သေတ်ဒိုဲ၊ သေပ်တေမ်ဗာ (၁၉)
ပ္ဍဲပရေၚ်ဍုၚ်ကွာန် ပရေၚ်ပၞာန် ဒကဴနာနာသာ် ဒပ်ကံၚ်ဇြဳပၞာန် မကျဟောံဒၟံၚ်တုဲ ဍောၚ်ၜိုတ်အိုတ်ဓတ် ခတုက်ခတဝ်ဒၟံၚ်ဂှ်ဝွံ သၠဲပ္တိုန်ဇြဟတ်ပၞာန် မွဲဒမြိပ်ပယျဵုဒၞက်ကၟိန်ဍုၚ်ဂှ်တုဲ စကာက္ၜၚ်ကျာဂျက်ဗ္တိုက်တံ၊ လွဟ်လက်နက်ဇၞော်တံတုဲ ဟွံချပ်စၚ်ခြၚ် ပန်ပှော်ဒၟံၚ် ကြာန်န်တံ ကၠောန်ၜိုတ်ဒၟံၚ်ဂှ် ဒပ်ပၞာန်ရခေၚ် (AA) လလောၚ်ပ္တိတ်လဝ်ရ။
ဟိုတ်နူကံၚ်ဇြဳပၞာန် ဟွံချပ်စၚ်ခြၚ် ပန်ပှော်ဒၟံၚ်ကြာန်န်တံဂှ်တုဲ ညးဍုၚ်ကွာန်နူကၟိန်ဍုၚ်ဗၟာတံ ဗွဲတၟေၚ် ညးမမံၚ်စံၚ်ဒၟံၚ် ပ္ဍဲဒေသပယျဵုတံ ဒှ်ဒၟံၚ်ဒဒိုက်အိုတ်ယျဂှ် သ္ဂးလဝ်ရ။
တုဲကၠုၚ် သၞာံတုဲတုဲတေံဂှ်လေဝ် ဒပ်ကံၚ်ဇြဳပၞာန်ဝွံ ပ္ဍဲဒေသပယျဵု ရခေၚ်−ဗေန်ဂလာဒေတ်ဂှ် ပွမဝးပ္ကဝ်ကၠေံ အခေါၚ်အရာမၞိဟ်တံ အမှုရာဇဝတ်ပၞာန် မလုတ်လောန်ကၠေံ လ္တူဂကူမၞိဟ်တံ ပရေံပရေံ လုတ်လောန်လဝ်နွံဂှ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။
ကံၚ်ဇြဳပၞာန်ဂှ် ပွမဗ္တိုက်စွံပွန် ကုဂကူမွဿလေမ် မဒှ်ဒၟံၚ်ဒဒိုက်တံဂှ် ကၠောန်သ္ပဒၟံၚ်တုဲ ပြဝဍေံတံ မလုတ်လောန်လဝ်တံဂှ် ပဒုဟ်ညးတၞဟ်ဟ်တံတုဲ တြးဒၟံၚ်ဝါဒ ကၠောန်ၜိုတ်ဒၟံၚ်ဂှ် ဂွံတီကေတ်ရ။
ပြဝကံၚ်ဇြဳပၞာန် စွံပွန်လ္ပာ်အရာပ်တံတုဲ ဟွံချပ်စၚ်ခြၚ် ပန်ပှော်ဒၟံၚ် လွဟ်လက်နက်ဇၞော်တံ ကြာန်န်ဂှ် ဗျိပၠုတ် ဒစဵုဒစး ဗွဲမသ္ကာတ်မြဟ်တုဲ ဒၟါနူပွပန်ပှော်ဗ္တိုက် ဓဇန်ဓဇန် ဟွံမွဲကဵု ဓဝ်ဆာန်ဍူတံဂှ် စိုတ်ဟွံခိုဟ်က္တဵုဒှ် သွက်ညးမဒးပြဟ်လလုဲဇီုကပိုက်အာလဝ်တံရောၚ် ထ္မံက်ထ္ၜးလဝ် ပ္ဍဲတၚ်လလောၚ်တြး ဒပ်ပၞာန်ရခေၚ်ဂှ်ရ။
တုဲကၠုၚ် ပ္ဍဲဂိတုသေပ်တေမ်ဗာ (၁၆) တေံ မကမ်လွဟ်လက်နက်ဇၞော် ဒပ်ကံၚ်ဇြဳပၞာန် မပန်ပှော်ဏာဂှ်ဝွံ ဒတုံဗ္တိုဟ်လဝ် ပ္ဍဲဒေသခံၚ်တုၚ် (ခေါၚ်းတုံး) ခရိုၚ်ဗေန်ဒရိုဝ်ဗေန် ဍုၚ်ဗေန်ဂလာဒေတ်တုဲ ညးသၟတ်မၞုံယၟု MD Iqbal အာယုက် (၁၇) သၞာံမွဲတၠ ချိုတ်အာတုဲ (၅) တၠပၠန်ဂှ် ဂွံလဝ်ဘဲဝပ် သ္ကာတ်တ်မြဟ်ဟ်တုဲ ဒးဒှ်စိုတ်ဟွံခိုဟ်အောန်စိုတ်ဂှ် ဟီုဂးလဝ်ရ။
သ္အာၚ်နူဂှ်ပၠန် ပ္ဍဲဂိတုသေပ်တေမ်ဗာ (၁၆) လဒေါဝ်တ္ၚဲဂှ်လေဝ် ဒၟါနူကံၚ်ဇြဳပၞာန် ပန်ပှော်လဝ် ကဵုက္ၜၚ်ကျာသၞေၚ်ဝဲ ကုဘာတန်မူလ ကွာန် (လက်ယက်ကုန်း) ပွိုၚ်ဍုၚ်ဒဳပေဝ်ယေန်ဂှ်ရ ကွးဘာတန်မူလ (၆) တၠ ချိုတ်အာလဝ်တုဲ ကောန်ၚာ်သၟတ် ဗဒါဲ (၂၀) တၠ ဇီုကပိုက်ဂွံလဝ်ဝပ်ရ။
ပရိုၚ်−သြၚ်လောန်တိုၚ်(မ်)
sanlontai