လာန်ဒါန်၊ ဒဳဇြေမ်ဗာ ၇
ကြဴနူပေါဲပၞာန် စကၠုၚ်သၞာံတုဲတေံတုဲဂှ် အေဿရေ ကလိလောန်ဒၟံၚ် ပရေၚ်ဂစိုတ်ကမၠက်ဂကူမၞိဟ်တံ ပ္ဍဲအေဿရဂှ်ေ ဂကောံအခေါၚ်ဗလးနူဒုဟ်ဒဏ် ဍုၚ်နာနာ Amnesty International စောဲစပ်လဝ်တုဲ လိက်ဒုၚ်စဳရေၚ်တၟိဂှ်ဝွံ ဒှ်အရာသ္ဂောံမ္ၚုဟ်က္တဵုတိုန်ညးဂၠးတံဂှ်ဏောၚ်ဂှ် ဟီုလဝ်ရ။
တၚ်လလောၚ်တြး အလဵုအသဳအေဿရေ ကေုာံ သၞာဲဒဴစပ်ကဵုလ္ပာ်ပၞာန်တံ မလလောၚ်ပ္တိတ်လဝ် ဟွံမွဲကဵုပရေၚ်ဗ္စာရဏာမၞိဟ်သၟးဟွံက သီုကဵုသဘဴဂစိုတ်ကမၠက်လဝ်ဂကူမၞိဟ်တံ မပါလုပ်ဒၟံၚ်ဂှ်ကီု၊ ညးဒေသဂါဇြာတံ ပလံၚ်ဗစိုပ်ပရိုၚ်နူသၟဝ်တိတံဂှ်ကီု၊ စှ်ေလ္ၚတ်လဝ်ဗလးတိဂှ်ကီု ကေုာံ ဒုၚ်သ္ဇိုၚ်ကဵု ဗၞတ်ဗ္ၜတ်မဒးလီုလာ်ဆောံလေၚ်အာလဝ် မထ္ၜးပျးလဝ် ပ္ဍဲဗီုရုပ်ဂြိုဟ်ပ္တောံတံဂှ်တုဲ ဒုၚ်လဝ်စဳရေၚ်ဂှ် ဂကောံအခေါၚ်အရာမၞိဟ် ဖျေံသ္ဇိုၚ်ဍုၚ်လာန်ဒါန်ဂှ် ဟီုလဝ်ရ။
လိက်ဒုၚ်စဳရေၚ်ဂှ်ဝွံ ကၠောန်ပကေတ်တုဲ ဒှ်လိက်ဒုၚ်စဳရေၚ်လီဠာန် မဒုၚ်လဝ်သ္ဇိုၚ် လ္တူတၚ်နၚ်မဗၠေတ်မှာတံဂှ်ဂးတုဲ အေဿရေ ခၠေဝ်ပလန်လဝ် သီုကဵုဒေါသရ။
ဂကောံ AI ဂကောံပါ် နွံဒၟံၚ်ပ္ဍဲအေဿရဂှ်ေတှ်ေ ပ္ဍဲအရာချူခၞံလိက်ဒုၚ်စဳရေၚ်ဏံဂှ် ဟွံပါလုပ်လဝ်တုဲ တၚ်စောဲစပ်ဂစိုတ်ကမၠက်ဂကူမၞိဟ်ဂှ် ဟွံဒုၚ်တဲ သ္ဂးရ။
အေဿရေ ဆက်ဆောံဒၟံၚ် ကုကောန်ဍုၚ်ပါလက်သတိုၚ်တံ ညံၚ်ရဴညးဟွံထေက်တန်ကဵု သိက္ခာမၞိဟ် အခေါၚ်အရာမၞိဟ်ဂှ်တုဲ တၚ်ရန်တၟံ မိက်ဂွံပလီုပလာ်ကၠေံ မဆေၚ်စပ်ကဵုရုပ်တံဂှ်လေဝ် ဂွံဆဵုကေတ်ဂှ် ဇၞော်သ္ကိုပ်ဂကောံ Amnesty International သ္ဂးရ။
ပရေၚ်ဂစိုတ်ကမၠက်ဂကူမၞိဟ် အေဿရေ မကလိလောန်ဒၟံၚ်ဂှ် စိုပ်အခိၚ်ဒးတာဒၞါယျဂှ် ညးဟီုလဝ်ရ။
ဟိုတ်နူပရေၚ်ဗ္တိုက် နူကဵုအေဿရေတံဂှ်တုဲ ပ္ဍဲဂါဇြာ အပံၚ်မၞိဟ်ဒးချိုတ်အာဂှ် ဗ္ဒါဲ ၄၅၀၀၀ နွံတုဲ မၞိဟ်ဒးဂြိပ်ပါဲဒလေတ်ဒၟံၚ် နွံဒၟံၚ်ဗွဲမဂၠိုၚ်ဂၠေၚ်တုဲ ဒးဆေၚ်ဒၟံၚ်မုက်ကဵုပြဒ္ဒညာနာနာသာ် မပ္တံကဵုပြဒ္ဒညာပရေၚ်ထတ်ယုက် ကေုာံ ဇွောံမစၞစတံဂှ်ရ။
Ref: AFP