ဝါယှေန်တာန်၊ ဒဳဇြေမ်ဗာ ၁၅
စိုပ်လက်ထက်ဒဝ်နေဝ်ထြာပ်တေံမှ သ္ဂုတ်သွာတ်ထေက် စပ်ကဵုပရူအကြာရဳပါပလေတ်ကာန်တံ မဒစဵုဒစးဒၟံၚ်ဂှ် အလဵုအသဳအမေရိကာန်ဝွံ ပ္ဍဲဂိတုဒဳဇြေမ်ဗာ ၁၃ ဂှ် ဒဒှ်ရထ္ပက်လဝ်စၟတ်တဲ တၚ်တုပ်စိုတ်ပရေၚ်ပံၚ်တောဲရေၚ်တၠုၚ်ပညာသိပ္ပံ ကုကြုက်ဂှ် ဌာနဝန်ဇၞော်ကာဍုၚ်သ္အာၚ် လလောၚ်ပ္တိတ်လဝ်ပရိုၚ်ရ။
ပ္ဍဲတၚ်တုပ်စိုတ်ဏံဂှ် ပရေၚ်စဵုဒၞါဇြဟတ်ခိုဟ် စပ်ကဵုဂီုကၠီုကောန်ဂကူတံ ပါလုပ်လဝ်တုဲဂှ် ဌာနဝန်ဇၞော်ကာဍုၚ်သ္အာၚ်အမေရိကာန် ဟီုတဴရ။
တၚ်နၚ်နူဍုၚ်ကြုက် မရပ်စပ်စကာဂွံ သွက်သွာၚ်သ္ဂောံမၚ်ကျောဝ် တဳချဳ၊ ရာသဳဥတု ကေုာံ ယဲဇွဟ်တံဂှ် အခေါၚ်အမေရိကာန် ဂွံရပ်စပ်စကာဂှ်ကီု၊ အကြာအေဂျေန်ဇြဳရေၚ်သ္ကအ် လှာဲဂတးတုဲ ဂွံခၞံဗဒှ်အာ သ္ဇိုၚ်မူတံဂှ်ကီု၊ ပ္ဍဲသွာၚ်စပ်ကဵုပညာသိပ္ပံ ဗွဲမဂၠိုၚ် သွက်ဂွံပံၚ်တောဲရေၚ်တၠုၚ်အာဂှ် ၜါဍုၚ် ထ္ပက်လဝ်စၟတ်တဲရ။
တၚ်တုပ်စိုတ်ဏံ မဂယိုၚ်ပ္တိုန် ဆက်ကၠုၚ်လဝ်အာယုက် မသုန်သၞာံမွဲအလန် နူသၞာံ ၁၉၇၉ တေံဂှ်ဝွံ ပ္ဍဲသၞာံဏံ ဟွံဂွံဆက်လဝ်အာယုက်ဂှ်ဝွံ ဒှ်ဒၟါနူပရေၚ်ဒှ်ဓဝိၚ် စပ်ကဵုကြုက် မဖံက်ပၠန်ကၠုၚ် သၞောဝ်ပိုၚ်ပြဳစပ်ကဵုကပေါတ်ဉာဏတံ မွဲဏှမွဲဏှရ။
ညးလ္ၚတ်ကောန်ဍုၚ်အမေရိကာန် မထံက်ဂလာန် ပရေၚ်ဆက်အာယုက်တၚ်တုပ်စိုတ်တံဂှ်လေဝ် ဒဒှ်ရနွံပၟိက် သွက်ဂွံမၚ်မွဲထိၚ်ဒဝ်အာ ပရေၚ်အမေရိကာန်ခၞံဗဒှ် မကဵုအာကြုက်တံဂှ် ထံက်ထ္ၜးလဝ်ရ။
ကၠာဒဝ်နေဝ်ထြာပ် ဟွံဂွံယဵုသစ္စာ ပ္ဍဲဂိတုဂျာန္နဝါရဳ ၂၀ တေံဏီ ၜိုတ်ပိပန်သတ္တာဟဂှ် တၚ်တုပ်စိုတ်တၟိ မထ္ပက်လဝ်စၟတ်တဲဂှ်ဝွံ ခိုဟ်နူကဵု တၚ်တုပ်စိုတ်ကၠာတေံဏီဂှ် အလဵုအသဳဗိုၚ်ဒေန် ဟီုလဝ်ရ။
နကဵုညးတံ ဒတုဲမြမောဝ်ပရေၚ်ဂီုကၠီုကောန်ဂကူ အမေရိကာန်တံဂှ် စုတ်လဝ်အာရီုလၟိုန်တုဲ ပ္ညဳပ္ညပ်သဳကၠဳလဝ်ရောၚ် ဌာနဝန်ဇၞော်ကာဍုၚ်သ္အာၚ် သၞာဲဒဴကဆံၚ်သၠုၚ်မွဲတၠ ဟီုလဝ်ရ။
အရာမရေၚ်တၠုၚ်ဒၟံၚ်ဂမၠိုၚ် သွက်ပရေၚ်တၚ်တုပ်စိုတ်ဏံဂှ် သွက်ဂွံဒေါအ်ဒေၚ်ကဵုလွာဲဂှ်ဂှ် ရဳပါပလေတ်ကာန်တံ ဟီုလဝ်တုဲ ဒစဵုဒစးကၠုၚ်လဝ် စဵုကဵုဗ္တံ ဂိတုဒဳဇြေမ်ဗာ ၁၂ ဂှ်ရ။
အခိၚ်ကာလအာယုက်အလဵုအသဳကြပ်အိုတ်ဏံ ဒဒှ်မထ္ပက်ကၠုၚ်စၟတ်တဲ တၚ်တုပ်စိုတ်တၟိမွဲသာ်ဏံဂှ်ဝွံ ညံၚ်ညးရပ်ဒက်ထောံ တဲအလဵုအသဳ မတိုန်ကၠုၚ်လက္ကရဴတံဂှ်ဏောၚ်တုဲ ညံၚ်နုက်တိတ်နူတၚ်တုပ်စိုတ်ဏံဟွံဂွံ ဟွံသေၚ်မ္ဂး ညံၚ်ဂွံဂွံတၚ်တုပ်စိုတ်ခိုဟ်နူဏံမွဲ ညံၚ်ပ္ညဳပ္ညပ်ဟွံဂွံဂှ် ကၠောန်ၜိုတ်လဝ်ရောၚ် ရဳပါပလေတ်ကာန်တံ ဟီုလဝ်ရ။
Ref; Reuters