သဵု(လ်) ၊ ဒဳဇြေမ်ဗာ ၈
သမ္မတကိုဝ်ရဳယျာသၠုၚ်ကျာ ယောန်သက်ယော ပ္ဍဲသတ္တာဟတုဲကၠုၚ်တေံ ဟိုတ်နူလလောၚ်တြးလဝ် သၞောတ်အုပ်ဓုပ်ပၞာန် ကာမံက်တိုန်ဂှ်တုဲ နဒဒှ်ဒုၚ်ဂုန်ဂှ် နကဵုညး ဟွံထပ်ပ္တိတ်အမိၚ်သာ်ဏံရပုဟ်ဂှ် ဟီုကၠုၚ်လဝ်ရ။
ပ္ဍဲဂိတုဒဳဇြေမ်ဗာ ၃ တေံ ကြဴနူတၚ်လလောၚ်တြး သၞောဝ်ပရေၚ်အုပ်ဓုပ်ပၞာန် တိတ်ကၠုၚ်တုဲဂှ် အမာတ်ကၠတ်ထဝ်ကိုဝ်ရဳယျာသၠုၚ်ကျာတံ ကော်ကေတ်ကောံဓရီုကၠတ်ထဝ်ကောန်ဂကူတုဲ တာဒၞါလဝ် တၚ်လလောၚ်တြးသမ္မတဂှ်ရ။
က္ဍိုပ်သ္ကိုပ်ဗော်ဒြဟတ်ညးဍုၚ်ကွာန် PPP မဂွံလဝ်အဝဵုဂှ် နကဵုသမ္မတ ဂွံယိုက်ဂၠေၚ်အာတာလျိုၚ်သ္ဇိုၚ်တံရဂှ် ဒှ်ဟွံမာန်ရတုဲ ထေက်ကဵုဒးနုက်တိတ် နူကဵုကဆံၚ်ဌာနန္တရညးဂှ် ဟီုလဝ်ရ။
ယဝ်ရဆက်ကေတ်အာ ကဆံၚ်ဌာနန္တရသမ္မတလၟုဟ်ဂှ်မ္ဂး ညးဍုၚ်ကွာန်ကိုဝ်ရဳယျာသၠုၚ်ကျာတံ အန္တရာယ်နွံကၠုၚ်မာန်ဂှ် က္ဍိုပ်သ္ကိုပ်ဗော်ဂွံအဝဵုဂှ် ဟီုလဝ်ရ။
သွက်ဂွံစောဲစပ်ပ္တိုန်ဒုဟ် သမ္မတယောန်သက်ယောဂှ် ဂကောံဇြဟတ်ဒစဵုဒစးဂမၠိုၚ် ပ္တိတ်ဒၟံၚ်ဇြဟတ်တုဲ နကဵုညး ခြာဟွံလအ် ဒးသၠးကၠေံကဆံၚ်ဌာနန္တရညးမာန် ဒှ်ဒၟံၚ်ရ။
သမ္မတယောန်ဂှ်တှ်ေ ဒဒှ်ရစိုတ်ဟွံခိုဟ် ဗွဲမလောန်ဂှ်ကီု၊ ဒဒှ်ရဒုၚ်ဂုဏ်ညးဍုၚ်ကွာန်တံ ဗွဲမယျေလ္ဂူဂှ် ဟီုလဝ်ဂလာန် မဗလးပ္တိတ်လဝ် နူကဵုလာၚ်ရုပ်ရမျာၚ်တံဂှ်တုဲ နကဵုညး ဂွံနုက်တိတ်နူကဆံၚ်ဌာနန္တရညး ဟွံမွဲဏီပုဟ်ဂှ် ညးလ္ၚတ်ဂမၠိုၚ် သ္ၚဳဂၠိပ်လဝ်ရ။
ယဝ်ရပ္တိတ်သမ္မတမ္ဂး အပ္ဍဲကၠတ်ထဝ် ပၞောဝ်ကဵုဒၞါဲအမာတ် ၃၀၀ ဂှ် ပိဂအုံၜါဂအုံဂှ်တှ်ေ ဒးထံက်ဂလာန်ဏောၚ်ဂှ်ရ နူကဵုဗော်ညး ဗော်ဂွံအဝဵုဂှ် အမာတ်ကၠတ်ထဝ် အောန်အိုတ် ၈ တၠ ဒးထံက်ဂလာန်ဏောၚ် မဒှ်ရ။
ဟိုတ်နူတၚ်လလောၚ်တြးသမ္မတ ပရေၚ်အုပ်ဓုပ်ပၞာန်ဂှ်တုဲ မ္ၚးနူကဵုသၟာပရေၚ်ဍုၚ်ကွာန််တံဂှ် ညးဍုၚ်ကွာန်ကောန်အရာပ်တံလေဝ် ဒေါသဒးတိတ်လဝ်အိုတ်ဂှ် ထ္မံက်ထ္ၜးလဝ် ပ္ဍဲပရိုၚ်အပ္ဍဲဍုၚ်ရ။
သမ္မတဝွံ ကၠာဟွံဂွံလလောၚ်တြး ပရေၚ်အုပ်ဓုပ်ပၞာန်သာ်ဏံဂှ် ဒးဆေၚ်လဝ်မုက်ကဵု တၚ်စောဲစပ်ဒ္ဂေတ်လီုစလာပ်၊ ပရေၚ်ကရေပ်ဓရတ် နူကဵုကၠတ်ထဝ် သၟဝ်သ္ကိုပ်သ္ကလ္ပာ်ဂကောံဒစဵုဒစး ကေုာံ မၞိဟ်ဒးဂၞပ်ညး အောန်စှ်ေကၠုၚ်တံဂှ်ရ။
Ref: BBC