တိုဝ်ကျိုဝ်၊ အဝ်ဂါတ် ၃၁
ပ္ဍဲဍုၚ်ဂျပါန် ပ္ဍဲဂိတုအဝ်ဂါတ် ၃၀ တေံ လဗိုတ်ကျာတိုၚ်ဝှောန် ယှာန်န် လုပ်စိုပ်ပိုက်လဝ် သိုက်က်တုဲ အခိၚ်မၞိဟ်ဒးချိုတ်အာ နွံကၠုၚ် စဵုကဵု ၅ တၠဂှ် မၞိဟ်ဂၠိုၚ်ကဵုပြကောဋိကိုဋ်ဂှ် ကဵုဆုဲပြံၚ်လဝ် ဒၞါဲဗၠးဘဲရ။
ဟိုတ်နူလဗိုတ်ကျာ ဇြဟတ်သ္ကာတ်ဏံတုဲ ဗြဲဇၞော်ဂူလဝ်တုဲ ဒးဆေၚ်ဒၟံၚ်မုက်ကဵု ပြသၞာပရေၚ်ပလံၚ်ဗစိုပ်တံရ။
လဗိုတ်ကျာဂှ်ဝွံ ပ္ဍဲဂိတုအဝ်ဂါတ် ၂၉ အခိၚ်ဒေသ ပယျာံဂယး ၈ နာဍဳဂှ် စလုပ်စိုပ်ပိုက်လဝ် တ္ကအ်ကျူယှူရ။
လဗိုတ်ကျာယှာန်ယှာန် မလုပ်စိုပ်ပိုက်လဝ်ဂျပါန် အပ္ဍဲပွိုၚ်ကဵုစှော်သၞာံဏံ ဇြဟတ်သ္ကာတ်အိုတ်ဂှ်ဝွံ ပ္ဍဲဂိတုအဝ်ဂါတ် ၃၀ အခိၚ်နူဂယးဂှ် ဇြဟတ်ဍိုန်အာညိကီုလေဝ် ဒမြိပ်ကျာပိုက်ဂှ်တှ်ေ မွဲနာဍဳ ၁၂၆ ကဳလောမဳတာ နွံဒၟံၚ်ဖိုဟ်ရ။
ကၠာလဗိုတ်ကျာဟွံဂွံလုပ် တ္ကအ်ကျူယှူ ပ္ဍဲဂိတုအဝ်ဂါတ် ၂၇ ဂှ် ဗြဲဇၞော်ဂူလဝ်တုဲ ဒေသအဳချဳ တိလာ်တုဲ ဂြောဝ်ဂတာပိတၠ ချိုတ်အာလဝ်ရ။
ပ္ဍဲတ္ကအ်ကျူယှူ မၞိဟ်တြုံမွဲတၠ အာကၠုၚ်ဒၟံၚ်ကဵုဂၠုၚ်ဍောတ်တ်မွဲမ ချိုတ်အာလဝ်တုဲ ပ္ဍဲဒေသတိုဝ်ကူယှဳမာဂှ် သ္ၚိၜါထပ်မွဲမ သရိုဟ်အာညိညတုဲ မၞိဟ်ချိုတ်အာလဝ် မွဲတၠပၠန်ရ။
ဂိတုအဝ်ဂါတ် ၂၉ အခိၚ်လဗိုတ်ကျာ လုပ်ကၠုၚ် တ္ကအ်ကျူယှူဂှ် ဒမြိပ်ကျာပိုက် မွဲနာဍဳ ၂၅၂ ကဳလောမဳတာ နွံတုဲ ကၟဳစမြိုၚ်ဂမၠိုၚ် ကလှ်သၠာ်တိတ်အာတုဲ ဒ္ၚေါဝ်ဗ္တၚ်တံလေဝ် ထ္ကးအာလဝ်ရ။
မၞိဟ်ကလိဂွံဝပ် ၉၀ ပြၚ်နွံတုဲ ဗွဲမဂၠိုၚ်ဂှ်တှ်ေ ဒးကဝေက်ဒ္ၚေါဝ်တုဲ ဒဒှ်ရကလိဂွံလဝ်ဝပ်ဂှ် ဂွံတီကေတ်ရ။
သၞာဲဒဴဂမၠိုၚ် ကဵုလဝ်သတိ သွက်ဂွံကၠောန်သ္ပ အစဳဇန်ဂွံဗၠးဘဲ စဵုကဵုဍုၚ်နဳနဝ်မဳယျာ ဗ္ဒါဲဍုၚ်တိုဝ်ကျိုဝ်ဂှ်တုဲ ဍာ်ၜဳမၞုံအပ္ဍဲဒေသတံ ဟးဒၟံၚ်ရ။
တ္ကအ်ကျူယှူ ဒေသလ္ၚဵုတံဂှ် ဂိတုအဝ်ဂါတ်ဏံ ဗ္ၜတ်ဗြဲဂူလဝ် ဂၠိုၚ်တုဲ အပ္ဍဲပွိုၚ် ၄၈ နာဍဳဂှ် ဂူလဝ် ၇၉၁ ဒဿမ ၅ မဳလဳမဳတာဂှ် ဌာန်စမ်ၜတ်အကာဲအရာဗြဲကျာဂျပါန် ဟီုရ။
ပရေၚ်ရေၚ်တၠုၚ် ကွဳပၟတ်မကမ် ပ္ဍဲတ္ကအ်ကျူယှူဂှ် ဒေါအ်ဒေၚ်လဝ်ဖိုဟ်တုဲ ဂၠံၚ်ဇၞော်အဓိက အကြာတိုဝ်ကျိုဝ်ကဵု အိုဝ်သာကာဂှ်လေဝ် ကၟာတ်လဝ်ရ။
လၟေၚ်တရဴကျာ စဳဇန်လဝ် သွက်ဂိတုအဝ်ဂါတ် ၃၀ (၆၀၀) ပြၚ်ဂှ် ဒဒှ်ရပလီုထောံလဝ်ဂှ် လာၚ်တရဴကျာဂျပါန် လလောၚ်တြးလဝ်ရ။
သွက်လၟိဟ်မၞိဟ် ၅ ပြကောဋိကိုဋ်ဂှ် အလဵုအသဳဂျပါန် လလောၚ်ပ္တိတ်လဝ် တၚ်ကဵုသတိကဆံၚ်သၠုၚ်အိုတ်တုဲ သ္ၚိဂၠိုၚ်ကဵုလ္ၚီ ပၟတ်ဓာတ်လလဳ ပိုတ်ဒၟံၚ်ရ။
Ref: AFP