ဝါယှေန်တာန်၊ ဒဳဇြေမ်ဗာ ၁၄
ကၠာဒဝ်နေဝ်ထြာပ် မဂွံဇၞးလဝ်ပေါဲရုဲမာဲသမ္မတ ဟွံဂွံစိုပ်သ္ၚိဗုဏီ အခိၚ်ဂ္စါန်ဗပေၚ်ဒၟံၚ်ဇြဟတ် ကုဒပ်ပၞာန်ကိဗ်ဂှ် အလဵုအသဳအမေရိကာန် လလောၚ်တြးကၠုၚ် ပ္ဍဲဂိတုဒဳဇြေမ်ဗာ ၁၃ တေံ အစဳဇန်မသ္ဂောံထပ်ကဵုအာ အရီုဗၚ်ပရေၚ်ပၞာန် ၚုဟ်မးမၞုံ ၅၀၀ ပြကောဋိကိုဋ်ဒဝ်ဠာ သွက်ယူကရုၚ်ဂှ်ရ။
သွက်ဒပ်ပၞာန်ယူကရုၚ် မဒးတာဒၞါစဵုဒၞါဒၟံၚ် ပရေၚ်ဗ္တိုက်နူရုယျာတံဂှ် ဒဒှ်ရညးတံ ထပ်ပလံၚ်ဗစိုပ်ကဵုအာ လွဟ်လက်နက်နွံပၟိက် ဇၞော်ကဵုပၟိက်တံဂှ်ပၠန်ဏောၚ်ဂှ် ဝန်ဇၞော်ကာဍုၚ်သ္အာၚ် အမေရိကာန် အာန်တိုဝ်နဳ ဗလေန်ကာန် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။
ပ္ဍဲပေါဲရုဲမာဲဂိတုနဝ်ဝေမ်ဗာဂှ် ထြာပ် ဂွံဇၞးလဝ်တုဲ စပ်ကဵုပရေၚ်ပလံၚ်ဗစိုပ် အရီုဗၚ်အမေရိကာန် သွက်ယူကရုၚ်ဂှ် သံသယနွံကၠုၚ်လဝ်တုဲ အရီုဗၚ်သ္ပဒတန်လဝ်တုဲတုဲတံဂှ် ဂိတုဂတဏံ ကၠာညးဟွံဂွံယဵုဒုၚ်သစ္စာဂှ် သွက်ဂွံကဵုအာမာန်ဂှ် ပၠံၚ်အခိၚ်တုဲ ဒးရေၚ်တၠုၚ်ဒၟံၚ်ရ။
ကြဴနူရုယှာ ၜက်ၜေတ်ဗ္တိုက်ကၠုၚ်တုဲဂှ် အမေရိကာန် ရီုဗၚ်ကဵုလဝ် ဗွဲမခိုၚ်ဗိုန်ကီုလေဝ် ထြာပ်ဂှ်တှ်ေ ဖအောန်ဖျေံအာ အရီုဗၚ်သွက်ယူကရုၚ်တံမာန်ဂှ် ဟီုလဝ်ရ။
ပ္ဍဲကဵုလွဟ်လက်နက် အမေရိကာန် မပလံၚ်ဗစိုပ်ကဵုအာ သွက်ယူကရုၚ်တံဂှ် စၚ်ပန်ကမ်လှောဝ် HIMARS ၊ မကမ်လွဟ်ဇၞော်ဂမၠိုၚ်၊ ဒရုၚ်ဂမၠိုၚ်၊ ကပေါတ်ကိရိယာ မစဵုဒၞါကဵု နူဘဲအန္တရာယ် ပရေၚ်ဗ္တိုက် နကဵုလွဟ်နျူကလဳယျာ၊ ပရေၚ်ဗ္တိုက် နကဵုလွဟ်ဓာတုတံ ဒဒှ်ရပါလုပ်ဂှ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။
အမေရိကာန်ဂှ်တှ်ေ သွက်ယူကရုၚ်ဂှ် ကဵုအာအရီုဗၚ်ပရေၚ်ပၞာန် ၇၂၅ ပြကောဋိကိုဋ်ဒဝ်ဠာ ကေုာံ ၉၈၈ ပြကောဋိကိုဋ်ဒဝ်ဠာဏောၚ်ဂှ် ပ္ဍဲဂိတုဏံမံက်တေံ လလောၚ်တြးလဝ် ၜါဝါတုဲဂှ် တၚ်လလောၚ်တြးသာ်ဏံ မံက်တိတ်ကၠုၚ်လဝ်ရ။
ဒဝ်နေဝ်ထြာပ် ပါ်ပါဲလဝ် ပရေၚ်အမေရိကာန် မကဵုဒၟံၚ်အရီုဗၚ်ပရေၚ်ပၞာန် ကုယူကရုၚ်ဂှ်တုဲ နကဵုညး ညံၚ်ပရေၚ်ပန်ပှော်တံ ဂွံတုဲဒှ်အာ အပ္ဍဲပွိုၚ်မွဲၜါနာဍဳဂှ် ရေၚ်တၠုၚ်မာန်ရောၚ် မဟီုကြီုလဝ်ဂှ် ကၠာညးဟွံဂွံစိုပ်သ္ၚိဗုဏီ အလဵုအသဳအမေရိကာန်လၟုဟ် ရေၚ်တၠုၚ်ကဵုဒၟံၚ် သွက်ဂွံဂွံအရီုဗၚ်သွက်ကိဗ် ၜိုတ်သ္ပမာန်ဂှ်ရ။
သမ္မတဂျဵုဗိုၚ်ဒေန်လၟုဟ်ဂှ်တှ်ေ စဵုကဵုအာယုက်အလဵုအသဳညးတံ အိုတ်အာဂှ် ရီုဗၚ်ကဵုအာ ယူကရုၚ်ဏောၚ်ဂှ် ဟီုလဝ်ရ။
ယဝ်ရဟွံဂွံ အရီုဗၚ်အမေရိကာန်တံရပုဟ်ဟီုမ္ဂး နကဵုယူကရုၚ် ဒုၚ်ဒဝ်အာ ပရေၚ်ဗ္တိုက်ရုယှာတံမာန်ညိဟာဟီုဂှ် ဆေၚ်စပ်ကဵုပရေၚ်ဏံတုဲ ပ္ဍဲယူကရုၚ်၊ ပ္ဍဲဥရဝ်ပတံဂှ် ပရေၚ်ဒှ်ဓဝိၚ်တံ သၠုၚ်တိုန်ဒၟံၚ်ရ။
Ref: AFP