္ဍဲဗလးတိ ပ္ဍဲတွဵုရးရခေၚ်ဂှ် မၚ်ရံၚ်ဒၟံၚ်ကြပ်ပ်တုဲ ကလိလောန်လဝ် အမှုရာဇဝတ်ပၞာန်ဟာ၊ အမှုရာဇဝတ် က္တဵုဒှ်လဝ် လ္တူဂကူမၞိဟ်တံ က္တဵုဒှ်လဝ်ဟာဟီုဂှ် ဂၠိုက်ဂၠါဲဒၟံၚ်ရောၚ် ထ္မံက်ထ္ၜးလဝ်ရ။
ဒပ်ပၞာန်ရခေၚ် အေအေဂှ် ဟီုလဝ် ဒဒှ်ရဗ္တိုက်ဒၟံၚ်ကံၚ်ဇြဳပၞာန် ညံၚ်သ္ဂောံကလိဂွံအခေါၚ်အုပ်ဓုပ်အပိုၚ် သွက်တွဵုရးရခေၚ် မဒှ်သီုဒၞါဲရိုဝ်ဟေန်ဂျာမွဿလေမ် ဗၞတ်တြဴကိုဋ် မံၚ်တန်တဴဒၟံၚ်ဂှ်ရ။
ဒၟါနူကံၚ်ဇြဳပၞာန် လၞိန်ဗပိန်တုဲ ရိုဝ်ဟေန်ဂျာ ဂၠိုၚ်ကဵုလ္ၚီဝွံ သၞာံ ၂၀၁၇ တေံ ဒးဂြိပ်တိတ်အာလဝ် ဍုၚ်ဇိုၚ်ဝုတ်ဒိုဟ် ဍုၚ်ဗေန်ဂလာန်ဒေတ်တုဲ ဒဵုကဵုအခိၚ်လၟုဟ် စောဲလဝ်ဂဗုတ် ပရူဏံ ပ္ဍဲရုၚ်သၞောဝ်ဓဝ်ကုလသမဂ္ဂ နကဵုဂဗုတ်ပြိုက်ဂစိုတ်ဂကူမၞိဟ်ရ။
စံၚ်သ္ၚိဌာန် နူဍုၚ်ဗူတဳဒံၚ်တုဲ ပွပကီုပရာပ် အသိၚ်မသ္ကာတ်ကၠုၚ်ဂှ် မပါလုပ် ပေါဲဗ္တိုက် အကြာအေအေ ကဵု ဒပ်ကံၚ်ဇြဳပၞာန် မသ္ကာတ်မြဟ်ကၠုၚ်ဒၟံၚ်ဂှ် ညးတံ ဂၠိုက်ဂၠါဲစၟဳတ်ဒၟံၚ်ဖိုဟ်ရောၚ် IIMM ဟီုလဝ်ရ။
ဟိုတ်နူပွပကီုပရာပ် မက္တဵုဒှ်ဒၟံၚ် ပ္ဍဲရခေၚ်ဂှ်တုဲ ဗွဲအဓိကမ္ဂး ရိုဝ်ဟေန်ဂျာ ဂၠိုၚ်ကဵုလ္ၚီ ဒးဂြိပ်ဒဴပါဲဒလေတ်လဝ်တုဲ လ္တူညးဍုၚ်ကွာန်ရခေၚ်တံကဵု လ္တူဘာသာဟိန္ဒူ ဂကူမၞိဟ်အောန်တံဂှ်လေဝ် ဒဒှ်ရအရာမဇီုကပိုက်တံ နွံဂှ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။
ဂကောံဍုၚ်သ္အာၚ် ချဳဒရာၚ်ဒၟံၚ် ပရေၚ်ရိုဝ်ဟေန်ဂျာတံဂှ် အေအေ ထဍေၚ်ပ္တိတ်လဝ်တုဲ စံၚ်ယတ်ပၠံၚ်ၜးကေတ်လဝ် သ္ၚိဌာန်တံရောၚ် စောတ်စောဲလဝ်ရ။
ပ္ဍဲတၚ်လလောၚ်တြး အေအေ ဂှ် ဟိုတ်နူပေါဲဗ္တိုက် သ္ကာတ်မြဟ်ကၠုၚ်မာန်ဂှ်ရ သွက်ဂွံဒစးဒုၚ် ပါဲဒလေတ်ကဵုဂှ် ဟီုလဝ် ကုညးဒေသ ဍုၚ်ဗူတဳဒံၚ်တံဂှ်တုဲ ညးပါဲဒလေတ်အာတံဂှ်လေဝ် ဖျေံလဝ်ကဵုဒၞါဲဝါဲ ဒၞါဲညးတံ ထိၚ်ဒက်လဝ်တံဂှ်ရောၚ် ထ္မံက်ထ္ၜးလဝ်ရ။
ဂကောံဂၠိုက်ဂၠါဲစၟဳတ်ကုလသမဂ္ဂဂှ် မ္ၚးနူကဵုတွဵုရးရခေၚ်ဂှ် အမှုရာဇဝတ် က္တဵုဒှ်ဒၟံၚ် အလုံဍုၚ်ဗၟာမွဲဂှ် ပါဲနူကဵုဒပ်ပၞာန်ဗၟာတုဲ အမှုရာဇဝတ် ဂကောံရပ်လွဟ်ဂမၠိုၚ် ကလိလောန်လဝ်တံလေဝ် နွံဒၟံၚ်ရောၚ် ဟီုလဝ်ရ။
SOURCE: TRTWORLD AND AGENCIES