သဵု(လ်) ၊ မေ ၂၉
ပ္ဍဲကဵုဗလးပ္တိုန် ဂြိုဟ်ပ္တောံထံၚ်ပရိုၚ်တၟိ စပ်ကဵုလ္ပာ်ပၞာန်ဂှ် စက်အေန်ဂျေန်ကမ်လှောဝ် ခၞံလဝ်တၟိဂှ် ဗ္တိုဟ်ထ္ကးအာ ပ္ဍဲကျာတုဲ ဒဒှ်ရဟွံအံၚ်ဇၞးလဝ်ဂှ် ကိုဝ်ရဳယျာသၟဝ်ကျာ ဟီုလဝ်ရ။
ဂြိုဟ်ပ္တောံထံၚ်ပရိုၚ်ကၠာတေံမွဲမဂှ် ကိုဝ်ရဳယျာသၟဝ်ကျာ ဗလးပ္တိုန်လဝ် နူဂိတုနဝ်ဝေမ်ဗာတေံ ဗွဲမအံၚ်ဇၞးတုဲ ပ္ဍဲအရာပ္တိတ်ဇြဟတ် သ္ဂောံဗလးပ္တိုန် အလန်ဒုတိယဂှ် မေ ၂၇ ဂှ် ဟွံအံၚ်ဇၞးဒှ်လဝ်ရ။
ကိုဝ်ရဳယျာသၟဝ်ကျာဝွံ သၞာံတုဲကၠုၚ်တေံလေဝ် ပ္တိတ်လဝ်ဇြဟတ် သွက်ဂွံဗလးပ္တိုန် ဂြိုဟ်ပ္တောံတုဲ စဵုကဵုၜါဝါ ဟွံအံၚ်ဇၞး ဒှ်လဝ်ရ။
ပ္ဍဲကဵုဗလးပ္တိုန် ကဆံၚ်ပထမဂှ်ရ စက်အေန်ဂျေန်ကမ်လှောဝ်ဂှ် ဗ္တိုဟ်ထ္ကးအာလဝ် ပ္ဍဲကျာဂှ် လစှ်ေသ္ကိုပ်စၞောန်ပ္ညုၚ် ဌာနကောပ်ကာဲ နဲကွတ်ပညာအကာသကဆံၚ်ကၟိန်ဍုၚ် ကိုဝ်ရဳယျာသၟဝ်ကျာ ဟီုလဝ်ရ။
အတိုၚ်လ္ၚတ်ဂွံလဝ်ကၠာတဲဂှ်မ္ဂး ဒဒှ်ရ ဒှ်ဟိုတ်နူစက်ကမ်လှောဝ် မသုၚ်စောဲဍာ်စၞပၟတ် မခၞံဗဒှ်လဝ်တၟိဂှ် ဂွံတီကေတ်ကီုလေဝ် ဟိုတ်ပရူ ဂွံဒှ်ပြသၞာတၞဟ်ဟ်တံဂှ် လ္ၚတ်အာဏောၚ်ဂှ် ကိုဝ်ရဳယျာသၟဝ်ကျာ ဟီုရ။
ဒဒှ်ရ ကိုဝ်ရဳယျာသၟဝ်ကျာ ဗလးပ္တိုန်ဂြိုဟ်ပ္တောံ ဟွံအံၚ်ဇၞး က္တဵုဒှ်လဝ်ဂှ် သၞာဲဒဴကိုဝ်ရဳယျာသၠုၚ်ကျာကဵု သၞာဲဒဴဂျပါန်တံ ဟီုလဝ် နူကဵုအခိၚ်ပြဟ်ဟ်တေံရ။
ဂြိုဟ်ပ္တောံကိုဝ်ရဳယျာသၟဝ်ကျာဂှ် ဗလးပ္တိုန်လဝ် နကဵုယာန်ကမ်လှောဝ်တုဲ ဂွံပွိုၚ် ၂ မိနေတ်ဂှ် အရာမလီုလာ်အာတံ ဒတုံစှ်ေကၠုၚ် ပ္ဍဲၜဳဂှ် ဂွံဆဵုကေတ်ရောၚ် ဍုၚ်ဂျပါန် ဟီုရ။
ပရေၚ်ဗလးပ္တိုန်ဂြိုဟ်ပ္တောံ ကိုဝ်ရဳယျာသၟဝ်ကျာဂှ် အမေရိကာန် ပ္တိုန်လဝ်ဒုဟ် ဒစဵုဒစးလဝ်တုဲ ဒှ်ပြဝ ဖံက်ပ္ကဝ်ကၠေံ ပရေၚ်ကေတ်အရေဝ်ကၟာတ်လဒဵု ကုလသမဂ္ဂရောၚ် ဟီုဂးလဝ်ရ။
ကိုဝ်ရဳယျာသၟဝ်ကျာဝွံ ပွန်အမေရိကာန်ကဵု ဂြိုဟ်ပ္တောံ ဗလးပ္တိုန်လဝ် ဂိတုနဝ်ဝေမ်ဗာတေံဂှ် ဂွံတက်လဝ်ဗီုဓာတ်ရောၚ် ဟီုလဝ်ကီုလေဝ် ထ္မံက်ထ္ၜးလဝ် ဗီုဓာတ်တံဏံဂှ် ဟွံမွဲဏီရ။
Ref: Reuters