မဝ်သဂိုဝ်၊ ဂျောန် ၂၇
ရုၚ်သၞောဝ်ဓဝ်ရာဇဝတ်ဂၠးတိ ICC ပတိတ်လဝ်ဝါရာန်ရပ် ကုသမ္မတရုယှာ ဗလာဒဳမာပူတေန်ဂှ်တုဲ နကဵုညး ဟွံတိုန်စိုပ် ကောံဓရီု BRICS မကၠောန်ဗဒှ်အာ ပ္ဍဲဗရာဇြဳ ပ္ဍဲသတ္တာဟဂတဏံဂှ် သၞာဲဒဴ မူဝါဒကာဍုၚ်သ္အာၚ် နန်ကရေမ္မလေန် ယူရဳ ချာကပ် ဟီုလဝ်ရ။
ရုယှာ စသၠိုၚ်လုပ်ၜက်ၜေတ်ယူကရုၚ် နကဵုဒြဟတ်ပေၚ်ၚ်တုဲ ဂွံမွဲသၞာံ ပ္ဍဲသၞာံ ၂၀၂၃ ဂှ် ICC စောဲစပ်လဝ် ပူတေန် ဒဒှ်ရကလိလောန်လဝ်ရာဇဝတ်ပၞာန် သ္ပဟိုတ်နူပြဝပလံၚ်ပတိတ်ဏာလဝ်ကောန်ၚာ်ယူကရုၚ်ဂၠိုၚ်ကဵုကၠံ ဆန္ဒညးတအ်ဟွံပါဂှ်တုဲ ပတိတ်လဝ်လိက်ဝရာန်ရ။
တၚ်စောဲစပ် မကလိလောန်လဝ်ရာဇဝတ်ပၞာန်ဂှ် ရုယှာ တးပါဲထောံလဝ်တုဲ နန်ကရေမ္မလေန် ဟိုတ်နူဟွံထ္ပက်လဝ်လိက်တၚ်တုပ်စိုတ် ICC တုဲ လိက်ဝါရာန်ဏံ ဟွံလုပ်သၞောဝ်ပုဟ်ဂှ် ဟီုလဝ်ရ။
ဆ္ဂး နကဵုပူတေန် ယဝ်အာဒး ဍုၚ်မထ္ပက်လဝ်စၟတ်တဲ တၚ်တုပ်စိုတ် ICC ဂှ် မွဲမွဲဍုၚ်မ္ဂး အန္တရာယ်ဒးဒုၚ်ရပ်မာန်ဂှ်လေဝ် ဒးတော်ဆလဝ်ရ။
ပ္ဍဲသၞာံ ၂၀၂၃ တေံ ပူတေန် အာတိုန်စိုပ်လဝ်ကောံဓရီု BRICS ပ္ဍဲဍုၚ်အာဖရိကသၠုၚ်ကျာ မွဲဍုၚ် မထ္ပက်လဝ်စၟတ်တဲသာ်ဏံဂှ်ရ။
ဍုၚ်မန်ဂိုဝ်လဳယျာ ၜိုန်ဒှ်ဍုၚ် ထ္ပက်လဝ်စၟတ်တဲ ICC ကီုလေဝ် သၞာံတုဲကၠုၚ်တေံဂှ် လးဒကဝ်အရံၚ်ဗ္ကေတ်တုဲ ဒုၚ်လဝ်တၠုၚ်ပူတေန်ရ။
ကောံဓရီု BRICS ကၠောန်ဗဒှ်အာ ပ္ဍဲဍုၚ်ဗရာဇြဳ ပ္ဍဲဂိတုဂျူလာၚ် ၆ ကဵု ၇ ဏံဂှ် ပူတေန် ပါလုပ်တိုန်စိုပ်အာ နူလပှ်ကျာရောၚ် နန်ကရေမ္မလေန် ဟီုရ။
ညံၚ်ဂွံဒှ်အကာဲအရာသောၚ်ၚ်ကၠးကၠး တၞဟ်နသမ္မတပူတေန် ဂွံပါလုပ် ပ္ဍဲကောံဓရီုဏံဂှ် အလဵုအသဳဗရာဇြဳ ရေၚ်တၠုၚ်ကဵုဟွံမာန်ရောၚ် နန်ကရေမ္မလေန် ဟီုကၠုၚ်ရ။
နဒဒှ်ညးစၞးရုယှာဂှ် ဝန်ဇၞော်ကာဍုၚ်သ္အာၚ် သာဂျဳ လက်ဗရတ် အာစိုပ်ဗရာဇြဳဏောၚ်တုဲ သမ္မတကြုက် ယှဳကျေန်ဖျေန်လေဝ် ဟွံတိုန်စိုပ် ကောံဓရီုမကၠောန်အာ ပ္ဍဲဗရာဇြဳဏံဂှ် ဂွံတီကေတ်ရ။
Ref: Reuters